རོམ་མི་ལེའུ་ 16 - རྫོང་ཁ་

བཀྲ་ཤིས་བདེ་ལེགས་ཟེར་ཞུ་བའི་སྐོར།

¹ ཁྲོམ་ ཀེན་ཁེརེ་ཡི་ནང་གི་ཆོས་ཚོགས་ཀྱི་དྲང་གཞགཔ་མོ་ ང་བཅས་ཀྱི་སྲིངམོ་ ཕི་བི་ལུ་ང་གིས་ཁྱེད་ལུ་བཅོལ་དོ།

² དཀོན་མཆོག་ཁོ་རའི་དམ་པའི་མི་ཚུ་ལུ་ཞེ་ས་འབདཝ་བཞིན་དུ་ ཁྱེད་ཀྱིས་མོ་ལུ་གཙོ་བོའི་མཚན་ནང་ བྱོན་པར་ལེགས་སོ་འབད་ དེ་ལས་མོ་ལུ་ཁག་ཆེཝ་ག་ཅི་ཡོད་རུང་ ཁྱེད་ཀྱིས་མོ་ལུ་ཕན་བཏགས་བྱིན་ ག་ཅི་སྨོ་ཟེར་བ་ཅིན་ མོ་གིས་ང་དང་མི་ལེ་ཤ་ལུ་རོགས་རམ་འབད་ཡི།

³ ཁིརཱིས་ཡེ་ཤུ་ནང་ ང་དང་གཅིག་ཁར་ དཀོན་མཆོག་གི་ཕྱག་ཞུ་མི་མཉམ་རོགས་ པིརཱིས་ཀ་དང་ མོ་གི་རྨགཔ་ ཨ་ཀུ་ལཱས་གཉིས་ལུ་ ང་ལས་སྐུ་གཟུགས་བཟང་པོ་ཡོད་ཟེར་སླབ་བྱིན།

⁴ ཁོང་གཉིས་ཀྱིས་ ངེ་གི་སྲོག་སྐྱབས་འབད་ནི་སྦེ་ ཁོང་རའི་སྲོག་ལུ་ཡང་ མ་ཕངས་པར་ འདྲོག་སི་སི་གི་གནས་སྟངས་ནང་ལུ་ཡང་ ང་ལུ་ཆ་རོགས་འབད་མི་ལུ་བཀའ་དྲིན་ཆེ་ ཁོང་ལུ་ང་གིས་རྐྱངམ་གཅིག་མེན་པར་ ཕྱིའི་མི་རིགས་ཀྱི་ཆོས་ཚོགས་ ཆ་མཉམ་གྱིས་ཡང་ རོགས་རམ་འབད་ནིའི་དོན་ལུ་ བཀའ་དྲིན་ཆེ་ཟེར་སླབ་བཏང་ཡི།

⁵ ཁོང་གི་ཁྱིམ་ནང་འཛོམས་མི་ཆོས་ཚོགས་ག་ར་ལུ་ ང་ལས་སྐུ་གཟུགས་བཟང་པོ་ཡོད་ དེ་ལས་ ཨེ་སི་ཡ་གི་ལུང་ཕྱོགས་ནང་ལས་ འགོ་དང་པ་རང་ ཁིརཱིས་ལུ་དད་པ་བསྐྱེད་མི་ ངེ་གི་ལྟོ་ཚང་ ཨེ་པའི་ནེ་ཏཱོས་ལུ་སྐུ་གཟུགས་བཟང་པོ།

