རོམ་མི་ལེའུ་ 5 - རྫོང་ཁ་

དཀོན་མཆོག་དང་མཉམ་མཐུན་ལམ་མཛད་གནང་བའི་སྐོར།

¹ དེ་འབདཝ་ལས་ དད་པ་བསྐྱེདཔ་ལས་བརྟེན་ཏེ་ ང་བཅས་དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་དེ་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་རྒྱུད་ལས་ དཀོན་མཆོག་གི་དགྲ་མེན་པར་ དཀོན་མཆོག་དང་ང་བཅས་ཀྱི་བར་ན་ མཐུན་ལམ་ལེགས་ཤོམ་མཛད་གནང་ནུག

² ཁོ་ལུ་དད་པ་བསྐྱེད་པའི་རྒྱུད་ལས་སྦེ་ དཀོན་མཆོག་གི་ཐུགས་རྗེ་ནང་ ཨ་རྟག་ར་སྒྲིང་སྒྲིང་སྦེ་སྡོད་ནི་གོ་སྐབས་ ང་བཅས་ལུ་གནངམ་ལས་བརྟེན་ཏེ་ ང་བཅས་ཡང་ཉིནམ་གཅིག་གི་ཚེ་ དཀོན་མཆོག་དང་གཅིག་ཁར་ གཟི་བརྗིད་ཅན་འགྱོ་ནིའི་རེ་བ་ནང་ སེམས་དགའ་ཚོར་འགྱུར་ཏེ་སྡོད་ནི་ཨིན།

³ དེ་གིས་མ་ཚད་ དཀའ་ངལ་དང་སྡུག་བསྔལ་འདི་ཚུ་བྱུངམ་ད་ ང་བཅས་ཀྱི་སེམས་དགའ་ཚོར་འགྱུར་ཏེ་སྡོདཔ་ཨིན་ ག་ཅི་སྨོ་ཟེར་བ་ཅིན་ སྡུག་བསྔལ་གྱི་འབྲས་བུ་འདི་བཟོད་སེམས་ཨིན།

⁴ བཟོད་སེམས་བསྐྱེད་ཚརཝ་ད་ སྤྱོད་པ་བཟང་པོ་སྦེ་འཐོན་འོང་ དེ་ལས་སྤྱོད་པ་བཟང་པོ་འདི་ལས་ ཐད་རི་བ་རི་ ཐར་པ་ཐོབ་ནི་ཟེར་རེ་བ་ཡར་ཡར་བསྐྱེད་འོང་།

⁵ དེ་ལས་རེ་བ་བསྐྱེད་མི་འདི་གིས་ བློ་ཕམ་མི་བཅུག་ ག་ཅི་སྨོ་ཟེར་བ་ཅིན་ དཀོན་མཆོག་གིས་དམ་པའི་ཐུགས་ཉིད་ ང་བཅས་ལུ་གནང་བའི་རྒྱུད་ལས་སྦེ་ བྱམས་པ་མ་ལང་ལངམ་སྦེ་ ང་བཅས་ཀྱི་སེམས་ནང་བླུགས་གནང་ཡི།

⁶ ང་བཅས་ལུ་འབད་ཐབས་མེད་པའི་དུས་ཚོད་ལུ་ ང་བཅས་དཀོན་མཆོག་ལུ་མ་འདྲོག་མི་ཚུ་གི་དོན་ལུ་ ཁིརཱིས་དུས་ཚོད་ཀྲིག་ཀྲི་ལུ་གཤགས་ནུག

⁷ མི་ཁ་ཆོས་འབད་མི་ ཅིག་གི་དོན་ལུ་རང་སྲོག་བྱིན་པ་ མ་པ་ལས་རང་ ལཱ་ཁག་ཨིན་ དེ་འབདཝ་ད་ མི་ལེགས་ཤོམ་ཅིག་གི་དོན་ལུ་ ཡང་ཅིན་རང་སྲོག་ བྱིན་མི་གཅིག་འདི་ཐོན་འོང་།

⁸ དེ་འབདཝ་ད་ ང་བཅས་སྡིག་ཅན་སྦེ་སྡོད་པའི་དུས་ལུ་ ཁིརཱིས་ང་བཅས་ཀྱི་དོན་ལུ་གཤགས་པའི་རྒྱུད་ལས་ དཀོན་མཆོག་གིས་ང་བཅས་ལུ་བྱམས་པ་ ག་ཅི་དེས་ཅིག་མཛད་གནང་ནུག

⁹ དེ་ལས་ཕར་ ཁིརཱིས་ཀྱི་སྐུ་ཁྲག་གི་རྒྱུད་ལས་སྦེ་ ང་བཅས་ལུ་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་པ་ཅིན་ དཀོན་མཆོག་གི་ཆདཔ་ལས་ང་བཅས་ལུ་ ག་དེམ་ཅིག་ཁིརཱིས་ཀྱིས་སྐྱབས་མཛད་ནི་སྨོ།

