ཏི་ཏུས་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ དཀོན་མཆོག་གིས་བཙག་འཐུ་མཛད་མི་ཚུ་ལུ་ དད་པ་བསྐྱེད་བཅུག་ནི་གི་དོན་ལུ་དང་ ཆོས་སེམས་བསྐྱེད་ནི་སྦེ་ བདེན་པའི་ཆོས་སྟོན་མི་ཚུ་ ཧ་གོ་བཅུག་ནི་གི་དོན་ལུ་ ང་ པའུལ་ལུ་ དཀོན་མཆོག་གི་ཕྱག་ཞུ་མི་དང་ ཡེ་ཤུ་ཁིརཱིས་ཀྱི་སྐུ་ཚབ་སྦེ་ གཏང་གནང་གནངམ་ཨིན།

² ཨ་རྟག་རང་བདེན་པ་གསུངས་མི་དཀོན་མཆོག་གིས་ འཛམ་བུ་གླིང་མ་མཛད་པའི་ཧེ་མ་ལས་ ཚེ་མཐའ་མེདཔ་གནང་ནི་ཨིན་ཟེར་ ཞལ་གྱི་བཞེས་མི་དེ་ལུ་ དདཔ་ཅན་ཚུ་གིས་ ཐེ་ཚོམ་མེད་པར་རེ་བ་བསྐྱེདཔ་ཨིནམ་མ་ཚད།

³ དུས་ཚོད་ཀྲིག་ཀྲི་ལུ་དཀོན་མཆོག་གིས་ ཆོས་བཤད་པའི་ཐོག་ལས་ ཁོ་རའི་གཏམ་བཟང་འདི་ཕྱི་ཁར་བཏོན་གནང་ནུག་ སྐྱབས་མགོན་དཀོན་མཆོག་གི་བཀའ་གིས་ མི་ཚུ་ལུ་ ཨ་ནི་གཏམ་བཟང་འདི་བཤད་དགོཔ་སྦེ་ ང་ལུ་བཅོལ་གནང་ཡི།

⁴ དབའེ་ ཏི་ཏུས་ ང་བཅས་དད་པ་གཅིག་ནང་ཡོད་མི་ ངེ་གི་བདེན་པའི་བུ་ ཁྱོད་ལུ་ཨ་ནི་ཡི་གུ་འདི་འབྲི་དོ་ ཡབ་དཀོན་མཆོག་དང་ ང་བཅས་ཀྱི་སྐྱབས་མགོན་ ཁིརཱིས་ཡེ་ཤུ་གིས་ ཁྱོད་ལུ་ཐུགས་རྗེ་དང་ཞི་བདེ་གནང་བཅུག།

ཏི་ཏུས་ཀྱིས་འབད་དགོ་པའི་སྐོར།

⁵ ང་གིས་ཁྱོད་ལུ་ མཚོ་གླིང་ ཀིརཱིད་ལུ་ ཤུལ་ལས་བཞག་མི་དོན་དག་དེ་ འབད་མ་ཚར་བའི་ལཱ་ཚུ་ ཚར་ནི་དང་ ཁྲོམ་རེ་རེ་ནང་ ང་གིས་སྟོན་མི་བཀོད་རྒྱ་ལྟར་དུ་ ཆོས་ཚོགས་ཀྱི་འགོ་འདྲེན་པ་ཚུ་ བཙག་འཐུ་འབད་ནི་གི་དོན་ལུ་ཨིན།

⁶ ཆོས་ཚོགས་ཀྱི་འགོ་འདྲེན་པ་འདི་ སྐྱོན་ག་ནི་ཡང་མེདཔ་དང་ ཨམ་སྲུ་གཅིག་གི་རྨགཔ་འབད་མི་དང་ ཁོ་གི་བུ་དང་བུམོ་ཚུ་ དད་པ་བསྐྱེད་མི་དང་ ཁོ་གི་ཨ་ལོ་ཚུ་ སྤྱོད་ལམ་གཟབ་ཏོག་ཏོ་འབད་མི་ དེ་ལས་ཕམ་གྱི་ཁ་ལུ་ཉན་མི་ རོགས་ཀྱིས་ཁ་གཏང་མ་ཚུགས་མི་ཚུ་དགོཔ་ཨིན།

