རོམ་མི་ལེའུ་ 14 - རྫོང་ཁ་

སྐྱོན་བཏགས་ནི་མེད་པའི་སྐོར།

¹ ཁྱེད་ཀྱི་སྦུག་ལུ་དད་པ་ནང་སྒྲིང་སྒྲིང་མེད་མི་ཚུ་ཡོད་རུང་ ཁོང་དང་རྩོད་པ་རྐྱབ་ནི་མི་འོང་ ཁོང་གིས་མནོ་བསམ་གཏང་མི་ལུ་ འཛོལ་བ་ཡོད་རུང་མེད་རུང་ ཁོང་ལུ་སྤུན་ཆ་སྦེ་རྩི་དགོ།

² དདཔ་ཅན་ལ་ལུ་གིས་ བཞེས་སྒོ་ག་ཅི་རང་འབད་རུང་ ཟ་བཏུབ་ཟེར་མནོ་སྟེ་ ག་ར་ཟཝ་ཨིན་ དེ་འབདཝ་ད་ དད་པ་ཉུང་དྲགས་འབད་མི་ལ་ལུ་གིས་ ཚོད་བསྲེ་གི་རིགས་རྐྱངམ་གཅིག་ཟ་སྡོད་འོང་།

³ བཞེས་སྒོ་ག་ཅི་རང་འབད་རུང་ཟ་བཏུབ་ཟེར་ ཟ་མི་ཚུ་གིས་ མ་ཟ་མི་དེ་ལུ་སྐྱོ་ཤོས་སྦེ་རྩི་མ་བཅུག་ དེ་ལས་མ་ཟ་མི་གིས་ ཟ་མི་ལུ་སྐྱོན་བཏགས་མ་བཅུག་ ག་ཅི་སྨོ་ཟེར་བ་ཅིན་ དཀོན་མཆོག་གིས་ གཉིས་ཆ་རང་ལུ་ ཁོ་གི་མི་སྦེ་ ཞལ་གྱིས་བཞེསཔ་ཨིན།

⁴ མི་གཞན་གྱི་གཡོགཔོ་ལུ་སྐྱོན་བཏགས་མི་ ཁྱོད་ག་སྨོ་ ཁོ་གིས་འབད་ཚུགས་རུང་ འབད་མ་ཚུགས་རུང་ ཁོ་རང་གི་སྦྱིན་བདག་ཡོད་ ག་ཅི་སྨོ་ཟེར་བ་ཅིན་ གཙོ་བོ་གིས་ ལཱ་ལེགས་ཤོམ་གྱི་དོན་ལུ་ ཁོ་ལུ་བཞག་ནི་དབང་ཚད་ཡོད།

⁵ མི་ལ་ལུ་ཅིག་གིས་ ཉིནམ་ག་ར་གི་གྲལ་ལས་ ཉིནམ་གཅིག་ཁག་ཆེ་ཏོག་ཏོ་ཨིན་ཟེར་ མནོ་བསམ་བཏངམ་ཨིན་ དེ་ལས་གཞན་གཅིག་གིས་ ཉིནམ་ག་ར་ཁག་ཆེ་ཏོག་ཏོ་ཨིན་ཟེར་མནོཝ་ཨིན་ དེ་འབདཝ་ད་ ཉིནམ་ག་འདི་རྩི་རུང་ མི་ག་ར་གིས་ རང་རང་སོ་སོའི་སེམས་ཁ་ལུ་ཏན་ཏན་ཤེས་དགོ།

⁶ ཉིནམ་ག་ར་གི་གྲལ་ལས་ གཅིག་ཁག་ཆེ་ཏོག་ཏོ་ཨིན་ཟེར་མནོ་མི་གིས་ གཙོ་བོ་གི་དོན་ལུ་འབདཝ་ཨིན་ དེ་ལས་བཞེས་སྒོ་ག་ཅི་རང་འབད་རུང་ ཟ་བཏུབ་མནོ་སྟེ་ཟ་མི་དང་ ཟ་མི་བཏུབ་མནོ་སྟེ་མ་ཟ་མི་གཉིས་ཆ་ར་ གཙོ་བོ་གི་དོན་ལུ་འབདཝ་ཨིན་ ཁོང་གཉིས་ཆ་ར་གིས་ བཞེས་སྒོ་གི་དོན་ལུ་ དཀོན་མཆོག་ལུ་བཀའ་དྲིན་ཆེ་ཟེར་ཞུཝ་ཨིན།