¹⁰ ང་བཅས་དཀོན་མཆོག་གི་དགྲ་སྦེ་སྡོད་པའི་སྐབས་ལུ་ ཁོ་གི་སྲས་གཤགས་པའི་རྒྱུད་ལས་སྦེ་ ང་བཅས་ལུ་དཀོན་མཆོག་དང་མཉམ་མཐུན་ལམ་མཛད་གནངམ་ཨིན་པ་ཅིན་ ད་རུང་འདི་ལས་ཡང་དྲགཔ་སྦེ་ ཁིརཱིས་གཤགས་ས་ལས་གསོན་པོ་སྦེ་བཞེངས་པའི་རྒྱུད་ལས་ འཆི་བ་གི་ཆདཔ་ལས་ང་བཅས་ལུ་སྐྱབས་མཛད་ནི་ཨིན།

¹¹ འདི་གིས་མ་ཚད་ དཀོན་མཆོག་ནང་ང་བཅས་དགའ་སྤྲོ་འགྱུར་ཏེ་སྡོདཔ་ཨིན་ ག་ཅི་སྨོ་ཟེར་བ་ཅིན་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་རྒྱུད་ལས་སྦེ་ དཀོན་མཆོག་དང་མཐུན་ལམ་མཛད་གནང་ཡི།།

ཨ་དམ་ལས་འཆི་བ་དང་ཁིརཱིས་ལས་ཚེ་མཐའ་མེདཔ་ཐོབ་པའི་སྐོར།

¹² འགོ་དང་པ་གི་མི་ ཨ་དམ་དེ་གི་རྒྱུད་ལས་སྦེ་ འཛམ་བུ་གླིང་ནང་སྡིག་པ་བྱུང་ནུག་ སྡིག་པ་གི་རྒྱུད་ལས་སྦེ་འཆི་བ་བྱུང་ནུག་ དེ་ལས་མི་ག་ར་གིས་སྡིགཔ་འབད་དེ་ ཁོང་གུ་འཆི་བ་ཁྱབ་སོང་ནུག

¹³ བཀའ་ཁྲིམས་མ་གནང་བའི་ཧེ་མ་ལས་རང་ འཛམ་བུ་གླིང་ནང་སྡིག་པ་ཁྱབ་སོང་ནུག་ དེ་འབདཝ་ད་ བཀའ་ཁྲིམས་འདི་མ་གནང་བའི་བར་ན་ སྡིག་པ་འབདཝ་ཨིན་ཟེར་ དཀོན་མཆོག་གིས་རྩིས་བཞེས་མ་གནང་།

¹⁴ དེ་སྦེ་ཨིན་རུང་ ལྡུམ་རེ་ནང་དཀོན་མཆོག་གིས་ ཨ་དམ་ལུ་བཀའ་གནང་རུང་ ཨ་དམ་གྱིས་མ་ཉན་པས་ དེ་ལས་ ཨ་དམ་ལས་འགོ་བཙུགས་ཏེ་ མོ་སཱེས་ཀྱི་དུས་སྐབས་ཚུན་ཚོད་ ཨ་དམ་གྱིས་འགལ་མི་བཀའ་འདི་ མི་ཚུ་གིས་མ་འགལ་རུང་ མི་ག་ར་ཤི་དགོཔ་ཐལ་ནུག ད་དེ་སྦེ་འབདཝ་ད་ ཨ་དམ་འདི་ཤུལ་ལས་འབྱོན་ནི་ཟེར་མི་གཅིག་གི་དཔེ་བཟུམ་སྦེ་ཨིན།

¹⁵ དེ་འབདཝ་ད་ དཀོན་མཆོག་གི་གསོལ་རས་དང་ ཨ་དམ་གྱི་ཉེས་པ་འདི་ཁྱད་པར་སྦོམ་འདུག་ ག་ཅི་སྨོ་ཟེར་བ་ཅིན་ ཨ་དམ་མི་གཅིག་གིས་ ཉེས་པ་འབད་དེ་ མི་ལེ་ཤ་ཤི་དགོཔ་ཐལ་ནུག་ དེ་འབདཝ་ད་ སྡིག་པ་གི་དབང་ལས་ཡང་སྦོམ་སྦེ་ ཡེ་ཤུ་ཁིརཱིས་ཁོ་གཅིག་གིས་ མི་ལེ་ཤ་གི་དོན་ལུ་ གསོལ་རས་ཕངས་སེམས་མེད་པར་གནང་བའི་རྒྱུད་ལས་སྦེ་ དཀོན་མཆོག་གིས་ཐུགས་རྗེ་ག་ཅི་དེས་ཅིག་གནང་ཡི།

