རོམ་མི་ལེའུ་ 6 - རྫོང་ཁ་

སྡིག་པའི་དབང་ལས་རྒྱལ་བའི་སྐོར།

¹ ང་བཅས་ཀྱིས་སྡིག་པ་འབད་དེ་ དཀོན་མཆོག་གི་ཐུགས་རྗེ་ཡར་འཕེལ་འགྱོ་ནི་ཨིན་པ་ཅིན་ ང་བཅས་ག་ཅི་སླབ་པ་ སྡིག་པ་འབད་དེ་རང་སྡོད་ནི་ཨིན་ན།

² དེ་སྦེ་མེན་ ང་བཅས་སྡིག་པའི་དབང་ལས་རྒྱལ་ཁ་ཐོབ་མི་ཚུ་ ད་རུང་ལོག་སྟེ་ག་དེ་སྦེ་སྡིག་པ་འབད་དེ་སྡོད་ནི་སྨོ།

³ ང་བཅས་ཁིརཱིས་ཡེ་ཤུ་ནང་ཁྲུས་གསོལ་ཞུ་མི་ཚུ་གིས་ ང་བཅས་ཡང་ཁིརཱིས་དང་གཅིག་ཁར་ཤི་དོཝ་བཟུམ་སྦེ་ཨིན་ཟེར་ ཁྱེད་ཀྱིས་མི་ཤེས་ག།

⁴ ཁིརཱིས་གཤགས་ཏེ་ དུར་ཁང་ནང་བཙུགས་དོཝ་བཟུམ་སྦེ་ ང་བཅས་ཡང་ཁོ་གི་ཁྲུས་གསོལ་ཞུཝ་ད་ ཁོ་དང་གཅིག་ཁར་ཤི་སྟེ་ དུར་ཁང་ནང་བཙུགས་དོཝ་བཟུམ་སྦེ་ཨིན་ དེ་འབདཝ་ད་ འདི་ལས་ཡང་ལྷགཔ་སྦེ་ ཡབ་དཀོན་མཆོག་གིས་ ཁོ་རའི་གཟི་བརྗིད་དང་ལྡན་པའི་ཤུགས་སྟོབས་གནང་བའི་རྒྱུད་ལས་ ཁིརཱིས་སྐུ་གསོན་པོ་སྦེ་བཞེང་དོཝ་བཟུམ་སྦེ་ ང་བཅས་ཡང་ཤི་ས་ལས་ མི་ཚེ་གསརཔ་ནང་སྡོད་ནི་སྦེ་ལྷོང་གནང་ཡི།

⁵ ག་ཅི་སྨོ་ཟེར་བ་ཅིན་ ང་བཅས་ཁོ་དང་གཅིག་ཁར་ཤི་ནི་ཨིན་པ་ཅིན་ དཀོན་མཆོག་གིས་ཁིརཱིས་སྐུ་གསོན་པོ་སྦེ་བཞེང་གནང་དོཝ་བཟུམ་སྦེ་ ང་བཅས་ཡང་ ཐད་རི་བ་རི་ཤི་ས་ལས་མི་ཚེ་གསརཔ་ནང་སྡོད་ནི་སྦེ་ལྷོང་གནང་ནི་ཨིན།

⁶ ཁིརཱིས་ཁྲམ་ཤིང་གུ་བཀྲོངས་དོཝ་བཟུམ་སྦེ་ ང་བཅས་ཀྱི་མི་ཚེ་རྙིངམ་འདི་ཡང་བསད་བཀོག་ཡི་ དེ་འབདཝ་ལས་ ང་བཅས་ཀྱི་ལུས་འདི་སྡིག་པའི་དབང་ལས་ཐར་ཏེ་ ད་རུང་སྡིག་པའི་འོག་ལུ་སྡོད་མི་དགོ་ཟེར་ང་བཅས་ཀྱིས་ཤེས།

⁷ ཤི་ཚར་མི་འདི་གིས་ ག་དེ་སྦེ་སྡིག་པ་འབད་ནི་སྨོ།

⁸ ཁིརཱིས་དང་གཅིག་ཁར་ཤི་བ་ཅིན་ ང་བཅས་ཁོ་དང་གཅིག་ཁར་གསོན་པོ་སྦེ་སྡོད་འོང་ཟེར་ ང་བཅས་ཀྱིས་དད་པ་བསྐྱེདཔ་ཨིན།

