རོམ་མི་ལེའུ་ 12 - རྫོང་ཁ་

ཁྱེད་ཀྱི་ལུས་དཀོན་མཆོག་ལུ་ཕུལ་དགོ་པའི་སྐོར།

¹ དབའེ་སྤུན་ཆ་ཚུ་ དཀོན་མཆོག་གིས་ང་བཅས་ལུ་ཐུགས་བརྩེ་བ་ལུ་བརྟེན་ཏེ་ དཀོན་མཆོག་གི་ཐུགས་དགྱེས་མི་སྦེ་ ཁྱེད་ཀྱི་གསོན་པོའི་ལུས་འདི་ རང་གིས་རང་ལུ་སྤང་སྟེ་ གཙང་ཏོག་ཏོ་གི་ཐོག་ལས་ ཁོ་ལུ་ཕུལ་ཟེར་ ང་གིས་ཁྱེད་ལུ་གསོལ་བཏབ་ཞུ་དོ་ མཆོདཔ་ངོ་མ་འདི་ཨ་ནི་རང་ཨིན།

² འཇིག་རྟེན་པའི་བསམ་བློ་དང་མ་འཁྲིལ་བར་ རང་གི་མནོ་བསམ་གཏང་ཐངས་འདི་ཚུ་ འགྱུར་བཅོས་འབད་དེ་ རང་གི་མི་ཚེ་ གསརཔ་སྦེ་སོར་ཏེ་སྡོད་དགོ་ དེ་སྦེ་འབདཝ་ད་ དཀོན་མཆོག་གི་ཐུགས་དགོངས་འདི་ ག་ཅི་ཨིན་ན་ཉམས་མྱོང་འབད་དེ་ ཁོ་གི་ཐུགས་དགོངས་འདི་ལེགས་ཤོམ་གཅིག་དང་ ཐུགས་དགྱེས་མི་གཅིག་དང་ ཡང་དག་པ་གཅིག་ཨིན་ཟེར་ ཁྱེད་ཀྱིས་ཧ་གོ་ནི་ཨིན།།

ཐུགས་རྗེ་གི་གསོལ་རས་ཀྱི་སྐོར།

³ ང་གིས་སླབ་མི་དབང་ཚད་དེ་ ཐུགས་རྗེ་ལས་བརྟེན་ཏེ་ཨིན་ ཁྱེད་ཀྱི་གྲལ་ཁར་ཡོད་མིའི་ མི་རེ་རེ་བཞིན་དུ་ ག་གིས་ཡང་རང་ལུ་ ང་ག་ར་ལས་དྲག་ཟེར་མནོ་བསམ་གཏང་ནི་མི་འོང་ དེ་འབདཝ་ད་ དཀོན་མཆོག་གིས་ཁྱེད་ལུ་གནང་མི་ཁེ་རྒོ་ དང་འཁྲིལ་ཏེ་ རང་གི་སྐོར་ལས་ཀྲིག་ཀྲི་སྦེ་མནོ་བསམ་གཏང་དགོ།

⁴ ག་ཅི་སྨོ་ཟེར་བ་ཅིན་ ང་བཅས་ཀྱི་གཟུགས་གཅིག་ལུ་ཡན་ལག་ལེ་ཤ་ཡོདཔ་མ་ཚད་ ཡན་ལག་ག་ར་གིས་ ལཱ་གཅིག་འབདཝ་མེན།

⁵ འདི་བཟུམ་སྦེ་རང་ ང་བཅས་ཁིརཱིས་ནང་ཡོད་མི་ཚུ་ལེ་ཤ་ཡོད་རུང་ ཁོ་ནང་ང་བཅས་གཟུགས་གཅིག་ཨིན་ དེ་ལས་ཡན་ལག་གཅིག་ལུ་ ཡན་ལག་གཞན་ག་ར་དགོ།

