1 Korɛntɛ̀n anmàn-bɔ̀ 14 - Ɛmɛẅi ankà ankrànkràn 2003

Ankà-kran-yé wrù hɔ̀n léyi bɔ́ cɔ́ Ɛnhɛ́n Prɔnprɔn cice ankà-dɔ̀ wú nɔn

¹ Eci lɔ fɛn mɛ̀n, nyɛ́n ji ɛcüɛ̀n. Nyɛ́n vru nyɛ́n ji Ɛnhɛ́n Prɔnprɔn cice, annannan le ndɔ léyi kɛ tán Ɔwɔ mɛẅì ankà-dɔ̀ léyi yɛ cɔ̀ nɔn.

² Ɔwrɔn léyi kɛ dɔ́ ankà ɛnbrɛ̀ nyàntɛn hɔ̀n mɛ̀n nɔn, nɛ́n mán anwrɔnẅì mɛhi yɔ sɩ́ dɔ́ ankà, tɛ́n Ɔwɔ mɛhi de yɔ dɔ́ ankà, ɔmuhi ɔwrɔn zriɛmɛ́n ke sɩ́ yá n'ankà-dɔ̀ lɔ nɔn. Ɛnhɛ́n Prɔnprɔn kɔrɛ̀srɔn mɛ̀n, nɛ dɔ́ ankà-bán-ankà annanwɔrɛ.

³ Tɛ́n ɔwrɔn léyi kɛ dɔ́ Ɔwɔ mɛẅi ankà nɔn, nɛ dɔ́ nɛ́n nyran hɔ̀n ankà, ô y'ankaẅì-bùtan kè nán esù kɛ̀ hɔ́n ezì, ô nɛ̀n yɩ́ yɔ edù, nɛ̀n bi ɛnbɔrɛ nɛ̀n wá yɔ.

⁴ Ɔwrɔn léyi kɛ dɔ́ ankà ɛnbrɛ̀ nyàntɛn hɔ̀n mɛ̀n nɔn, nɛ́n zri kɩ nɛ cɔ́ vɔ̀nshɛ́ ankà-dɔ̀ lɔ wú, tɛ́n ɔwrɔn léyi kɛ dɔ́ Ɔwɔ mɛẅi ankà nɔn, nɛ tán Ɔwɔ fɛcüè lɔ fɛn ankà-yé.

⁵ Mɛ cüɛn anvrɛnvrɛn mɛ̀n le nyɛ lɛ fɛn nyɛ́n dɔ́ ankà ɛnbrɛ̀ nyàntɛn hɔ̀n mɛ̀n, tɛ́n me vru me ji le nyɛ́n cɔ́ ɛyri nyɛ́n dɔ́ Ɔwɔ mɛẅi ankà. Annanwɔrɛ mɛ̀n lɔ, ɔwrɔn léyi kɛ dɔ́ ɛmɛẅi ankà ndɔ lɔ nɔn, ẅɛn vɔ̀nshɛ́ vrán ɔwrɔn léyi kɛ dɔ́ ankà ɛnbrɛ̀ nyantɛn hɔ̀n mɛ̀n nɔn, tɛ́n ke ji le ɔwrɔn tɔ̀n kè dù kɛ̀ yá, ô kɛ̀ dɔ́ Ɔwɔ fɛcüè mumù lɔ fɛn kè nyrì.

⁶ Ɔmu lɔ, anwrɔn-nɛ́n-muan-ẅì hɔ̀n, me yrɛ nyɛ̀n le: ɛnvra léyi mɛ lɛ vá nyɛ̀n ɛmɛ̀n nɔn, ke dú kɛ mɛ dɔ́ nyɛ̀n ankà ɛnbrɛ̀ nyàntɛn hɔ̀n mɛ̀n, ecitan mɛ̀n de mɛ lɛ ẅɛn vɔ̀nshɛ́ nye yri nɛ́n? Eci zriɛmɛ́n mán mɛ̀n, tɛ́n ke dú kɛ mɛ dɔ́ nyɛ̀n ankà-bán-ankà tɔ̀n, me yé nyɛ̀n eci-nyrì tɔ̀n, mɛ dɔ́ nyɛ̀n Ɔwɔ mɛẅi ankà tɔ̀n, kɩ me vru me yé ankà tɔ̀n.