¹⁶ དཀོན་མཆོག་གིས་གནང་མི་གསོལ་རས་དང་ མི་གཅིག་གིས་འབད་མི་སྡིག་པ་གི་འབྲས་བུ་དེ་མི་འདྲ་བས་ ག་ཅི་སྨོ་ཟེར་བ་ཅིན་ མི་གཅིག་གིས་སྡིག་པ་འབདཝ་ལས་ ཉེས་ཆད་ཕོག་སྟེ་ཁྲིམས་བཀལ་དགོཔ་ཐལ་ནུག་ དེ་འབདཝ་ད་ མི་ཚུ་གིས་སྡིག་པ་ལེ་ཤ་འབད་དེ་འབད་རུང་ གསོལ་རས་ཀྱི་རྒྱུད་ལས་ དཀོན་མཆོག་གིས་དགོངས་ཡངས་གནང་སྟེ་ ཁོང་མི་ཚུ་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་ནུག

¹⁷ མི་གཅིག་གིས་ཉེས་པ་འབད་དེ་ མི་འདི་གི་རྒྱུད་ལས་སྦེ་འཆི་བ་གིས་ མི་ག་ར་ལུ་དབང་ནུག་ དེ་འབདཝ་ད་ འདི་ལས་ཡང་ལྷག་སྟེ་ ཡེ་ཤུ་ཁིརཱིས་ཁོ་གཅིག་གིས་མཛད་མི་ལས་བརྟེན་ཏེ་ དཀོན་མཆོག་གི་ཕངས་སེམས་མེད་པའི་ཐུགས་རྗེ་གནང་སྟེ་ ཁོ་གིས་ང་བཅས་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་ནུག་ དེ་ལས་ང་བཅས་ཀྱིས་ཁིརཱིས་དང་གཅིག་ཁར་སྡོད་དེ་ དུས་རྒྱུན་དུ་རྒྱལ་སྲིད་སྐྱོང་ནི་ཨིན།

¹⁸ དེ་གིས་འབད་ ཨ་དམ་ཁོ་གཅིག་གིས་ཉེས་པ་འབད་དེ་ མི་ག་ར་གི་གུ་ལུ་ཆདཔ་འབྱུང་འོང་དོཝ་བཟུམ་སྦེ་ ཁིརཱིས་ཁོ་གཅིག་གིས་དྲང་བདེན་པའི་ཕྱག་ལཱ་མཛད་དེ་ མི་ག་ར་ དཀོན་མཆོག་གི་ཐུགས་དང་ལྡན་པའི་ ཕྲངམ་སྦེ་མཛད་དེ་ ཚེ་མཐའ་མེདཔ་གི་ཐོབ་ཐངས་ཡོད།

¹⁹ ཨ་དམ་མི་གཅིག་གིས་ དཀོན་མཆོག་གི་བཀའ་ལུ་མ་ཉན་པར་ མི་ག་ར་སྡིག་ཅན་སྦེ་བྱུང་དོཝ་བཟུམ་སྦེ་ ཁིརཱིས་ཁོ་གཅིག་གིས་ཡང་ དཀོན་མཆོག་གི་བཀའ་ལུ་ཉན་ཏེ་ མི་ལེ་ཤ་ལུ་ ཁོ་རའི་ཐུགས་དང་ལྡན་པའི་མི་ཕྲངམ་སྦེ་མཛད་གནང་ནུག

²⁰ དཀོན་མཆོག་གི་བཀའ་ཁྲིམས་གནང་མི་དོན་དག་འདི་ མི་འདི་ཚུ་གིས་ཉེས་པ་ག་དེ་ཅིག་འབདཝ་ཨིན་ན་ཟེར་ མཐོང་ཚུགས་པའི་དོན་ལུ་ཨིན་ དེ་འབདཝ་ད་ ཉེས་པ་ཡར་འཕེལ་འགྱོ་ས་ལུ་ དཀོན་མཆོག་གི་ཐུགས་རྗེ་ཡང་ འདི་བ་ལས་ལྷག་པའི་ཁྱབ་ཆེ་ཏོག་ཏོ་སྦེ་གནང་ནུག

²¹ ཧེ་མ་སྡིག་པ་གིས་དབང་སྟེ་ང་བཅས་ཤི་དགོཔ་ཐལ་དོཝ་བཟུམ་སྦེ་ ད་རེས་དཀོན་མཆོག་གི་ཐུགས་རྗེ་སྐྱོང་སྟེ་ གཙོ་བོ་ཡེ་ཤུ་ཁིརཱིས་ཀྱི་དྲང་བདེན་པའི་ཕྱག་ལཱ་གི་རྒྱུད་ལས་སྦེ་ ང་བཅས་ཀྱིས་ཚེ་མཐའ་མེདཔ་ཐོབ་ནི་ཨིན།།