རོམ་མི་ལེའུ་ 2 - རྫོང་ཁ་

དཀོན་མཆོག་གིས་མི་ག་ལུ་ཡང་ཉེ་རིང་མི་ཕྱེ་བའི་སྐོར།

¹ ཨ་ཁའི་ ཁྱོད་ཀྱིས་རོགས་ལུ་སྐྱོན་བཏག་ནི་ཀྲིག་ཀྲི་ཨིན་ཟེར་བ་ཅིན་ ཁྱོད་ཀྱིས་རོགས་ལུ་སྐྱོན་བཏགཔ་ད་ རོགས་ལུ་རྐྱངམ་གཅིག་མེན་པར་ རང་ལུ་ཡང་བཏགཔ་ཨིན་ ག་ཅི་སྨོ་ཟེར་བ་ཅིན་ ཁོང་གིས་ག་འབད་མི་དེ་ ཁྱོད་ཀྱིས་ཡང་འབདཝ་ཨིན་མས་ ཁྱོད་ཀྱིས་འབད་མི་ལཱ་ཉེས་པ་འདི་ཚུ་ལས་ ཁྱོད་སྤར་མི་ཐར།

² ཨ་ནི་བཟུམ་གྱི་ལཱ་འབད་མི་ལུ་ཆདཔ་གནངམ་ད་ དཀོན་མཆོག་གིས་ཁྲིམས་འདི་ ཕྲང་ཕྱེཝ་ཨིན་ཟེར་ང་བཅས་ཀྱིས་ཤེས།

³ ཨ་ཁའི་ ཁྱོད་ཀྱིས་ཨ་ནི་བཟུམ་ལཱ་འབད་མི་ཚུ་ལུ་སྐྱོན་བཏགས་ཏེ་ རང་ཡང་འདི་བཟུམ་གྱི་ལཱ་འབད་བ་ཅིན་ ཁྱོད་དཀོན་མཆོག་གི་ཁྲིམས་ལས་སྤར་ཐར་ཟེར་ མནོ་བསམ་གཏངམ་ཨིན་ན།

⁴ དཀོན་མཆོག་གི་སྐྱིད་སྡུག་དང་ བཟོད་པ་མ་ལང་ལངམ་སྦེ་མཛད་དེ་ཡོད་རུང་ ཁྱོད་ཀྱིས་ཁུངས་མེདཔ་སྦེ་རྩིཝ་ཨིན་ན་ དཀོན་མཆོག་གིས་ཁྱོད་ལུ་སྐྱིད་སྡུག་གཟིགསཔ་ད་ སྡིག་པ་ལས་སེམས་འགྱུར་ནི་དོན་ལུ་ཨིན་ཟེར་མ་ཤེས་ག།

⁵ དེ་འབདཝ་ད་ ཁྱོད་ཀྱི་སེམས་སྲ་ཀྲག་དང་ སྡིག་པ་ལས་སེམས་མ་འགྱུར་ནི་འདི་གིས་ ཁྱོད་རང་གི་དོན་ལུ་ ཆདཔ་ཕོག་ནི་གི་རྒྱུ་བསག་བཞགཔ་ཨིན་མས་ དེ་འབདཝ་ལས་ ཉིནམ་གཅིག་གི་ཚེ་ ཁྲིམས་ཕྲང་ཕྱེ་མི་དཀོན་མཆོག་གིས་ཆདཔ་གནང་འོང་།

⁶ དཀོན་མཆོག་གིས་མི་ག་ར་ལུ་ ཁོང་གིས་ག་འབད་མི་དང་བསྟུན་ཏེ་ཁྲིམས་ཕྱེ་འོང་།

⁷ བཟོད་པ་བསྒོམ་ ལཱ་ལེགས་ཤོམ་འབད་དེ་ དཀོན་མཆོག་གིས་གནང་མི་བསྟོད་པ་དང་ གཟི་བརྗིད་དང་ འཆི་བ་མེདཔ་འཚོལ་མི་འདི་ཚུ་ལུ་ ཁོ་གིས་ཚེ་མཐའ་མེདཔ་གནང་འོང་།

⁸ དེ་འབདཝ་ད་ མི་རང་གི་དོན་ལུ་འདོདཔ་བཙོང་མི་དང་ བདེན་པ་གི་ཁ་ལུ་མ་ཉན་པར་ ལཱ་ངན་པ་འབད་སྡོད་མི་ཚུ་ལུ་ དཀོན་མཆོག་གིས་ཁོ་རང་གི་ཆདཔ་ ཡང་ཆ་མེད་པར་བཀལ་གནང་འོང་།

