2 Korɛntɛ̀n anmàn-bɔ̀ 4 - Ɛmɛẅi ankà ankrànkràn 2003

Ɛnhɛ́n mɛ̀n nɛ̀ncüì-di ci tɔ̀n léyi yɛ hɛ́n ɛnsî hɔ̀n mɛ̀n nɔn

¹ Ɔwɔ, n'ɛcüɛn-bɔrɛ lɔ mɛ̀n, wá bɔ̀ ɔkɔ̀hɔ̀n ndɔ lɔ antamɛ̀n, kɩ hɩ le kruhú de bɔ̀ dú ɛnvra lɔ fɛn edùyiemɛ̀n nɔn.

² Bɔ́ krɔ eci-hán lɔ fɛn léyi dú ɛbán mɛ̀n mán anvɛvrà mɛ̀n; bɔ́ sɩ́ hán eci ɛfrɛ́n mɛ̀n kɩ bɔ́ sɩ́ crɔn Ɔwɔ mùan-ankà-dɔ̀ lɔ. Tɛ́n, bɔ́ hán ye nyri kpetemɛ̀n annanwɔrɛ ankà, kɩ ɔmu lɔ, bɔ́ srɔ ɛmrɛ̀nci-bɔ̀ anvrɛnvrɛn bɔ́ tán ɔwrɔn totɔtɔ̀n lɔ fɛn, Ɔwɔ zìwú.

³ Tɛ́n, ke dú kɛ Ɛmɛẅi ankà Ankrankran léyi bɔ́ yé nɔn, kɛ cá ɛnzàn mɛ̀n ci hô, nɛ́n dù nɛ̀n tán anwrɔn hɔ̀n léyi kɛ zrɛ́n y'edomɛ̀n nɔn tɛn kɩ.

⁴ Yɔ sɩ̀ ẅɛ̀n ankaẅì-bùtan ɔmuhi Anwa-wrɔn léyi dú ɛnhibù ndɔ lɔ wɔ, boyɛ y'ɛnkruemɛ̀n-ẅɛn lɔ anvɛ̀. Ɔwɔ ndɔ lɔ ke sɩ́ tán yɔ ɛkɔrɛ̀levri yɔ cɔ́ ɛyri-kàn léyi Ɛmɛẅi ankà Ankrankran kɛ tán Krisì ci-zrɔ lɔ mɛ̀n, Krisì léyi dú Ɔwɔ mumù picɛ̀ nɔn.

⁵ Annànwɔrɛ mɛ̀n, b'ankà-dɔ́ mɛ̀n lɔ, kè sɩ̀ dù bɔ́ dùku de bɔ́ dɔ́ bɔ́ edomɛ̀n ankà, tɛ́n Zhezü Krisì léyi dú Ɛẅɛnwrɔn, n'ankà de bɔ́ dɔ̀ nɔn; bɔ́ tɛn tɛ́n, bɔ́ dɔ̀ le, bɔ̀ dú ny'eci-bɩ̀tan-bɔ̀ Zhezü kruhú.

⁶ Ɛnbiɛhɛ́n vra lɔ, Ɔwɔ dɔ̀ le: “Ke ji le ɛyri-kàn kɛ̀ gbrɛ́n ɛyri yɔwɔ wanzi!” Ɔmu zri lɔ, nɛ́n de nɛ̀n vru nɛ̀n hán ɛyri-kàn kɛ̀ gbrɛ́n bɔ́ ɛnbɔrɛ hɔ̀n lɔ mɛ̀n, ô kɛ̀ tán bɔ̀ eci-nyrì yri-kàn léyi dú n'Ɔwɔ ci-zrɔ lɔ mɛ̀n kɛ gbrɛ́n Krisì zìwú nɔn.

⁷ Tɛ́n, Ɛnhɛ́n mɛ̀n nɛ̀ncüì-di-ci ndɔ lɔ dú bɔ̀ ɛmɛ̀n, kɩ bɔ̀ ẅɛn nɛ̀n anta dú ɛnsî hɔ̀n mɛ̀n, ô ye nyri kpetemɛ̀n le ɛkɔrɛ̀-srɔn vri ndɔ lɔ, dú Ɔwɔ yri và, tɛ́n kè sɩ̀ dù bɔ́ yri.

