2 Korɛntɛ̀n anmàn-bɔ̀ 2 - Ɛmɛẅi ankà ankrànkràn 2003

¹ Ɔmu lɔ de, mɛ̀n wá, mɛ́n bɩ́ vru ɛmɛẅì mɛ́n vá ny'edúyri, ô mɛ́n vru mɛ́n wá nyɛ̀n obòto mɛ̀n.

² Ɔmuhi ke dú kɛ mɛ wá nyɛ̀n obòto mɛ̀n hô, antɔn de kɛ lɛ tán mɛ̀n pɔpüɛ̀-brà nɛ́n? Ɔwrɔn léyi mɛ lɛ wá obòto mɛ̀n nɔn nɛ lɛ tán mɛ̀n pɔpüɛ̀-brà tɛ̀a?

³ Nyàn eci le kruhú léyi mɛ̀n merɛ́n owrú hán ɔmu le mɛ̀n hán nɔn hɔ́: mɛ́n sɩ́ ji le mɛ vá ny'edúyri hô, anwrɔn dùku léyi kɛ lɛ tán mɛ̀n pɔpüɛ̀-brà nɔn, kɛ̀ hán mɛ̀n, mɛ̀n dú obòto mɛ̀n. Mɛ̀n nyri annanwɔrɛ mɛ̀n le: ɛnvra léyi me dú pɔ̀püɛ̀-bra mɛ̀n nɔn, nyɛ́n mán nyɛ́n dú ɛnbɔrɛbruemɛ̀n nyɛ lɛ fɛn.

⁴ Hɛ̀ɛ̀, mɛ̀n merɛ́n nyɛ̀n owrú ankà-tro vriemɛ̀n, ɛnbɔrɛ-zì mán anvɛ-shi bobrebe cüemɛ̀n, kè sɩ̀ dù hɩ le m'á wá nyɛ̀n obòto mɛ̀n, tɛ́n, nyɛ́n nyri ɔmu le mɛ̀n ẅɛn ny'ɛcüɛ̀n nɔn.

Ye bɩ́ ɛgbàn ye ce ɛgbàn-hán-wrɔn

⁵ Ke dú kɛ ɔwrɔn tɔ̀n kɛ wá obòtò ke sɩ́, kè sɩ̀ dù m'ɛkruhú de nɛ̀n wà obòtò lɔ nɔn, tɛ́n nyɛ lɛ fɛn ny'ɛkruhú, kɩ bɔ́ bɩ́ dɔ́ ke fɛ ɛwú, tɛ́n ny'ɛmɛ̀n lɔ anwrɔn cá kruhú.

⁶ Zro tán le ny'ɛmɛ̀n lɔ, ɔwrɔn ndɔ lɔ bobrebe kɛ bó nɛ̀n nwù,

⁷ hɩ le kruhú de ke ji le zɛtɛ̀ lɔ, nyɛ́n bɩ́ ɛgbàn nyɛ́n ce nɛ̀n, nyɛ́n yɩ́ nɛ̀n edù, ô nɛ́n bɩ́ dú obòtò vriemɛ̀n, kɛ hán tán n'esɛ́ lɔ fɛn kɛ hɔ́n ɛzrɛ́n mɛ̀n.

⁸ Hɩ le kruhú, mɛ dɔ́ nyɛ̀n le, nyɛ́n yé nɛ̀n ɛcüɛ̀n léyi nyɛ́n ẅɛn n'ɛwú nɔn.

⁹ Annanwɔrɛ mɛ̀n lɔ, nyàn eci le kruhú léyi mɛ̀n merɛ́n nyɛ̀n owrú nɔn: me ji mɛ̀n wɔɛn nyɛ̀n mɛ̀n nyan, ô mɛ̀n kán ɔmu le ɛnvra lɔ fɛn, nyɛ́n krɔn kpehɛ́n nyɛ́n ẅɛn m'ankà-yé lɔ nyɛ́n hɛ́n nɔn.