⁶ འདི་བཟུམ་སྦེ་རང་ དཀོན་མཆོག་གིས་ང་བཅས་ལུ་གནང་མི་ཐུགས་རྗེ་ལས་བརྟེན་ཏེ་ ང་བཅས་དདཔ་ཅན་ལུ་ཡོད་མི་གསོལ་རས་མ་འདྲཝ་དེ་ཚུ་ ལག་ལེན་འཐབ་སྟེ་སྡོད་དགོ་ གསོལ་རས་དེ་ ལུང་བསྟན་བཤད་ནི་ཨིན་པ་ཅིན་ རང་རང་སོ་སོ་གི་དད་པ་དང་བསྟུན་ཏེ་ ལག་ལེན་འཐབ་སྟེ་སྡོད་དགོ།

⁷ ཁྱེད་ལུ་མི་གཞན་ལུ་ཞབས་ཏོག་ཞུ་ནི་གི་གསོལ་རས་ཡོད་པ་ཅིན་ ཆ་རོགས་འབད་ནི་གི་ལཱ་ལུ་གཙོ་བོ་བསྟེན་འབད་ སློབ་དཔོན་འབད་ནི་གི་གསོལ་རས་ཡོད་པ་ཅིན་ ཆོས་སྟོན་ནི་ལུ་གཙོ་བོ་བསྟེན་འབད།

⁸ ཁྱེད་ལུ་མི་གཞན་ལུ་སེམས་གསོ་འབད་ནི་དང་ བསླབ་བྱ་བྱིན་ནི་གི་གསོལ་རས་ཡོད་པ་ཅིན་ འདི་ལུ་གཙོ་བོ་བསྟེན་ཏེ་འབད་ ཁྱེད་ལུ་མི་གཞན་ལུ་བྱིན་ནི་གི་གསོལ་རས་ཡོད་པ་ཅིན་ ཕངས་སེམས་མེད་པར་བྱིན་ ཁྱོད་ལུ་གོ་འདྲེན་འཐབ་ནི་གི་གསོལ་རས་ཡོད་པ་ཅིན་ གོ་འདྲེན་འཐབ་ནི་གི་ལཱ་ལུ་འགན་ཁག་འབག་སྟེ་ རྩ་འགེངས་ཏེ་འབད་ དེ་ལས་ཁྱེད་ཀྱི་གཞན་ལུ་སྙིང་རྗེ་བསྐྱེད་ནིའི་གསོལ་རས་ཡོད་པ་ཅིན་ སེམས་དགའ་སྟེ་སྙིང་རྗེ་བསྐྱེད་དགོ།།

དདཔ་ཅན་གྱི་རྟགས་མཚན་ངོ་མ་གི་སྐོར།

⁹ བྱམས་པ་ཧིང་ལས་འབད་ནི་དང་ ངན་པ་རྩ་བ་ལས་སྤང་སྟེ་ ལེགས་ཤོམ་ལུ་ཨ་རྟག་རང་གཙོ་བོ་བསྟེན་སྡོད་དགོ།

¹⁰ སྤུན་ཆ་ནང་འཁོད་ནང་ལུ་བྱམས་པ་འབད་དོཝ་བཟུམ་སྦེ་ ཁྱེད་ཡང་གཅིག་གིས་གཅིག་ལུ་བྱམས་པ་འབད་ གཅིག་གིས་གཅིག་ལུ་གུས་ཞབས་བྱིན་ནི་ལུ་མགྱོགས་དྲགས་འབད།

¹¹ ཁྱེད་ཀྱི་ལཱ་ནང་ སྒྱིད་ཐག་ཡངས་འཕྲོས་འཕྲོས་འབད་ནི་དང་ སེམས་ཁ་ལས་བརྩོན་འགྲུས་བསྐྱེད་དེ་ གཙོ་བོ་གི་ཕྱག་ཞུ།

¹² དཀོན་མཆོག་གི་དོན་དག་ཚུ་སྒྲུབ་ནི་ཨིན་ཟེར་ རེ་བ་བསྐྱེད་དེ་དགའ་ཚོར་འགྱུར་ དཀའ་ངལ་བྱུང་པའི་སྐབས་ལུ་བཟོད་པ་སྒོམས་ ཉམས་མ་འཚེར་བར་སྨོན་ལམ་བཏབ་སྡོད།

