རོམ་མི་ལེའུ་ 9 - རྫོང་ཁ་

ཡ་ཧུ་ད་པ་ལུ་བཙག་འཐུ་མཛད་གནང་བའི་སྐོར།

¹ ང་གིས་ཤོབ་མ་རྐྱབ་པར་ཕྲང་སླབ་དོ་ ག་ཅི་སྨོ་ཟེར་བ་ཅིན་ ང་གིས་སླབ་མི་དང་ ཐུགས་ཉིད་ཀྱིས་གསུངས་མི་འདི་ གཅིག་སྦེ་མཐུནམ་ཨིནམ་མ་ཚད་ ང་ཁིརཱིས་ཀྱི་ཨིན།

² ངེ་གི་སེམས་ཁར་གྱི་མྱ་ངན་དང་སྡུག་བསྔལ་དེ་ ནམ་ཡང་དྲག་ནི་མེད་པའི་ན་ཟུག་བཟུམ་སྦེ་ ཟུག་བརྐྱབས་ཏེ་ཡོད།

³ ག་ཅི་སྨོ་ཟེར་བ་ཅིན་ ངེ་གི་མི་རིགས་ ཡ་ཧུ་ད་པའི་སྤུན་ཆ་ཚུ་སྐྱབས་མཛད་ནིའི་དོན་ལུ་ ང་རང་ཆདཔ་ཕོག་སྟེ་ ཁིརཱིས་དང་ཁ་འབྲལ་སོང་རུང་ ང་ལུ་བློ་འགྱོད་མེད།

⁴ ཨཱིས་ར་ཨཱེལ་པ་ཚུ་དཀོན་མཆོག་གིས་ཁྱད་པར་ཅན་མཛད་དེ་ཡོད་ ཁོང་དཀོན་མཆོག་གི་སྲས་དང་སྲསམོ་སྦེ་ འོས་འབབ་ཐོབ་མི་ཚུ་ཨིནམ་མ་ཚད་ ཁོང་དཀོན་མཆོག་གི་གཟི་བརྗིད་དེ་ ལོག་ཅི་ལོག་ཅི་མཐོང་མི་ཚུ་ཨིན་ ད་རུང་དཀོན་མཆོག་གིས་ ཁོང་དང་ཞལ་འཆེས་བཞེས་ཏེ་ ཁོང་བཀའ་ཁྲིམས་ཡང་ཐོབ་མི་ཚུ་དང་ དཀོན་མཆོག་ལུ་བསྟོད་པ་གཏང་རག་ཕུལ་ནི་གི་ཁ་བཀོད་ཡང་ཐོབ་མི་ཚུ་དང་ ཁོང་དཀོན་མཆོག་གིས་ཁས་བླངས་ཚར་ལེ་ཤ་བཞེས་གནང་མི་ཚུ་ཡང་ཨིན།

⁵ ཨབ་ར་ཧམ་དང་ ཨི་སག་དང་ ཡ་ཀོབ་ ཕ་བརྒྱུད་སྙན་གྲགས་ཅན་བརྩིས་མི་ཚུ་ ཁོང་ ཡ་ཧུ་ད་པའི་ཕ་བརྒྱུད་ཚུ་ཡང་ཨིན་ དེ་ལས་དཀོན་མཆོག་གིས་ བཙག་འཐུ་མཛད་མི་ཁིརཱིས་དེ་ ཁོ་རང་གི་སྐུ་ལུས་ཀྱི་རང་བཞིན་འདི་ ཡ་ཧུ་ད་པ་ཨིན་ ཁིརཱིས་འདི་ ག་ར་ལུ་དབང་མི་དཀོན་མཆོག་ཨིན་ དེ་ལས་དུས་རྒྱུན་དུ་ ཁོ་གི་མཚན་ཡར་ཡར་སྙན་གྲགས་འགྱོ་སྟེ་ བསྟོད་པ་གཏང་རག་ཐོབ་པའི་འོས་འབབ་ ཁོ་ལུ་ཡོད་ ཨ་མཱེན།

