1 Korɛntɛ̀n anmàn-bɔ̀ 9 - Ɛmɛẅi ankà ankrànkràn 2003

Ɔkɔ̀hɔ̀n-wá-wrɔn kɔrɛ̀-levri ci mán n'ɔkɔ̀hɔ̀n-hán-kɔ̀hɔ̀n

¹ Mɛ̀n sɩ̀ dù ɔwrɔn kora? Mɛ̀n sɩ̀ dù ɔkɔ̀hɔ̀n-wá-wrɔn hàn? Mɛ̀n sɩ̀ kàn Zhezü bɔ́ Ɛẅɛnwrɔn hàn? Nyɛ́n sɩ̀ dù m'ɛkɔrɛ̀-kɔ̀hɔ̀n-hán vɔ̀nshɛ́-ci, Ɛẅɛnwrɔn ci-bɩ̀tan kɔ̀hɔn mɛ̀n hàn?

² Kɩ ke dú kɛ anwrɔn ndɔ hɔ̀n kɛ kɔrɔ, ke sɩ́ ji ke bɩ́ mɛ̀n kɛ̀ hán ɔkɔ̀hɔ̀n-wá-wrɔn, nyɛ tɛn nyɛ́n nyri annanwɔrɛ mɛ̀n le mɛ̀n dú ɔkɔ̀hɔ̀n-wá-wrɔn. Annanwɔrɛ mɛ̀n lɔ, ɔmuhi nyɛ́n dú Ɛẅɛnwrɔn bɔ̀sɔ̀ lɔ mɛ̀n nɔn, nyɛ́n dùku nye yé le mɛ̀n dú ɔkɔ̀hɔ̀n-wá-wrɔn.

³ Nyàn ɔmu le mɛ dɔ́ ankà tán m'edomɛ̀n anwrɔn hɔ̀n léyi kɛ dɔ́ ankà gbàngbàn m'ɛmɛẅi nɔn, y'ɛtɛ̀sɛ̀n:

⁴ kɛɛ, mɛ̀n sɩ̀ ẅɛ̀n ɛci-zî mán ɛnshi-mì kɔrɛ̀-levri m'ɔkɔ̀hɔ̀n-hán lɔ mɛ̀n hàn?

⁵ Kɛɛ, mɛ̀n sɩ̀ ẅɛ̀n ɛkɔrɛ̀-levri m'á bɩ́ ɛnnyɔnwrɔn léyi dú Krisì-sɛ̀nkɛn-hi kè dú ɛ hi, hán ɔmu le ɔkɔ̀hɔ̀n-wá-bɔ̀, Ɛẅɛnwrɔn nɛ́n muan-ẅì hɔ̀n mán Piɛrɛ̀n kɛ hán nɛ́n?

⁶ Kale, mɛ̀n mán Barnabasɛ̀n mɛhi bɔ́ zri kɩ ke ji le bɔ̀ hán ɔkɔ̀hɔ̀n, ô bɔ̀ cɔ́ ɛci-zî hɛ̀?

⁷ Kɛɛ, nyɛ́n gɔ̀ yá yɛ dɔ̀ le gɔliɛ-wrɔn dùku kɛ hán n'edomɛ̀n ɛci-zî n'ɔkɔ̀hɔ̀n-hán lɔ mɛ̀n hàn? Kale, ɔwrɔn léyi tɛ́ ɛci nɔn ke sɩ́ zî n'ɛci-tɛ́-ci tɛ̀-ẅì lɔa? Kale ɔnɔ̀n-kua-wrɔn ke sɩ́ mi n'ɔnɔ̀n nyàn-shi lɔa?

⁸ Tɛ́n mɛ́n sɩ́ bɩ́ sɛnpò ɔwrɔnẅì wúvà ci-hán zri wú, ɔmuhi Mohizì nyànmàn mán kɛ dɔ́ ankà zri lɔ nɔn.

⁹ Annanwɔrɛ mɛ̀n lɔ, ɛnyànmàn ndɔ lɔ mɛ̀n, ye merɛ́n le: “Ɛnnanman tɔ̀n léyi kɛ hán ɔkɔ̀hɔ̀n ankɛ̀tɛ́ mɛ̀n nɔn, ye bɩ́ tɔ́n nɛ̀n ɔmùan yɛ hɛ́n hán.” Ɔwɔ kɛ ẅɛn ɛnnanman hɔ̀n ankà-tro hɛ̀?

