1 Korɛntɛ̀n anmàn-bɔ̀ 7 - Ɛmɛẅi ankà ankrànkràn 2003

Ankà-dɔ̀ léyi dú eyiri-mùanwá-ankà wú nɔn

¹ Zɛtɛn bɔ̀ dɔ́ ankà léyi nyɛ́n dɔ́ mɛ̀n ny'owrú lɔ mɛ̀n nɔn. Zrɔ tán le ɛncɔnwrɔn ke bɩ́ yiri ɛnnyɔnwrɔn.

² Tɛ́n, ɛwúvà-gbàngbàn-ẅɛ̀n léyi bonyì nɔn, hɩ kruhú ke ji le ɛncɔnwrɔn kɛ̀ ẅɛn nɛ́n hi, kɩ ɛnnyɔnwrɔn mán kɛ̀ ẅɛn nɛ́n cüì.

³ Ke ji le ɛncɔnwrɔn kɛ̀ hán ɛnnyɔnwrɔn domɛ̀n kɔ̀hɔ̀n lɔ fɛn kɩ ɛnnyɔnwrɔn mán kɛ̀ hán eci zri lɔ.

⁴ Ke sɩ́ ji le ɛnnyɔnwrɔn ke bɩ́ n'edùwrú kɛ̀ hán eci léyi nɛ́n dùku ne ji nɔn: n'edùwrú lɔ dú nɛ́n cüì tɛn; ɔmu zri lɔ ke sɩ́ ji le ɛncɔnwrɔn mán kè bɩ́ n'edùwrú lɔ kɛ̀ hán eci léyi ne ji nɔn: n'edùwrú lɔ dú nɛ́n hi tɛn.

⁵ Nyɛ́n bɩ́ krɔ ny'edomɛ̀n ny'ɔbɔ̀sɔ̀ lɔ mɛ̀n ke dú kɛ kè sɩ̀ dù ɔmùan-krɔn zriemɛ̀n, ô nyɛ́n dú Ɔwɔ sɛ́n mɛ̀n ɛnvra cá mɛ̀n; tɛ́n ɛnvra lɔ kɛ vácì hô, nyɛ́n vru nyɛ́n bɔ̀sɔ ny'edomɛ̀n, kè sɩ̀ dù ɔmu lɔ hô, nyɛ́n sɩ̀ ẅɛn ny'edomɛ̀n nyɛ́n hɛ́n rɔ́, kɩ nye le bru Anwa-wrɔn wɔ̀ɛn-nyan lɔ mɛ̀n.

⁶ Ankà léyi mɛ dɔ́ nyɛ̀n nɔn kè sɩ̀ dù ɛnyànmàn-wá-tán, tɛ́n ɔmùan-krɔn ankà.

⁷ Annanwɔrɛ mɛ̀n lɔ, mɛ cüɛn ɔmu le anwrɔn lɔ fɛn kè dú wúcɔ̀ kora kɛ̀ hán mɛ̀n hɔ́; tɛ́n ɔwrɔnwrɔn Ɔwɔ tán ecice tɔ̀n: ɔwrɔn tɔ̀n, ecice ndɔ lɔ, ɔwrɔn nyàntɛn, ecice nyàntɛn ndɔ lɔ.

⁸ Nyàn ankà léyi mɛ dɔ́ wúcɔ̀ kora hɔ̀n mán ɔngrɔn-wúyɔ̀ hɔ̀n nɔn: zrɔ tán le nyɛ́n yɛ́ nyɛ́n zri kɛ̀ hán mɛ̀n hɔ́.

⁹ Tɛ́n ke dú kɛ nyɛ́n sɩ̀ ẅɛn ny'edomɛ̀n nyɛ́n hɛ́n rɔ́ hô, nyɛ́n yiri ny'edomɛ̀n: zrɔ tán le ye yiri ɛnnyɔnwrɔn, ye yiri ɛncɔnwrɔn, kɩ yɛ ẅɛn ɛnbrá mɛ̀n ankà-tro.