¹⁰ Ɛnvra léyi nyɛ́n bɩ́ ɛgbàn nye ce ɔwrɔn tɔ̀n, mɛ̀n mán me bɩ́ ce nɛ̀n. Kɩ ke dú kɛ me bɩ́ ɛgbàn me ce, (andɛ̀n mùan léyi ke ji le mɛ̀n bɩ ce eci tɔ̀n mɛ̀n nɔn) mɛ hán nɛ̀n ny'ɛkruhú, Krisì zìwú,

¹¹ ô bɔ́ bí teze Anwa-wrɔn kɔrɛ̀ kɛ dɛ́ bɔ̀ ɛwúɛ; annanwɔrɛ mɛ̀n lɔ, bɔ̀ nyri n'ankà-tro hɔ̀n lɔ fɛn.

Pɔlɛ̀n ɛnkrɛ̀ta-kù Troasɛ̀n anmàn

¹² Ɛnvra léyi mɛ̀n bru Troasɛ̀n anmàn, ô mɛ̀n dɔ́ Krisì Mɛẅi ankà Ankrankran lɔ nɔn, mɛ̀n kán ɔmu le Ɛẅɛnwrɔn tán mɛ̀n ɛnvra anvrɛnvrɛn, ô mɛ̀n hán hɩ ci lɔ.

¹³ Tɛ́n mɛ̀n dú ɛnkrɛ̀ta-kù vriemɛ̀n ɔmuhi, mɛ̀n sɩ̀ cɔ̀ bɔ́ muan-ẅì Titɛ̀n nɔn. Hɩ le kruhú de mɛ̀n tán Troasɛ̀n anmàn-bɔ̀ ɛyri-hɔ́n-mùan-bɔ̀ kɩ mɛ̀n hɔ́n Masedùhanɛ̀n kpɔsɔ wú.

Ɛkɔ̀nkà Zhezü Krisì mɛ̀n

¹⁴ Tɛ́n ɛmrɛ́n kè dú Ɔwɔ tɛn, Ɔmuhi ɛnvra lɔ fɛn ne sɩ́ bɔ̀ Krisì kɔ̀nkà fɛcüè lɔ mɛ̀n. Ne ci bɔ́ ɛmɛ̀n nɛ hán ye nyri Krisì ɛyri lɔ fɛn, hán ɛnshi-bánbán léyi nɛ́n ndɔ̀ ke bɩ́ ɛyri lɔ fɛn nɔn.

¹⁵ Annanwɔrɛ mɛ̀n lɔ bɔ́ dù bɔ̀ hán ɛnshi-bán tɔ̀n léyi ẅɛn ndɔ̀ anvrɛnvrɛn, hɩ Krisì ke ce Ɔwɔ nɔn; bɔ́ dú nɛ̀n bɔ̀ tán anwrɔn hɔ̀n léyi dú ɛnkrukɔrɛ̀ levri wú mán yɔ hɔ̀n léyi yɔ dú ɛzrɛ́n mɛ̀n nɔn.

¹⁶ Anwrɔn janbɔ̀ tɛn, ndɔ̀ lɔ dú owù dɔ̀ léyi ke sɩ́ owúemɛ̀n nɔn; kɩ anwrɔn ndɔ hɔ̀n tɛn, ndɔ̀ lɔ dú ɛwúvà dɔ̀ léyi ke sɩ́ ɔkɔrɛ mɛ̀n nɔn. Antɔn de krɔn pkehɛ́n kɛ lɛ hán ɔkɔ̀hɔ̀n ɔmu lɔ nɛ́n?

¹⁷ Bɔ̀ sɩ̀ dù kɛ̀ hàn anwrɔn bobrebe ndɔ hɔ̀n léyi ke bɩ́ Ɔwɔ mùan-ankà-dɔ̀ kɛ zhrɛ́ anhàn; tɛ́n, ɔmuhi dú Ɔwɔ de wá bɔ̀ ɔkɔ̀hɔ̀n bɔ̀ và nɔn, bɔ́ dɔ́ ankà annanwɔrɛ mɛ̀n n'ezìwú, bɔ́ mán Krisì mɛhi b'ɔbɔ̀sɔ̀ lɔ mɛ̀n.