⁹ ལཱ་ངན་པ་འབད་སྡོད་མིའི་མི་ག་ར་ལུ་ དཀའ་ངལ་སྡུག་བསྔལ་མྱོང་ནི་ཨིན་ དང་པ་རང་ ཡ་ཧུ་ད་པ་ཚུ་དང་ གཉིས་པ་ལུ་ ཕྱིའི་མི་རིགས་ཚུ་ལུ་ཕོག་འོང་།

¹⁰ དེ་འབདཝ་ད་ ལཱ་ལེགས་ཤོམ་འབད་སྡོད་མི་ཚུ་ལུ་ བསྟོད་པ་དང་ གཟི་བརྗིད་དང་ ཞི་བདེ་གནང་འོང་ དང་པ་རང་ ཡ་ཧུ་ད་པ་ཚུ་ལུ་དང་ གཉིས་པ་ལུ་ ཕྱིའི་མི་རིགས་ཚུ་ལུ་གནང་འོང་།

¹¹ ག་ཅི་སྨོ་ཟེར་བ་ཅིན་ དཀོན་མཆོག་གིས་མི་ག་ལུ་ཡང་ཉེ་རིང་མི་ཕྱེ།

¹² དེ་གིས་འབད་ དཀོན་མཆོག་གི་བཀའ་ཁྲིམས་མ་ཤེས་པར་ ཉེས་པ་འབད་མི་ཚུ་ལུ་ བཀའ་ཁྲིམས་ཡོད་རུང་ དེ་དང་འཁྲིལ་ཏེ་ཉེས་ཁྲིམས་མི་བཀལ་ དཀོན་མཆོག་གི་བཀའ་ཁྲིམས་ཤེས་ཏེ་ ཉེས་པ་འབད་མི་ཚུ་ལུ་ བཀའ་ཁྲིམས་དང་འཁྲིལ་ཏེ་ ཁྲིམས་བཀལ་འོང་།

¹³ བཀའ་ཁྲིམས་ཤེསཔ་རྐྱངམ་གཅིག་གིས་ དཀོན་མཆོག་གི་གཟིགས་སར་ ཆོས་སེམས་ཅན་འགྱུར་མི་ཚུགས་ དེ་འབདཝ་ད་ བཀའ་ཁྲིམས་དང་བསྟུན་ཏེ་འབད་མི་འདི་ལུ་ དཀོན་མཆོག་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་བརྩི་གནང་འོང་།

¹⁴ དཀོན་མཆོག་གིས་ མོ་སཱེས་ལུ་གནང་མི་བཀའ་ཁྲིམས་འདི་ ཕྱིའི་མི་རིགས་ཚུ་གིས་མ་ཐོབ་སྟེ་འབད་རུང་ ཁོང་གི་འབད་བཞག་བཅའ་བཞག་གི་ཐོག་ལས་ ཁྲིམས་ལྟར་དུ་སྒྲིགས་ལམ་སྒྲིགས་ནི་འདི་གིས་ ཁོང་ལུ་ཡང་ཁྲིམས་ཡོད་དོཝ་བཟུམ་སྦེ་ཨིན་མས།

¹⁵ དཀོན་མཆོག་གི་བཀའ་ཁྲིམས་འདི་ ཁོང་གི་སེམས་ནང་ཡོད་ཟེར་བྲིས་ཏེ་སྟོནམ་ཨིནམ་མ་ཚད་ རང་གིས་རང་ལུ་ང་གིས་ཀྲིག་ཀྲི་འབད་ཡི་ཟེར་མནོ་ནི་དང་ ང་གིས་ཟོགཔོ་འབད་ཡི་ཟེར་མནོ་ནི་ ཁོང་གི་སེམས་ཀྱི་ནང་འཁོད་ནང་ལས་རང་ བཟང་ངན་དབྱེ་བ་ཕྱེ་ཚུགསཔ་ཨིན་མས།

¹⁶ དེ་འབདཝ་ལས་ ང་གིས་ཧེ་མ་ལས་བཤད་མི་གཏམ་བཟང་དང་བསྟུན་ཏེ་ ཉིནམ་གཅིག་གི་ཚེ་ དཀོན་མཆོག་གིས་ཡེ་ཤུ་ཁིརཱིས་ལས་རྒྱུད་དེ་ མི་ཚུ་གི་སེམས་ཀྱི་ནང་ན་སྦ་བཞག་མི་བློ་ཚུ་ལུ་བརྟེན་ཏེ་ ཁྲིམས་བཀལ་གནང་འོང་།།

