རོམ་མི་ལེའུ་ 3 - རྫོང་ཁ་

མི་ག་ར་སྡིག་ཅན་ཨིན་ཟེར་བའི་སྐོར།

¹ དེ་འབདཝ་ལས་ ཡ་ཧུ་ད་པ་ལུ་ཁེ་ཕན་ག་ཅི་ཡོདཔ་སྨོ་ ཡ་ཧུ་ད་པའི་ལུགས་སྲོལ་སྒྲིགས་ཏེ་ ཕོ་རྒྱ་ཚུ་གི་གཟུགས་གུ་རྟགས་བཀལ་དགོ་པའི་ཕན་པ་ག་ཅི་སྨོ།

² ཡ་ཧུ་ད་པ་ཟེར་སླབ་དགོ་མི་ཁེ་ཕན་ལེ་ཤ་ཡོད་ ག་ཅི་སྨོ་ཟེར་བ་ཅིན་ འགོ་དང་པ་རང་ དཀོན་མཆོག་གིས་ཁོ་རང་གི་གསུང་དེ་ཚུ་ ཡ་ཧུ་ད་པ་ཚུ་ལུ་ཐུགས་གཏད་དེ་བཅོལ་གནང་ནུག

³ ག་དེམ་ཅིག་སྦེ་ ཁོང་ལ་ལུ་ཅིག་གིས་ ཨ་ནི་གསུང་དེ་ཚུ་ལུ་ མ་ཉན་པར་སྡོད་པ་ཅིན་ ཁོང་མ་ཉན་པར་སྡོད་པའི་རྒྱུད་ལས་ དཀོན་མཆོག་གི་ཞལ་འཆེས་འདི་ ཉམས་གཏང་ཚུགས་ཟེརཝ་ཨིན་ན།

⁴ འདི་ཐད་རི་བ་རི་མེན་ མི་འདི་ཚུ་ག་ར་ཤོབ་ཟེ་སྦེ་འཐོན་ཏེ་འབད་རུང་ དཀོན་མཆོག་འདི་བདེན་པ་ཨིན་ ག་ཅི་སྨོ་ཟེར་བ་ཅིན་གསུང་རབ་ནང་ལུ། ནཱ་གི་བཀའ་འདི་ བདེན་པ་སྦེ་བཞུགས་ནི་ཨིན་ མི་ཚུ་གིས་ནཱ་ལུ་བརྟག་དཔྱད་འབད་དེ་མཇལཝ་ད་ ནཱ་སྐྱོན་མེད་མི་གཅིག་སྦེ་ རྒྱལ་ཁ་བཞེས་ནི་ཨིན་ཟེར་ བྲིས་ཏེ་འདུག

⁵ དེ་འབདཝ་ད་ ག་དེམ་ཅིག་སྦེ་ ང་བཅས་ཀྱིས་ཉེས་པ་འབདཝ་ད་ དཀོན་མཆོག་གིས་མཛད་མི་འདི་ དྲང་བདེན་སྦེ་མཐོང་པ་ཅིན་ འདི་ལུ་ང་བཅས་ཀྱིས་ག་ཅི་སླབ་ནི་ དཀོན་མཆོག་གིས་དགོངསམ་ཁྲེལ་ཏེ་ ང་བཅས་ལུ་ཆདཔ་གནངམ་ད་ ཁོ་གིས་ཁྲིམས་མི་ཕྲང་མས་ཟེར་སླབ་ནི་ཨིན་ན་ མ་གཞི་ མི་གི་མནོ་བསམ་གཏང་ཐངས་འདི་ དེ་སྦེ་རང་ཨིན།

⁶ འདི་ཐད་རི་བ་རི་མེན་ དཀོན་མཆོག་གིས་ཉེས་ཁྲིམས་འདི་ཕྱེ་མ་ཚུགས་པ་ཅིན་ ག་དེ་སྦེ་འཛམ་བུ་གླིང་གི་ཁྲིམས་ཕྱེ་ནི་སྨོ།

⁷ ད་རུང་མི་གཅིག་གིས་ ང་གིས་ཤོབ་རྐྱབ་པའི་རྒྱུད་ལས་སྦེ་ དཀོན་མཆོག་གི་བདེན་པ་འདི་ གསལ་ཏོག་ཏོ་སྦེ་མཐོང་ནི་དང་ ཁོ་གི་གཟི་བརྗིད་ཡར་ཡར་འགྱོ་ནི་ཨིན་པ་ཅིན་ དཀོན་མཆོག་གིས་ག་ཅི་འབད་ ང་ལུ་ཉེས་ཅན་སྦེ་ ཁྲིམས་དང་ཆདཔ་གནངམ་ཨིན་ན་ཟེར་སླབ་མས།