⁹ ག་ཅི་སྨོ་ཟེར་བ་ཅིན་ ང་བཅས་ཀྱིས་ཐད་རི་བ་རི་ཤེས་ ཁིརཱིས་གཤགས་ས་ལས་སྐུ་གསོན་པོ་སྦེ་བཞེངས་ཚརཝ་ད་ ད་རུང་ལོག་སྟེ་རྩ་ལས་རང་ཁོ་མི་གཤགས་ འཆི་བ་གིས་ཁོ་ལུ་མི་དབང་།

¹⁰ ཁོ་ཚར་གཅིག་གཤགས་མི་འདི་ སྡིག་པའི་དབང་ལས་རྒྱལ་བའི་དོན་ལུ་ཨིན་ ཁོ་ཨ་རྟག་རང་བཞུགས་མི་འདི་ དཀོན་མཆོག་གི་ཐུགས་དགྱེས་པའི་དོན་ལུ་ཨིན།

¹¹ འདི་བཟུམ་སྦེ་ ཁིརཱིས་ཡེ་ཤུ་གིས་མཛད་མི་ཕྱག་ལཱ་ལས་བརྟེན་ཏེ་ ཁྱེད་ཀྱིས་ཡང་སྡིག་པའི་དབང་ལས་རྒྱལ་ཏེ་ དཀོན་མཆོག་གི་ཐུགས་དགྱེས་པའི་དོན་ལུ་ སྡོདཔ་ཨིན་ཟེར་ ཁྱེད་ཀྱིས་མནོ་བསམ་གཏང་དགོ།

¹² འདི་གི་དོན་ལུ་ འདོད་པ་ལུ་ཆགས་ཏེ་ ཁྱེད་ཀྱི་ལུས་ལུ་སྡིག་པ་གིས་དབང་མ་བཅུག

¹³ སྡིག་པ་གི་གཡོག་རྐྱབས་ནི་སྦེ་ ཁྱེད་ཀྱི་ལུས་ཀྱི་ཡན་ལག་འདི་ ལཱ་ངན་པ་འབད་ནི་གི་ལག་ཆ་བཟོ་མ་བཅུག་ དེ་འབདཝ་ད་ ཤི་ས་ལས་ལྷོང་གནང་སྟེ་ མི་ཚེ་གསརཔ་ནང་སྡོད་མིའི་མི་སྦེ་ དཀོན་མཆོག་གི་ཕྱག་ཞུ་སྟེ་ ཁྱེད་ཀྱི་ལུས་ཀྱི་ཡན་ལག་རེ་རེ་བཞིན་དུ་ དཀོན་མཆོག་གི་ཐུགས་དགྱེས་མི་ལག་ཆ་སྦེ་ཕུལ་བཅུག

¹⁴ སྡིག་པ་དེ་གིས་ ཁྱེད་ལུ་དབང་བཅུག་ནི་མི་འོང་ ག་ཅི་སྨོ་ཟེར་བ་ཅིན་ ཁྱེད་བཀའ་ཁྲིམས་ཀྱི་འོག་ལུ་མེན་པར་ ཐུགས་རྗེ་གི་འོག་ལུ་ཨིན།།

དཀོན་མཆོག་གིས་ཐུགས་དགྱེས་མི་གཡོགཔོ་གཅིག་ལུ་བྱུང་བའི་སྐོར།

¹⁵ ད་དེ་སྦེ་ཨིན་པ་ཅིན་ ང་བཅས་ཀྱིས་ག་ཅི་འབད་ནི་སྨོ་ བཀའ་ཁྲིམས་ཀྱི་འོག་ལུ་མེན་པར་ ཐུགས་རྗེ་གི་འོག་ལུ་ཡོད་ཟེར་ སྡིག་པ་འབདཝ་ད་བཏུབ་ག་ དེ་སྦེ་རྩ་ལས་རང་མེན།

¹⁶ ཁྱེད་ག་གི་གཡོག་རྐྱབ་དོ་ག་ འདི་ཁྱེད་ཀྱི་སྦྱིན་བདག་ཨིན་ཟེར་མ་ཤེས་ག་ སྡིག་པའི་གཡོག་རྐྱབ་པ་ཅིན་ འཆི་བ་ལུ་འཁྱིད་འོང་ དཀོན་མཆོག་གི་བཀའ་ལུ་ཉན་པ་ཅིན་ མི་ཕྲངམ་སྦེ་འཐོན་འོང་།

