2 Korɛntɛ̀n anmàn-bɔ̀ 12 - Ɛmɛẅi ankà ankrànkràn 2003

Ɔwɔ-mɛ̀n-yri-kàn mán n'eci-yé léyi yɛ tán Pɔlɛ̀n nɔn

¹ Ke ji le mɛ̀n gbú ɔmùan, kɩ mɛ̀n nyri ɔmu le ndɔ lɔ kè sɩ̀ zrɔ̀a. Tɛ́n mɛ lɛ dɔ́ zɛtɛ̀ lɔ Ɔwɔ-mɛ̀n-yri-kàn mán ankà-bán-ankà-yé léyi mɛ̀n cɔ́ Ɔwɔ yri nɔn, n'ankà.

² Mɛ̀n nyri Krisì-sɛ̀nkɛn-wrɔn tɔ̀n léyi ɛnnànwàn kru ɛvà-anzɔ̀, de ye sɩ́ nɛ̀n ɛwú hàn kɩ cɔ́ anhobɩ́. (Mɛ̀n sɩ̀ nyrìɛn ke dú kɛ annanwɔrɛ mɛ̀n lɔ, ye sɩ́ nɛ̀n ɛwú kale nɛ̀n cɔ́ Ɔwɔ-mɛ̀n-yri-kàn tɔ̀n, Ɔwɔ zri kɩ nyrì.)

^3-4 Hɛ̀ɛ̀, mɛ̀n nyrì ɔmu le ɔwrɔn ndɔ lɔ ye sɩ́ nɛ̀n ɛwú hàn kɩ cɔ́ anhobɩ́ (anhyrɛmɛ̀n tɛn, mɛ̀n sɩ̀ nyrìɛn ke dú kɛ annanwɔrɛ mɛ̀n lɔ ye sɩ́ nɛ̀n ɛwú kale nɛ̀n cɔ́ Ɔwɔ-mɛ̀n-yri-kàn tɔ̀n, Ɔwɔ zri kɩ nyrì), kɩ nanvrɛn lɔ nɛ̀n yá ankà-dɔ̀ hɔ̀n léyi ye sɩ̀ nyri n'ɛmɛ̀n nɔn, hɩ kè sɩ̀ wá tán ɔwrɔnẅì zriɛmɛ́n k'á dɔ̀ nɔn.

⁵ Ɔwrɔn ndɔ lɔ me le gbú n'ɔmùan; tɛ́n, mɛ tɛn, me le gbú m'ɛjɛ́ mùan kɩ.

⁶ Ke dú kɛ me ji mɛ̀n gbú ɔmùan hô, mɛ́n sɩ̀ dú nmù-hán-wrɔn, ɔmuhi mɛ lɛ dɔ́ ankà annanwɔrɛ nɔn. Tɛ́n mɛ́n sɩ́ ji mɛ̀n gbù ɔmùan, ɔmuhi mɛ́n sɩ́ ji yɛ cɔ́ m'edomɛ̀n ankà léyi wí eci léyi yɛ kán mɛ̀n mɛ hán mán ankà léyi yɛ yá mɛ dɔ̀ nɔn ɛwú.

⁷ Tɛ́n, ô tùtre ke bɩ́ yí mɛ̀n edomɛ̀n ankà-bán-ankà-yé léyi mɛ́n cɔ̀ nɔn wú, yɛ tán mɛ̀n ɛgbànkàn vri m'edùwrú-ẅia mɛ̀n hán le Anwa-wrɔn mɛẅi ankà-dɔ́-wrɔn tɔ̀n léyi yɛ wá tán ke gorɛ mɛ̀n, ô ke bɩ́ tán mɛ̀n tùtre ci-hán.

⁸ Andɛ̀n anhɔ̀n, mɛ̀n sɛ́n Ɛẅɛnwrɔn kɛ ẅɛn mɛ̀n ɛgbànkàn ndɔ lɔ mɛ̀n kɛ̀ sɔhɔ́.

