1 Korɛntɛ̀n anmàn-bɔ̀ 13 - Ɛmɛẅi ankà ankrànkràn 2003

Ɛcüɛ̀n

¹ Bɔ̀ tro ke dú kɛ mɛ vrá anwrɔnẅì brɛ̀, kɩ mɛ vrá Ɔwɔ-kùyüre-bɔ̀ brɛ̀ mán: ke dú kɛ mɛ̀n sɩ̀ ẅɛ̀n ɛcüɛ̀n, mɛ̀n sɩ̀ dù eci zriɛmɛ́n, mɛ́n dù mɛ̀n cá pritù-ẅì léyi ke shrì mán yaka léyi ke di nkù nɔn hɔ́.

² Mɛ lɛ dɔ́ Ɔwɔ mɛẅi ankà léyi mɛ́n cɔ̀ nɔn, mɛ lɛ ẅɛn ankà-nyrì lɔ fɛn, ô mɛ̀n yá anvɛmɛ̀n-frɛ́n-ci hɔ̀n lɔ fɛn y'ɛmɛ̀n ankà, mɛ lɛ ẅɛn ankaẅì-bùtan kɛ lɛ hán tán mɛ̀n frɛ́ ɛnkpò hɔ̀n lɔ fɛn mɛ̀n hɛ́n ɛyri nyàntɛn, ke dú kɛ mɛ̀n sɩ̀ ẅɛ̀n ɛcüɛ̀n, mɛ̀n sɩ̀ dù eci zriɛmɛ́n.

³ Mɛ lɛ dɛ́ m'ɛci-ẅɛn-ci hɔ̀n lɔ fɛn mɛ̀n tán ɔmùanwu-bɔ̀ kɩ me le bɩ́ m'edùwrú mɛ̀n tán ɛnhyà, ke dú kɛ mɛ̀n sɩ̀ ẅɛn ɛcüɛ̀n, ndɔ lɔ dú eci woro.

⁴ Ɔwrɔn léyi ẅɛn ɛcüɛ̀n nɔn, nɛ̀n dú ɛnbɔrɛ-ẅɛ̀n-hɛ́n-wrɔn kɩ nɛ̀n zrɔ, ɔwrɔn-ci ke sɩ́ cüɛn nɛ̀n ɛvɛ̀, nɛ́n sɩ́ gbú ɔmùan kɩ nɛ́n sɩ́ hán ɛgbúgbú-ci;

⁵ Ɔwrɔn léyi ẅɛn ɛcüɛ̀n nɔn, nɛ́n sɩ́ hán anvɛvrà-ci, nɛ̀n sɩ̀ ẅɛ̀n kɔtɛ̀, nɛ́n sɩ́ bɩ́ ɛmɛ̀nhyì kɩ nɛ́n sɩ́ wá ankà ɛmɛ̀ntɛ̀ mɛ̀n;

⁶ Ɔwrɔn léyi ẅɛn ɛcüɛ̀n nɔn, nɛ́n sɩ́ brá ɛgbàn pɔpüɛ̀, nɛ brá annanwɔrɛ pɔpüɛ̀.

⁷ Ɔwrɔn léyi ẅɛn ɛcüɛ̀n nɔn, nɛ ẅɛn ɛnbɔrɛ hɛ́n eci lɔ fɛn mɛ̀n, kɩ nɛ ẅɛn ankaẅì-bùtan, esɛ́ mán ɛnbɔrɛ-ẅɛ̀n-hɛ́n ɛnvra lɔ fɛn mɛ̀n.

⁸ Ɛcüɛ̀n kè sɩ̀ ẅɛ̀n ɔtrɔ. Ɔwɔ mɛẅi ankà-dɔ̀ kɛ lɛ trɔ ɛnbì tɔ̀n, ankà-dɔ̀ cice léyi Ɛnhɛ́n Prɔnprɔn kɛ tán bɔ̀ ɛnbrɛ̀ nyàntɛn vrá mɛ̀n nɔn mán kɛ lɛ trɔ, eci-nyrì kɛ lɛ zrɛ́n.

⁹ Annanwɔrɛ mɛ̀n lɔ, bɔ́ eci-nyrì lɔ kè sɩ̀ sɛ́n nmù kɩ b'Ɔwɔ mɛẅi ankà-dɔ̀ ẅɛn ɔvɔ̀n;

¹⁰ Tɛ́n ɛnvra léyi nmù-sá ci lɔ kɛ lɛ và nɔn, eci léyi kè sɩ̀ sɛ̀n nmù nɔn kɛ lɛ zrɛ́n.

¹¹ Ɛnvra léyi mɛ̀n dú ɛnẅì-cɛ nɔn, mɛ dɔ́ ankà, me tro ankà kɩ me bú ankà ɛnkruemɛ̀n kɛ hán ɛnẅì-cɛ hɔ́; tɛ́n ɛnvra léyi mɛ̀n srɔ ɛcüìcüì nɔn, mɛ́n teze ɛnẅì-cɛ ci-hán-ci lɔ fɛn.

¹² Zɛtɛ̀ lɔ, bɔ́ kán picɛ̀ tɔ̀n kɛ hán tùhɔ̀n kɛ cá zɛnci gbànvri mɛ̀n picɛ̀ hɔ́; kɩ zɛtɛn bɔ́ lɛ kán b'anvɛẅìemɛ̀n kpete. Zɛtɛ̀ lɔ m'eci-nyrì kè sɩ̀ sɛ́n nmù; kɩ zɛtɛn, me le nyri Ɔwɔ kokrohô, kɛ lɛ hán ɔmu le nɛ́n dùku mán nɛ̀n nyri mɛ̀n nɔn hɔ́.

¹³ Zɛtɛ̀ lɔ, ɛci anhɔ̀n ndɔ hɔ̀n lɔ ndù; ankaẅì-bùtan, esɛ́ mán ɛcüɛ̀n; tɛ́n yɔ, ɛci anhɔ̀n lɔ, y'ecüìcüì dú ɛcüɛ̀n.