རོམ་མི་ལེའུ་ 15 - རྫོང་ཁ་

སེམས་མཐུན་ཏེ་སྡོད་དགོ་པའི་སྐོར།

¹ དད་པ་སྒྲིང་སྒྲིང་ཡོད་མི་ ག་གིས་རང་འབད་རུང་ རང་རྐྱངམ་གཅིག་གི་དོན་ལུ་མནོ་བསམ་མ་བཏང་ དེ་འབདཝ་ད་ དད་པ་སྒྲིང་སྒྲིང་མེད་མི་དེ་ཚུ་ལུ་ ང་བཅས་ཀྱིས་སུ་ཐག་རིངམོ་སྦེ་སྡོད་དགོ།

² ང་བཅས་རེ་རེ་གིས་ ཁྱིམ་ཚང་གི་དད་པ་ ཡར་རྒྱས་གཏང་ནི་གི་དོན་ལུ་ ཕན་ཐོག་པའི་ལཱ་འབད་དེ་ ཁོང་ལུ་དགའ་ཚོར་བསྐྱེད་བཅུག་དགོ།

³ ཁིརཱིས་ཡང་ ཁོ་རང་གིས་ཁོ་རང་ལུ་ ཐུགས་དགྱེས་པའི་ཕྱག་ལཱ་མ་མཛད་པས་ དེ་འབདཝ་ད་ གསུང་རབ་ནང་ཡོད་མི་བཟུམ་སྦེ། མི་གཞན་གྱིས་ནཱ་ལུ་སྨད་པ་བརྐྱབས་མི་འདི་ ནཱ་ལུ་མེན་པར་ ང་ལུ་ཕོག་ཅི་ཟེར་ བྲིས་ཏེ་ཡོད།

⁴ ཨ་ནི་བཟུམ་སྦེ་ ཧེ་མ་ག་བྲིས་བཞག་མི་དེ་ཚུ་ག་ར་ ང་བཅས་ལུ་སྦྱོང་བརྡར་བྱིན་པའི་དོན་ལུ་ཨིན་ དེ་གིས་འབད་ བཟོད་སེམས་བསྐྱེད་དེ་ གསུང་རབ་ཀྱི་རྒྱུད་ལས་སེམས་གསོ་ཐོབ་སྟེ་ ང་བཅས་རེ་བ་བསྐྱེད་དེ་སྡོདཔ་ཨིན།

⁵ དཔེ་ཁིརཱིས་ཡེ་ཤུ་ལུ་བལྟ་སྟེ་ གཅིག་དང་གཅིག་ སེམས་མཐུན་ཏེ་སྡོད་ནིའི་ཁེ་རྒོ་ བཟོད་སེམས་དང་སེམས་གསོ་གནང་མི་དཀོན་མཆོག་གིས་ ཁྱེད་ཆ་ཁྱབ་ལུ་གནང་བཅུག

⁶ དེ་གིས་འབད་ ཁྱེད་ག་ར་སེམས་མཐུན་བཞིནམ་ད་ སྐད་གཅིག་སྦེ་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་ཡབ་དཀོན་མཆོག་ལུ་ བསྟོད་པ་ཕུལ་ཚུགས།

⁷ དེ་འབདཝ་ལས་ ཁིརཱིས་ཀྱིས་ང་བཅས་ལུ་ ཁོ་རའི་མི་སྦེ་ཞལ་གྱིས་བཞེས་དོཝ་བཟུམ་སྦེ་ ང་བཅས་ཡང་ གཅིག་གིས་གཅིག་ལུ་བསུ་ལེན་འབད་དགོ་ དེ་ལས་དཀོན་མཆོག་གི་མཚན་སྙན་གྲགས་ཅན་སྦེ་འགྱོ་འོང་།