⁸ Ɛgbànkàn mɛ̀ntɛ mɛ̀ntɛ kɛ mian bɔ̀, tɛ́n ke sɩ́ boyɛ bɔ̀ wá; bɔ́ dú ɛnkrɛ̀ta kuemɛ̀n, tɛ́n esɛ́ dú bɔ̀ ɛmɛ̀n;

⁹ bɔ́ dú owú-gbànkàn mɛ̀n, tɛ́n ye sɩ̀ teze bɔ̀a; yɛ kɔ́n bɔ̀ cüe ɛnhibɩ́, tɛ́n ye sɩ̀ zrɛ́n bɔ̀.

¹⁰ Ɛnvra lɔ fɛn Zhezü wù lɔ dú bɔ̀ edomɛ̀n, ô n'ɛwúvà lɔ mán kè dú bɔ́ edùwrú lɔ mɛ̀n.

¹¹ Bɔ́ dú ɛwúvà-kɔrɛ̀ mɛ̀n, kɩ bɔ́ dú ɛnvra lɔ fɛn owù tɛ̀sɛ̀n Zhezü kruhú, ô n'ɛwúvà mán kè dú b'owú dùwrú lɔ mɛ̀n.

¹² Ɔmu lɔ de owù dú bɔ̀ edomɛ̀n, ô ɛwúvà kè dú nyɛ̀n ɛmɛ̀n.

¹³ Owrú Prɔnprɔn kɛ dɔ̀ le: “Mɛ́n bùtan ankaẅì hɩ le kruhú de mɛ̀n dɔ́ ankà nɔn.” Bɔ́ mán Ɛnhɛ́n mɛ̀n ankaẅì-bùtan zri lɔ mɛ̀n, bɔ́ bùtan ankàẅì kɩ hɩ le kruhú de bɔ́ dɔ́ ankà nɔn.

¹⁴ Annanwɔrɛ mɛ̀n lɔ, bɔ̀ nyri ɔmu le Ɔwɔ léyi bɩ́ Ɛẅɛnwrɔn Zhezü owú-bɔ̀ mɛ̀n sɩ́ ɔkɔrɛ-bɔ̀ mɛ̀n nɔn, ke le sɩ́ bɔ́ mán Zhezü mɛhi ɔkɔrɛ-bɔ̀ mɛ̀n kɩ nɛ lɛ hán bɔ̀ bɔ́ lɛ srɔ bɔ́ mán nyɛ́n mɛhi n'ezìwú.

¹⁵ Bɔ́ ɛgbànkàn lɔ fɛn, dú nyɛ tɛn; ɔmu lɔ de Ɔwɔ boafɔ̀n kɛ cɔ́ anwrɔn bobrebe, kɩ kɛ hán tán enyri-kùɛn-tán Wɔ-sɛ̀n léyi yɛ hán Ɔwɔ-ci-zrɔ mɛ̀n nɔn, kɛ sán cüɛn.

Ye dú ankaẅì-bùtan wúvà mɛ̀n

¹⁶ Hɩ le kruhú de bɔ̀ dú edùyiemɛ̀n ɛnvra lɔ fɛn nɔn. Tɛ́n ke dú kɛ b'ɔwrɔnẅì dùwrú ke dú ɛjrɛ́ mɛ̀n janjan hô, bɔ́ ɛnhɛ́n dùwrú kɛ sán srɔ owrù ɛnbì ɛnbì.

¹⁷ Obòtò léyi bɔ́ cɔ́ ɛnvra ndɔ lɔ mɛ̀n nɔn, wole vrán eci-zrɔ bobrebe léyi ke sɩ́ trɔa, ɔmuhi nɛ̀n ẅɛn vɔ̀nshɛ́ vri, kɩ nɛ sán hán bɔ̀ nɔn.

¹⁸ Ɔmuhi bɔ́ sɩ́ hɛ́n bɔ́ esùvá-wá eci léyi bɔ́ kàn nɔn wú, tɛ́n esùvá-wá ke dú bɔ̀ eci léyi bɔ́ sɩ́ kán nɔn wú. Eci léyi yɛ kàn nɔn, ke sɩ́ mɔɛnhán, tɛ́n, hɩ léyi ye sɩ́ kán nɔn, dú ɛnvra lɔ fɛn.