⁹ Nɛ̀n mrɛ́n mɛ̀n ɔmùan le: “Mɛ́n boafɔ̀n krɔn mɛ́n. M'ɛkɔrɛ̀-srɔn ke yé n'edomɛ̀n ɛnvra léyi e dú ɛjɛ mɛ̀n nɔn.” Mɛ cüɛn ɔmu le mɛ̀n gbú ɔmùan m'ɛjɛ̀ hɔ̀n lɔ wú, ô Krisì kɔrɛ̀-srɔn lɔ, n'esùva-wá kɛ vá mɛ̀n ɛwú.

¹⁰ Hɩ le kruhú de mɛ brá pɔpüɛ̀ tán m'ɛjɛ̀, ɔwɔra, ɛgbànkàn-jüedì, owú-gbànkàn mán ankà-tro hɔ̀n léyi mɛ srɔ́n ɛsù Krisì kruhú; ɔmuhi ɛnvra léyi me dú ɛjɛ mɛ̀n nɔn, hɩ lɔ de zɛtɛn mɛ ẅɛn ecüì nɔn.

Ɛnkrɛ̀ta-kù ankà-tro léyi Pɔlɛ̀n ẅɛn Korɛntɛ̀n anmàn-bɔ̀ wú nɔn

¹¹ Mɛ dɔ́ ankà kɛ hán nmù-wrɔn hɔ́, tɛ́n nyɛ́n de nyɛ́n wá tán mɛ̀n nɔn. Nyɛ́n de ke ji le nyɛ́n dɔ́ ankà nyɛ́n tán mɛ̀n. Ɔmuhi ke dú kɛ mɛ̀n sɩ̀ dù eci zriɛmɛ́n hô, nyɛ́n nyri ɔmu le mɛ̀n sɩ̀ dù ɛnhi kɛ̀ vràn ny'ɔkɔ̀hɔ̀n-wá-bɔ̀ léyi nye tro le sevri nɔn.

¹² Eci-hán hɔ̀n léyi ke yé le mɛ̀n dú ɔkɔ̀hɔ̀n-wá-wrɔn nɔn, hán tán ny'ɛmɛ̀n nyɛ́n kàn, ɛnbɔrɛ-ẅɛ̀n-hɛ́n anvrɛnvrɛn mɛ̀n: eci-hán ndɔ hɔ̀n lɔ dú anvɛmɛ̀n-frɛ́n-ci mán eci-woroan-ci mɛ̀ntɛ mɛ̀ntɛ.

¹³ Ecitan mɛ̀n de ye sɩ̀ nyrì wá nyɛ̀n esùva kɛ̀ hàn Ɔwɔ-fɛcüè ndɔ hɔ̀n lɔ, ke dú kɛ, kè sɩ̀ dù mɛ̀n léyi mɛ̀n sɩ̀ srɔ ɛnlòwrú mɛ̀n tán nyɛ̀n nɛ́n? Nyɛ́n bɩ́ eci-hán ndɔ léyi kè sɩ̀ nyrɔ̀n hàn nɔn nyɛ́n ce mɛ̀n!

¹⁴ Nyàn mɛ̀n, mɛ̀n krɔn kpehɛ́n mɛ vá ny'edúyri andɛ̀n anhɔnmɛ̀n, kɩ mɛ́n sɩ̀ srɔ ɛnlòwrú mɛ̀n tán nyɛ̀n. Nyɛ́n de me ji nyɛ̀n nɔn, kɩ kè sɩ̀ dù ny'ɔkùa lɔ. Annanwɔrɛ mɛ̀n lɔ, kè sɩ̀ dù ɛẅì hɔ̀n de ke ji ɔkùa kɛ tán yɔ zi hɔ̀n nɔn, tɛ́n ɛẅì-nɛ́n-zi hɔ̀n de ke ji ɔkùa tán y'ɛẅì hɔ̀n nɔn.