⁶ ཁྱེད་ལུ་རོགས་རམ་འབད་དེ་ རྩ་འགེངས་ལཱ་འབད་མི་ མཱིར་ཡམ་ལུ་སྐུ་གཟུགས་བཟང་པོ་ཡོད།

⁷ ཨཱན་དྲོ་ནི་ཀཱོས་དང་ ཡུ་ནི་ཡཱས་ལུ་སྐུ་གཟུགས་བཟང་པོ་ཡོད་ ཁོང་གཉིས་ང་དང་ རིགས་བརྒྱུད་གཅིག་འབད་མི་དང་ ངེ་གི་བཙོན་པ་ཆ་རོགས་ཨིནམ་མ་ཚད་ སྐུ་ཚབ་ཚུ་གི་གྲལ་ལས་མིང་ཅན་ དེ་ལས་ངེ་གི་ཧེ་མ་ལས་ཁིརཱིས་ལུ་དད་པ་བསྐྱེད་མི་ཚུ་ཨིན།

⁸ གཙོ་བོ་ནང་ང་གིས་གཅེས་པའི་ ཨམ་པིལི་ཏཱོས་ལུ་ ང་ལས་སྐུ་གཟུགས་བཟང་པོ་ཡོད།

⁹ ཁིརཱིས་ཀྱི་དོན་ལུ་ ང་བཅས་དང་མཉམ་དཀོན་མཆོག་གི་ཕྱག་ཞུ་མི་ ཨུར་བ་ནཱས་དང་ ངེ་གི་ལྟོ་ཚང་ སེཏེ་ཀཱས་ལུ་ང་ལས་སྐུ་གཟུགས་བཟང་པོ།

¹⁰ ཁིརཱིས་ཀྱི་དོན་ལུ་འོས་འབབ་ཡོད་མི་ ཨ་པེ་ལཱེས་དང་ ཨ་རཱིས་ཏོ་བུ་ལཱོས་ཀྱི་བཟའ་ཚན་ག་ར་ལུ་ སྐུ་གཟུགས་བཟང་པོ་སླབ་གནང་།

¹¹ ང་དང་ རིགས་བརྒྱུད་གཅིག་འབད་མི་ ཧེ་རོ་དི་ཨཱོན་ལུ་སྐུ་གཟུགས་བཟང་པོ་ དེ་ལས་གཙོ་བོ་ནང་ཡོད་མི་ ནཱར་སི་སཱོས་ཀྱི་བཟའ་ཚན་ལུ་ཡང་ སྐུ་གཟུགས་བཟང་པོ་ཟེར་སླབ་གནང་།

¹² གཙོ་བོ་གི་དོན་ལུ་ ལཱ་འབད་མི་སྲིངམོ་ ཏིརི་ཕེ་ན་དང་ ཏིརི་ཕོ་ས་ལུ་ སྐུ་གཟུགས་བཟང་པོ་ ད་རུང་གཙོ་བོ་གི་དོན་ལུ་ ལཱ་རྩ་འགེངས་འབད་མི་སྲིངམོ་ ང་བཅས་ཀྱི་གཅེས་པའི་ པེར་སཱིས་ལུ་ཡང་སྐུ་གཟུགས་བཟང་པོ་ཟེར་སླབ་གནང་།

¹³ དཀོན་མཆོག་གིས་བཙག་འཐུ་མཛད་གནང་མི་ རུ་ཕཱས་དང་ ངེ་གི་ཨའི་དང་འདྲ་བའི་ ཁོ་གི་ཨའི་ལུ་ཡང་ སྐུ་གཟུགས་བཟང་པོ་ཡོད་ཟེར་སླབ་གནང་།

¹⁴ དེ་ལས་ ཨ་སུག་ཀིརི་ཏཱོས་དང་ ཕེལེ་གཱོན་ ཧཱེར་མཱེས་ པ་ཏྲོ་བཱས་ ཧཱེར་མཱས་ དེ་ལས་ཁོང་དང་གཅིག་ཁར་ཡོད་མི་ དདཔ་ཅན་སྤུན་ཆ་ག་ར་ལུ་ ང་ལས་སྐུ་གཟུགས་བཟང་པོ་ཟེར་སླབ་གནང་།