⁷ ག་ཅི་སྨོ་ཟེར་བ་ཅིན་ ཆོས་ཚོགས་ཀྱི་འགོ་འདྲེན་པ་འདི་ལུ་ དཀོན་མཆོག་གི་ཕྱག་ལཱ་གི་འགན་ཁག་ བཀལ་གནང་མི་ཨིནམ་ལས་ ཁོ་ལུ་སྐྱོན་བཏག་མི་ག་ཡང་མེད་མི་དང་ རོ་རྔམ་མེད་མི་དང་ ཙིགཔ་ཟ་ནི་ལུ་མགྱོགས་དྲགས་མེད་མི་དང་ ཆང་མ་འགྲངས་མི་དང་ ཉེས་སྤྱོད་མ་འབད་མི་ དེ་ལས་འབབ་ཁུངས་བཟོ་ནིའི་དོན་ལུ་ངན་ལྷད་ལུ་ཡ་མ་འབད་མི་གཅིག་དགོཔ་ཨིན།

⁸ དེ་འབདཝ་ད་ ཁོ་མགྱོནམ་ལུ་མཐོང་བསྐྱེད་མི་དང་ ལཱ་ལེགས་ཤོམ་འབད་ནི་ལུ་ སེམས་དགའ་མི་དང་ མཚམས་ཚོད་ཤེས་མི་དང་ ཕྲངམ་འབད་མི་དང་ དམ་པ་སྦེ་སྡོད་མི་ དེ་ལས་སྒྲིགས་ལམ་ལུ་ གནས་མི་གཅིག་དགོཔ་ཨིན།

⁹ ང་བཅས་ཀྱིས་སྟོན་མི་གཏམ་བཟང་ལྟར་དུ་ ཁོ་གིས་ བདེན་པ་དང་ཆ་བཞག་ཚུགས་མི་ཆོས་ཚུ་ ཀྲིག་ཀྲི་སྦེ་སྲུང་སྡོད་ནི་ཨིནམ་ལས་བརྟེན་ཏེ་ ཁོ་གིས་དདཔ་ཅན་ཚུ་ལུ་ གཞི་བརྟན་ཏོག་ཏོ་ སྟོན་ཚུགསཔ་ཨིནམ་མ་ཚད་ གཞི་བདེན་པ་ལུ་ སྐྱོན་བཏག་མི་ཚུ་ལུ་ཡང་ བཀག་ཚུགས་མི་གཅིག་དགོཔ་ཨིན།།

འཚོ་གླིང་ ཀིརཱིད་ལུ་ཡོད་མི་ ཡ་ཧུ་ད་པའི་དདཔ་ཅན་ཚུ་གི་སྐོར།

¹⁰ ག་ཅི་སྨོ་ཟེར་བ་ཅིན་ བདེན་པའི་ཆོས་ལུ་ ངོ་རྒོལ་འབད་མི་ ལེ་ཤ་ཅིག་རང་ཡོད་ ཁོང་མི་ཚུ་ལུ་ ཕན་ཐོགས་ག་ནི་ཡང་མེད་མི་ ཆོས་ཚུ་སྟོན་མི་དང་ མགུ་བསྐོར་ནང་བཙུག་མི་ཚུ་ཨིན་ འདི་བཟུམ་སྦེ་ཁག་ཆེ་བ་རང་ ཡ་ཧུ་ད་པ་ཚུ་གི་ལུགས་སྲོལ་གྱི་རྟགས་ ཨིན་ཅི་མིན་ཅི་ བཀལ་དགོ་ཟེར་མི་ཚུ་ཨིན་མས།