¹⁰ Anwrɔn hɔ̀n léyi dú eyiri-bɔ̀ nɔn, mɛ tán yɔ ɛnyànmàn ndɔ (léyi kè sɩ̀ dù me yri kɛ̀ và, tɛ́n Ɛẅɛnwrɔn yri): ke sɩ́ ji le ɛnnyɔnwrɔn kè teze nɛ́n cüì,

¹¹ (ke dú kɛ nɛ hán ɔmu lɔ hô, ke sɩ́ ji le nɛ̀n vru nɛ́n yiri ɛncɔnwrɔn, kɩ zrɔ tán le nɛ́n mán nɛ́n cüì mɛhi angranmɛ̀n kɛ̀ wɔ́ yɔ) kɩ ke sɩ́ ji le ɛncɔnwrɔn kɛ̀ wrɔ́ nɛ́n hi.

¹² Nyàn ankà léyi mɛ́n dùku mɛ dɔ̀ tán anwrɔn nyàntɛn hɔ̀n (kɩ kè sɩ̀ dù Ɛẅɛnwrɔn mùanwú-ankà): ke dú kɛ ɛncɔnwrɔn léyi dú Krisì-sɛ̀nkɛn-wrɔn ke yiri ɛnnyɔnwrɔn léyi kè sɩ̀ ẅɛ̀n ankaẅì-bùtan Krisì mɛ̀n, kɩ ke ji kɛ̀ cɔ́ nɛ̀n mɛhi yɔ yɛ́ nɔn, ke sɩ́ ji le nɛ̀n wrɔ́ ɛnnyɔnwrɔn lɔ;

¹³ hɩ zri lɔ, ke dú kɛ ɛnnyɔnwrɔn léyi dú Krisì-sɛ̀nkɛn-hi, ke yiri ɛncɔnwrɔn léyi kè sɩ̀ ẅɛ̀n ankaẅì-bùtan Krisì mɛ̀n, kɩ ke ji kɛ̀ cɔ́ nɛ̀n mɛhi yɔ yɛ́ nɔn, ke sɩ́ ji le nɛ̀n wrɔ́ ɛncɔnwrɔn lɔ.

¹⁴ Annanwɔrɛ mɛ̀n lɔ, ɛncɔnwrɔn léyi kè sɩ̀ ẅɛ̀n ankaẅì-bùtan nɔn, bá Ɔwɔ ɛtɛ̀sɛ̀n ankaẅì-bùtan-ẅɛ̀n-nyɔnwrɔn léyi nɛ́n yirì nɔn kruhú; ɔmu zri lɔ ɛnnyɔnwrɔn léyi kè sɩ̀ ẅɛ̀n ankaẅì-bùtan nɔn, bá Ɔwɔ ɛtɛ̀sɛ̀n ankaẅì-bùtan-ẅɛ̀n-cɔnwrɔn léyi nɛ́n yirì nɔn kruhú. Kè sɩ̀ dù ɔmu lɔ hô, ny'ɛẅì hɔ̀n lɔ, ke le dú ɛnbrá mɛ̀n ẅì hɔ̀n, kɩ annanwɔrɛ mɛ̀n lɔ, yɔ bá Ɔwɔ ɛtɛ̀sɛ̀n.

¹⁵ Tɛ́n, ke dú kɛ ɔwrɔn léyi kè sɩ̀ ẅɛ̀n ankaẅì-bùtan ke ji kè teze ankaẅì-bùtan-ẅɛn-wrɔn lɔ, yɛ tán nɛ̀n ɛkɔrɛ̀-levri. Ankà ndɔ ɔmu lɔ wú, eyiri-bɔ̀ anhyrɛ̀ lɔ dú anwrɔn kora hɔ̀n, ɔmuhi Ɔwɔ bi nyɛ̀n, ô nyɛ́n dú ɛwúvà wɔwɔ mɛ̀n.

¹⁶ Anwɔntan ɛ lɛ hán è nyrì, vɛ́n, Krisì-sɛ̀nkɛn-hi le, e le bɩ́ ecüì è die nɛ́n? Kale, anhɔntan ɛ lɛ hán è nyrì, vɛ́n Krisì-sɛ̀nkɛn-wrɔn le, e le bɩ́ e hi è die nɛ́n?

