ཏི་ཏུས་ལེའུ་ 3 - རྫོང་ཁ་

ལཱ་ལེགས་ཤོམ་འབད་དགོ་པའི་སྐོར།

¹ ཁྱོད་ཀྱིས་དདཔ་ཅན་ཚུ་ལུ་ གཞུང་གི་འགོ་དཔོན་དང་ རང་ལས་མཐོ་བའི་ གོངམ་དེ་ཚུ་གི་འོག་ལུ་སྡོད་ནི་དང་ བཀའ་ལུ་ཉན་ནི་དང་ རྟག་བུ་རང་ལཱ་ལེགས་ཤོམ་འབད་ནི་གི་དོན་ལུ་ གྲ་སྒྲིག་སྦེ་སྡོད་ནི་དང་།

² རོགས་ལུ་སྐྱོན་བཏག་ནི་མེདཔ་དང་ འཐབ་འཛིང་འབད་ནི་མེདཔ་དང་ མི་ག་ར་ལུ་ཉམ་ཆུང་ཏོག་ཏོ་སྦེ་ ཞེ་ས་འབད་དགོ་ཟེར་དྲན་བསྐུལ་འབད།

³ ག་ཅི་སྨོ་ཟེར་བ་ཅིན་ དུས་ཚོད་གཅིག་གི་ཚེ་ལུ་ ང་བཅས་ཡང་དཀོན་མཆོག་གི་སྐོར་ལས་ མ་ཤེས་མི་དང་ ཁོ་གི་བཀའ་ལུ་མ་ཉན་མི་དང་ མགུ་བསྐོར་ནང་ཚུད་མི་དང་ འདོད་ཆགས་མ་གཅིགཔ་ལེ་ཤ་གི་གཡོགཔོ་སྦེ་སྡོད་མི་དང་ རོགས་ལུ་ཞན་སེམས་བསྐྱེད་སྡོད་མི་ དེ་ལས་ ང་བཅས་རོགས་ལུ་མ་དགའཝ་ལས་བརྟེན་ཏེ་ རོགས་ཀྱིས་ཡང་ང་བཅས་ལུ་མ་དགའ་བར་སྦེ་ སྡོད་སྡོདཔ་ཨིན།

^4-5 དེ་འབདཝ་ད་ང་བཅས་ཀྱི་ སྐྱབས་མགོན་དཀོན་མཆོག་གི་ ཐུགས་རྗེ་དང་བྱམས་པ་ཕྱི་ཁར་བཏོན་གནང་སྟེ་ ཁོ་གིས་ང་བཅས་ལུ་སྐྱབས་མཛད་ཅི་ དེ་སྦེ་བྱུང་མི་འདི་ང་བཅས་རང་གི་ ལཱ་ལེགས་ཤོམ་འབདཝ་ལས་བརྟེན་ཏེ་མེན་ དེ་འབདཝ་ད་ ཁོ་གིས་ང་བཅས་ལུ་ སྙིང་རྗེ་གཟིགས་ཏེ་ ང་བཅས་ཀྱི་སྡིག་པ་བཀའ་དྲིན་བསྐྱང་སྟེ་ དམ་པའི་ཐུགས་ཉིད་ཀྱི་ཐོག་ལས་སྦེ་ མི་བརྒྱུད་གསརཔ་དང་ སྐྱེ་བ་གསརཔ་གནང་ཡི།

⁶ དཀོན་མཆོག་གིས་སྐྱབས་མགོན་ཡེ་ཤུ་ཁིརཱིས་ཀྱི་ཐོག་ལས་སྦེ་ ང་བཅས་ལུ་དམ་པའི་ཐུགས་ཉིད་མ་ལང་ལངམ་སྦེ་གནང་ཡི།

⁷ ཨ་ནི་དེ་ དཀོན་མཆོག་གི་ཐུགས་རྗེ་ལས་སྦེ་ ང་བཅས་ལུ་ཁོ་གི་ཐུགས་དགྱེས་མིའི་མི་ཚུ་མཛད་དེ་ ཚེ་མཐའ་མེདཔ་འདི་ཤུལ་འཛིན་པ་ཚུ་གིས་ཐོབ་ཟེར་ ཐེ་ཚོམ་མེད་པར་རེ་བ་བསྐྱེད་དེ་ སྡོད་ནི་གི་དོན་ལུ་ཨིན།

⁸ ང་གིས་སླབ་མི་དེ་ བདེན་པ་དང་ཆ་བཞག་ཚུགས་མི་གཅིག་ཨིན་ ཨ་ནི་ལོ་རྒྱུས་ཚུ་ལུ་ཁྱོད་ཀྱིས་གཙོ་བོ་བསྟེན་ཏེ་ དཀོན་མཆོག་ལུ་དད་པ་བསྐྱེད་མི་ཚུ་ལུ་སྟོན་བྱིན་འོང་ཟེར་ང་ལུ་འདོད་པ་ཡོད་ དེ་ལས་དདཔ་ཅན་ཚུ་དུས་སྐབས་བར་སྟོར་མ་བཏང་པར་ ལཱ་བཟང་པོ་ལུ་སེམས་བཙུག་དགོ་ དེ་ལས་ཨ་ནི་དེ་ཚུ་ མི་ག་ར་གི་དོན་ལུ་ ཕན་པ་དང་ལེགས་ཤོམ་ཨིན།

