2 Korɛntɛ̀n anmàn-bɔ̀ 1 - Ɛmɛẅi ankà ankrànkràn 2003

Ebinyan

¹ Ebinyan ndɔ lɔ dú Pɔlɛ̀n mán bɔ́ muan-ẅì Timote yri kɛ và, Pɔlɛ̀n léyi Ɔwɔ kɔrɛ̀-levriemɛ̀n srɔ Zhezü Krisì kɔ̀hɔ̀n-wá-wrɔn nɔn. Ɔwɔ-fɛcüè léyi dú Korɛntɛ̀n anmàn mán anwrɔn hɔ̀n léyi dú Ɔwɔ-fɛcüè tɛn Akahi kpɔsɔ mumù lɔ fɛn wú nɔn:

² Ɔwɔ bɔ́ Zi mán Ɛẅɛnwrɔn Zhezü Krisì kɛ̀ tán nyɛ̀n nboafɔ̀n mán anwɔwɔ.

Pɔlɛ̀n kɛ tán Ɔwɔ ɔkùɛn

³ Bɔ̀ mrɛ́n Ɔwɔ, bɔ́ Ɛẅɛnwrɔn Zhezü Krisì nɛ́n Zi, ɔwrɔn nɛ́n Zi léyi di ɛnnɛ̀ncüì ɛzrɔ mɛ̀n nɔn, Ɔwɔ léyi kɛ tán ɛnbɔrɛ-bi-wá eci lɔ fɛn mɛ̀n nɔn!

⁴ Ne bi ɛnbɔrɛ wá bɔ̀, bɔ́ ɛgbànkàn hɔ̀n lɔ mɛ̀n, ô bɔ́ mán bɔ̀ bi ɛnbɔrɛ bɔ̀ wá anwrɔn léyi ke ci ɛgbànkàn bobrebe zìwú, ô bɔ̀ hɔ̀n sɩ́ yɔ ɛnbɔrɛ-bi-wá léyi bɔ̀ cɔ́ n'eyri nɔn.

⁵ Annanwɔrɛ mɛ̀n lɔ, ɔmu zri léyi bɔ̀ dú Krisì gbànkàn lɔ mɛ̀n nɔn, ɔmu zri lɔ mán de bɔ́ cɔ́ ɛnbɔrɛ-bi-wá vri Krisi mɛ̀n nɔn.

⁶ Ke dú kɛ bɔ́ dú ɛgbànkán mɛ̀n hô, ny'ɛnbɔrɛ-bi-wá mán ɛnkrukɔrɛ̀ léyi nyɛ lɛ cɔ̀ nɔn hɩ kruhú; ke dú kɛ bɔ́ cɔ́ ɛnbɔrɛ-bi-wá hô, ɛnbɔrɛ-bi-wá ndɔ léyi nyɛ lɛ cɔ̀ nɔn, kɛ lɛ tán nyɛ̀n ɛgbànkàn dùsɔ́ ɛnbɔrɛ-ẅɛ̀n-hɛ́n mɛ̀n, ɛgbànkàn zri léyi bɔ́ mán bɔ́ kàn nɔn.

⁷ Ɔmu lɔ de bɔ̀ ẅɛn esɛ́ vri ny'ɛwú; ɔmuhi, bɔ́ nyrì le, hán ɔmu le nyɛ́n dú bɔ́ ɛgbànkàn hɔ̀n lɔ mɛ̀n nɔn, nyɛ́n mán nyɛ́n dú ɛnbɔrɛ-bi-wá léyi bɔ́ cɔ̀ nɔn mɛ̀n.

⁸ Anwrɔn-nɛ́n-muan-ẅì hɔ̀n annanwɔrɛ mɛ̀n lɔ, bɔ́ ji le nyɛ́n nyri ɛgbànkàn léyi bɔ̀ cɔ́ Azi kpɔsɔ wú nɔn: ɛgbànkàn lɔ srɔn ká bɔ̀, bɔ́ sɩ́ cɔ́ n'ɛẅɛn-yri, kɩ ɛwúvà-sɛ́ zriɛmɛ́n bàda bɔ̀ ɛmɛ̀n.