¹⁷ དེ་འབདཝ་ད་ ང་བཅས་ཀྱིས་དཀོན་མཆོག་ལུ་བཀའ་དྲིན་ཆེ་ཟེར་ཞུཝ་ཨིན་ ག་ཅི་སྨོ་ཟེར་བ་ཅིན་ ཧེ་མ་ཁྱེད་སྡིག་པའི་གཡོགཔོ་ཨིན་ཏེ་འབད་རུང་ ད་རེས་སྐབས་ ཁྱེད་ལུ་སྟོན་མི་གཞི་བདེན་པ་འདི་ སེམས་ཁར་བཙུགས་ཏེ་ཉན་སྡོད་ཅི།

¹⁸ དེ་ལས་སྡིག་པའི་དབང་ལས་སྤར་ཐར་ཏེ་ ད་ལྟོ་ཁྱེད་དཀོན་མཆོག་གི་ཐུགས་དགྱེས་མི་དང་ ཕྲང་སྟེ་འབད་མི་ རྒྱོབོ་རྒྱམོ་གཅིག་སྦེ་བྱུང་ཡི།

¹⁹ (སྦྱིན་བདག་དང་གཡོགཔོ་གི་དཔེ་སླབ་མི་དོན་དག་འདི་ ཁྱེད་འཇམ་ཏོང་ཏོ་སྦེ་ ཧ་གོ་ནི་གི་དོན་ལུ་ཨིན།) ཁྱེད་ཧེ་མ་ལུས་ཀྱི་ཡན་ལག་འདི་ འདོད་ཆགས་དང་ཉེས་པ་གི་དབང་དུ་གཏང་སྟེ་སྡོད་དོཝ་བཟུམ་སྦེ་ ད་ལྟོ་ཁྱེད་ཀྱི་ལུས་ཀྱི་ཡན་ལག་རེ་རེ་བཞིན་དུ་ དཀོན་མཆོག་གི་ཐུགས་དགྱེས་མི་ལག་ཆ་སྦེ་ཕུལ་དགོཔ་ཨིན་ ཧེ་མ་གི་འབད་ཐངས་ལས་ སྡིག་པ་དང་ཉེས་པ་ཡར་འཕེལ་སོང་ཡི་ དེ་འབདཝ་ད་ དཀོན་མཆོག་གི་ཕྱག་ཞུཝ་ལས་ ཁྱེད་དཀོན་མཆོག་གི་མི་སྦེ་འཐོན་ནི་ཨིན།

²⁰ ཁྱེད་སྡིག་པའི་གཡོགཔོ་སྦེ་སྡོད་པའི་སྐབས་ལུ་ དཀོན་མཆོག་གི་ཐུགས་དགྱེས་མི་ལཱ་ལུ་ ཁྱེད་ཀྱིས་སྣང་མེད་སྦེ་བཞག་ནུག

²¹ ཁྱེད་ཀྱིས་ཧེ་མ་འབད་བའི་ལཱ་ལུ་བལྟ་སྟེ་ངོ་ཚརཝ་ཨིན་ ལཱ་དེ་ཚུ་གིས་ ཁེ་སང་ག་ནི་ཡང་མ་ཐོབ་པར་ འདི་ཚུ་གི་འབྲས་བུ་དེ་ འཆི་བ་རྐྱངམ་གཅིག་ཨིན།

²² དེ་འབདཝ་ད་ སྡིག་པ་གི་དབང་ལས་དགོངས་ཡངས་གནང་སྟེ་ ཁྱེད་དཀོན་མཆོག་གི་རྒྱོབོ་རྒྱམོ་སྦེ་བྱུང་ཡི་ ད་འདི་གི་འབྲས་བུ་འདི་ ཁྱེད་དཀོན་མཆོག་གི་མི་སྦེ་གཙངམ་འགྱུར་ཏེ་ མཐའན་མཇུག་ལུ་ཚེ་མཐའ་མེདཔ་ཐོབ་ནི་ཨིན།

²³ སྡིག་པའི་འབྲས་བུ་འདི་འཆི་བ་ཨིན་ དེ་འབདཝ་ད་ དཀོན་མཆོག་གིས་ཕངས་སེམས་མེད་པར་གནང་མི་གསོལ་རས་འདི་ ང་བཅས་ཀྱི་གཙོ་བོ་ཁིརཱིས་ཡེ་ཤུ་ལས་རྒྱུད་དེ་ ཚེ་མཐའ་མེདཔ་འདི་ཨིན།།