1 Tesalonikɛ̀n anmàn-bɔ̀ 5 - Ɛmɛẅi ankà ankrànkràn 2003

¹ Anwrɔn-nɛ́n-muan-ẅì hɔ̀n, ɛci hɔ̀n léyi kɛ lɛ wɔ̀ɛn nɔn hɩ wú lɔ, kè sɩ̀ ẅɛ̀n n'owrú merɛ́n, ô nyɛ́n nyri n'ɛnvra mán nɛ́n wacɛ̀n.

² Ɔmuhi nyɛ́n dùku nyɛ́n nyri anvrɛnvrɛn le, Ɛẅɛnwrɔn vá bì lɔ kɛ lɛ ẅɛn nmù kɛ lɛ hán ɛci-yerɛ-wrɔn léyi kɛ vá ɛnnyran nɔn.

³ Ɛnvra léyi anwrɔn kɛ lɛ dɔ̀ le: “Eci lɔ fɛn dú anwɔwɔ mɛ̀n, ɛnanmɛ̀n”, zɛtɛn hɩ vra lɔ de, kpatakpata lɔ muzhie kɛ lɛ vá yɔ ɛwú ke le dù kɛ lɛ hán ɛmɛ̀nsɩ́-hi ẅì-bî-vra hɔ́. Ɔwrɔn zriɛmɛ́n mùzhie lɔ ke sɩ̀ vɔ́n ɛwú.

⁴ Tɛ́n nyɛ́n, anwrɔn-nɛ́n-muan-ẅì hɔ̀n, nyɛ́n sɩ̀ dù ɛyri yɔwɔ mɛ̀n kokroho, hɩ ɛnbì ndɔ lɔ ká ẅɛn nyɛ̀n nmù kɛ̀ hán ɛci-yerɛ-wrɔn hɔ́ nɔn.

⁵ Nyɛ lɛ fɛn, annanwɔrɛ mɛ̀n lɔ, nyɛ́n dú ɛyri-kàn kɔrɛ̀levriemɛ̀n, nyɛ́n dú ɛcɛ̀n pupu tɛn. Bɔ̀ sɩ̀ dù ɛnnyran mán ɛyri-yɔwɔ kɔrɛ̀levri wú.

⁶ Ɔmu lɔ, bɔ́ bɩ́ di ndà kɛ hán anwrɔn ndɔ hɔ̀n hɔ́; tɛ́n bɔ̀ kpri ɛvɛ̀, anvɛmɛ̀n kè cüe bɔ̀a.

⁷ Ndà-dá-bɔ̀ lɔ, ɛnnyran de yɔ di ndà, kɩ ɛntàn-mi-bɔ̀ lɔ, ɛnnyran de yɔ kɔ́n ɛntàn nɔn.

⁸ Tɛ́n bɔ́ léyi, bɔ̀ dú ɛcɛ̀n pupu tɛn nɔn, ke ji le anvɛmɛ̀n kè cüe bɔ̀a. Bɔ̀ bɩ́ ankaẅì-bùtan mán ɛcüɛ̀n kè dú bɔ́ anhà-kɔ́n-ceci, kɩ bɔ́ ɛnkrukɔrɛ̀-sɛ́ kè dú bɔ́ ɛnkpro.

⁹ Annanwɔrɛ mɛ̀n lɔ, Ɔwɔ kè sɩ̀ hán bɔ̀, ô bɔ̀ dú n'ɛmɛ̀nhyì-bɩ̀ lɔ mɛ̀n, tɛ́n bɔ̀ cɔ́ ɛnkrukɔrɛ̀ bɔ́ Ɛẅɛnwrɔn Zhezü Krisì bɩmɛ̀n.

¹⁰ Krisì wú bɔ́ kruhú, ô nɛ̀n hán bɔ̀, bɔ́ mán nɛ́n mɛhi bɔ̀ kɔrɛ̀ bɔ̀ dù, ke dú kɛ bɔ́ dú ɔkɔrɛ-bɔ̀ mɛ̀n, kɩ bɔ́ dú owú-bɔ̀ mɛ̀n mán, ɛnvra léyi nɛ lɛ và nɔn.

¹¹ Ɔmu lɔ, nyɛ́n yɩ́ ny'edomɛ̀n edù, ô nyɛ́n tán ny'edomɛ̀n ecüì ankaẅì-bùtan mɛ̀n, hán ɔmu le nyɛ́n gɔ̀ hán nɔn.