⁸ དེ་བཟུམ་གྱི་མནོ་བསམ་གཏང་པ་ཅིན་ ང་བཅས་སྡིག་པ་ག་དེ་ཅིག་འབད་རུང་ལེགས་ཤོམ་ཨིན་ཟེར་སླབ་དོཝ་བཟུམ་སྦེ་ཨིན་ མི་ལ་ལུ་ཅིག་གིས་ ང་གིས་དེ་སྦེ་སླབ་དེས་ཟེར་སླབ་མས་ དེ་སྦེ་མེན་ ཨ་ནི་བཟུམ་སླབ་མི་ཚུ་ལུ་ཆདཔ་ཕོག་དགོཔ་འདི་ ཀྲིག་ཀྲི་རང་ཨིན།

⁹ མདོར་བསྡུས་ཏེ་སླབ་པ་ཅིན་ ང་བཅས་ ཡ་ཧུ་ད་པ་ཚུ་མི་གཞན་ལས་དྲག་ཤོས་ཨིན་ན་ འདི་ཐད་རི་བ་རི་མེན་ ཆདཔ་གནང་དགོ་པའི་དོན་དག་དེ་ ཡ་ཧུ་ད་པ་དང་ ཕྱིའི་མི་རིགས་ཚུ་ག་ར་ སྡིག་པའི་དབང་འོག་ལུ་ཡོདཔ་ཨིན་ཟེར་ གོང་ལས་ང་གིས་སྟོན་ཚར་ཡི།

¹⁰ གསུང་རབ་ནང་དེ་སྦེ་བྲིས་ཏེ་ཡོད། མི་ཆོས་སེམས་ཅན་ག་ཡང་མེད་ མེད་པའི་ནང་ལས་གཅིག་ཡང་མེད།

¹¹ དཀོན་མཆོག་ལུ་ཧ་གོ་མི་དང་འཚོལ་མི་ག་ཡང་མིན་འདུག

¹² ཁོང་ག་ར་དཀོན་མཆོག་ལས་རྒྱབ་ལོག་སྟེ་ དོན་མེད་པའི་ལམ་བདའ་ཡར་སོང་ཡི་ ལེགས་ཤོམ་འབད་མི་ག་ཡང་མེད་ མེད་པའི་ནང་ལས་གཅིག་ཡང་མིན་འདུག

¹³ ཁོང་གི་བློ་འདི་ དུར་ཁུང་ཁ་ཕྱེཝ་ད་ དྲིམ་མནམ་དོ་བཟུམ་སྦེ་ རུལ་དྲི་ཧག་ཧ་སྦེ་མནམ་མས་ ཁོང་གི་སླབ་མི་བློ་འདི་གིས་ མི་ལུ་མགུ་རྡུངམ་མས། སྦུལ་དུག་དྲགས་ཀྱིས་མི་ལུ་དུག་དོཝ་བཟུམ་སྦེ་ ཁོང་གི་བློ་གིས་མི་ལུ་གནོདཔ་བསྐྱེལཝ་མས།

¹⁴ ཁོང་གི་ཁ་ནང་ཁ་སྨོན་དང་ བློ་གདུག་དྲགས་ཚུ་གིས་གང་སྟེ་འདུག

¹⁵ ཁོང་གི་རྐངམ་དེ་བསད་ནི་ནང་ མགྱོགས་དྲགས་ཨིན་མས།

¹⁶ ཁོང་ག་སྟེ་འགྱོ་རུང་ མི་ལུ་མེདཔ་གཏང་ནི་དང་ བགེགས་སྐྱོན་བསྐྱེལཝ་མས།

¹⁷ ག་ཅི་སྨོ་ཟེར་བ་ཅིན་ ཞི་བདེ་གི་ལམ་ ཁོང་གིས་ངོ་མ་ཤེས་པར་ཨིན་མས།

¹⁸ དཀོན་མཆོག་བལྟ་སྟེ་ཡང་ ཁོང་འདྲོག་དགོཔ་མི་ཤེས་བས་ཟེར་ གསུང་རབ་ནང་བྲིས་དོཝ་བཟུམ་སྦེ་ཨིན།