¹⁵ ཕི་ལོ་ལོ་གུས་དང་ ཡུ་ལི་ཡ་དང་ ནེ་རེའུས་དང་ ཁོ་གི་སྲིངམོ་ དེ་ལས་ ཨོ་ལིམ་པཱས་དང་ ཁོང་དང་མཉམ་ཡོད་མི་ དཀོན་མཆོག་ཁོ་རའི་དམ་པའི་མི་ཚུ་ལུ་ ང་ལས་སྐུ་གཟུགས་བཟང་པོ་ཟེར་སླབ་གནང་།

¹⁶ ཁྱེད་རང་གཅིག་གིས་གཅིག་ལུ་ ཁིརཱིས་ཀྱི་བྱམས་པ་འབད་དེ་ སྐུ་གཟུགས་བཟང་པོ་ཟེར་སླབ་དེ་ལས་ནཱ་ལུ་ཡོད་མི་ཆོས་ཚོགས་ག་ར་གིས་ ཁིརཱིས་ནང་ཁྱེད་ག་ར་ལུ་སྐུ་གཟུགས་བཟང་པོ་ཟེར་སླབ་གཏང་དེས།།

མཐའན་མཇུག་གི་བཀོད་རྒྱ་གི་སྐོར།

¹⁷ དབའེ་སྤུན་ཆ་ཚུ་ ཁྱེད་ལུ་སྟོན་མི་གཞི་གི་སྐོར་ལས་ དཀྲོགས་ཁ་བརྐྱབས་མི་དང་ བར་ཆད་གཏང་མི་ཚུ་ལུ་ ན་འཐན་སྦེ་བལྟ་ དེ་ལས་ཁྱེད་དེ་ཚུ་ལས་ རང་ས་སྦེ་སྡོད་ཟེར་ ང་ཁྱེད་ལུ་གསོལཝ་བཏབ་དོ།

¹⁸ ག་ཅི་སྨོ་ཟེར་བ་ཅིན་ ཨ་ནི་བཟུམ་གྱི་མི་དེ་ཚུ་གིས་ ང་བཅས་ཀྱི་གཙོ་བོ་ཁིརཱིས་ཀྱི་ཕྱག་ཞུཝ་མེན་པར་ ཁོང་རའི་ཕོཝ་གི་དོན་ལུ་ལཱ་འབདཝ་ཨིན་ དེ་ལས་ཁོང་གི་བློ་ཧན་ཏོང་ཏོ་དང་ རང་བསྟོད་རྐྱབ་ནི་གི་ཐོག་ལས་ མི་ཕྲངམ་དེ་ཚུ་ལུ་ མགུ་བརྡུངམ་ཨིན།

¹⁹ ཁྱེད་གཙོ་བོ་གི་བཀའ་ལུ་ཉན་ཏེ་སྡོདཔ་ཨིན་མས་ཟེར་ ས་ཆ་ག་ར་ནང་གི་དདཔ་ཅན་ཚུ་གིས་ཤེས་ དེ་འབདཝ་ལས་བརྟེན་ཏེ་ ཁྱེད་ཀྱིས་འབད་མི་དེ་ལུ་བལྟ་སྟེ་ ང་སེམས་དགའ་ཡི་ དེ་འབདཝ་ད་ ཁྱེད་ལེགས་ཤོམ་འབད་ནི་ལུ་རིགཔ་རྩལ་དྲགས་དང་ ལཱ་ངན་པ་འབད་ནི་ཤེས་རུང་ དེ་ལུ་འབྲེལ་བ་མ་འཐབ་པར་སྡོད་འོང་ཟེར་ ང་ལུ་འདོད་པ་ཡོད།

²⁰ དེ་ལས་སྐྱིདཔ་གནང་མི་དཀོན་མཆོག་གིས་མགྱོགས་པ་རང་ བདུད་ སེ་ཏཱན་ཁྱེད་ཀྱི་རྐང་མའི་འོག་ལུ་བསྒྲལ་བཀོག་འོང་ ང་བཅས་གཙོ་བོ་ཡེ་ཤུ་ཁིརཱིས་ཀྱི་ཐུགས་རྗེ་ ཁྱེད་ལུ་གནང་བཅུག