⁹ Bɔ̀ tro le owúemɛ̀n-dì dú bɔ́ tɛn. Tɛ́n, ɔmu lɔ de dù nɔn, ô bɔ́ nyrì le ke sɩ́ ji le bɔ̀ ẅɛn esɛ́ bɔ́ dùku bɔ́ ɛwú, tɛ́n Ɔwɔ wú, nɛ́n léyi ne sɩ́ owú-bɔ̀ ɔkɔrɛ-bɔ̀ mɛ̀n nɔn.

¹⁰ Nɛ́n de nɛ̀n mrɛ́n bɔ̀ owù ndɔ ɔmu lɔ mɛ̀n nɛ̀n sɔhɔ́ nɔn, kɩ ne le vru nɛ̀n mrɛ́n bɔ̀ owù nyàntɛn mɛ̀n nɛ̀n sɔhɔ́. Hɛ̀ɛ̀, bɔ̀ ẅɛn esɛ́ ndɔ lɔ n'ɛwú le, ne le vru nɛ̀n mrɛ́n bɔ̀ owúemɛ̀n nɛ̀n sɔhɔ́,

¹¹ kɩ nyɛ́n dùku ny'Ɔwɔ-sɛ́n mɛ̀n lɔ, nyɛ lɛ wá bɔ̀ ɛkɔrɛ̀. Ɔmu lɔ de Ɔwɔ kɛ lɛ yá Ɔwɔ-sɛ̀n léyi bobrebe kɛ hán tán bɔ̀, nɛ lɛ hán bɔ̀ anvrɛn ndɔ lɔ kɩ bobrebe kɛ lɛ tán nɛ̀n ɔkùɛn bɔ́ kruhú.

Pɔlɛ̀n kɛ crɔn n'ɔkɔ̀hɔ̀n-ci-hán

¹² Nyàn eci le kruhú léyi ke ji le bɔ̀ gbú ɔmùan nɔn: hán ɔmu le bɔ́ wàwúyɛ lɔ ke yé nɔn, bɔ́ nyrɔn bɔ́ edomɛ̀n ɛnhibù wú, annannan le ny'ɛtɛ̀sɛ̀n, sɔ̀hɔ̀ mɛ̀n mán annanwɔrɛ léyi dú Ɔwɔ yri kɛ và nɔn mɛ̀n, kɩ bɔ́ dú ɛnyrɔn mɛ̀n Ɔwɔ boafɔ̀n mɛ̀n, kɩ kè sɩ̀ dù ɔwrɔnẅì ankà-nyriemɛ̀n.

¹³ Annanwɔrɛ mɛ̀n lɔ, ɛwrú hɔ̀n léyi bɔ́ merɛ́n nyɛ̀n nɔn n'ɛmɛ̀n lɔ, ankà nyàntɛn zriɛmɛ́n bàdà ke dú kɛ kè sɩ̀ dù hɩ le nyɛ krɛ̀ hɩ nyɛ yá nɔn. Kɩ mɛ ẅɛn esɛ́ le nyɛ lɛ cɔ̀ nyɛ́n nyri anvrɛnvrɛn mɛ̀n ndɔ léyi

¹⁴ nyɛ yá zɛtɛ̀ lɔ ɛcá mán ɛcá mɛ̀n: bɔ́ Ɛẅɛnwrɔn Zhezü vá bì lɔ, ɛkɔrɛ̀-levri dù nye le gbú ɔmùan bɔ́ ɛwú kɩ bɔ́ mán bɔ́ le gbú ɔmùan ny'ɛwú.

¹⁵ Mɛ̀n ẅɛn esɛ́ ɔmu lɔ hɩ wú, kɩ mɛ̀n wá le mɛ lɛ gɔ̀ hɔ́n ny'edúyri, ô nyɛ́n cɔ́ anvrɛn-hán anhyrɛ̀.