¹⁹ གོང་ལས་ང་གིས་གསུང་རབ་ལྟར་དུ་ཞུ་མི་འདི་ བཀའ་ཁྲིམས་ཀྱི་འོག་ལུ་སྡོད་མི་ ཡ་ཧུ་ད་པ་ཚུ་གི་དོན་ལུ་ དཀོན་མཆོག་གིས་གསུངས་གསུངསམ་ཨིནམ་ ང་བཅས་ཀྱི་ཤེས་ དེ་འབདཝ་ལས་བརྟེན་ཏེ་ བཀའ་ཁྲིམས་ཀྱི་དོན་དག་འདི་ཧ་མ་གོ་ཟེར་ ཁོང་ ཡ་ཧུ་ད་པ་ཚུ་ཡང་ཧད་བཏགས་བཟོ་སྟེ་སྡོད་མི་ཚུགས་ ཡ་ཧུ་ད་པ་ཚུ་འབད་རུང་འདྲ་ མི་གཞན་འབད་རུང་འདྲ་ རང་གི་འབད་མི་ལཱ་འདི་ ཨིན་ཅི་མིན་ཅི་ དཀོན་མཆོག་ལུ་རྩིས་ཕུལ་དགོཔ་ཨིན།

²⁰ ག་ཅི་སྨོ་ཟེར་བ་ཅིན་ མི་ག་ར་འབད་རུང་ བཀའ་ཁྲིམས་སྲུང་སྟེ་ དཀོན་མཆོག་གི་གཟིགས་སར་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་མི་གནང་ དེ་འབདཝ་ད་ ང་བཅས་ཀྱིས་བཀའ་ཁྲིམས་ཤེས་ཏེ་ མི་ག་ར་སྡིག་ཅན་ཨིན་ཟེར་ཧིང་སངས་ས་སྦེ་ཧ་གོ་ནི་ཨིན།།

དཀོན་མཆོག་གིས་ཉེས་ཆད་ཀྱི་དགོངས་ཡངས་གནང་ནི་གི་སྐོར།

²¹ དཀོན་མཆོག་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་བྱུང་ནི་འདི་ བཀའ་ཁྲིམས་ལས་བརྟེན་ཏེ་མེན་ཟེར་ ཧེ་མ་ལས་ བཀའ་ཁྲིམས་དང་ལུང་སྟོན་པ་གི་དེབ་ནང་ བྲིས་མི་བཀའ་འདི་ཚུ་གིས་ ཨ་ནི་གི་སྐོར་ལས་འཛོམ་དཔང་འབད་ནུག་ དེ་འབདཝ་ད་ ད་རེས་ནངས་པ་ དཀོན་མཆོག་གིས་འདི་གི་སྐོར་ལས་སྟོན་གནང་ཡི།

²² འདི་ག་ཅི་སྨོ་ཟེར་བ་ཅིན་ ཡེ་ཤུ་ཁིརཱིས་ལུ་དད་པ་བསྐྱེད་མི་ག་ར་ལུ་ དཀོན་མཆོག་གིས་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནངམ་ཨིན་ དཀོན་མཆོག་གིས་ ཡ་ཧུ་ད་པའི་མི་རིགས་ཨིན་རུང་མེན་རུང་ ཁོ་གིས་ག་ལུ་ཡང་ཉེ་རིང་མི་ཕྱེ།

²³ མི་ག་ར་གིས་སྡིག་པ་འབདཝ་ལས་བརྟེན་ཏེ་ དཀོན་མཆོག་གི་ཐུགས་དགྱེས་པའི་ལཱ་ ག་གིས་ཡང་འབད་མི་ཚུགས།

²⁴ དེ་འབདཝ་ད་ དཀོན་མཆོག་གི་ཐུགས་རྗེ་ལས་བརྟེན་ཏེ་ ཁིརཱིས་ཡེ་ཤུ་གཤགས་ཏེ་ ང་བཅས་ལུ་དགོངས་ཡངས་གནང་སྟེ་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་མི་འདི་ ང་བཅས་ལུ་གསོལ་རས་སྦེ་གནང་ནུག