²¹ ང་དང་མཉམ་ལཱ་འབད་མི་ ཏི་མོ་ཐི་གིས་ཁྱེད་ལུ་ སྐུ་གཟུགས་བཟང་པོ་ཟེར་ཞུ་དེས་ དེ་ལས་ང་དང་རིགས་བརྒྱུད་གཅིག་འབད་མི་ལྟོ་ཚང་ ལུ་ཀིའུས་དང་ ཡ་སཱོན་དང་ སོ་སི་པ་ཏཱེར་ཚུ་གིས་ཡང་ ཁྱེད་ག་ར་ལུ་སྐུ་གཟུགས་བཟང་པོ་ཟེར་སླབ་བཏང་དེས།

²² པའུལ་གྱི་གསུངམ་བཞིན་དུ་ ཨ་ནི་ཡི་གུ་བྲིས་མི་ང་ ཏཱེར་ཏི་ཨཱས་ཀྱིས་ གཙོ་བོ་ནང་ཁྱེད་ཆ་ཁྱབ་ལུ་སྐུ་གཟུགས་བཟང་པོ་ཟེར་སླབ་བཏང་དོ།

²³ ང་སྡོད་མི་ཁྱིམ་གྱི་སྦྱིན་བདག་ གའི་ཡུས་དང་ ཁོ་གི་ཁྱིམ་ནང་འཛོམས་མི་ཆོས་ཚོགས་ཀྱིས་ ཁྱེད་ལུ་སྐུ་གཟུགས་བཟང་པོ་སླབ་བཏང་དེས་ དེ་ལས་ཁྲོམ་གྱི་རྩིས་དཔོན་ ཨེ་རཱས་ཏཱོས་དང་ ང་བཅས་ཀྱི་ནུ་གཅུང་ ཀ་ཝཱར་ཏུས་ཀྱིས་ཡང་ ཁྱེད་ལུ་སྐུ་གཟུགས་བཟང་པོ་ཟེར་སླབ་དེས།

²⁴

^25-26 མཐའ་མེད་པའི་དཀོན་མཆོག་གི་བཀའ་དང་བསྟུན་ཏེ་ མི་རིགས་ག་ར་གིས་ དཀོན་མཆོག་གི་བཀའ་ལུ་དད་པ་བསྐྱེད་དེ་ ཉན་བཅུག་ནི་གི་དོན་ལུ་ ལུང་བསྟན་ཚུ་ཧེ་མ་བྲིས་བཞག་མི་གསུང་རབ་ཀྱི་རྒྱུད་ལས་སྦེ་ཕྱི་ཁར་འཐོན་ཏེ་ ཧེ་མ་ལས་གསང་བཞག་མི་བདེན་པའི་གཏམ་བཟང་འདི་ ད་རེས་སྐབས་ཁྱབ་བསྒྲགས་འབད་མི་དང་བསྟུན་ཏེ་ ཡེ་ཤུ་ཁིརཱིས་ཀྱི་སྐོར་ལས་ཁྱབ་བསྒྲགས་དང་ ང་གིས་བཤད་མི་གཏམ་བཟང་གི་རྒྱུད་ལས་སྦེ་ ཁྱེད་ལུ་དད་པ་སྒྲིང་སྒྲིང་མཛད་མི།

²⁷ ག་ར་ལས་ཤེས་རབ་ཅན་གྱི་དཀོན་མཆོག་ལུ་ ཡེ་ཤུ་ཁིརཱིས་ཀྱི་རྒྱུད་ལས་སྦེ་ དུས་ཨ་རྟག་ར་ ཁོ་ལུ་བསྟོད་པ་ཕུལ་བར་ཤོག་ ཨ་མཱེན།། །།