^8-9 ང་བཅས་ཀྱི་ཕ་བརྒྱུད་ཚུ་ལུ་ དཀོན་མཆོག་གིས་ཞལ་གྱི་བཞེས་ཡོད་མིའི་བདེན་པ་དེ་ ཏན་ཏན་གྲུབ་ནིའི་དོན་ལུ་དང་ ཕྱིའི་མི་རིགས་ཚུ་གིས་ཡང་ ཁོང་ལུ་སྙིང་རྗེ་བསྐྱེད་མི་དཀོན་མཆོག་ལུ་ བསྟོད་པ་ཕུལ་བཅུག་ནིའི་དོན་ལུ་ ཁིརཱིས་ ཡ་ཧུ་ད་པ་ཚུ་གི་གཡོགཔོ་སྦེ་བྱོན་ཡི་ཟེར་ ང་གིས་ཁྱེད་ལུ་སླབ་དོ་ གསུང་རབ་ནང་ཡོད་མི་བཟུམ་སྦེ། ང་ ཕྱིའི་མི་རིགས་ཚུ་གི་གདོང་ཁར་ ནཱ་ལུ་བསྟོད་པ་ཕུལ་ནི་ དེ་ལས་ནཱ་གི་མཚན་འདི་ལུ་ གླུ་དབྱངས་ཕུལ་ནི་ཟེར་ བྲིས་ནུག

¹⁰ ད་རུང་གཞན་གཅིག་ཁ་ལུ། དབའེ་ ཕྱིའི་མི་རིགས་ཚུ་ གཙོ་བོ་གི་མི་ཚུ་དང་གཅིག་ཁར་ ཁྱེད་ག་ར་དགའ་ཚོར་འགྱུར་ཟེར་

¹¹ དེ་ལས་ད་རུང་། དབའེ་ ཕྱིའི་མི་རིགས་ག་ར་གིས་ གཙོ་བོ་ལུ་བསྟོད་པ་ཕུལ་ འཛམ་བུ་གླིང་གི་མི་ག་ར་གིས་ ཁོ་ལུ་བསྟོད་པ་ཕུལ་ཟེར་ བྲིས་ནུག

¹² ད་རུང་ལུང་སྟོན་པ་ ཨའི་ཟ་ཡ་གིས། ཇེ་སི་གི་བུ་བརྒྱུད་ལས་ མི་གཅིག་འབྱུང་འོང་། ཁོ་གིས་ ཕྱིའི་མི་རིགས་ཀྱི་རྒྱལ་སྲིད་སྐྱོངས་ནི་ཨིན་ ཁོང་གིས་ཁོ་ལུ་རེ་བ་བསྐྱེད་དེ་སྡོད་འོང་ཟེར་ སླབ་ནུག

¹³ ཁྱེད་དད་པ་བསྐྱེད་ནི་འདི་གིས་ རེ་བ་གནང་མི་དཀོན་མཆོག་གིས་ དགའ་ཚོར་དང་ཞི་བདེ་ ཡོངས་སུ་རྫོགསཔ་སྦེ་ ཁྱེད་ལུ་གནང་བཅུག་ དེ་ལས་དམ་པའི་ཐུགས་ཉིད་ཀྱི་དབང་གི་རྒྱུད་ལས་སྦེ་ ཁྱེད་རེ་བ་སྦོམ་བསྐྱེད་མི་སྦེ་སྡོད་འོང་།།

པའུལ་གྱིས་ཡི་གུ་འབྲི་དགོ་མི་དོན་དག་གི་སྐོར།

¹⁴ ངེ་གི་དདཔ་ཅན་སྤུན་ཆ་ཚུ་ཁྱེད་ལུ་བལྟ་སྟེ་ ང་ཡིད་རངས་ཡི་ ག་ཅི་སྨོ་ཟེར་བ་ཅིན་ ཁྱེད་ག་ར་ལེགས་ཤོམ་ཨིནམ་མ་ཚད་ ཁྱེད་ག་ར་ཤེས་རབ་ཀྱིས་གང་སྟེ་ཡོད་མི་ཚུ་དང་ ཁྱེད་རང་གཅིག་གི་གཅིག་ལུ་བསླབ་བྱ་བྱིན་ཏེ་ བཅོ་ཁ་བརྐྱབ་ནི་ལུ་ལྕོགས་གྲུབ་ཅན་ཚུ་ཨིན།