¹⁶ Annanwɔrɛ mɛ̀n lɔ, mɛ̀n ji ny'edúyri vá yri, zɛtɛn mɛ̀n hɔ́n Masedùhanɛ̀n kpɔsɔ wú, ô m'evruvá mɛ̀n lɔ, mɛ̀n vru mɛ̀n kán nyɛ̀n: kɩ nyɛ lɛ wá mɛ̀n ɛkɔrɛ̀ mɛ́n Zhüde kpɔsɔ yri hɔ́n mɛ̀n lɔ.

¹⁷ M'ɛyri-wá-hɔ̀n ndɔ lɔ, ke yé tán le mɛ̀n sɩ̀ bɔ̀sɔ̀ m'edomɛ̀n anvrɛnvrɛn hàn? Ɛci hɔ̀n léyi mɛ wá mɛ̀n hán nɔn, dú ɔwrɔnẅì ankà-tro ci, hɩ kɛ lɛ hán tán le mɛ̀n krɔn kpehɛ́n mɛ̀n dɔ̀ le: “Hɛ̀ɛ̀” mán “Hɔ̂” ɛnvra zri lɔ mɛ̀n hàn?

¹⁸ Ɔwɔ dú mɛ́n dalɛfuɛ-di-wrɔn, Ankà léyi mɛ̀n dɔ́ nyɛ̀n nɔn, Kè sɩ̀ dù “Hɛ̀ɛ̀” mán “Hɔ̂” ɛnvra zri lɔ mɛ̀n.

¹⁹ Ɔmuhi Zhezü Krisì, Ɔwɔ ẅì léyi bɔ̀ dɔ́ n'ankà ny'edúyri, Silasɛ̀n, Timote mán mɛ́n mumù, kè sɩ̀ và hô, kɛ̀ dɔ̀ le “Hɛ̀ɛ̀” mán “Hɔ̂”. Tɛ́n, n'ɛmɛ̀n lɔ, ɛnvra lɔ fɛn “Hɛ̀ɛ̀” kɩ dù:

²⁰ annanwɔrɛ mɛ̀n lɔ, nɛ̀n dú “Hɛ̀ɛ̀” léyi ke yé Ɔwɔ mùan-wá hɔ̀n lɔ fɛn nɔn. Zhezü Krisì bɩmɛ̀n de bɔ́ dɔ̀ le “Kè dú ɔmu lɔ”, ô bɔ̀ zrɔ Ɔwɔ eci.

²¹ Kɩ Ɔwɔ dùku de kɛ tán bɔ̀ ecüì bɔ́ mán nyɛ́n mɛhi Krisì wúvà lɔ mɛ̀n. Ɔwɔ dùku mrɛ́n bɔ̀ nbɩ̀,

²² nɛ̀n tán bɔ̀ n'ebɩ kɩ nɛ̀n wá bɔ́ ɛnbɔrɛ hɔ̀n lɔ mɛ̀n Ɛnhɛ́n Prɔnprɔn kè dù kɛ̀ hán anhoba-ci, anvrɛn hɔ̀n léyi nɛ̀n wá nɛ̀n hɛ́n bɔ̀ hán nɔn hɩ kruhú.

²³ Me bɩ́ Ɔwɔ, dú mɛ́n dalɛfuɛ-di-wrɔn, ankà ndɔ lɔ mɛ̀n (nɛ̀n hán mɛ̀n, mɛ̀n wù ke dú kɛ mɛ ẅɛn ɛyɔ̀n): mɛ́n sɩ́ ji mɛ̀n wá nyɛ̀n ejüe hɩ le kruhú de mɛ̀n sɩ̀ vrù ɛmɛẅi mɛ̀n vá Korɛntɛ̀n anmàn nɔn.

²⁴ Bɔ́ sɩ́ ji bɔ̀ wá ankaẅì-bùtan ankà bɔ̀ tán nyɛ̀n, ɔmuhi nyɛ́n dú ɛshishiemɛ̀n ankaẅì-bùtan ẅɛn mɛ̀n; tɛ́n bɔ́ ji bɔ̀ srɛ́n nyɛ̀n ny'ɛnbɔrɛbru lɔ mɛ̀n.