Biblia Todo Logo
Bìoball air-loidhne

- Sanasan -

2 Korɛntɛ̀n anmàn-bɔ̀ 11 - Ɛmɛẅi ankà ankrànkràn 2003


Pɔlɛ̀n mán ɛyɔ̀n kɔ̀hɔ̀n-wá-bɔ̀

1 Ô! Me ji le nyɛ́n shrì nyɛ́n bɩ́ mɛ́n nmù ci-hán lɔ jan! Hɛ̀ɛ̀, zrɔ, nyɛ́n ci mɛ̀n ɛmɛẅi!

2 Mɛ kɔ́n ecüì-hi ny'ɛwú ecüì-hi-kɔ̀n tɔ̀n léyi dú Ɔwɔ yri nvà nɔn: mɛ̀n wá nyɛ̀n eyiri-mùan ɛncɔnwrɔn zri yri, Krisì, kɩ me ji mɛ̀n bɩ́ nyɛ̀n mɛ̀n yé nɛ̀n kɛ hán ɛnnyrɔnẅì tɔ̀n léyi nfì, kè sɩ̀ nyrì ɛncɔnwrɔn ankà nɔn.

3 Tɛ́n, hán ɔmu le Ɛvɛ̀n teze n'edomɛ̀n bru ɛnlɛbrì tanwrɔn lɔ mɛ̀n nɔn, mɛ ẅɛn ɛnjansù le, ny'ɛnkruemɛ̀n-ẅɛ̀n ke bɩ́ jrɛ́a, ô ke sɩ́ nyɛ̀n esù she Krisì cüɛ̀n-mùan-zri-dì fifi lɔ tɛ̀sɛ̀n.

4 Annanwɔrɛ mɛ̀n lɔ, nyɛ cüɛn ɔmu le ɔwrɔn tɔ̀n kɛ̀ và kɛ̀ dɔ́ nyɛ̀n Krisì léyi kè sɩ̀ cà ndɔ léyi bɔ̀ dɔ́ nyɛ̀n n'ankà nɔn; nyɛ́n vru nyɛ́n krɔn kpehɛ́n ô nyɛ́n shri ɛnhɛ́n tɔ̀n mán ɛmɛẅi ankà léyi kè sɩ̀ cà Ɛnhɛ́n Prɔnprɔn mán Ɛmɛẅi ankà Ankrankran léyi nyɛ́n cɔ́ b'antamɛ̀n nɔn.

5 Mɛ́n sɩ́ tro le mɛ̀n dú ɛnhi mɛ̀n vrán ny'ɔkɔ̀hɔ̀n-wá-bɔ̀ léyi nye tro le sevri nɔn!

6 Ke le dú annanwɔrɛ le, mɛ̀n dú ankà-nyrì-dɔ́-wrɔn anvrɛnvrɛn, tɛ́n kè sɩ̀ dù eci nyriemɛ̀n: bɔ̀ yé nyɛ̀n ndɔ lɔ kpetehe mɛ̀n, ɛnvra lɔ fɛn mán eci lɔ fɛn mɛ̀n.

7 Ɛnvra léyi mɛ̀n dɔ́ nyɛ̀n Ɔwɔ Mɛẅi ankà Ankrankran lɔ nɔn, mɛ̀n hán nɛ̀n ankora; mɛ̀n sɩ́ m'edomɛ̀n ɛnhi, ô mɛ̀n sɩ́ nyɛ̀n ɛwú. Hɩ le mɛ̀n hán ɔmu lɔ nɔn, m'ankà kè sɩ̀ zrɔ̀a?

8 Mɛ́n shrì mɛ̀n tán Ɔwɔ-fɛcüè nyàntɛn kè dí mɛ̀n ɔwɔ̀ɛn, ô yɔ dú m'esùva-wá mɛ̀n, ô mɛ̀n dú ny'eci-bɩ̀tan-wrɔn.

9 Kɩ ɛnvra léyi mɛ̀n dú ny'edúyri nɔn, mɛ̀n sɩ̀ dù ɔwrɔn zriɛmɛ́n kɔrɛ̀-wá mɛ̀n ɛnvra léyi eci kɛ ẅɛn mɛ̀n ɛmìan nɔn, ɔmuhi anwrɔn-nɛ́n-muan-ẅì hɔ̀n léyi dú Maseduhanɛ̀n kpɔsɔ wú và nɔn, vá sɩ́ mɛ̀n ɛci hɔ̀n lɔ fɛn léyi me ji nɔn. Mɛ̀n ẅɛn m'edomɛ̀n mɛ̀n hɛ́n, ô mɛ́n bɩ́ srɔ ɛnlowrú mɛ́n tán nyɛ̀n eci totɔtɔ̀n mɛ̀n, kɩ me le dú esùva ndɔ lɔ n'ɛwá mɛ̀n.

10 Krisì annanwɔrɛ ankà léyi dú mɛ̀n ɛmɛ̀n nɔn, mɛ dɔ̀ le: ɔwrɔn zriɛmɛ́n ke sɩ́ mrɛ́n m'ɔmùan-gbù lɔ kɛ̀ sɔhɔ́ rɔ́, Akàhi kpɔsɔ ndɔ lɔ fɛn wú.