⁷ Bɔ̀ bɩ́ sɛnpò ɛcɔ̀-krɛ́-ci léyi dú kètè mán dɔ̀nmrɛ́n nɔn wú: ke dú kɛ ye sɩ̀ tàn esùva zri zri, ɛcɔ̀-krɛ́-ci anhyrɛ̀ lɔ wú, anwɔntan de yɛ lɛ hán ye nyri ɛmràn nán léyi ye bɩ ye mú ɛcɔ̀-krɛ́-ci anhyrɛ̀ hɔ̀n lɔ wú nɛ́n?

⁸ Kɩ ke dú kɛ ɛbrɛ̀n-gbá-mú-wrɔn kè sɩ̀ mú n'ɛbrɛ̀n lɔ kɛ̀ dɛ̀ ɛwúɛ, antɔn de kɛ lɛ bɔ̀sɔ n'edomɛ̀n kɛ̀ hɔ́n anhà-kɔ́n mɛ̀n nɛ́n?

⁹ Ɔmu zri lɔ, anwɔntan de yɛ lɛ hán yɛ yá ankà léyi nyɛ dɔ̀ nɔn, ke dú kɛ ɛmɛẅi ankà léyi nyɛ dɔ́ ɛnbrɛ̀ nyàntɛn hɔ̀n mɛ̀n nɔn, ye sɩ́ cɔ́ n'ɛyá yri nɛ́n? Nyɛ lɛ dɔ́ ankà tán ɛndɔ̀nwrɔ̀n!

¹⁰ Ɛnbrɛ̀ vɛnvɛn hɔ̀n de dú ɛnhibù wú nɔn, tɛ́n y'ɛmɛ̀n lɔ, ɛnbrɛ̀ zrizri ẅɛ́n n'ankà-dɔ̀.

¹¹ Tɛ́n ke dú kɛ mɛ́n sɩ́ yá ɛnbrɛ̀ tɔ̀n, ɔwrɔn léyi kɛ vrá nɛ̀n nɔn, ne le dú ɛmɛ̀n-nyàntɛn-mɛ̀n-wrɔn, nɛ̀n tán mɛ̀n, kɩ mɛ̀n mán me le dú ɛmɛ̀n-nyàntɛn-mɛ̀n-wrɔn, mɛ̀n tán nɛ̀n.

¹² Ɔmuhi nye ji edùyiemɛ̀n Ɛnhɛ́n Prɔnprɔn cice hɔ̀n lɔ nɔn, nyɛ́n ji ɛyri nyɛ́n di ɛnnɛ̀ncüì Ɛnhɛ́n Prɔnprɔn cice hɔ̀n léyi kɛ tán Ɔwɔ fɛcüè ezì hɔ̀n nɔn n'ɛmɛ̀n.

¹³ Zɛtɛn, Ɔwrɔn léyi kɛ dɔ́ ankà ɛnbrɛ̀ nyàntɛn hɔ̀n mɛ̀n nɔn, ke ji le nɛ̀n sán Ɔwɔ kɛ̀ tán nɛ̀n ecice ankà-nyri-ankà-dɔ̀ ɛnbrɛ̀ ndɔ hɔ̀n lɔ mɛ̀n.

¹⁴ Ɔmuhi ke dú kɛ mɛ sɛ́n Ɔwɔ ɛnbrɛ̀ ndɔ hɔ̀n lɔ mɛ̀n, m'ɛnhɛ́n dú Ɔwɔ-sɛ́n mɛ̀n anvrɛnvrɛn, tɛ́n m'ɛnkruemɛ̀n-ẅɛ̀n ke sɩ́ hán ɔkɔ̀hɔ̀n.

¹⁵ Ecitan de mɛ lɛ hán nɛ́n? Mɛ lɛ sɛ́n Ɔwɔ ɛnhɛ́n mɛ̀n, tɛ́n me le vru mɛ̀n sɛ́n Ɔwɔ ɛnkrumɛ̀n-ẅɛn mɛ̀n; mɛ lɛ krɛ́ ɛcɔ̀ ɛnhɛ́n mɛ̀n, tɛ́n me le vru mɛ̀n krɛ́ ɛcɔ̀ ɛnkruemɛ̀n-ẅɛn mɛ̀n.

