1 Piɛrɛ̀n 5 - Ɛmɛẅi ankà ankrànkràn 2003

Ɔwɔ kɔ̀kɔ̀sɛ̀ kà sùva-wá

¹ Mɛ dɔ́ zɛtɛ̀ lɔ, anwrɔn hɔ̀n léyi ny'ɛmɛ̀n lɔ dú ɛcüìcüì-bɔ̀ Ɔwɔ fɛcüè mɛ̀n nɔn ankà. Mɛ̀n mán mɛ̀n dú ecüìcüì; mɛ̀n dú Krisì gbànkán hɔ̀n lɔ yɔ dalɛfuɛ-di-wrɔn kɩ mɛ lɛ cɔ́ n'eci-zrɔ léyi ye le yé nɔn. Nyàn eci léyi mɛ dɔ́ yɔ yɛ hán nɔn:

² nyɛ́n wá esùva kɛ̀ hán annɔn-kua-bɔ̀ léyi Ɔwɔ bɩ́ nɛ́n kɔ̀kɔ̀sɛ̀-kà wá antamɛ̀n nɔn, nyɛ́n wá nɛ̀n esùvá kɩ kè sɩ̀ dù kèkrèmɛ̀n, tɛ́n ɛnbɔrɛ ankrankran mɛ̀n, hán ɔmu le Ɔwɔ ke ji nɔn. Nyɛ́n hán eci ke bɩ́ dú ɔkùa jiemɛ̀n, tɛ́n ɛnbɔrɛ ankrankran mɛ̀n.

³ Anwrɔn hɔ̀n léyi yɛ wá nyɛ̀n antamɛ̀n nɔn, nyɛ́n bɩ́ sɩ́ ny'edomɛ̀n ɛwú nyɛ́n tán yɔ, tɛ́n nyɛ́n dú kɔ̀kɔ̀sɛ̀-kà lɔ yɔ sɛnpò.

⁴ Kɩ ɛnvra léyi annɔn-kua-bɔ̀ fra-wrɔn lɔ kɛ lɛ srɔ nɔn, nyɛ lɛ cɔ́ eci-zrɔ krusɔ́n-ci léyi n'ɛgbrɛ́n ke sɩ̀ zrɛ́n mrìmrì nɔn.

⁵ Ɔmu zri lɔ, sùgban-bɔ̀, nyɛ́n sɩ́ ny'edomɛ̀n ɛnhi nyɛ́n tán anwrɔn hɔ̀n léyi dú nyɛ̀n ɛcüìcüì nɔn. Kɩ nyɛ lɛ fɛn lɔ nyɛ́n ẅɛn edomɛ̀n-hi-sɩ́ ci edomɛ̀n nyɛ́n mán nyɛ́n nyran hɔ̀n mɛhi ny'ankà-dɔ́ mɛ̀n, ɔmuhi Owrú Prɔnprɔn kɛ dɔ̀ le: “Ɔwɔ kɛ kɛ́n tùtre-bɔ̀ ezì, tɛ́n nɛ̀n ẅɛn ɛnbɔrɛ wɔwɔ edomɛ̀n-hi-sɩ́-bɔ̀ tɛsɛ̀n.”

⁶ Nyɛ́n vé, nyɛ́n sɩ́ ny'edomɛ̀n ɛnhi Ɔwɔ kɔrɛ̀srɔn manmɛ̀n, ô nɛ̀n sɩ́ nyɛ̀n ɛwú ɛnvra léyi nɛ̀n wá nɔn.

⁷ Nyɛ́n bɩ́ ny'ejüedì ankà lɔ fɛn nyɛ̀n tán nɛ̀n, ɔmuhi, nɛ̀n ẅɛn ny'esùva-wá nɔn.

⁸ Anvɛ̀ kè kpri nyɛ̀n, anvɛmɛ̀n kè bi nyɛ̀n! Ɔmuhi ny'egbriwrɔn anwawrɔn, kɛ gbrɛnkɛn ɔmùan kɛ hán gɔ̀ngɔ̀sɔvɛ̀ léyi esùvamɛ̀n ke shrì ke ji ɔwrɔn tɔ̀n kɛ̀ rá nɔn.

⁹ Nyɛ́n kɛ́n nɛ̀n ezi ny'ankaẅìbùtan ẅɛ̀n hɛ́n ɛshishiemɛ̀n. Ke bru nyɛ̀n le, nyɛ́n muan-ẅì hɔ̀n léyi dú ɛnhibù mumù lɔ wú nɔn, ci ɛgbànkàn zri hɔ̀n lɔ mɛ̀n.

¹⁰ Nye le vru nyɛ́n kán ɛgbàn ɛnvra cá mɛ̀n. Tɛ́n Ɔwɔ léyi dú nboafɔ̀n lɔ fɛn shi-bɛ́ nɔn, bi nyɛ̀n ô nyɛ́n dú n'eci-zrɔ léyi kè sɩ̀ ẅɛ̀n ɛnkrutrɔ nɔn mɛ̀n, Zhezü Krisì mɛhi y'ɔbɔsɔ̀ lɔ mɛ̀n; nɛ́n dùku nɛ lɛ sàn hán nyɛ̀n, nɛ́n dùku nɛ lɛ hán nyɛ̀n nyɛ́n sàn zrɔ, nɛ lɛ tán nyɛ̀n ecüì kɩ nɛ lɛ hɛ́n nyɛ̀n edù kɛ̀ sɔ́ nyɛ̀n kɛ̀ hán Ɔwɔn hi-nan-bù hɔ́.

¹¹ Ɛkɔrɛ̀srɔn dú nɛ tɛn ɛnvra lɔ fɛn! Kè dú ɔmu lɔ.

Ɛmɛẅi-trɔ binyan

¹² Mɛ̀n merɛ́n nyɛ̀n owrú buri ndɔ lɔ, mɛ̀n mán Silasɛ̀n kɔrɛ̀-wá mɛ̀n, nɛ́n léyi me bɩ́ nɛ̀n mɛ hán ɔwrɔn-nɛ́n-muanẅì tɔ̀n léyi ke di ɔmùan zri nɔn. Mɛ̀n hán eci ndɔ lɔ, ô mɛ̀n yí nyɛ̀n edù, mɛ̀n hán tán nyɛ̀n nyɛ́n nyrì le, Ɔwɔ nboafɔ̀n annanwɔrɛ mɛ̀n de nyɛ́n dù nɔn.

¹³ Ɔwɔ fɛcüè léyi dú ɛnu Babilɔnɛ̀n shinan wú nɔn, hɩ Ɔwɔ mrɛ́n bɩ hán nyɛ́n hɔ́ nɔn, ke yüre nyɛ̀n y'ebinyan, yɔ mán m'ɛnẅì Markɛ̀n mɛhi.

¹⁴ Nyɛ́n bi ny'edomɛ̀n nyɛ́n nyan, ɔwrɔn-nɛ́n-muanẅì mùansɔ̀n anvrɛnvrɛn mɛ̀n. Nyɛ lɛ fɛn léyi nyɛ́n dú Krisì tɛn nɔn, anwɔwɔ kɛ và dú nyɛ̀n ɛmɛ̀n.