11 Cɛci kruhú kɛ mɛ̀n dɔ́ ankà ndɔ lɔa? Ke le dù tán le mɛ́n sɩ́ cüɛ̀n nyɛ̀n hàn? Ɔwɔ nyri anvrɛnvrɛn le mɛ cüɛn nyɛ̀n!

12 Me le dú eci lɔ n'ɛhán mɛ̀n kɛ lɛ hán zɛtɛ̀ lɔ hɔ́, ô anwrɔn hɔ̀n léyi ke ji kè gbú ɔmùan kɛ̀ dɔ̀ le yɔ mɛhi bɔ̀ krɔn nɔn, mɛ̀n mrɛ́n yɔ ankà-tro ndɔ lɔ ɛnkruemɛ̀n mɛ̀n sɔhɔ́.

13 Anwrɔn ɔmu hɔ̀n lɔ yɔ dú ɛyɔ̀n kɔ̀hɔ̀n-wá-bɔ̀, ɛfrɛ́n-bɔ̀ léyi kɛ srɔ y'edomɛ̀n Krisì kɔ̀hɔ̀n-wá-bɔ̀ nɔn.

14 Ɛnu lɔ anvɛmɛ̀n-frɛ́n-ci zriɛmɛ́n bàdà nɛ̀n ɛmɛ̀n, ɔmuhi Anwa-wrɔn dùku mán kɛ srɔ n'edòmɛ̀n ɛyri-kán Wɔ-kùyüre-wrɔn nɔn.

15 Kè sɩ̀ dù anvɛmɛ̀n-frɛ́n-ci, ke dú kɛ n'eci-bɩtan-bɔ̀ hɔ̀n mán, kɛ srɔ y'edòmɛ̀n ɛnyrɔnnan Wɔ ci-bɩtan-bɔ̀. Tɛ́n yɔ lɛ cɔ́ ɔtrɔ léyi vɛ́n y'eci-hán hɔ̀n lɔ nɔn.


Ɛgbànkàn hɔ̀n léyi Pɔlɛ̀n cɔ́ ɔkɔ̀hɔ̀n-wá-kɔ̀hɔ̀n lɔ mɛ̀n nɔn

16 Mɛ sán dɔ̀: ɔwrɔn zriɛmɛ́n ke bɩ́ bɩ́ mɛ̀n kɛ hán nmù-wrɔn. Kɩ zɛtɛn, ke dú kɛ ye tro ndɔ lɔ hô, nyɛ́n shrì nyɛ́n tán le mɛ̀n dú nmù-wrɔn, ô mɛ̀n mán mɛ̀n gbú ɔmùan ẅiɛ jan.

17 Annanwɔrɛ mɛ̀n lɔ, ke dú kɛ mɛ hán ɔmùan-gbú kɔ̀hɔ̀n hô, mɛ́n sɩ́ dɔ́ ankà kɛ hán ɔmu le Ɛẅɛnwrɔn ke ji nɔn, tɛ́n kɛ hán ɔmu le mɛ̀n dú nmù-wrɔn hɔ́.

18 Ɔmuhi bobrebe ndɔ hɔ̀n ke gbú ɔmùan anwrɔnẅì ci-hán wú nɔn, zɛtɛn, mɛ̀n mán me le gbú ɔmùan.

19 Nyɛ́n léyi nyɛ́n dú ankà-nyri-bɔ̀ nɔn, nye ci nmù-hán-bɔ̀ ɛmɛẅi ny'ɛnbɔrɛ anvrɛnvrɛn mɛ̀n!

20 Nye shrì nyɛ tán yɛ hán nyɛ̀n anwɔ̀n-bɔ̀ ci, yɛ frɛ́n nyɛ̀n, ye bɩ́ nyɛ̀n ɛci edomɛ̀n yɛ sɔhɔ́, yɛ nyan nyɛ̀n ɛwú, yɛ cüran nyɛ̀n ansa anvɛmɛ̀n.

21 Anvɛvrà kɛ ẅɛn mɛ̀n n'ɛdɔ́ mɛ̀n: Bɔ̀ ẅɛn ɛjɛ̀ sevri ankà ndɔ lɔ mɛ̀n! Tɛ́n, ɛyri léyi anwrɔn ndɔ hɔ̀n kɛ ẅɛn ɔmùan-gbú kɔrɛ̀-levri nɔn (mɛ dɔ́ ankà kɛ hán le nmù-wrɔn hɔ́) mɛ̀n mán mɛ̀n ẅɛn yi kɔrɛ̀-levri lɔ.