¹⁶ Annanwɔrɛ mɛ̀n lɔ, ke dú kɛ ɛ tán Ɔwɔ ɔkùɛn ɛnhɛ́n mɛ̀n tɛ̀kɩ, anwɔntan de ɔwrɔn léyi dú nukù-die-wrɔn fɛcüè lɔ mɛ̀n, kɛ lɛ hán kɛ̀ mrɛ́n ɔmùan le “Kè du ɔmu lɔ” v'ɛnyrì-kùɛn-tán Wɔ-sɛ́n lɔ mɛ̀n nɛ́n? Annanwɔrɛ mɛ̀n lɔ, nɛ̀n sɩ̀ nyrì ankà léyi ɛ dɔ̀ nɔn.

¹⁷ Ke dú kɛ v'ɛnyrì-kùɛn tán Wɔ́-sɛ̀n lɔ zeze fì mán, ɛnyran ndɔ lɔ, ke sɩ́ cɔ́ n'ɛmɛ̀n vɔ̀nshɛ́ zriɛmɛ́n.

¹⁸ Mɛ tán Ɔwɔ ɔkùɛn, ɔmuhi mɛ vrá ɛnbrɛ̀ nyàntɛn hɔ̀n vrán nyɛ lɛ fɛn nɔn.

¹⁹ Tɛ́n, Ɔwɔ-fɛcüè zìwú, mɛ cüɛn ɔmu le mɛ̀n dɔ́ ankà-yá-ankà ɛnrì, ô mɛ̀n yé anwrɔn ndɔ hɔ̀n ankà, zrɔ vrán ankà bobrebe léyi mɛ lɛ dɔ́ ɛnbrɛ̀ nyàntɛn hɔ̀n mɛ̀n nɔn.

²⁰ Anwrɔn-nɛ́n-muan-ẅì hɔ̀n nyɛ́n bɩ́ tro ankà kɛ hán ɛẅì hɔ̀n hɔ́; nyɛ́n srɔ ɛẅì hɔ̀n ɛgbàn tɛ̀sɛ̀n, tɛ́n nyɛ́n srɔ anwrɔn cüìcüì hɔ̀n ny'ankà-tro mɛ̀n.

²¹ Nyàn ankà léyi owrú kɛ̀ dɔ̀ nɔn: “Ɛẅɛnwrɔn kɛ dɔ̀ le, ɛnbrɛ̀-nyàntɛn-mɛ̀n-bɔ̀ mùan wú de mɛ lɛ dɔ́ fɛcüè ndɔ lɔ ankà nɔn, nɛ̀nnyàn-bɔ̀ mùan mɛ̀n de mɛ lɛ dɔ́ yɔ ankà nɔn. Zɛtɛn hɩ mɛ̀n lɔ, yɔ sɩ̀ shrì yɔ yá m'ankà lɔ.”

²² Ɔmu lɔ, ɛnbrɛ̀ nyàntɛn mɛ̀n ankà-nyrì-dɔ̀ lɔ dú eci-woroan-ci tán anwrɔn hɔ̀n léyi kè sɩ̀ ẅɛ̀n ankàẅì-bùtan, tɛ́n kè sɩ̀ dù tàn ankaẅì-bùtan-ẅɛn-bɔ̀; ɔmu zri lɔ, Ɔwɔ-mɛẅi-ankà-nyrì-dɔ̀ lɔ dú eci-woroan-ci tán ankaẅì-bùtan-ẅɛn-bɔ̀, tɛ́n kè sɩ̀ dù tàn anwrɔn hɔ̀n léyi kè sɩ̀ ẅɛ̀n ankaẅì-bùtan nɔn.

²³ Bɔ̀ crɛnyan ke dú kɛ Ɔwɔ-fɛcüè mumù lɔ fɛn kɛ bɔrɛ y'edomɛ̀n ɛkru, kɩ yɔ lɛ fɛn yɔ bukru yɔ dɔ́ ankà ɛnbrɛ̀ nyàntɛn hɔ̀n mɛ̀n: kɩ ke dú kɛ nukù-die-bɔ̀ kora mán anwrɔn hɔ̀n léyi kè sɩ̀ ẅɛ̀n ankaẅì-bùtan ke bru ɛyri léyi nyɛ́n dù nɔn, ye sɩ̀ dɔ̀ le nyɛ́n dú nmù-hán-bɔ̀a?