¹⁵ ཨིན་རུང་ ཁྱེད་ཀྱི་སེམས་ཁར་དྲན་པའི་དོན་ལུ་ དོན་དག་ལ་ལུ་ཅིག་གཙོ་བོ་བསྟེན་ཏེ་ ང་མ་འདྲོགས་པར་ ཁྱེད་ལུ་བྲིས་ཏེ་གཏང་ཡི་ ག་ཅི་སྨོ་ཟེར་བ་ཅིན་ དཀོན་མཆོག་གིས་ང་ལུ་གནང་མིའི་ཐུགས་རྗེ་ལས་བརྟེན་ཏེ།

¹⁶ ཁིརཱིས་ཡེ་ཤུ་གི་ཕྱག་ཞུ་མི་སྦེ་བྱུང་སྟེ་ དཀོན་མཆོག་གི་གཏམ་བཟང་ ཕྱིའི་མི་རིགས་ཚུ་ལུ་བཤད་མིའི་ཞབས་ཏོག་ཞུཝ་ཨིན་ འདི་ག་ཅི་སྨོ་ཟེར་བ་ཅིན་ ཕྱིའི་མི་རིགས་དེ་ཚུ་ དམ་པའི་ཐུགས་ཉིད་ལས་སྦེ་ གཙང་ཏོག་ཏོ་མཛད་དེ་ དཀོན་མཆོག་གིས་ཐུགས་དགྱེས་པའི་མཆོདཔ་གཅིག་ལུ་ འགྱུར་བཅུག་ནིའི་དོན་ལུ་ཨིན།

¹⁷ དེ་འབདཝ་ལས་བརྟེན་ཏེ་ ང་གིས་དཀོན་མཆོག་གི་ཕྱག་ཞུ་བའི་ཐོག་ལས་ ཁིརཱིས་ཡེ་ཤུ་གིས་མཛད་མི་ལུ་མཇལཝ་ད་ ང་ལུ་དགའ་ཚོར་བསྐྱེད་ནིའི་དོན་དག་ལེ་ཤ་ཡོད།

¹⁸ ག་ཅི་སྨོ་ཟེར་བ་ཅིན་ ཕྱིའི་མི་རིགས་ཚུ་ལུ་དཀོན་མཆོག་གི་བཀའ་ལུ་ཉན་བཅུག་ནི་སྦེ་ ཁིརཱིས་ཀྱིས་ང་གིས་སླབ་མི་དང་འབད་མི་གི་རྒྱུད་ལས་སྦེ་ ག་ཅི་རང་མཛད་གནང་ཡི་ག་ འདི་ལས་འགལ་ཏེ་ གཞན་ག་ནི་ཡང་ང་གིས་མ་སླབ།

¹⁹ རྟགས་མཚན་དང་ཧ་ལས་པའི་ཕྱག་ལཱ་ཚུ་ དམ་པའི་ཐུགས་ཉིད་ཀྱི་དབང་ཤུགས་ཀྱི་རྒྱུད་ལས་སྦེ་ ཡེ་རུ་ཤ་ལེམ་ལས་འགོ་བཙུགས་ཏེ་ ཨཱིལ་ལི་རི་ཀུམ་ལུང་ཕྱོགས་ལུ་ཚུན་ཚོད་ ཁིརཱིས་ཀྱི་གཏམ་བཟང་འདི་ ང་གིས་ག་ཏེ་ཡང་བཤད་དེ་སླབ་ཚར་ཡི།