Ɛmɛẅitrɔ ankà-yé mán ebinyan

¹² Amwrɔn-nɛ́n-muan-ẅì hɔ̀n, bɔ́ dɔ́ nyɛ̀n nyɛ́n wá anwrɔn hɔ̀n léyi dú nyɛ̀n ɛmɛ̀n kɛ hán ɔkɔ̀hɔ̀n, anwrɔn hɔ̀n léyi Ɛẅɛnwrɔn kɔrɛ̀levriemɛ̀n kɛ nyrɔn nyɛ̀n kɩ ke bi-dɔ́ nyɛ̀n nɔn.

¹³ Nyɛ́n yé yɔ ɛcüɛ̀n bobrebe, ɔkɔ̀hɔ̀n léyi yɔ hán nɔn hɩ kruhú. Yɔ mɛhi nyɛ́n dú anwɔwɔ mɛ̀n.

¹⁴ Bɔ́ wá tán nyɛ̀n, anwrɔn-nɛ́n-muan-ẅì hɔ̀n: nyɛ́n dɔ́ ɛjɛ́-bɔ̀ ankà, nyɛ́n yɩ́ ɛnjansu-bɔ̀ edù, nyɛ́n wá edùka-bɔ̀ ɛkɔrɛ̀, nyɛ́n ẅɛn ɛnbɔrɛ nyɛ́n hɛ́n yɔ lɛ fɛn y'ɛtɛ̀sɛ̀n.

¹⁵ Nyɛ́n wá esùva ô ɔwrɔn zriɛmɛ́n ke bɩ́ bɩ́ ɛgbàn ke dí ɛgbàn-wɔ̀ɛn, tɛ́n nyɛ́n ji ɛnvra lɔ fɛn anvrɛn-hán ny'edomɛ̀n mán anwrɔn lɔ fɛn tɛ̀sɛ̀n.

¹⁶ Nyɛ́n dú ɛnvra lɔ fɛn pɔpüɛ̀ mɛ̀n,

¹⁷ nyɛ́n sɛ́n ɛnvra lɔ fɛn,

¹⁸ nyɛ́n tán Ɔwɔ ɔkùɛn eci lɔ fɛn mɛ̀n. Nyàn eci léyi Ɔwɔ ke ji ny'ɛmɛ̀n, ny'ɛwúvà lɔ mɛ̀n nyɛ́n mán Zhezü Krisì mɛhi nɔn.

¹⁹ Nyɛ́n bɩ́ kɛ́n Ɛnhɛ́n Prɔnprɔn kɔ̀hɔ̀n lɔ nyɛ́n hɛ́n hán;

²⁰ nyɛ́n bɩ́ kɔrɔa Ɔwɔ-mùan-ankà-dɔ̀ léyi kɛ vá nyɛ̀n ɛnkruemɛ̀n nɔn.

²¹ Tɛ́n nyɛ́n crɛn eci lɔ fɛn mɛ̀n anvrɛnvrɛn: nyɛ́n bɩ́ hɩ léyi zrɔ nɔn,

²² ô nyɛ́n wá ny'edomɛ̀n esùva eci-gbàngbàn totɔtɔ̀n lɔ fɛn tɛ̀sɛ̀n.

²³ Ɔwɔ léyi dú anwɔwɔ shi-bɛ́ kɛ̀ hán tán nyɛ́n dú nɛ tɛn kokroho; nɛ̀n bɩ́ nyɛ́n mumù lɔ fɛn, ɛnhɛ́n, wàwuyɛ mán edùwrú, kè dú ɛfifiemɛ̀n kɛ̀ vrá ɛnbì léyi bɔ́ Ɛẅɛnwrɔn Zhezü Krisì kɛ lɛ và nɔn.

²⁴ Ɔwrɔn léyi ke bi nyɛ̀n nɔn, kɛ lɛ sá eci ndɔ lɔ nmù ɔmuhi nɛ̀n dú ɔmùan-zri-di-wrɔn nɔn.

²⁵ Anwrɔn-nɛ́n-muan-ẅì hɔ̀n, bɔ́ mán nyɛ́n sɛ̀n nyɛ́n tán bɔ̀.

²⁶ Nyɛ́n tán ɔwrɔn-nɛ́n-muan-ẅì hɔ̀n lɔ fɛn ebinyan ɔwrɔn-nɛ́n-muan-ẅì mùan-sɔ́n mɛ̀n.

²⁷ Mɛ sɛ́n nyɛ̀n Ɛẅɛnwrɔn bɩmɛ̀n: nyɛ́n krɛ́ owrú ndɔ lɔ nyɛ́n tán anwrɔn-nɛ́n-muan-ẅì hɔ̀n lɔ fɛn kɛ̀ yá.

²⁸ Ɛẅɛnwrɔn Zhezü Krisì shifù lɔ kɛ̀ và dú nyɛ̀n ɛmɛ̀n.