དཀོན་མཆོག་གི་ཐུགས་དགྱེས་པའི་ལཱ་གི་སྐོར།

¹⁷ དེ་འབདཝ་ད་ ཁྱོད་ཀྱིས་རང་ལུ་ ཡ་ཧུ་ད་པ་ཨིན་ཟེར་སླབ་མས་ དཀོན་མཆོག་གི་བཀའ་ཁྲིམས་ལུ་བརྟེན་ཏེ་ དཀོན་མཆོག་དང་ཁྱོད་ཀྱི་སྦུག་ལུ་མཐུན་ལམ་ཡོད་ཟེར་ རང་བསྟོད་རྐྱབ་ཨིན་མས།

¹⁸ ཁྱོད་ཀྱིས་འབད་བ་ཅིན་ གསུང་རབ་ཀྱི་སྟོནམ་བཞིན་དུ་ དཀོན་མཆོག་གིས་ག་ཅི་ཐུགས་དགྱེསཔ་ཨིན་ན་ བཟང་ངན་འདི་ག་དེ་སྦེ་དབྱེ་བ་ཕྱེ་ཚུགས་ག་ འདི་ཁྱོད་ཀྱིས་ཤེས་ཟེར་སླབ་ཨིན་མས།

^19-20 ཁྱོད་ཀྱིས་འབད་བ་ཅིན་ ཁྱོད་ཀྱིས་དཀོན་མཆོག་གི་བཀའ་ཁྲིམས་ཐོབ་ནི་འདི་གིས་ ཡོན་ཏན་དང་བདེན་པ་ག་ར་ཁྱོད་ནང་ཡོད་ འདི་འབདཝ་ལས་ ཞརཝ་གི་དོན་ལུ་ལམ་སྟོན་ཚུགས་ནི་དང་ དཀོན་མཆོག་གི་ལམ་འབྱང་སྟེ་ གནག་དུང་དུ་ནང་ལུས་མི་ཚུ་ལུ་འོད་ཤར་བཅུག་ནི་དང་ ཡོན་ཏན་མ་ཤེས་མི་གི་དོན་ལུ་ཆོས་སྟོན་ཚུགས་ནི་ དེ་ལས་མི་དད་པ་ནང་ཨ་ལོ་བཟུམ་ཚུ་ལུ་ དཀོན་མཆོག་གི་ལམ་སྟོན་ཚུགསཔ་ཨིན་ཟེར་སླབ་ཨིན་མས།

²¹ དེ་སྦེ་རོགས་ལུ་ལེགས་ཤོམ་སྦེ་སྟོན་ཚུགསཔ་ཨིན་པ་ཅིན་ ཁྱོད་རང་གི་དོན་ལུ་ག་ཅི་འབད་སྟོན་མ་ཚུགསཔ་སྨོ་ ཁྱོད་རོགས་ལུ་ཨརཝ་མ་རྐུ་ཟེར་སླབ་ཨིན་མས་ ཁྱོད་རང་ག་ཅི་འབད་ཨརཝ་རྐུཝ་སྨོ།

²² ཁྱོད་ཀྱིས་གཉེན་ལས་འགལ་བའི་ལུས་འབྲེལ་འབད་ནི་མེད་ཟེར་སླབ་མས་ དེ་འབདཝ་ད་ ཁྱོད་རང་གིས་མ་འབད་ག་ ཁྱོད་ཀྱིས་སྐུ་འདྲ་ལུ་མི་དགའ་ཟེར་སླབ་ཨིན་མས་ དེ་འབདཝ་ད་ ལྷ་ཁང་ནང་ལས་ཨརཝ་མ་རྐུ་ག།

²³ བཀའ་ཁྲིམས་ཤེས་ཟེར་རང་བསྟོད་རྐྱབ་ཨིན་མས་ དེ་འབདཝ་ད་ བཀའ་ཁྲིམས་ལས་འགལཝ་ད་ དཀོན་མཆོག་ལུ་དམའ་ཕབ་མི་བརྐྱབ་ག།