¹⁰ Annanwɔrɛ mɛ̀n lɔ, kè sɩ̀ dù bɔ́ kruhú de nɛ̀n dɔ̀ ankà ɔmu lɔ nɛ́n? Annànwɔrɛ mɛ̀n, ankà-dɔ̀ ndɔ lɔ ye merɛ́n nɛ̀n bɔ́ kruhú. Ke ji le ɔwrɔn léyi kɛ wá ɛci-tɛ́ nànmàn mán ɔwrɔn léyi kɛ küɛ ɛci nɔn, kɛ̀ hán ɔkɔ̀hɔ̀n lɔ, ô yɔ ẅɛn esɛ́ le, yɔ lɛ cɔ́ yɔ tɛn ɛci.

¹¹ Bɔ̀ tɛ́ ny'ɛnbɔrɛ lɔ mɛ̀n, ɛnhɛ́n tɛ̀-ẅì: ke dú kɛ bɔ́ bɩ́ ny'anvrɛn ci-ẅɛn-ci lɔ jan hô, bɔ̀ hán eci ke fɛ ɛwú hɛ?

¹² Ke dú kɛ anwrɔn ndɔ hɔ̀n ẅɛn ɛkɔrɛ̀-levri ndɔ lɔ ny'ɛwú, annannan le bɔ́ tɛn bɔ̀ sɩ̀ ẅɛn nɛ́n? Ɔmu tɛ̀kɩ, bɔ̀ sɩ̀ hàn ɛkɔrɛ̀-levri ndɔ lɔ n'eci. Tɛ́n, bɔ̀ ẅɛn ɛnbɔrɛ bɔ̀ hɛ́n, ô ɛtɛ̀ ke bɩ́ dabra dɛ́ Krisì Mɛẅi ankà Ankrankran lɔ n'ɛnlevri wúɛ.

¹³ Nyɛ́n nyri annanwɔrɛ mɛ̀n le, anwrɔn hɔ̀n léyi dú ɔkɔ̀hɔn mɛ̀n ecice-wɔn lɔ mɛ̀n nɔn, kɛ cɔ́ y'ɛci-zî ɛcice-wɔn lɔ mɛ̀n, kɩ anwrɔn hɔ̀n léyi ke sɩ́ ɛcice-ci hɔ̀n lɔ Ɔwɔ tɛbrɛ̀ wú nɔn, yɔ cɔ́ y'ɛci-zî ɔkɔ̀hɔ̀n ndɔ lɔ mɛ̀n.

¹⁴ Ɔmu zri lɔ, Ɛẅɛnwrɔn wá tán le anwrɔn hɔ̀n léyi kɛ dɔ́ Ɛmɛẅi ankà Ankrankran lɔ nɔn, kɛ̀ cɔ́ y'ɛci-zî ɔkɔ̀hɔ̀n ndɔ lɔ mɛ̀n.

¹⁵ Tɛ́n ɛkɔrɛ̀-levri ndɔ lɔ fɛn, mɛ̀n sɩ̀ hàn y'eci-hán-ci, kɩ mɛ̀n sɩ̀ merɛ́n owrú, ô mɛ̀n sàn n'eci-hán. Mɛ cüɛn ɔmu le mɛ̀n wù! Ɔwrɔn zriɛmɛ́n ke sɩ̀ ẅɛn m'ɔmùan-gbú-ankà ndɔ lɔ kɛ̀ sɔhɔ́ rɔ́!

¹⁶ Mɛ́n sɩ́ ji mɛ̀n gbú ɔmùan Ɛmɛẅi ankà Ankrànkràn dɔ́ mɛ̀n. Kɩ, dú eci-hán-ci léyi yɛ wá tán mɛ̀n, kɩ muzhie dú mɛ tɛn ke dú kɛ mɛ̀n sɩ̀ dɔ̀ Ɛmɛẅi ankà Ankrànkràn lɔ.

¹⁷ Ke dú kɛ mɛ́n dùku de mɛ̀n mrɛ́n ɔkɔ̀hɔ̀n lɔ mɛ́n bɩ nɔn, mɛ lɛ ẅɛn ɔwɔ̀ɛn-dì kɔrɛ̀-levri; tɛ́n ɔmuhi, yɛ wá ɔkɔ̀hɔ̀n lɔ yɛ tán mɛ̀n nɔn, mɛ hán eci léyi yɛ wá tán mɛ̀n nɔn sɔ̀hɔ̀ mɛ̀n.

¹⁸ Zɛtɛn, m'ɔwɔ̀ɛn-dì dú tɛtán? M'ɔwɔ̀ɛn-dì dú ɛnbɔrɛbru léyi mɛ cɔ́ Ɛmɛẅi ankà Ankrankran léyi mɛ dɔ́ ankora, kɩ mɛ́n sɩ́ hán ɛkɔrɛ̀-levri ẅɛn ci léyi Ɛmɛẅi ankà-dɔ̀ ankrankran ndɔ lɔ kɛ tán mɛ̀n nɔn.

