1 Tesalonikɛ̀n anmàn-bɔ̀ 1 - Ɛmɛẅi ankà ankrànkràn 2003

Ebinyan

¹ Ebinyan ndɔ lɔ dú Pɔlɛ̀n, Silasɛ̀n mán Timote yri kɛ và. Tɛsalonikɛ̀n wɔ-fɛcüè léyi dú Ɔwɔ Zi mán Ɛẅɛnwrɔn Zhezü Krisì tɛn nɔn: nboafɔ̀n mán anwɔwɔ kè dú nyɛ tɛn.

Tesalonikɛ̀n anmàn-bɔ̀ wúvà mán y'ankaẅì-bùtan

² Bɔ́ tán ɛnvra lɔ fɛn Ɔwɔ ɔkùɛn ny'ɛkruhú kɩ bɔ́ tro ny'ankà b'ɔwɔ-sɛ̀n hɔ̀n lɔ fɛn mɛ̀n.

³ Annanwɔrɛ mɛ̀n lɔ, bɔ́ kro-sɩ́ bɔ́ edomɛ̀n Ɔwɔ bɔ́ Zi zìwú ny'ankaẅì-bùtan léyi ẅɛn vɔ̀nshɛ́, nyɛ cüɛ̀n léyi ẅɛn edùyì mán ny'esɛ́ annanwɔrɛ léyi nyɛ́n ẅɛn bɔ́ Ɛẅɛnwrɔn Zhezü Krisì wú nɔn.

⁴ Awrɔn-nɛ́n-muan-ẅì hɔ̀n, bɔ̀ nyri ɔmu le Ɔwɔ cüɛn nyɛ̀n kɩ mrɛ́n nyɛ̀n nbɩ, ô nyɛ́n dú nɛ tɛn.

⁵ Annanwɔrɛ mɛ̀n lɔ, ɛnvra léyi bɔ̀ dɔ́ nyɛ̀n Ɛmɛẅi ankà ankrankran lɔ nɔn, kè sɩ̀ dù anmùan mɛ̀n ankà-dɔ̀ tɛ̀-kɩ, tɛ́n Ɛnhɛ́n Prɔnprɔn kɔrɛ̀-srɔn, n'ɛkɔrɛ̀-wá mán n'esɛ́ annanwɔrɛ mɛ̀n mɛhi. Nyɛ́n nyri ɔmu le bɔ̀ hán bɔ̀ ẅɛn bɔ́ edomɛ̀n ny'ɛmɛ̀n, ny'anvrɛn kruhú.

⁶ Nyɛ́n bɩ́ bɔ́ sɛnpò mán Ɛẅɛnwrɔn tɛn lɔ; nyɛ́n kán ɛgbàn bobrebe, ɔmu tɛ̀kɩ nyɛ́n bɩ́ Ɔwɔ mùan-ankà-dɔ̀ lɔ pɔpüɛ̀ mɛ̀n, pɔpüɛ̀ léyi Ɛnhɛ́n Prɔnprɔn kɛ tán nɔn.

⁷ Ɔmu lɔ de, nyɛ́n srɔ sɛnpò nyɛ́n tán ankaẅì-bùtan-ẅɛn-bɔ̀ léyi dú Maseduhanɛ̀n mán Akahi kpɔsɔ wú nɔn.

⁸ Annanwɔrɛ mɛ̀n lɔ, kè sɩ̀ dù Maseduhanɛ̀n mán Akahi kpɔsɔ wú tɛ̀kɩ Ɛẅɛnwrɔn ankà-dɔ̀ lɔ kè bonyì hɛ̀n, tɛ́n ɛyri lɔ fɛn de ny'Ɔwɔ mɛ̀n ankaẅì-bùtan lɔ bonyì nɔn. Bɔ́ sɩ̀ ẅɛ̀n ankà b'á dɔ́ hɩ wú lɔ.

⁹ Yɔ lɔ fɛn, yɔ dɔ́ ɔmu le nyɛ́n ẅɛn bɔ̀ ɛnvra léyi bɔ̀ hɔ́n ny'anmàn mán ɔmu le nyɛ́n hán nyɛ́n tecüe antɛ̀-buri-Wɔ, hɩ nyɛ́n crɛ ezì nyɛ́n kɛ́n Ɔwɔ, ô nyɛ́n srɔ n'eci-bɩ̀tan-bɔ̀, nɛ́n léyi nɛ̀n dú Ɔwɔ kɔrɛkɔrɛ mán annanwɔrɛ nɔn.

¹⁰ Nyɛ vrá Zhezü léyi dú n'Ɛnẅì, kè dú anhobɩ́ kɛ̀ và. Nɛ́n de Ɔwɔ bɩ́ nɛ̀n owú-bɔ̀ mɛ̀n sɩ́ ɔkɔrɛ-bɔ̀ mɛ̀n; nɛ mrɛ́n bɔ̀ nɛ̀n sɔhɔ́ Ɔwɔ mrɛ̀ncì léyi kɛ́n eburi nɔn mɛ̀n.