²⁰ ཡེ་ཤུ་ཁིརཱིས་ཀྱི་སྐོར་ལས་ ནམ་ཡང་རྣ་བ་མ་གོ་བར་སྡོད་མི་ཚུ་གི་ས་གནས་ནང་ལུ་ ང་གནམ་མེད་ས་མེད་གཏམ་བཟང་བཤད་པ་འགྱོ་དགོ་མནོ་ཡི་ དེ་འབདཝ་ད་ གཏམ་བཟང་ཧེ་མ་ལས་ གཞན་གྱིས་བཤད་ཚར་བའི་ས་གནས་ནང་ གཞན་ལས་འཕྲོ་མཐུད་དེ་ ང་གིས་གཏམ་བཟང་བཤད་དགོ་མི་མནོ་བས།

²¹ དེ་འབདཝ་ད་གསུང་རབ་ནང་ལུ། ཁོ་གི་སྐོར་ལས་ནམ་ཡང་ ཆོས་མ་བཤད་པར་མ་གོ་མི་ཚུ་གིས་ ད་མཐོང་ནི་ཨིན་ དེ་ལས་ཁོ་གི་སྐོར་ལས་ ནམ་ཡང་རྣ་བ་མ་གོ་མི་ཚུ་གིས་ ད་ལེགས་ཤོམ་སྦེ་ཧ་གོ་ནི་ཨིན་ཟེར་བྲིས་ཏེ་འདུག།

པའུལ་ རོམ་ལུ་འགྱོ་དགོ་མནོ་བའི་སྐོར།

²² འདི་གིས་འབད་དེ་ ང་ཁྱེད་སྡོད་ས་ལུ་ཚར་ལེ་ཤ་ཅིག་རང་འོང་ནི་འབད་རུང་ འོང་མ་ཚུགས།

²³ ད་ང་ཨ་ནི་ལུང་ཕྱོགས་ཚུ་ནང་ལུ་ ང་གིས་འབད་དགོ་པའི་ལཱ་དེ་ཚུ་ག་ར་ཚར་སོང་ཡི་ དེ་མ་ཚད་ ང་ལོ་མང་རབས་གཅིག་གི་ཧེ་མ་ལས་ ཁྱེད་སྡོད་ས་འོང་ནི་རེ་བ་ གནམ་མེད་ས་མེད་བསྐྱེད་དེ་ཡོད།

²⁴ ང་ སེཔེའཱིན་ལུ་འགྱོཝ་ད་ ལམ་ཁ་ལུ་ ཁྱེད་དང་གཅིག་ཁར་འཕྱད་ནི་གི་རེ་བ་བསྐྱེད་དོ་ དེ་ལས་དུས་ཡུན་དུམ་གྲ་གཅིག་ ཁྱེད་དང་མཉམ་གཅིག་དགའ་ཏོག་ཏོ་སྦེ་སྡོད་དེ་ ང་ཕར་འགྱོཝ་ད་ཁྱེད་ཀྱིས་ང་ལུ་ ལམ་འགྲུལ་འབད་ནི་གི་དོན་ལུ་ རོགས་རམ་འབད་བྱིན་འོང་ཟེར་ ང་ལུ་རེ་བ་ཡོད།

²⁵ དེ་འབདཝ་ད་ དཀོན་མཆོག་ཁོ་རའི་དམ་པའི་མི་ཚུ་ལུ་ རོགས་རམ་འབད་ནིའི་དོན་ལུ་ ད་ང་ ཡེ་རུ་ཤ་ལེམ་ལུ་འགྱོ་དོ།

²⁶ ག་ཅི་སྨོ་ཟེར་བ་ཅིན་ ཡེ་རུ་ཤ་ལེམ་ནང་ཡོད་མི་ དཀོན་མཆོག་ཁོ་རའི་དམ་པའི་མི་ སྤྱང་ཀ་ཚུ་གི་དོན་ལུ་ ལུང་ཕྱོགས་ མ་ཀེ་དོ་ནི་ཡ་དང་ ཨ་ཀེ་ཡ་གི་ཆོས་ཚོགས་ཀྱིས་ ཁོང་གི་དོན་ལུ་སེམས་དགའ་སྟེ་ཞལ་འདེབས་བྱིན་ཡི།