Ny'ɛwúvà kè dù kɛ̀ cá ɔmu le Ɔwɔ bi nyɛ̀n, ô nyɛ́n hán nɔn

¹⁷ Ankà ndɔ lɔ dú ɔhɔnan, kɩ ke ji le ɔwrɔnwrɔn kè dú ɛwúvà léyi Ɛẅɛnwrɔn tán nɛ̀n ecüì nɛ̀n dú ɛmɛ̀n nɔn, ô nɛ̀n dù kɛ̀ hán ɔmu le nɛ̀n dú ɛnvra léyi Ɔwɔ bi nɛ̀n nɔn. Ndɔ lɔ de dú ɛnyànmàn léyi mɛ wá tán Ɔwɔ-fɛcüè-bɔ̀ lɔ fɛn nɔn.

¹⁸ Ke dú kɛ Ɔwrɔn tɔ̀n ye wi wúcɔ̀-domɛ̀n ɛnvra léyi Ɔwɔ bi nɛ̀n nɔn, ke sɩ́ ji le nɛ̀n ji nɛ́n wúcɔ̀-domɛ̀n-wì lɔ ɛbán-yri; ke dú kɛ ɔwrɔn nyàntɛn tɔ̀n, ye sɩ̀ wì wúcɔ̀-domɛ̀n ɛnvra léyi Ɔwɔ bi nɛ̀n nɔn, ke sɩ́ ji le nɛ̀n ji ɛyri ye wi nɛ̀n wúcɔ̀-domɛ̀n.

¹⁹ Ye wi mɛ́n, kɩ ye sɩ̀ wi mɛ́n wúcɔ̀-domɛ̀n mán, ndɔ lɔ kè sɩ̀ ẅɛ̀n vɔ̀nshɛ́ zriɛmɛ́n: hɩ le ẅɛn vɔ̀nshɛ́ nɔn, dú Ɔwɔ nyànmàn-wá.

²⁰ Ke ji le Ɔwrɔnwrɔn kɛ̀ yɛ́ kɛ̀ hán ɔmu le nɛ́n dù ɛnvra léyi Ɔwɔ bi nɛ̀n nɔn.

²¹ E dú ɔwɔ̀n-wrɔn ɛnvra léyi Ɔwɔ bi mɛ́n nɛ́n? Ke bɩ́ ku mɛ́n ɛnkrɛ̀ta; tɛ́n ke dú kɛ eci tɔ̀n kɛ tán mɛ́n ɛkɔrɛ̀levri ɛ̀ srɔ ɔwrɔn kora hô, è bɩ́ ɛkɔrɛ̀levri ndɔ lɔ.

²² Ɔmuhi ɔwɔ̀n-wrɔn léyi Ɛẅɛnwrɔn bi nɔn, nɛ̀n srɔ ɔwrɔn kora léyi dú Ɛẅɛnwrɔn tɛn nɔn; ɔmu zri lɔ, ɔwrɔn kora léyi Krisì bi nɔn, nɛ̀n dú Krisì wɔ̀n-wrɔn.

²³ Nyɛ́n dú Ɔwɔ tɛn, ɔmuhi nɛ̀n di yi wɔ̀ɛn nɔn; nyɛ́n bɩ́ srɔ anwrɔnẅì wɔ̀n-bɔ̀.

²⁴ Hɛ̀ɛ̀, anwrɔn-nɛ́n-muan-ẅì hɔ̀n, ke ji le ɔwrɔnwrɔn kè dú Ɔwɔ zìwú eci léyi dú nɛ̀n ɛnvra léyi ye bi nɛ̀n nɔn.

Ankà-dɔ̀ léyi kɛ crɛ-nyan anwrɔn hɔ̀n léyi kè sɩ̀ wà eyiri-mùan mán ɛngrɔn-wúyɔ̀ nɔn

²⁵ Hɩ le kɛ crɛ-nyan anwrɔn hɔ̀n léyi kè sɩ̀ wà eyiri-mùan nɔn, Ɛẅɛnwrɔn kè sɩ̀ tán mɛ̀n ɛnyànmàn; tɛ́n mɛ dɔ́ mɛ́n dùku m'ɛnkruemɛ̀n ankà, mɛ̀n léyi Ɛẅɛnwrɔn bɔrɛ wɔwɔ lɔ mɛ̀n, mɛ̀n ẅɛn n'esɛ̀ kɔrɛ̀levri nɔn.

