1 Korɛntɛ̀n anmàn-bɔ̀ 5 - Ɛmɛẅi ankà ankrànkràn 2003

Ɔwɔ-fɛcüe mɛ̀n sùnan-gbàngbàn

¹ Yɛ yá yɛ dɔ́ ɛyri lɔ fɛn le, esùnan-gbàngbàn dú nyɛ̀n ɛmɛ̀n, esùnan-gbàngbàn vri tɔ̀n léyi anwrɔn hɔ̀n léyi kè sɩ̀ nyrì Ɔwɔ nɔn, ke sɩ̀ hán hɩ ci lɔ rɔ́: annanwɔrɛ mɛ̀n lɔ yɛ dɔ̀ le ny'ɛmɛ̀n lɔ, ɔwrɔn tɔ̀n mán nɛ́n zi hi mɛhi ndù!

² Kɩ nye vru nyɛ hán ɛgbúgbú-ci! Tɛ́n ke ji le, eci-hán ndɔ lɔ kè dú ny'edomɛ̀n-bru-ankà, ô eci gbàngbàn-hán-wrɔn ndɔ lɔ, yɛ wrɔ́ nɛ̀n ny'anwanzi.

^3-4 Tɛ́n mɛ tɛn, ke dú kɛ mɛ̀n sɩ̀ dú nyɛ̀n ɛmɛ̀n dùku mán, mɛ̀n dú nyɛ̀n ɛtɛ̀sɛ̀n ɛnhɛ́n mɛ̀n; kɩ bɔ́ Ɛẅɛnwrɔn Zhezü bɩmɛ̀n lɔ, eci-gbàngbàn-hán-wrɔn ndɔ lɔ, mɛ̀n ci nɛ̀n ɛmrɛ̀n, hán le mɛ̀n dú nyɛ̀n ɛmɛ̀n hɔ́. Ɛnvra léyi nyɛ lɛ borɛkru, me le dú nyɛ̀n ɛmɛ̀n ɛnhɛ́n mɛ̀n kɩ bɔ́ Ɛẅɛnwrɔn Zhezü kɔrɛ̀-srɔn lɔ ke le yé n'edomɛ̀n;

⁵ zɛtɛn, ke ji le nyɛ́n bɩ́ ɔwrɔn ndɔ lɔ nyɛ́n tán anwa-wrɔn, ô n'ɛgbàn dùwrú lɔ kɛ̀ jrɛ́, tɛ́n ke ji le n'ɛnhɛ́n kɛ̀ cɔ́ ebɩ̀die Ɛẅɛnwrɔn bì lɔ.

⁶ Ɔmùan-gbú-ankà bàdà ɛmɛ̀n! Nyɛ́n nyri ankà ndɔ lɔ anvrɛnvrɛn: “Eci-fɔ́-ci ẅiɛ kɩ kɛ hán dùdú-sɔ́n kɛ fɔ́.”

⁷ Nyɛ́n fi ny'edomɛ̀n zɛtɛn! Nyɛ́n mrɛ́n eci-fɔ́-ci gbànvri ndɔ lɔ nyɛ́n sɔhɔ́, ô nyɛ́n dù nyɛ́n cá dùdú-sɔ́n wrù léyi eci-fɔ́-ci bàdà ɛmɛ̀n nɔn. Annanwɔrɛ mɛ̀n lɔ, nyɛ́n dú dùdú-sɔ́n wrù ndɔ lɔ ɛnvra léyi Krisì, bɔ́ ecice kɔ̀kɔ̀sɛ̀-ẅì wú ɛgbàn-hán-tɛ̀ wú nɔn.

⁸ Bɔ̀ koran b'ɔkoran bì lɔ, kè sɩ̀ dù hɩ mán abùtùkumɛ́n léyi ɛgbàn ci-fɔ́-ci mán esùnàn gbàngbàn dú ɛmɛ̀n nɔn, tɛ́n hɩ mán abùtùkumɛ́n léyi eci-fɔ́-ci bàda ɛmɛ̀n, hɩ ɛfifi mán annanwɔrɛ dú ɛmɛ̀n nɔn.

⁹ Mɛ́n kpàkpà wrú léyi mɛ̀n merɛ́n nyɛ̀n nɔn, mɛ̀n dɔ́ nyɛ̀n le nyɛ́n mán esù-gbàngbàn-nán-bɔ̀ mɛhi nyɛ́n bɩ́ hán eci zri.

¹⁰ Mɛ́n sɩ́ dɔ́ anwrɔn lɔ fɛn ankà, yɔ hɔ̀n léyi ɛnhibù ndɔ lɔ wú ẅɛn esùnàn gbàngbàn, ẅɛn nɛ́n nyran ci ɛvɛ̀-ɛwú-wá, dú ɛci-yerɛ-bɔ̀, antɛ̀-buri-sɛ́n-bɔ̀ nɔn. Kè sɩ̀ dù ɔmu lɔ hô, ke ji le nyɛ́n cɔhɔ́ ɛnhibù wú!

¹¹ Me ji mɛ̀n dɔ́ nyɛ̀n le nyɛ́n bɩ́ ẅɛn ɔbɔ̀sɔ̀ nyɛ́n mán ɔwrɔn tɔ̀n léyi kɛ tán n'edomɛ̀n ebɩ́ Krisì-sɛ̀nkɛn-wrɔn, hɩ ke le dú esùnàn gbàngbàn ci-hán-wrɔn, kɛ lɛ wá nɛ́n nyran ci ɛvɛ̀-ɛwú, ke le dú antɛ̀-buri-sɛ́n-wrɔn, ɛyɔ̀n-wrɔn, ɛntàn-kɔ́n-wrɔn mán ɛci-yerɛ-wrɔn nɔn. Ke sɩ́ ji le, ɔwrɔn ɔmu lɔ, nɛ́n mán nyɛ́n mɛhi nyɛ́n zî ɛci ɛyri zri.

^12-13 Annanwɔrɛ mɛ̀n lɔ, kè sɩ̀ dù m'ankà, hɩ m'á ci anwrɔn hɔ̀n léyi kè sɩ̀ dù Krisì-sɛ̀nkɛn-bɔ̀ nɔn ɛmrɛ̀n. Ɔwɔ ke le ci yɔ ɛmrɛ̀n. Tɛ́n, kè sɩ̀ zrɔ tán le nyɛ́n ci nyɛ́n fɛcüè-bɔ̀ ɛmrɛ̀n hàn? Annanwɔrɛ mɛ̀n lɔ, ye merɛ́n le: “Nyɛ́n wrɔ́ anbɔrɛ-ci-hán-wrɔn ny'anwanzi.”