²⁷ ཞལ་འདེབས་དེ་ ཁོང་གིས་སེམས་དགའ་སྟེ་བྱིན་ཡི་ དེ་སྦེ་ཨིན་ཏེ་འབད་རུང་ ཁོང་ཕྱིའི་མི་རིགས་ཚུ་ ཡ་ཧུ་ད་པ་ཚུ་ལུ་ དྲིན་ལན་འཇལ་དགོཔ་ཨིན་ ག་ཅི་སྨོ་ཟེར་བ་ཅིན་ ཡ་ཧུ་ད་པ་ཚུ་གི་སེམས་ཉིད་ཀྱི་བྱིན་རླབས་འདི་ ཁོང་ཕྱིའི་མི་རིགས་ཚུ་གིས་ཐོབ་སྟེ་ཡོད་པ་ཅིན་ ཡ་ཧུ་ད་པ་ལུ་འཇིག་རྟེན་གྱི་ཁག་ཆེཝ་དེ་ཚུ་ཡང་བྱིན་ཏེ་ རོགས་རམ་འབད་དགོ།

²⁸ དེ་འབདཝ་ལས་བརྟེན་ཏེ་ ཁོང་གི་དོན་ལུ་བསྡུ་མི་ཞལ་འདེབས་དེ་འབག་སྟེ་ ཁོང་ལུ་སྤྲོད་ཚརཝ་ད་ ང་ཁྱེད་སྡོད་ས་ལས་སྦེ་ སེཔེའཱིན་ལུ་འགྱོ་ནི་ཨིན།

²⁹ ང་ཁྱེད་སྡོད་ས་ལུ་འོངམ་ད་ ཁིརཱིས་ཀྱིས་བྱིན་རླབས་མངམ་སྦེ་གནང་ནི་ཨིན་ཟེར་ ང་གིས་ཐད་རི་བ་རི་ཤེས།

³⁰ དབའེ་སྤུན་ཆ་ཚུ་ ང་བཅས་ཀྱི་གཙོ་བོ་ཡེ་ཤུ་ཁིརཱིས་དང་ དམ་པའི་ཐུགས་ཉིད་ཀྱི་བྱམས་པ་ལས་བརྟེན་ཏེ་ ང་ལཱ་ནང་རྩ་འགེངས་དོཝ་བཟུམ་སྦེ་ ཁྱེད་ཀྱིས་ཡང་བརྩོན་འགྲུས་བསྐྱེད་དེ་ ངེ་གི་དོན་ལས་ དཀོན་མཆོག་ལུ་སྨོན་ལམ་བཏབ་གནང་ཟེར་ ང་གིས་གསོལཝ་བཏབ་ཨིན།

³¹ ཡུ་དེ་ཡ་གི་ལུང་ཕྱོགས་ལུ་ཡོད་མི་ དད་པ་བསྐྱེད་མ་བཏུབ་མི་ཚུ་ལས་ ང་སྤར་ཐར་ནིའི་དོན་ལུ་དང་ ཡེ་རུ་ཤ་ལེམ་ལུ་ཡོད་མི་ དཀོན་མཆོག་ཁོ་རའི་དམ་པའི་མི་ཚུ་ལུ་ ང་གིས་འབད་མི་དེ་ ལེགས་ཤོམ་རང་འབྱུང་བཅུག་ཟེར་ སྨོན་ལམ་བཏབ་གནང་།

³² དེ་ལས་དཀོན་མཆོག་གི་ཐུགས་དགོངས་ཡོད་པ་ཅིན་ ང་དགའ་ཚོར་ནང་ཁྱེད་སྡོད་ས་ལྷོད་དེ་ ཁྱེད་དང་མཉམ་ང་ངལ་འཚོ་སྟེ་ཧིང་སང་ས་འགྱོ་ནི་ཨིན།

³³ ཞི་བདེ་གནང་མིའི་དཀོན་མཆོག་འདི་ ཁྱེད་ག་ར་དང་མཉམ་གཅིག་བཞུགས་བཅུག་ ཨ་མཱེན།།