²⁴ Tɛ́n ke dú kɛ yɔ lɛ fɛn, yɔ dɔ́ Ɔwɔ mɛẅi ankà, kɩ ɔwrɔn tɔ̀n léyi kè sɩ̀ ẅɛ̀n ankaẅì-bùtan, mán nukù-die-wrɔn kora, ke bru ɛyri zri lɔ, ne le nyri n'ɛgbàn lɔ, ankà léyi nɛ yá nɔn hɩ kruhú. Ankà léyi nɛ yá nɔn, ke le ci nɛ̀n ɛmrɛ̀n,

²⁵ kɩ n'ankà-bán-ankà-tro hɔ̀n lɔ ke le dú ɛyri-kán mɛ̀n kpetehe. Zɛtɛn, ne le sɩ́ ezì ɛnhi kɩ ne le cüe Ɔwɔ ankɔrɛ̀ ezìwúɛ, nɛ lɛ dɔ̀ le: “Annanwɔrɛ mɛ̀n Ɔwɔ dú nyɛ̀n ɛmɛ̀n!”

Owròlò ci-hán Ɔwɔ-fɛcüè mɛ̀n

²⁶ Onwrɔn-nɛ́n-muan-ẅì hɔ̀n, ankà tán de yɛ lɛ dɔ̀ nɛ́n? Ɛnvra léyi nyɛ sá ny'edomɛ̀n ɛkru, ô nyɛ́n dú Ɔwɔ-sɛ̀n-ci-hán mɛ̀n nɔn, ny'ɛmɛ̀n lɔ ɔtɔ̀n kɛ lɛ krɛ́ ɔcɔ̀ tɔ̀n, ɔwrɔn tɔ̀n ke le sɩ́ ankà-yé tɔ̀n, ɔwrɔn nyàntɛn tɔ̀n ankà-bán-ankà tɔ̀n, ɔwrɔn nyàntɛn tɔ̀n ɛmɛẅi ankà-dɔ̀ ɛnbrɛ̀ nyàntɛn hɔ̀n mɛ̀n kɩ ɔwrɔn nyàntɛn tɔ̀n, kɛ lɛ dɔ́ ɛmɛẅi ankà léyi yɛ dɔ́ ɛnbrɛ̀ nyàntɛn hɔ̀n mɛ̀n nɔn y'ɛwú ankà: ndɔ lɔ fɛn de ke ji le kɛ wá Ɔwɔ-fɛcüè ɛkɔrɛ̀ kɛ̀ nán esù kɛ̀ hɔ́n ezì nɔn.

²⁷ Ke dú yɛ bukru yɛ dɔ́ ankà ɛnbrɛ̀ nyàntɛn mɛ̀n, ke ji le anwrɔn anhyrɛ̀ mán anhɔ̀n kɛ̀ dɔ̀, ɔwrɔnwrɔn kɛ̀ ẅɛn n'ɛnvra, ô ɔwrɔn tɔ̀n kɛ̀ dɔ́ n'ɛwú ankà kɛ̀ tán anwrɔn kɛ̀ yá.

²⁸ Ke dú kɛ ɔwrɔn zriɛmɛ́n bàdà ká dɔ́ n'ɛwú ankà hô, ke ji le ye teze ɛnbrɛ̀ nyantɛn hɔ̀n mɛ̀n ankà-dɔ̀ lɔ, ô ye bɩ́ sɩ́ ɔmùan ɛwú yɛ dɔ́ nɛ̀n fɛcüɛ̀ mɛ̀n: nɛ̀n dɔ́ nɛ́n dùku n'edomɛ̀n ankà nɛ́n mán Ɔwɔ mɛhi.

²⁹ Yɔ hɔ̀n léyi kɛ cɔ́ Ɔwɔ mɛẅi ankà-dɔ̀ hɔ̀n lɔ nɔn, ke ji le anwrɔn anhyrɛ̀ mán anhɔ̀n ke bɩ́ ankà-dɔ̀, ô anwrɔn ndɔ hɔ̀n kɛ̀ crɛ́n ankà léyi yɔ dɔ̀ nɔn, n'ɛmɛ̀n.