¹⁵ Mɛ tɛn tɛ́n, me le dú ɛnbɔrɛ-bruemɛ̀n ke dú kɛ mɛ jrɛ́ eci lɔ fɛn léyi mɛ́n ẅɛ̀n mán mɛ́n mumù mɛhi ny'ɛkruhú. Nyɛ lɛ cüɛn mɛ̀n ɛẅiɛ tɛ̀kɩ, ke dú kɛ mɛ ẅɛn ny'ɛcüɛ̀n vri ɔmu lɔa?

¹⁶ Nye le nyrì le, mɛ̀n sɩ̀ dù ɛnlòwrú mɛ̀n tán nyɛ̀n. Tɛ́n yɛ lɛ dɔ̀ le, ɛyɔ̀n-wrɔn ɔmu lɔ dú mɛ̀n nɔn, mɛ̀n ẅɛn nyɛ̀n antanwrɔn mɛ̀n ɛfrɛ́n mɛ̀n.

¹⁷ Kɛ̂ anwrɔn hɔ̀n léyi mɛ̀n yüre nyɛ̀n nɔn, mɛ̀n ci ɔtɔ̀n mɛ̀n, mɛ̀n frɛ́n nyɛ̀n hàn?

¹⁸ Mɛ̀n sɛ́n Titɛ̀n kɛ̀ vá ny'edúyri kɩ mɛ̀n wá nɛ́n mán ɔwrɔn-nɛ́n-muan-ẅì léyi nyɛ́n nyrì nɔn ɔkɔ̀hɔ̀n. Titɛ̀n frɛ́n nyɛ̀n hàn? Mɛ̀n mán nɛ́n mɛhi bɔ̀ sɩ̀ ẅɛ̀n ankà-tro zri hɔ̀n lɔ, ɛnlevri zri wú sùnan mɛ̀n hàn?

¹⁹ Kale nyɛ́n tro ɛnvra sheshemɛ̀n le, bɔ́ ji ɛyri bɔ̀ cɔ́ ankà-zrɔ ny'ezìwuɛ? Hɔ̂! Bɔ́ mán Krisì mɛhi bɔ́ dɔ́ ankà, ɔbɔ̀sɔ mɛ̀n Ɔwɔ zìwú, kɩ bɔ̀ dɔ́ nyɛ̀n ankà ndɔ lɔ fɛn, anwrɔn-nɛ́n-muan-ẅì hɔ̀n, ô nyɛ́n nán esù nyɛ́n hɔ́n ezì ankaẅì-bùtan-ẅɛn mɛ̀n.

²⁰ Mɛ ẅɛn anjansù le, ɛnvra léyi me le bru ny'edúyri nɔn, mɛ́n sɩ̀ cɔ́ nyɛ̀n kɛ hán ɔmu le me ji nɔn, kɩ nyɛ́n mán nyɛ́n sɩ̀ cɔ́ mɛ̀n kɛ hán ɔmu le nye ji nɔn. Mɛ ẅɛn ɛnjansù le ɛdrɛ̀ hɔ̀n mán ecüì-hi-kɔ̀n, ɛmɛ̀nhyì mán annankran hɔ̀n, ɔwora hɔ̀n mán ɛyɔ̀n ankà-dɔ̀ hɔ̀n, tùtre mán ɛgbàzhrà ke le dú nyɛ̀n ɛmɛ̀n.

²¹ Mɛ ẅɛn ɛnjansù le m'ɛyri hɔ̀n lɔ mɛ̀n, m'Ɔwɔ kɛ lɛ trɔ mɛ̀n ezì ny'ezìwú, kɩ me le wú eyú mɛ̀n ku bobrebe hɔ̀n léyi dú ɛgbàn hán mɛ̀n nɔn ɛwú hán ɛnbiɛhɛ́n vra lɔ, kɩ yɔ sɩ̀ crɛ̀ ezì sɔhɔ́ ɛnbrá-ci-hán mɛ̀n, ɛwúvà gbàngbàn-ẅɛn mɛ̀n, mán ɛnkru-fé ci hɔ̀n léyi yɔ hán nɔn mɛ̀n.