22 Yɔ dú Ebre-bɔ̀a? Mɛ̀n mán. Izraɛlɛ̀n-bɔ̀a? Mɛ̀n mán. Abrahamɛ̀n mɛẅi-bɔ̀a? Mɛ̀n mán.

23 Yɔ dú Krisì ci-bɩ̀tan-bɔ̀a? Zɛtɛn, mɛ lɛ dɔ́ ankà kɛ lɛ hán tán le ɛnkruemɛ̀n zrɛ́n mɛ̀n kokroho: mɛ̀n dú nɛ̀n mɛ̀n vrán yɔ. Mɛ̀n di ejüe vrán yɔ, mɛ̀n hɔ́n anwɔn-mɛ̀n-wá-wɔn mɛ̀n ɛburiburi, ye gorɛ mɛ̀n bobrebe vrán yɔ, kɩ mɛ̀n dú owú-gbànkán mɛ̀n frɛfrɛ.

24 Andɛ̀n ɛnrì, Zhüifɛ̀n-bɔ̀ hán yɛ cüran mɛ̀n ɛngbele mùan ɛẅia-ɛvà-ɔmɔrɔ̀,

25 andɛ̀n anhɔ̀n, Rɔmɛ̀n anmàn-bɔ̀ hán ye gorɛ mɛ̀n ɛngbele mɛ̀n, kɩ ɛdɛ̀n zri yɔ wri mɛ̀n eci edù ɛbù mɛ̀n; andɛ̀n anhɔ̀n ecüe kɔ́n mɛ̀n, kɩ ɛdɛ̀n zri mɛ̀n yɛ́ ɛnnyran mán ɛcɛ̀n ɛnshiemɛ̀n.

26 M'ɛyri hɔ̀n bobrebe mɛ̀n lɔ, mɛ̀n srɔ́n ɛgbànkàn ɛsù; yɔ hɔ̀n léyi dú ɛnshi léyi ke yɩ̀ kɛ gbɛ́ nɔn mɛ̀n, mán ɛci-gbangbàn-hán-bɔ̀ tamɛ̀n, ɛgbànkàn hɔ̀n léyi nmàn-ẅì hɔ̀n Zhüifɛ̀n-bɔ̀ mán yɔ léyi yɔ sɩ̀ dù Zhüifɛ̀n-bɔ̀ kɛ hán mɛ̀n mɛ kàn, mɛ̀n dú ɛgbànkán mɛ̀n anmàn mán ɛyri-tra mɛ̀n, mɛ̀n dú ɛgbànkán mɛ̀n ecüe wú mán anwrɔn-nén-muan-ẅì hɔ̀n ɛyɔ̀n-bɔ̀ granmɛ̀n.

27 Mɛ̀n srɔ́n ejüedì-kɔ̀hɔ̀n mán ɔwɔ̀ɛn-nyan shishi ɛsù; ɛnvra ndɔ hɔ̀n mɛ́n sɩ́ cɔ́ ɛndà-dá-yri; ɛci-zî mùan-wù mán ɛnshi-mùan-wù ẅɛn mɛ̀n; me bɩ́ kishe frɛfrɛ kèkrèmɛ̀n; mɛ̀n kán ɛgbàn ɔwɔ̀rɔ̀ mɛ̀n kɩ edòmɛ̀n-ẅɛn-ci bàda mɛ̀n.

28 Kɩ hɩ le wɔrɔ dù nɔn, mɛ́n sɩ́ dɔ́ n'ankà, m'ɛnbì lɔ fɛn ci-hán mán ndù: ankà-tro léyi mɛ ẅɛn Ɔwɔ-fɛcüè-bɔ̀ lɔ fɛn wú nɔn.

29 Ke dú kɛ ɔwrɔn tɔ̀n njɛ̀, mɛ̀n mán me dú ɛjɛ́ mɛ̀n; ke dú kɛ ɔwrɔn tɔ̀n kɛ zrɛ́n ankaẅì-bùtan-ẅɛn mɛ̀n, me dú ɛgbànkàn vriemɛ́n.

30 Ke dú kɛ ke ji le mɛ̀n gbú ɔmùan, me le gbú ɔmùan m'ɛjɛ̀ lɔ wú.

31 Ɔwɔ, Ɛẅɛnwrɔn Zhezü nɛ́n Zi (kè dú ɛmrɛ́n mɛ̀n ɛnvra lɔ fɛn!) nyri ɔmu le mɛ́n sɩ́ ẅɛn ɛyɔ̀n.

32 Ɛnvra léyi mɛ̀n dú Damasɛ̀n anmàn nɔn, govràn léyi dú ɛnnɛ̀ncüì Aretasɛ̀n zìwú wrɔn nɔn, hɛ́n gɔliɛ-bɔ̀ anmàn gbàtà-mùan ô kɛ̀ ẅɛn mɛ̀n.

33 Tɛ́n ɛbù-drɛn sùgbàtà cɛ mɛ̀n, yɛ hán mɛ̀n mɛ́n kàkɛ ɛntrɛ ɛkɛ́ tɔ̀n mɛ̀n, kɩ ɔmu lɔ de mɛ̀n srɛ́ dí ɛnnɛ̀ncüì lɔ anta nɔn.

Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.

Bible Society of Côte d'Ivoire
Lean sinn:



Sanasan