³⁰ Tɛ́n ke dú kɛ Ɔwrɔn nyàntɛn tɔ̀n léyi nyɔn nyɛ̀n ɛmɛ̀n nɔn kɛ cɔ́ Ɔwɔ ankà-bán-ankà tɔ̀n, ke ji le ɔwrɔn léyi dú ankà-dɔ́ mɛ̀n nɔn, kɛ kɛ́n ɔmùan kɛ̀ hɛ́n.

³¹ Nyɛ lɛ fɛn lɔ ɛkɔrɛ̀-levri dù nyɛ lɛ tán ɔwrɔn zrizri Ɔwɔ mɛẅi ankà-dɔ̀ lɔ, ô yɔ lɔ fɛn yɔ cɔ́ ankà-yé, edù ke yɩ́ yɔ.

³² Anwrɔn hɔ̀n léyi kɛ tán ɛmɛẅi ankà hɔ̀n lɔ nɔn, ke ji le Ɛnhɛ́n Prɔnprɔn cice ankà-dɔ̀ lɔ tán yɔ nɔn, edù kɛ̀ sɔ́ kè dú y'ɛmɛ̀n,

³³ ɔmuhi Ɔwɔ kè sɩ̀ dù Ɔwɔ tɔ̀n léyi kɛ wá sùkùsùkù ɛyri, tɛ́n nɛ hán anwɔwɔ kɔ̀hɔ̀n nɔn. Ndù hán Krisì-sɛ̀nkɛn-bɔ̀ hɔ̀n fɛcüè krubɔrɛ lɔ fɛn mɛ̀n,

³⁴ ke ji le wúyɔ̀ hɔ̀n kɛ̀ kɛ́n ɔmùan kɛ̀ hɛ́n ɛkruborɛ hɔ̀n lɔ mɛ̀n: ye sɩ̀ tàn yɔ ankà-dɔ́ kɔrɛ̀-levri. Hán ɔmu le Ɔwɔ nyànmàn kɛ dɔ̀ nɔn, ke ji le wúyɔ̀ hɔ̀n ke sɩ́ y'edomɛ̀n ɛnhi.

³⁵ Ke dú kɛ yɔ ji yɔ nyri ankà tɔ̀n hô, yɔ yrɛ yɔ cüì hɔ̀n ankà lɔ ɛbemɛ̀n. Kè sɩ̀ zrɔ tán le ɛnnyɔnwrɔn kɛ dɔ́ ankà fɛcüè krubɔrɛ mɛ̀n.

³⁶ Kale nye yri de Ɔwɔ ankà-dɔ̀ lɔ ndù kɛ và nɛ́n? Kɩ kale nyɛ́n zri kɩ ankà-dɔ̀ lɔ vá cɔ́ nyɛ̀n nɛ́n?

³⁷ Ke dú kɛ Ɔwrɔn tɔ̀n ke tro le nɛ̀n dú Ɔwɔ mɛẅi ankà-dɔ́-wrɔn, kɩ ne tro le nɛ̀n cɔ́ ɛnhɛ́n mɛ̀n cice, ke ji le nɛ̀n nyrì le owrú léyi mɛ̀n merɛ́n nɔn, dú Ɛẅɛnwrɔn nyànmàn tɔ̀n.

³⁸ Tɛ́n ke dú kɛ nɛ́n sɩ́ ji nɛ̀n nyrì, ye bɩ́ ẅɛn n'esɛ́.

³⁹ Ɔmu lɔ, anwrɔn-nɛ́n-muan-ẅì hɔ̀n, eci lɔ fɛn hán mɛ̀n lɔ nyɛ́n ji Ɔwɔ mɛẅi ankà-dɔ̀, tɛ́n nyɛ́n bɩ́ sɩ́ tán ɛnbrɛ̀ nyàntɛn hɔ̀n mɛ̀n ankà-dɔ̀.

⁴⁰ Tɛ́n ke ji le eci lɔ fɛn kɛ̀ hɔ́n ɔwá mɛ̀n mán owròlò mɛ̀n.