¹⁹ Mɛ̀n dú ɔwrɔn kora, mɛ̀n sɩ̀ dù ɔwrɔn zriɛmɛ́n wɔ̀n-wrɔn; tɛ́n mɛ̀n srɔ m'edomɛ̀n anwrɔn lɔ fɛn wɔ̀n-wrɔn, ô mɛ̀n cɔ́ anwrɔn bobrebe kɛ̀ cüɛn kè dú Krisì tɛn.

²⁰ Ɛnvra léyi Zhüifɛ̀n-bɔ̀ mɛhi bɔ́ ẅɛn eci-hán nɔn, mɛ ẅɛn ɛwúvà kɛ hán Zhüifɛ̀n-wrɔn hɔ́, ô mɛ̀n cɔ́ yɔ; tɛ́n mɛ̀n sɩ̀ dù Mohizì nyànmàn kɔrɛ̀-levri wú, ɔmu tɛ̀kɩ m'ɛwúvà kɛ cá ɔwrɔn léyi dú ɛnyànmàn wú ɛnvra léyi yɔ mɛhi bɔ́ ẅɛn eci-hán-ci ɛnyànmàn ndɔ lɔ wú, ô mɛ̀n cɔ́ yɔ.

²¹ Ɔmu zri lɔ, ɛnvra léyi mɛ̀n mán anwrɔn hɔ̀n léyi kè sɩ̀ nyrì Mohizì nyànmàn mɛhi bɔ́ yɛ́ nɔn, mɛ ẅɛn ɛwúvà kɛ hán yɔ hɔ́, mɛ́n sɩ́ crɛ-nyan ɛnyànmàn ndɔ lɔ, ô mɛ̀n cɔ́ yɔ. Ndɔ lɔ ke sɩ́ yé le Ɔwɔ nyànmàn ke sɩ́ hán mɛ̀n eci zriɛmɛ́n, ɔmuhi mɛ̀n dú Krisì nyànmàn kɔrɛ̀-levri wú nɔn.

²² Ɛnvra léyi mɛ̀n mán anwrɔn hɔ̀n léyi ẅɛn ɛjɛ̀ ankaẅì-bùtan mɛ̀n mɛhi bɔ́ dù nɔn, mɛ́n mumù mán mɛ ẅɛn ɛjɛ̀ m'ɛwúvà lɔ mɛ̀n, ô mɛ̀n cɔ́ yɔ. Ɔmu lɔ, mɛ srɔ yɔ lɔ fɛn, yɔ tɛn, ô mɛ̀n cɔ́ ɛyri mɛ̀n bɩ́ ɛnjanbɔ̀ mɛ̀n die.

²³ Mɛ hán ndɔ lɔ fɛn Ɛmɛẅi ankà Ankrankran lɔ kruhú, ô mɛ̀n cɔ́ anvrɛn-hán léyi dú nɛ̀n ɛwú nɔn.

²⁴ Nyɛ́n nyri annanwɔrɛ mɛ̀n le, ɛsrɛ́-bɔ̀ léyi ke dú ɛsrɛ́-kɔ̀ mɛ̀n nɔn, yɔ lɔ fɛn yɔ srɛ́, tɛ́n ɛnzri kɩ kɛ cɔ́ anjapkà. Nyɛ́n srɛ́, ô kɛ̀ hán tán nyɛ́n cɔ́ anjapkà.

²⁵ Ɛsrɛ́-bɔ̀ lɔ fɛn léyi dú ɛsrɛ́ ci-hán mɛ̀n nɔn kɛ tán y'edomɛ̀n ɔkɔ̀hɔ̀n shishi. Yɔ hán ɔmu lɔ, ô yɔ cɔ́ ɛnkrusɔn-ci léyi kɛ gɔ́ jrɛ́ nɔn; tɛ́n bɔ́, bɔ́ hán nɛ̀n, ô bɔ̀ cɔ́ ɛnkrusɔn-ci léyi ke sɩ́ jrɛ́ mrìmrì nɔn.

²⁶ Hɩ le Kruhú de mɛ srɛ́ kɩ mɛ nyan ɛyri léyi dú ɛnkrutrɔ-yri nɔn; hɩ kruhú de mɛ cá ejì-kɔ́n-wrɔn léyi ke sɩ́ gɔ́n ɔwrɔn oworo mɛ̀n nɔn.

²⁷ Mɛ hán m'edùwrú lɔ ɛgbàn ɛshishiemɛ̀n kɩ mɛ ẅɛn nɛ̀n ecüìemɛ̀n mɛ hɛ́n, ô mɛ́n dùku mán ye bɩ́ kɔ́n mɛ̀n ye ze hɛ, ɛnvra léyi mɛ lɛ dɔ́ anwrɔn ankà kɛ̀ trɔ nɔn.