²⁶ Ɛnvra ndɔ lɔ mɛ̀n jüedì lɔ, nyàn ankà léyi me tro nɔn: zrɔ tán le ɔwrɔnwrɔn kè dù kɛ̀ hán ɔmu le nɛ́n dù nɔn.

²⁷ Ɛ̀ ẅɛn ɛnnyɔnwrɔn tɔ̀n hàn? Zɛtɛn, e bɩ́ ji ɛyri e teze nɛ̀n. È sɩ̀ yirì ɛnnyɔnwrɔn hàn? Zɛtɛn, e bɩ́ ji ɛnnyɔnwrɔn.

²⁸ Tɛ́n ke dú kɛ è yiri ɛnnyɔnwrɔn, e sɩ́ hán ɛgbàn; kɩ ke dú kɛ sùgban-nyɔnwrɔn-ẅì ke yiri ɛncɔnwrɔn, nɛ́n sɩ́ hán ɛgbàn. Tɛ́n eyiri-bɔ̀ ke le di ejüe y'ɛnbì ɛnbì wúvà lɔ mɛ̀n, kɩ me ji mɛ̀n ẅɛn nyɛ̀n mɛ̀n sɔhɔ́ ejüedì lɔ mɛ̀n.

²⁹ Anwrɔn-nɛ́n-muan-ẅì hɔ̀n, nyàn ankà léyi me ji mɛ̀n dɔ̀ nɔn: wɔrɔ ɛnvra jan; zɛtɛ̀ lɔ bɔ́ dú ɛmɛ̀n nɔn, ke ji le wúcɔ̀ hɔ̀n léyi yiri wúyɔ̀ nɔn, kɛ̀ ẅɛn ewúvà kɛ̀ hán le yɔ sɩ̀ yirì wúyɔ̀,

³⁰ anwrɔn hɔ̀n léyi ke wú eyú nɔn, kè dù kɛ̀ hán le yɔ sɩ̀ dù obòtò mɛ̀n, anwrɔn hɔ̀n léyi kɛ yürɛ ɛnhyürɛ̀ nɔn, kè dù kɛ̀ hán le yɔ sɩ̀ dù pɔpüɛ̀ mɛ̀n, anwrɔn hɔ̀n léyi kɛ wɔ́ ɛci nɔn, kè dù kɛ̀ hán le ɛci léyi yɔ wɔ̀ nɔn, kè sɩ̀ dù yɔ tɛn,

³¹ anwrɔn hɔ̀n léyi kɛ cɔ́ ɛnu ɛnhibù wú anvrɛn hɔ̀n lɔ nɔn, kè dù kɛ̀ hán le yɔ sɩ́ cɔ́ anvrɛn hɔ̀n lɔ. Ɔmuhi, ɛnhibù ndɔ lɔ, ɔmu le nɛ̀n hán nɛ́n dù nɔn, nɛ́n sɩ̀ vru mɔɛ̀n nɛ̀n dú ɛnvra sheshe hɛ.

³² Mɛ cüɛ̀n ɔmu le, nyɛ́n bɩ́ ẅɛn ejüedì ankà-tro zriɛmɛ́n. Ɔwrɔn léyi kè sɩ̀ wà eyiri-mùan nɔn, kɛ crɛ-nyan Ɛẅɛnwrɔn domɛ̀n ankà, ne ji nɛ̀n cüɛn Ɛẅɛnwrɔn ɛvɛ̀;

³³ tɛ́n ɔwrɔn léyi wá eyiri-mùan nɔn, kɛ crɛ-nyan ɛnhibù wú domɛ̀n ci lɔ fɛn, ne ji nɛ̀n cüɛn nɛ́n hi ɛvɛ̀,