⁷ ག་ཅི་སྨོ་ཟེར་བ་ཅིན་ གསོན་པོ་སྦེ་སྡོད་ནི་དང་ཤི་ནི་འདི་ ང་བཅས་ཀྱི་དོན་ལུ་མེན།

⁸ ང་བཅས་གསོན་པོ་སྦེ་སྡོད་རུང་ གཙོ་བོ་གི་དོན་ལུ་ཨིན་ ང་བཅས་ཤི་རུང་ གཙོ་བོ་གི་དོན་ལུ་ཨིན་ དེ་འབདཝ་ལས་ མི་ཚེ་ནང་འབད་རུང་རང་ འཆི་བ་ནང་འབད་རུང་རང་ ང་བཅས་མ་པ་ལས་ར་གཙོ་བོ་གི་ཨིན།

⁹ ཁིརཱིས་ ཤི་སོང་མི་ཚུ་དང་ གསོན་པོ་སྦེ་སྡོད་མི་ གཉིས་ཆ་ར་གི་སྦྱིན་བདག་སྦེ་འབྱུང་ནིའི་དོན་ལུ་ ཁོ་གཤགས་ཏེ་ ད་རུང་སྐུ་གསོན་པོ་བཞེངས་ཅི།

¹⁰ དེ་འབདཝ་ལས་བརྟེན་ཏེ་ ཁྱོད་ཀྱིས་རང་གི་དདཔ་ཅན་སྤུན་ཆ་ལུ་ ག་ཅི་འབད་དབྱེ་ཞིབ་འབདཝ་སྨོ་ ཁྱོད་རང་གི་དདཔ་ཅན་སྤུན་ཆ་ལུ་ ག་ཅི་འབད་སྐྱོ་ཤོས་སྦེ་རྩིཝ་སྨོ་ ག་ཅི་སྨོ་ཟེར་བ་ཅིན་ ཉིནམ་གཅིག་གི་ཚེ་ ང་བཅས་ག་ར་དཀོན་མཆོག་གི་བཞུགས་ཁྲི་གི་གདོང་ཁར་ལོང་དགོ་ཟེར་ ང་བཅས་ཀྱིས་ཤེས།

¹¹ གསུང་རབ་ནང་ལུ་གཙོ་བོ་གིས། ང་གསོན་པོ་སྦེ་སྡོདཔ་ཨིན་ཟེར་མི་འདི་ བདེན་པ་ཨིན་པ་ཅིན་ མི་ག་ར་གིས་ང་ལུ་པུས་མོ་ས་ཁ་བཙུགས་ཏེ་ ནཱ་དཀོན་མཆོག་ཨིན་མས་ ཟེར་འཛོམ་དཔང་འབད་འོང་ཟེར་ བྲིས་ཏེ་འདུག

¹² དེ་འབདཝ་ལས་བརྟེན་ཏེ་ ང་བཅས་ག་ར་གིས་ རང་གི་སྐོར་ལས་རྩིས་དཀོན་མཆོག་ལུ་ཕུལ་དགོ།།

དདཔ་ཅན་ནུ་གཅུང་ལུ་ཐེ་འཚོམ་བསྐྱེད་མ་བཅུག་ནི་གི་སྐོར།

¹³ ད་ང་བཅས་གཅིག་གིས་གཅིག་ལུ་དབྱེ་ཞིབ་མ་འབད་ དེ་གི་ཚབ་ལུ་ སྤུན་ཆ་གི་དད་པ་ལུ་གནོདཔ་མ་སྐྱེལ་ནི་དང་ འགྱེལ་མ་བཅུག་ནིའི་དོན་ལུ་རྩ་འགེངས་དགོ།

¹⁴ བཞེས་སྒོ་ག་ཅི་རང་ཨིན་རུང་ འདི་ནང་མ་གཙངམ་ག་ནི་ཡང་མེད་ཟེར་ གཙོ་བོ་ཡེ་ཤུ་གི་དབང་ཚད་ལས་སྦེ་ ང་གིས་ཐད་རི་བ་རི་ཤེས་ དེ་འབདཝ་ད་ ག་གིས་རང་འབད་རུང་ འདི་ལུ་མ་གཙངམ་ཨིན་ཟེར་མནོ་བ་ཅིན་ བཞེས་སྒོ་དེ་ ཁོ་གི་དོན་ལུ་མ་གཙངམ་འགྱོཝ་ཨིན།

¹⁵ ཁྱོད་ཀྱིས་ཟ་མི་བཞེས་སྒོ་གིས་ ཁྱོད་ཀྱི་དདཔ་ཅན་ནུ་གཅུང་ལུ་སེམས་ཕམ་བཅུག་པ་ཅིན་ ཁོ་ལུ་བྱམས་པ་མེདཔ་ཨིན་མས་ དེ་འབདཝ་ལས་ ཁྱོད་ཀྱིས་ཟ་མི་བཞེས་སྒོ་གིས་ ཡེ་ཤུ་ཁིརཱིས་གཤགས་གནང་མི་དདཔ་ཅན་ཚུ་གི་ཚེ་ མེདཔ་ཐལ་མ་བཅུག