⁶ དེ་འབདཝ་ད་ངེ་གི་སྤུན་ཆ་ ཨཱིས་ར་ཨཱེལ་པ་དེ་ཚུ་གིས་ཁིརཱིས་ལུ་ཆ་མ་བཞག་རུང་ དཀོན་མཆོག་གི་ཁས་བླངས་བཞེས་མི་འདི་ཚུ་མ་སྒྲུབ་མིན་འདུག་ ག་ཅི་སྨོ་ཟེར་བ་ཅིན་ཁོང་ ཨཱིས་ར་ཨཱེལ་པ་དེ་ཚུ་ག་ར་ ཡ་ཀོབ་ཀྱི་བུ་བརྒྱུད་ཨིན་རུང་ ཁོང་ལ་ལུ་ཅིག་ དཀོན་མཆོག་གིས་བཙག་འཐུ་གནང་མི་ ཨཱིས་ར་ཨཱེལ་པ་ངོ་མ་མེན་པས།

⁷ འདི་བཟུམ་སྦེ་ ཨབ་ར་ཧམ་གྱི་རྒྱུད་ལས་སྐྱེས་འོང་མི་བུ་བརྒྱུད་ག་ར་ ཨབ་ར་ཧམ་གྱི་བུ་བརྒྱུད་ངོ་མ་སྦེ་མི་བརྩི་ ག་ཅི་སྨོ་ཟེར་བ་ཅིན་ གསུང་རབ་ནང་དཀོན་མཆོག་གིས་ ཨབ་ར་ཧམ་ལུ་གསུངས་མི་གི་སྐོར་ལས། ཨི་སག་ལས་རྒྱུད་འོང་མི་དེ་རྐྱངམ་གཅིག་ ཁྱོད་ཀྱི་བུ་བརྒྱུད་ངོ་མ་སྦེ་རྩིཝ་ཨིན་ཟེར་ བྲིས་ཏེ་ཡོད།

⁸ འདི་གི་དོན་དག་དེ་ ཨབ་ར་ཧམ་གྱི་ཤ་རུས་ལས་འོང་མི་བུ་བརྒྱུད་ཚུ་ ཨིན་ཅི་མིན་ཅི་ དཀོན་མཆོག་གི་བུ་སྦེ་བརྩི་མི་ཚུགས་ དེ་འབདཝ་ད་ དཀོན་མཆོག་གིས་ཁས་བླངས་བཞེས་མི་གི་རྒྱུད་ལས་ སྐྱེས་འོང་མི་བུ་ཚུ་རྐྱངམ་གཅིག་ བུ་བརྒྱུད་ངོ་མ་སྦེ་བརྩི་ནི་ཨིན།

⁹ ག་ཅི་སྨོ་ཟེར་བ་ཅིན་ དཀོན་མཆོག་གིས་ཁས་བླངས་དེ་སྦེ་བཞེས་ནུག སང་ཕོད་ཀྱི་ལོ་ནང་ དུས་ཚོད་ཨ་ནི་བཟུམ་གཅིག་ཁར་ང་ལོག་འོངམ་ད་ ས་ར་གིས་བུ་གཅིག་ སྐྱེ་སྡོད་འོང་ཟེར་གསུངས་ནུག

¹⁰ འདི་གིས་མ་ཚད་ རེ་བེ་ཀ་གིས་ཡང་ ང་བཅས་ཀྱི་ཕ་བརྒྱུད་ ཨི་སག་ལས་ཨ་ལོ་ཆགས་ཏེ་ བུ་མཚེ་མ་སྐྱེས་ནུག

^11-12 བུ་མཚེ་མ་མ་སྐྱེཝ་ལས་ ཁོང་གིས་ལེགས་ཤོམ་དང་ཟོགཔོ་མ་འབད་བའི་ཧེ་མ་ལས་ དཀོན་མཆོག་གིས་ རེ་བེ་ཀ་ལུ། བུ་སྦོམ་ཤོས་ཀྱིས་ ཆུང་ཤོས་ཀྱི་གཡོག་རྒྱུག་འོང་ཟེར་ གསུངས་ནུག་ དེ་སྦེ་གསུངས་མིའི་དོན་དག་དེ་ དཀོན་མཆོག་གིས་བཙག་འཐུ་མཛད་གནང་མི་དེ་ ཁོང་གཉིས་ཀྱིས་འབད་མི་ལྟར་དུ་མེན་པར་ མི་ལུ་འབོ་མི་དཀོན་མཆོག་ ཁོ་རང་གི་འཆར་གཞི་དང་འཁྲིལ་ཏེ་ཨིན།