³⁴ kɩ ɔmu lɔ, nɛ̀n dú eci anhyrɛ̀ granmɛ̀n. Ɔmu zri lɔ, ɛnnyɔnwrɔn tɔ̀n, ɛnvra tɔ̀n hô, sùgban-nyɔnwrɔn-ẅì léyi kè sɩ̀ nyrì ɛncɔnwrɔn nɔn, kɛ crɛ-nyan Ɛẅɛnwrɔn domɛ̀n ankà, ɔmuhi ne ji nɛ̀n dú Ɛẅɛnwrɔn tɛn n'eci lɔ fɛn hán mɛ̀n mán n'ankà-tro mɛ̀n; tɛ́n ɛnnyɔnwrɔn léyi yiri ɛncɔnwrɔn nɔn, kɛ crɛnyan ɛnhibù wú domɛ̀n ci lɔ fɛn, ne ji ɛyri nɛ̀n cüɛn nɛ́n cüì ɛvɛ̀.

³⁵ Ny'anvrɛn kruhú de mɛ dɔ́ ankà ndɔ lɔ nɔn, kɩ kè sɩ̀ dù hɩ le mɛ lɛ wá eci ecüìemɛ̀n mɛ̀n tán nyɛ̀n nɔn; me ji le nyɛ́n hán eci léyi zrɔ nɔn, ny'edomɛ̀n bɩ wá kokroho Ɛẅɛnwrɔn ci-bɩ̀tan-kɔ̀hɔ̀n mɛ̀n.

³⁶ Zɛtɛ̀ lɔ, ke dú kɛ sùgban-ẅì tɔ̀n ke tro le nɛ̀n sɩ̀ yirì n'ɔmùan-sɔ́n nyɔnwrɔn hô, nɛ hán yi ɛgbàn, ke dú kɛ ankà-tro ndɔ lɔ kɛ ẅɛn ecüì, kɩ nɛ cüɛn ɔmu le yɔ yiri y'edomɛ̀n hô, zrɔ tán le yɔ yirì kɛ̀ hán ɔmu le nɛ cüɛ̀n nɔn hɔ́; nɛ́n sɩ́ hán ɛgbàn.

³⁷ Tɛ́n, ke dú kɛ sùgban-ẅì lɔ, ye sɩ̀ ẅɛn nɛ̀n ecüìemɛ̀n, kɩ nɛ́n dùku n'ɛnbɔrɛmɛ̀n, nɛ́n sɩ́ ji nɛ̀n wá eyiri-mùan, kɩ ke dú kɛ nɛ lɛ ẅɛn n'edomɛ̀n nɛ̀n hɛ́n tɛ̀ le, nɛ́n mán n'ɔmùan-sɔ́n nyɔnwrɔn mɛhi yɔ sɩ̀ kán y'edòmɛ̀n, nɛ hán eci ankrànkràn.

³⁸ Ɔmu lɔ, ke dú kɛ ɔwrɔn ke yiri n'ɔmùan-sɔ́n nyɔnwrɔn hô, nɛ hán eci ankrankran, tɛ́n ɔwrɔn léyi kè sɩ̀ wà yiri-mùan nɔn, nɛ hán eci ankrankran kɛ sán zrɔ.

³⁹ Ɛnnyɔnwrɔn kè dú ɛnvra lɔ fɛn léyi nɛ́n cüì dú ɔkɔrɛ mɛ̀n nɔn, hɩ mɛhi eyirì bɔ̀sɔ mɛ̀n; tɛ́n ke dú kɛ nɛ́n cüì ke wù hô, ɛkɔrɛ̀-levri dù ne le yiri ɛncɔnwrɔn léyi ne ji nɔn, tɛ́n ke ji le kè dú Krisì-sɛ̀nkɛn-bɔ̀ yirì.

⁴⁰ Tɛ́n ne le dú ɛnbɔrɛ-bruemɛ̀n ke dú kɛ nɛ yɛ́ ɔmu lɔ. Ndɔ lɔ de dú m'ɛnkruemɛ̀n ankà, kɩ me tro le, mɛ̀n mán Ɔwɔ Hɛ́n dú mɛ̀n edomɛ̀n.