¹⁶ མདོར་བསྡུས་ཏེ་སླབ་པ་ཅིན་ ཁྱོད་རང་གི་སེམས་ཁ་ཀྲིག་ཀྲི་ཨིན་ཟེར་མནོ་མི་དེ་གིས་ མི་གཞན་གྱི་དད་པ་ལུ་གནོདཔ་སྐྱེལ་མ་བཅུག

¹⁷ ག་ཅི་སྨོ་ཟེར་བ་ཅིན་ དཀོན་མཆོག་གི་རྒྱལ་སྲིད་དེ་ བཟའ་ནི་འཐུང་ནི་གི་སྐོར་ལས་མེན་ དེ་འབདཝ་ད་ དཀོན་མཆོག་གི་ཐུགས་ལྡན་པའི་ལཱ་ཕྲངམ་དང་ ཞི་བདེ་དང་ དམ་པའི་ཐུགས་ཉིད་ཀྱི་རྒྱུད་ལས་སྦེ་ ཐོབ་མི་དགའ་ཚོར་གྱི་སྐོར་ལས་ཨིན།

¹⁸ ག་གིས་རང་འབད་རུང་ ཨ་ནི་བཟུམ་སྦེ་ཁིརཱིས་ཀྱི་ཕྱག་ཞུ་བ་ཅིན་ འདི་ལུ་དཀོན་མཆོག་གིས་ཐུགས་དགྱེསཔ་ཨིནམ་མ་ཚད་ མི་དེ་ཚུ་གིས་ཡང་ དེ་ལུ་ལེགས་ཤོམ་སྦེ་བརྩི་འོང་།

¹⁹ དེ་འབདཝ་ལས་བརྟེན་ཏེ་ ང་བཅས་དདཔ་ཅན་ཚུ་གིས་ གཅིག་གི་གཅིག་ལུ་མཐུན་ལམ་བཟོ་ནི་དང་ དད་པ་ཡར་རྒྱས་འགྱོ་ནིའི་དོན་ལུ་ གཅིག་གིས་གཅིག་ལུ་ ཕན་ཐོག་པའི་ལཱ་ལུ་གཙོ་བོ་བསྟེན་ཏེ་སྡོད་དགོ།

²⁰ ཁྱོད་ཀྱིས་ཟ་མི་བཞེས་སྒོ་གིས་འབད་དེ་ དཀོན་མཆོག་གི་ཕྱག་ལཱ་དེ་མེདཔ་མ་གཏང་ བཞེས་སྒོ་ག་ཅི་རང་འབད་རུང་ མ་པ་ལས་རང་གཙང་ཏོག་ཏོ་ཨིན་ དེ་འབདཝ་ད་ ཁྱོད་ཀྱི་ཟ་མི་བཞེས་སྒོ་གི་རྒྱུད་ལས་སྦེ་ དདཔ་ཅན་ནུ་གཅུང་གི་སེམས་ཁ་དོགས་པ་ཆགས་ཏེ་ ཟ་བཅུག་པ་ཅིན་ འདི་ལེགས་ཤོམ་མེན།

²¹ ཁྱོད་ཀྱིས་ཤ་ཟ་རུང་ རྒུན་འབྲུམ་ཆང་འཐུང་རུང་ ལཱ་ག་ཅི་རང་འབད་རུང་རང་ དདཔ་ཅན་སྤུན་ཆ་ལུ་གནོད་ནི་ཨིན་པ་ཅིན་ འདི་མ་འབད་བར་སྡོད་པ་ཅིན་དྲག་པས།

²² ཨ་ནི་འདི་ཚུ་གི་སྐོར་ལས་ ཁྱོད་དང་དཀོན་མཆོག་གི་ནང་ན་རང་བཞག་ ག་གིས་རང་འབད་རུང་ ཀྲིག་ཀྲི་རང་ཨིན་ཟེར་མནོ་སྟེ་ སེམས་ཁར་ཐེ་འཚོམ་མ་བསྐྱེད་མི་དེ་ བྱིན་རླབས་ཅན་ཨིན།

²³ དེ་འབདཝ་ད་ ཁོ་གིས་སེམས་ཁ་ཐེ་འཚོམ་བསྐྱེད་དེ་ཟ་བ་ཅིན་ ཁོ་ལུ་དྲན་ཤེས་གསལ་ཏོག་ཏོ་མི་འོང་ ག་ཅི་སྨོ་ཟེར་བ་ཅིན་ ཁོ་གིས་ཐད་རི་བ་རི་མ་ཤེས་པར་ཟ་ཡི་ ག་ཅི་རང་འབད་རུང་ སེམས་ཁར་ལས་དད་པ་བསྐྱེད་དེ་ ཐད་རི་བ་རི་ཐག་མ་བཅད་མི་འདི་ ག་ར་སྡིག་པ་ཨིན།།