²⁵ དེ་གིས་འབད་ ཁིརཱིས་ལུ་དད་པ་བསྐྱེདཔ་ལས་ དཀོན་མཆོག་གིས་ཡེ་ཤུ་ཁིརཱིས་ཀྱི་སྐུ་ཁྲག་གི་སྒོ་ལས་སྦེ་ ང་བཅས་ལུ་ཕོག་དགོ་མི་ཆདཔ་ལས་དགོངས་ཡངས་གནང་ནུག་ ཁིརཱིས་ཀྱིས་དགོངས་ཡངས་གནང་པ་མ་བྱོན་ཚུན་ཚོད་ ཧེ་མ་འབད་མི་ཉེས་པ་འདི་ཚུ་ལུ་བཟོད་པ་བསྒོམས་ཏེ་ དཀོན་མཆོག་གིས་ཐུགས་བསམ་མ་བཞེས་པས་ དེ་འབདཝ་ད་ ཁིརཱིས་ཀྱི་དགོངས་ཡངས་ལས་རྒྱུད་དེ་ ཆདཔ་ཁོ་རང་གིས་བཞེས་ཏེ་ དཀོན་མཆོག་གིས་མཛད་མི་དེ་ དྲང་བདེན་སྦེ་འཐོན་ནུག

²⁶ འདི་ཚུ་ག་ར་ད་རེས་ཀྱི་དུས་ལུ་ དཀོན་མཆོག་ཁོ་རང་ དྲང་བདེན་ཨིན་ཟེར་སྟོན་ནི་གི་དོན་ལུ་ཨིན་ ག་ཅི་སྨོ་ཟེར་བ་ཅིན་ ཁོ་དྲང་ཁྲིམས་ཕྱེ་མི་ཨིནམ་མ་ཚད་ ཡེ་ཤུ་ལུ་དད་པ་བསྐྱེད་མི་ཚུ་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་མི་ཨིན།

²⁷ དེ་སྦེ་ཨིན་པ་ཅིན་ ང་བཅས་ཀྱིས་ལཱ་ལེགས་ཤོམ་འབད་དེ་ རང་བསྟོད་རྐྱབ་ཚུགས་ག་ དེ་སྦེ་རྩ་ལས་རང་མེན་ ག་ཅི་སྨོ་ཟེར་བ་ཅིན་དཀོན་མཆོག་གིས་ ཁྲིམས་ཀྱི་ཉེས་ཆད་ཀྱི་དགོངས་ཡངས་ བཀའ་ཁྲིམས་སྲུང་ནི་ལུ་བརྟེན་ཏེ་མེན་པར་ དད་པ་བསྐྱེད་པའི་རྒྱུད་ལས་ཨིན།

²⁸ དེ་འབདཝ་ལས་བརྟེན་ཏེ་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་འབྱུང་ནི་འདི་ བཀའ་ཁྲིམས་སྲུང་སྟེ་མེན་པར་ ཁིརཱིས་ལུ་དད་པ་བསྐྱེད་ནི་གི་རྒྱུད་ལས་ཨིན་ཟེར་ཞུ་ནི་ཨིན།

²⁹ ག་ཅི་སྨོ་ཟེར་བ་ཅིན་ དཀོན་མཆོག་དེ་ ཡ་ཧུ་ད་པ་ཚུ་གི་དཀོན་མཆོག་རྐྱངམ་གཅིག་ཨིན་ན་ ཕྱིའི་མི་རིགས་ཚུ་གི་དོན་ལུ་ཡང་ཨིན་མེན་ན་ ཐད་རི་བ་རི་ ཕྱིའི་མི་རིགས་ཚུ་གི་དཀོན་མཆོག་ཡང་ཨིན།

³⁰ དཀོན་མཆོག་འདི་གཅིག་རྐྱངམ་གཅིག་ཡོདཔ་ལས་ ཡ་ཧུ་ད་པ་ཨིན་རུང་མེན་རུང་ ཁིརཱིས་ལུ་དད་པ་བསྐྱེད་པའི་རྒྱུད་ལས་སྦེ་ དཀོན་མཆོག་གིས་ང་བཅས་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛདཔ་ཨིན།

³¹ ང་བཅས་ཀྱིས་དད་པ་བསྐྱེད་ནི་འདི་ གཙོ་བོ་བསྟེན་པ་ཅིན་ བཀའ་ཁྲིམས་འདི་ཁུངས་མེདཔ་སྦེ་བརྩི་ནི་ཨིན་ན་ དེ་སྦེ་ཐད་རི་བ་རི་མེན་ ང་བཅས་དད་པ་བསྐྱེདཔ་ད་ བཀའ་ཁྲིམས་ཡང་ དོན་ལས་རང་སྒྲུབ་ནི་ཨིན་ཟེར་ཞུ་ནི་ཨིན།།