¹³ འདི་དང་མཐུནམ་ད། ང་གིས་ ཡ་ཀོབ་ལུ་དགའ་ནི་དང་ ཨི་སཝ་ལུ་མི་དགའ་ཟེར་ གསུང་རབ་ནང་བྲིས་ཏེ་འདུག

¹⁴ དེ་སྦེ་ཨིན་པ་ཅིན་ ང་བཅས་ག་ཅི་སླབ་ནི་ དཀོན་མཆོག་དེ་ཉེ་རིང་ཕྱེ་མི་གཅིག་ཨིན་ན་ དེ་སྦེ་མེན།

¹⁵ ག་ཅི་སྨོ་ཟེར་བ་ཅིན། ང་གིས་ག་དགའ་མི་ལུ་སྙིང་རྗེ་བསྐྱེད་ནི་ཨིན་ དེ་ལས་ང་གིས་ག་བཙག་འཐུ་འབད་མི་ལུ་ བརྩེ་བ་འབད་ནི་ཨིན་ཟེར་ དཀོན་མཆོག་གིས་ མོ་སཱེས་ལུ་གསུངས་ནུག

¹⁶ ཨ་ནི་གསུངས་མི་འདི་ མི་གིས་རྩ་འགེངས་ཏེ་ ལཱ་ལེགས་ཤོམ་འབད་བའི་ཐོག་ལས་མེན་ དེ་འབདཝ་ད་ དཀོན་མཆོག་གིས་སྙིང་རྗེ་བསྐྱེད་པའི་ཐོག་ལས་ཨིན།

¹⁷ གསུང་རབ་ནང་དཀོན་མཆོག་གིས་རྒྱལཔོ་ ཕེ་རོ་ལུ་ གསུངས་མི་གི་སྐོར་ལས་ དེ་སྦེ་བྲིས་ཏེ་ཡོད། ང་གིས་ཁྱོད་ལུ་ཡར་འཐེན་མི་གི་དོན་དག་དེ་ ངེ་གི་དབང་ཤུགས་ཁྱོད་ལས་རྒྱུད་དེ་ ག་ར་ལུ་སྟོན་ནི་ཨིནམ་མ་ཚད་ འཛམ་བུ་གླིང་ག་ར་ནང་ངེ་གི་མིང་ དར་ཁྱབ་འགྱོ་ནི་གི་དོན་ལུ་ཨིན།

¹⁸ དེ་ལས་ཁོ་གིས་སྙིང་རྗེ་མཛད་དགོ་མནོ་མི་ཚུ་ལུ་མཛད་གནངམ་ཨིན་ དེ་ལས་ཁོ་གིས་སེམས་སྲ་ཀྲག་བཟོ་དགོ་མནོ་མི་ལུ་ སེམས་སྲ་ཀྲག་མཛད་གནངམ་ཨིན།

¹⁹ དེ་སྦེ་འབད་བ་ཅིན་ ཁྱེད་ལ་ལུ་གིས་ དཀོན་མཆོག་གིས་ང་བཅས་ལུ་ ག་ཅི་འབད་ཉེས་སྐྱོན་བཏགསཔ་སྨོ་ དཀོན་མཆོག་གི་ཐུགས་དགོངས་ལུ་ ག་གིས་རྒོལ་ཚུགསཔ་ཟེར་སླབ་འོང་།