¹³ དཀོན་མཆོག་ལུ་དད་པ་བསྐྱེད་མི་ཚུ་ལུ་ ཁག་ཆེཝ་ཡོད་པ་ཅིན་ ཕན་ཐོག་པའི་ལཱ་འབད་བྱིན་ ཁྱིམ་ནང་འོང་མི་མགྱོནམ་ལུ་མཐོང་བསྐྱེད་དེ་སྡོད།

¹⁴ ཁྱེད་ལུ་གནོད་འཚེ་བསྐྱལ་མི་ཚུ་ལུ་ ཁ་སྨོན་མ་བཏབ་པར་ ཁོང་གི་དོན་ལུ་དཀོན་མཆོག་ལས་བྱིན་རླབས་ཞུ་བྱིན།

¹⁵ དགའ་སྤྲོ་འབད་མི་ཚུ་དང་གཅིག་ཁར་དགའ་སྤྲོ་འགྱུར་ དེ་ལས་སྔུ་མི་ཚུ་དང་གཅིག་ཁར་སྔུ།

¹⁶ ག་ར་དང་མཉམ་འཆམ་ཏོག་ཏོ་སྦེ་སྡོད་ དེ་ལས་ཁམས་བཙོང་སྟེ་ མི་གཞན་ལས་དྲགཔ་ཨིན་ཟེར་མ་མནོ་ དེ་འབདཝ་ད་ མི་ཉམ་ཆུང་ཚུ་དང་འབྲེལ་བ་ལེགས་ཤོམ་སྦེ་འཐབ།

¹⁷ ཁྱེད་ལུ་ཉེས་པ་འབད་མི་གི་ཚབ་ལུ་ ཉེས་པ་མ་འབད་ དེ་འབདཝ་ད་ མི་ག་ར་གིས་གདོང་ཁ་ལུ་ ཞེ་ས་ཐོབ་ནི་གི་སྤྱོད་ལམ་ལུ་ དྲནམ་བཏོན་ཏེ་མནོ་བསམ་གཏང་དགོ།

¹⁸ ཁྱེད་ཀྱིས་འབད་ཚུགས་པ་ཅིན་ ག་དེ་དྲག་དྲག་ མི་ག་ར་དང་འཆམ་མཐུན་ཏེ་སྡོད།

¹⁹ དབའེ་བྱམས་པའི་སྤུན་ཆ་ གཞན་གྱིས་ཁྱེད་ལུ་ཟོགཔོ་འབདཝ་ད་ ནམ་ཡང་དགྲ་ལན་མ་འཇལ་ དེ་འབདཝ་ད་ དཀོན་མཆོག་གིས་ཆདཔ་གནང་འོང་ཟེར་ ཁོ་གི་ཕྱག་འོག་ལུ་བཞག་ ག་ཅི་སྨོ་ཟེར་བ་ཅིན་ གསུང་རབ་ནང་དེ་སྦེ་བྲིས་ཏེ་འདུག གཙོ་བོ་གིས་གསུང་དེས་ དགྲ་ལན་འཇལ་ནིའི་ལཱ་འདི་ ང་རང་གི་ཨིན་ ང་གིས་དགྲ་ལན་འཇལ་འོང་།

²⁰ ཁྱོད་ཀྱི་བྱང་ཕྱད་ལྟོཝ་བཀྱེས་འོང་པ་ཅིན་ བཞེས་སྒོ་བྱིན་ ཁ་སྐོམ་འོང་པ་ཅིན་ཆུ་བྱིན་ དེ་ལས་ཁོ་གིས་ཁྱོད་ཀྱིས་འབད་མི་ལུ་བལྟ་སྟེ་ ཁོ་རང་ངོ་ཚ་སྡོད་འོང་།

²¹ ངན་པ་ལུ་ཁྱོད་ལས་རྒྱལ་མ་བཅུག་ དེ་འབདཝ་ད་ ལེགས་ཤོམ་འབད་བའི་རྒྱུད་ལས་སྦེ་ ངན་པ་ལས་རྒྱལ་ཁ་ཐོབ་དགོ།།