¹¹ ཁོང་ལུ་འདི་བཟུམ་གྱི་ ཆོས་སྟོན་ནི་ལས་བཀག་དགོ་ ག་ཅི་སྨོ་ཟེར་བ་ཅིན་ ཁོང་གིས་ངོ་ཚ་ནི་མེད་པར་ ཏི་རུ་བཟོ་ནི་གི་ཐབས་ལུ་ སྟོན་མ་བཏུབ་པའི་ཆོས་ཚུ་སྟོན་ཏེ་ བཟའ་ཚང་ལ་ལུ་ཅིག་ནང་ ནང་འཁྲུག་བཙུག་སྟེ་ ཆོས་བདེན་པ་ལུ་ དོགས་པ་ཟ་བཅུགཔ་ཨིན་མས།

¹² ཀིརཱིད་པ་གི་མི་ཚུ་ ཨ་རྟག་རང་ཤོབ་རྐྱབ་མི་དང་ རི་དྭགས་སེམས་ཅན་བཟུམ་སྦེ་ ཁམས་ལོག་སི་སི་དང་སྒྱིད་ངན་ ཟ་སྟེ་འགྲང་ནི་མེད་མི་ཚུ་ཨིན་ཟེར་ ཁོང་རང་གི་གྲལ་ཁ་ལས་ ལུང་སྟོན་པ་གཅིག་གིས་ སླབ་མི་འདི་ དོན་ལས་རང་ཨིན་མས།

¹³ དེ་འབདཝ་ལས་ ཁོང་དད་པ་ནང་སྒྲིང་སྒྲིང་སྦེ་འགྱོ་ནིའི་དོན་ལུ་ ཚོགས་བརྡ་རྩུབ་དྲགས་སྦེ་གཏང་དགོ།

¹⁴ དེ་ལས་བདེན་པ་ལུ་མ་ཉན་མི་ཚུ་གི་ཁྲིམས་ལུགས་དང་ ཡ་ཧུ་ད་པ་ཚུ་གི་དོན་དག་མེད་པའི་གཏམ་ཚུ་ནང་ སེམས་བཙུགས་མ་བཅུག

¹⁵ བཙོག་གྲིབ་དགཔ་བཟོ་རུང་ མ་བཟོ་རུང་ སེམས་གཙངམ་ཡོད་མི་ཚུ་གི་དོན་ལུ་ ག་ར་གཙངམ་ཨིན་ དེ་འབདཝ་ད་ སེམས་མ་གཙངམ་དང་ དད་པ་མ་བསྐྱེད་མི་ཚུ་གི་དོན་ལུ་ བཙོག་གྲིབ་དགཔ་བཟོ་རུང་རང་ གཙངམ་ག་ནི་ཡང་མེད་ དོན་ལས་རང་ ཁོང་གིས་ངན་པ་འབད་རུང་ འགྱོད་སེམས་མི་བསྐྱེད་ ག་ཅི་སྨོ་ཟེར་བ་ཅིན་ བཟང་པོ་དང་ངན་པ་ དབྱེ་བ་ཕྱེ་ནི་གི་ཤེས་རབ་ ཁོང་ནང་མེད་ ཁོང་གྲིབ་ཅན་བཟུམ་སྦེ་ཨིན།

¹⁶ ཁོང་གིས་ དཀོན་མཆོག་དང་གཞན་འབྲེལ་ཡོད་ཟེར་སླབ་ཨིན་ དེ་འབདཝ་ད་ ཁོང་གིས་ དཀོན་མཆོག་ངོ་མི་ཤེས་པས་ཟེར་ ཁོང་གི་འབད་བཞག་བཅའ་བཞག་ལས་ཧ་གོ་ ཁོང་དཀོན་མཆོག་གི་དོན་ལུ་ ཁམས་ཕོག་རྐྱབ་སི་སི་དང་ དཀོན་མཆོག་གི་བཀའ་ལུ་མ་ཉན་མི་ དེ་ལས་ལཱ་བཟང་པོ་ག་ནི་ཡང་འབད་མ་ཚུགས་མི་ཚུ་ཨིན།།