²⁰ དབའེ་མི་ཁྱོད་ དཀོན་མཆོག་ལུ་ལན་རྐྱབ་ཆོག་ག་ དཔེར་ན་ཅ་ཆས་ཚུ་གིས་ ཁོང་བཟོ་མི་ལུ་ ང་ལུ་ག་ཅི་འབད་ ཨ་ནི་བཟུམ་སྦེ་བཟོཝ་སྨོ་ཟེར་སླབ་འོང་ག།

²¹ གཅིག་ལས་འབདན་ འདམ་ཨང་གོང་གཅིག་ལས་རང་ གཅིག་འདི་ རྟེན་འབྲེལ་རྩི་སར་ ལག་ལེན་འཐབ་ནི་གི་དོན་ལུ་རྫམ་བཟོ་ནི་དང་ གཞན་འདི་ ཉིན་ལྟར་བཞིན་དུ་ལག་ལེན་འཐབ་ནི་གི་དོན་ལུ་ རྫམ་བཟོ་ནི་འདི་ རྫམ་མཁནམ་ལུ་དབང་ཚད་ཡོད་མེན་ན།

²² འདི་བཟུམ་སྦེ་རང་ དཀོན་མཆོག་གིས་ཆདཔ་ཕོག་དགོ་མི་ཚུ་ལུ་ ཐུགས་ཁྲོ་བོ་སྟོན་གནང་ནི་དང་ རྩ་མེད་གཏང་ནི་དབང་ཤུགས་ཡོད་ཟེར་ ཤེས་བཅུག་ནིའི་ཐུགས་བསམ་ཡོད་དེ་འབད་རུང་ དཀོན་མཆོག་བཟོད་པ་བསྒོམས་ཏེ་བཞུགས་ནུག

²³ དེ་སྦེ་བཞུགས་མི་དེ་ ཁོ་རའི་གཟི་བརྗིད་ དེ་ག་ཅི་དེས་ཅིག་སྦོམ་སྟོན་ནི་གི་དོན་ལུ་ཨིན་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཧེ་མ་ལས་ ག་ག་ལུ་སྙིང་རྗེ་བསྐྱེད་དོ་ག་ ཨ་ནི་འདི་ཚུ་ལུ་ཆདཔ་མ་གནང་པར་ ཁོ་རའི་གཟི་བརྗིད་ཀྱི་དོན་ལུ་གྲ་སྒྲིག་མཛད་ནུག

²⁴ དེ་ལས་ ཡ་ཧུ་ད་པ་འབད་རུང་རང་ ཕྱིའི་མི་རིགས་འབད་རུང་རང་ དཀོན་མཆོག་གིས་ང་བཅས་ལུ་གྲ་སྒྲིག་མཛད་དེ་འབོ་གནང་ཡི།

²⁵ ལུང་སྟོན་པ་ ཧོ་ཤེ་ཡ་གིས་ དཀོན་མཆོག་གི་གསུངས་མི་གི་སྐོར་ལས། ཧེ་མ་ངེ་གི་མི་མེན་མི་ཚུ་ལུ་ ངེ་གི་མི་སྦེ་བརྩི་ནི་ཨིན་ དེ་ལས་ཧེ་མ་ངེ་གི་གཅེས་གཅེས་ ཕངས་ཕངས་མེན་མི་ལུ་ ངེ་གི་གཅེས་གཅེས་ ཕངས་ཕངས་སྦེ་བརྩི་ནི་ཨིན།

²⁶ ད་རུང་ཧེ་མ་ཚར་གཅིག་ཁོང་ལུ་ ངེ་གི་མི་མེན་ཟེར་གསུངས་ས་ལུ་ ད་ཁོང་གསོན་པོའི་དཀོན་མཆོག་གི་ སྲས་དང་སྲསམོ་སྦེ་བརྩི་ནི་ཨིན་ཟེར་ བྲིས་ཏེ་ཡོད།

²⁷ ཨཱིས་ར་ཨཱེལ་གྱི་སྐོར་ལས་ལུང་སྟོན་པ་ ཨའི་ཟ་ཡ་གིས་སྐད་ཤུགས་སྦེ་བརྐྱབས་ཏེ། ཨཱིས་ར་ཨཱེལ་པ་གི་གྱངས་ཁ་དེ་ རྒྱ་མཚོ་གི་བྱེམ་བཟུམ་སྦེ་ཡོད་རུང་ ཐར་པ་ཐོབ་མི་གི་གྱངས་ཁ་དེ་ ཉུང་སུ་གཅིག་ལས་བརྒལ་མེད།