⁹ དེ་འབདཝ་ད་ ཁྱོད་ཁུངས་ག་ནི་ཡང་མེད་པའི་འདྲི་ལན་ཚུ་དང་ ཧེ་མ་ཕ་བརྒྱུད་ཚུ་གི་དོན་དག་མེད་པའི་གཏམ་ཚུ་དང་ དེ་ལས་བཀའ་ཁྲིམས་ཀྱི་སྐོར་ལས་ མ་སྒྲིགས་པར་རྩོད་གཞི་ཕྱེ་ནི་དང་ ཁ་ཤགས་བརྐྱབ་ནི་ཚུ་ལུ་ ཡ་མ་འབད་ ག་ཅི་སྨོ་ཟེར་བ་ཅིན་ འདི་ཚུ་ནང་ལས་ ཕན་པ་ག་ནི་ཡང་མེདཔ་མ་ཚད་ དོན་དག་ག་ནི་ཡང་མེདཔ་ཨིན།

¹⁰ ཆོས་ཚོགས་ནང་ ནང་འཁྲུག་སློངས་མི་ཚུ་ལུ་རྣ་བ་སྐྱེལ་དགོ་ དེ་ལས་ཁོང་ལུ་ཚར་གཉིས་སླབ་སྟེ་ ཉན་མ་བཏུབ་པ་ཅིན་ ཁོང་དང་གཅིག་ཁར་ འབྲེལ་བ་ག་ནི་ཡང་མ་འཐབ།

¹¹ འདི་བཟུམ་གྱི་མི་ རང་གིས་རང་ལུ་མེདཔ་གཏང་མིའི་མི་ངན་པ་དང་ སྡིག་ཅན་ཨིན་ཟེར་ཁྱོད་ཀྱིས་ཤེས་དགོ།།

བཀོད་རྒྱ་གཞན་ཚུ་དང་བྱིན་རླབས་ཞུ་བའི་སྐོར།

¹² ང་གིས་ ཨཱར་ཏེ་མཱས་དང་ ཏི་ཀི་ཀུས་གཉིས་ལས་གཅིག་ ཁྱོད་སྡོད་ས་གཏང་དོ་ ཁོ་ཕར་ལྷོདཔ་ད་ཁྱོད་ ང་སྡོད་སའི་ཁྲོམ་ ནི་ཀོ་པོ་ལཱིས་ལུ་ འོང་ནི་ལུ་རྩ་འགེངས་ ག་ཅི་སྨོ་ཟེར་བ་ཅིན་ ང་གནམ་དགུན་ཕར་ལུ་སྡོད་ནི་སྦེ་ཐག་བཅད་ཅི།

¹³ ཁྱོད་ཀྱིས་ཁྲིམས་རྩོདཔ་ ཟེ་ནཱས་དང་ ཨ་པོ་ལཱོས་གཉིས་མཚོ་གླིང་ ཀིརཱིད་ལས་ལོག་འགྱོཝ་ད་ ཁོང་ལུ་ག་དེ་དྲག་དྲག་རོགས་རམ་འབད་བྱིན་ ཁོང་ལུ་ལམ་ཁར་ཁག་ཆེཝ་ ག་ཅི་དགོ་རུང་སྐྱེལ་གཏང་།

¹⁴ ང་བཅས་ཀྱི་དདཔ་ཅན་ཚུ་གིས་ མི་ཚུ་གི་ཁག་ཆེཝ་ཚུ་སྒྲུབ་ནིའི་དོན་ལུ་ ལཱ་ལེགས་ཤོམ་འབད་ནི་ལུ་ རྩ་འགེངས་ཏེ་ལྷབ་དགོ་ དེ་ལས་ཁོང་ཁུངས་ག་ནི་ཡང་མེདཔ་སྦེ་མི་སྡོད།

¹⁵ མཐའན་མཇུག་ལུ་ ང་དང་ཆ་ཡོད་མི་ག་ར་གིས་ ཁྱོད་ལུ་སྐུ་གཟུགས་བཟང་པོ་ཟེར་ཞུ་དོ་ དེ་ལས་ང་བཅས་ཀྱི་ཁ་ཐུག་ལས་ ཕར་གྱི་དདཔ་ཅན་ཆ་རོགས་ཚུ་ལུ་ཡང་ སྐུ་གཟུགས་བཟང་པོ་ཟེར་སླབ་བྱིན་ དཀོན་མཆོག་གི་ཐུགས་རྗེ་ཁྱེད་ག་ར་དང་གཅིག་ཁར་བཞུགས་བཅུག། །།