²⁴ དེ་འབདཝ་ལས་ ཁྱེད་ལས་བརྟེན་ཏེ་ ཕྱིའི་མི་རིགས་ཚུ་གིས་ དཀོན་མཆོག་ལུ་དབུ་ཕང་སྨདཔ་མས་ཟེར་ གསུང་རབ་ནང་བྲིས་མི་འདི་ ཀྲིག་ཀྲི་ཨིན་མས།

²⁵ དཀོན་མཆོག་གི་བཀའ་ཁྲིམས་ཉན་ཏེ་སྡོད་པ་ཅིན་ ཡ་ཧུ་ད་པ་གི་ལུགས་སྲོལ་བཞིན་དུ་ཕོ་རྒྱ་ལུ་ རྟགས་བཀལ་ནི་དེ་ཕན་པ་ཅིག་ཡོད་ དེ་འབདཝ་ད་ ཁྱོད་ཀྱིས་བཀའ་ཁྲིམས་ལས་འགལ་ཏེ་སྡོད་པ་ཅིན་ ཡ་ཧུ་ད་པའི་རྟགས་མེད་མི་ ཕྱིའི་མི་རིགས་ཚུ་དང་ཁྱད་པར་མེད།

²⁶ འདི་བཟུམ་སྦེ་ ཡ་ཧུ་ད་པའི་རྟགས་མ་བཀལ་མི་ཚུ་གིས་ བཀའ་ཁྲིམས་ལུ་ཉན་སྡོད་པ་ཅིན་ དཀོན་མཆོག་གིས་ཁོང་ལུ་རྟགས་བཀལ་མི་བཟུམ་སྦེ་ མ་བརྩིས་བར་བཞག་འོང་ག།

²⁷ ཁོང་ཕྱིའི་མི་རིགས་ལུ་ ཡ་ཧུ་ད་པའི་རྟགས་མ་བཀལ་ཏེ་འབད་རུང་ དཀོན་མཆོག་གི་བཀའ་ཁྲིམས་ལུ་ཉནམ་ཨིན་མས་ དེ་འབདཝ་ད་ཁྱོད་ཀྱིས་ ཡ་ཧུ་ད་པའི་རྟགས་བཀལ་ཏེ་ དཀོན་མཆོག་གི་བཀའ་ཁྲིམས་ཤེས་ཏེ་འབད་རུང་ མ་པ་ལས་རང་བཀའ་ལུ་མི་ཉན་པས་ དེ་འབདཝ་ལས་ ཁོང་རྟགས་མ་བཀལ་མི་ ཕྱིའི་མི་རིགས་ཚུ་གིས་ ཁྱོད་རྟགས་བཀལ་མི་ལུ་སྐྱོན་མི་བཏག་ག།

²⁸ ཁྱོད་ཕྱི་ཁར་ལས་རྐྱངམ་གཅིག་ ཡ་ཧུ་ད་པའི་ལུགས་སྲོལ་སྒྲིགས་ཏེ་ དཀོན་མཆོག་གི་གཟིགས་སར་ ཡ་ཧུ་ད་པ་ངོ་མ་མེན་ ད་རུང་ཕྱི་ལུས་ལུ་རྐྱངམ་གཅིག་རྟགས་བཀལ་ནི་འདི་ དཀོན་མཆོག་གི་གཟིགས་སར་ རྟགས་ངོ་མ་སྦེ་བརྩི་མི་གནང་།

²⁹ ཡ་ཧུ་ད་པ་ངོ་མ་འབད་ནི་འདི་ ཕྱི་ལུས་ལུ་མེན་པར་ སེམས་འགྱུར་ཏེ་ དཀོན་མཆོག་གིས་ཐུགས་དགྱེས་མི་གཅིག་ཨིན་ ད་རུང་ཕོ་རྒྱ་ལུ་རྟགས་བཀལ་ནི་ངོ་མ་འདི་ ཕྱི་ལུས་ལུ་མེན་པར་ བཀའ་གི་ཚིག་འབྲུ་རེ་རེ་བཞིན་དུ་ ཕྱི་ཁ་ལུ་སྲུང་ནི་ཡང་མེན་པར་ དེ་འབདཝ་ད་ ཐུགས་ཉིད་ལས་སེམས་འགྱུར་མི་གཅིག་ཨིན་ ཨ་ནི་བཟུམ་སེམས་འགྱུར་མི་གཅིག་ཡོད་པ་ཅིན་ ཁོ་གིས་མི་གི་བསྟོད་པ་ལུ་མ་བལྟ་བར་ དཀོན་མཆོག་གི་བསྟོད་པ་ལུ་མཇལཝ་ཨིན།།