²⁸ ག་ཅི་སྨོ་ཟེར་བ་ཅིན་གཙོ་བོ་གིས་ འཛམ་བུ་གླིང་གི་མི་ཚུ་ལུ་གནང་མི་ཁྲིམས་འདི་ ཡོངས་སུ་རྫོགསཔ་སྦེ་གནང་ནི་དང་ འདི་ཡང་དེ་འཕྲོ་ལས་རང་མཛད་ནི་ཨིན།

²⁹ ཀུན་དབང་དཀོན་མཆོག་གིས་ ང་བཅས་ཀྱི་དོན་ལུ་ བུ་བརྒྱུད་བཞག་མ་གནང་པ་ཅིན་ ང་བཅས་ཡང་ཁྲོམ་ སོ་དོམ་དང་ གོ་མོ་ར་གི་མི་ཚུ་བཟུམ་སྦེ་རང་ རྩ་མེད་བཏང་བཏངམ་འོང་ཟེར་ ལུང་སྟོན་པ་ ཨའི་ཟ་ཡ་གིས་ལུང་བསྟན་བཤད་ནུག

³⁰ ད་ང་བཅས་ཀྱིས་ག་ཅི་སླབ་ནི་ ཕྱིའི་མི་རིགས་ཚུ་གིས་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་མི་དེ་ མ་འཚོལ་ཏེ་འབད་རུང་ དཀོན་མཆོག་གིས་ཁོང་ལུ་ ཁོ་རའི་ཐུགས་དང་ལྡནམ་ མི་ཕྲངམ་སྦེ་མཛད་གནང་ནུག་ དེ་སྦེ་མཛད་གནང་མི་འདི་ ཁོང་དད་པ་བསྐྱེད་པའི་རྒྱུད་ལས་ཨིན།

³¹ དེ་འབདཝ་ད་ ཨཱིས་ར་ཨཱེལ་པ་ཚུ་གིས་བཀའ་ཁྲིམས་སྲུང་སྟེ་ ག་དེ་ཅིག་རང་རྩ་འགེངས་ཏེ་འབད་རུང་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་འདི་ རྩ་ལས་རང་ཐོབ་མ་ཚུགས་པས།

³² ཁོང་གིས་ག་ཅི་འབད་མ་ཐོབ་སྨོ་ཟེར་བ་ཅིན་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་མི་འདི་ དད་པ་གི་རྒྱུད་ལས་སྦེ་མ་འཚོལ་བས་ དེ་འབདཝ་ད་ ཁོང་གིས་ལཱ་ལེགས་ཤོམ་དང་ བཀའ་ཁྲིམས་ཀྱི་སྒོ་ལས་འཚོལ་ཏེ་འགྱོཝ་ད་ རྡོ་གུ་རྐངམ་ཐོགས་ཏེ་འགྱེལ་དོཝ་བཟུམ་སྦེ་ཨིན།

³³ ལུང་སྟོན་པ་ ཨའི་ཟ་ཡ་གིས་གསུང་རབ་ནང་ལུ། ཉན་ཤིག་ ང་གིས་ ཟི་ཨཱོན་ལུ་རྡོ་གཅིག་ བཀལ་བཞག་ནི་ཨིན་ ཨ་ནི་རྡོ་འདི་གིས་ མི་ཚུ་གི་ལམ་བཀག་འོང་ དེ་ལས་ཁོང་དེའི་གུ་ལུ་ རྐངམ་ཐོགས་ཏེ་འགྱེལ་འོང་ དེ་འབདཝ་ད་ ཁོ་ལུ་དད་པ་བསྐྱེད་མི་དེ་ ངོ་ཚ་མི་བཅུག་ཟེར་ གསུངས་དོཝ་བཟུམ་སྦེ་རང་བྱུང་ནུག།