རོམ་མི་ལེའུ་ 11 - རྫོང་ཁ་

དཀོན་མཆོག་གིས་ ཨཱིས་ར་ཨཱེལ་པ་ཚུ་ལུ་བྱམས་པ་མཛད་པའི་སྐོར།

¹ དེ་སྦེ་ཨིན་པ་ཅིན་ ང་གིས་ད་རུང་འབྲི་དོ་ དཀོན་མཆོག་གིས་ཁོ་གི་མི་ཚུ་ལུ་དོན་ལས་རང་སྤངམ་ཨིན་ན་ མེན་ ཁོང་ག་ར་ལུ་རྩ་ལས་རང་མ་སྤང་ དཔེར་ན་ང་རང་བཟུམ་གཅིག་ལུ་ཆ་བཞག་རུང་ ང་རང་ ཨབ་ར་ཧམ་གྱི་བུ་བརྒྱུད་ བེན་ཇ་མིན་གྱི་རིགས་བརྒྱུད་ལས་ཨིན་པའི་ ཨཱིས་ར་ཨཱེལ་པ་གཅིག་ཨིན།

² འདི་བཟུམ་སྦེ་ དཀོན་མཆོག་གིས་ཁོ་རའི་མི་ ཧེ་མ་ལས་ངོ་མཁྱེན་མི་ཚུ་ལུ་མ་སྤང་ ཨེ་ལི་ཡ་གིས་ ཨཱིས་ར་ཨཱེལ་པ་ཚུ་ལུ་བལྟཝ་ད་ སེམས་ཕམ་སྟེ་ དཀོན་མཆོག་ལུ་ཞུ་བ་ཕུལ་མི་གི་སྐོར་ལས་ གསུང་རབ་ནང་གསུངས་ཡོདཔ་ ཁྱེད་ཀྱིས་མ་ཤེས་ག།

³ གཙོ་བོ་ལགས་ ཁོང་གིས་ཁྱོད་ཀྱི་ལུང་སྟོན་པ་ཚུ་ལུ་བསད་ཅི་ དེ་ལས་ནཱ་གི་མཆོདཔ་ཕུལ་སའི་འདི་ བརྡལ་བཀོག་ཡི་ ད་ང་རྐྱངམ་གཅིག་ལུས་ཏེ་ཡོད་ ཁོང་གིས་ང་ལུ་ཡང་བསད་ནི་སྦེ་འཚོལ་དོ་ཟེར་ བྲིས་ཏེ་ཡོད།

⁴ དེ་འབདཝ་ད་ དཀོན་མཆོག་གིས་ལན་ག་དེ་སྦེ་གསུངས་ཡི་ག་ཟེར་བ་ཅིན་ ལྷ་ བཱལ་ ཟེར་མི་གི་གདོང་ཁར་ཕྱག་མ་འཚལ་མི་ མི་སྟོང་ཕྲག་བདུན་ ང་ལུ་རྐྱངམ་ཅིག་ཕྱག་འཚལ་ནི་སྦེ་བཞག་ཅི།

⁵ འདི་བཟུམ་སྦེ་རང་ད་རེས་སྐབས་ལུ་ཡང་ དཀོན་མཆོག་གི་ཐུགས་རྗེ་ལས་ བཙག་འཐུ་མཛད་གནང་མི་གྱངས་ཁ་ཉུང་སུ་གཅིག་ཡོད།

⁶ དེ་འབདཝ་ད་ དཀོན་མཆོག་གི་ཐུགས་དགོངས་དེ་ ལཱ་ལེགས་ཤོམ་ལུ་བརྟེན་ཏེ་མེན་པར་ ཐུགས་རྗེ་ལུ་བརྟེན་ཏེ་ཨིན་ ག་དེམ་ཅིག་སྦེ་ ལཱ་ལེགས་ཤོམ་ལུ་བརྟེན་ཏེ་ཨིན་པ་ཅིན་ ཐུགས་རྗེ་དེ་ཁུངས་མེདཔ་འགྱོ་འོང་།

⁷ དེ་འབདཝ་ལས་ ཨཱིས་ར་ཨཱེལ་པ་འདི་ཚུ་གིས་འཚོལ་མི་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་འདི་ ཁོང་གིས་མ་ཐོབ་སྟེ་འབད་རུང་ བཙག་འཐུ་མཛད་གནང་ཡོད་མི་ཚུ་གིས་ཐོབ་ཅི་ དེ་ལས་ཁོང་ལྷག་ལུས་མི་ཚུ་གི་སེམས་སྲ་ཀྲག་ལུ་འགྱུར་བཅུག་ནུག

⁸ འདི་བཟུམ་སྦེ་གསུང་རབ་ནང་། དཀོན་མཆོག་གིས་ཁོང་ལུ་ ད་ལྟོ་ཚུན་ཚོད་ཀྱི་བར་ན་ གཉིད་ཀྱིས་ར་བཟི་དོཝ་བཟུམ་སྦེ་ མིག་ཏོ་མ་མཐོང་ནི་དང་ རྣམ་ཅོག་མ་གོ་ནི་སྦེ་མཛད་གནང་ནུག་ཟེར་ བྲིས་ཏེ་ཡོད།

⁹ འདི་བཟུམ་སྦེ་རང་ རྒྱལཔོ་ ད་བིད་ཀྱིས། ཁོང་གི་བཟའ་ཁྲི་དེ་མཐོངམ་ད་ ག་ར་ཐོབ་ཅི་ཟེར་བློ་བདེ་སྟེ་ ཁོང་ཧིང་ན་ཚུད་བཅུག་ནུག་ དེ་ལས་ཁོང་རང་གིས་ཐོབ་མི་བྱིན་རླབས་དེ་ ཁོང་རང་རྐངམ་ཐོགས་འགྱེལ་བཅུག

¹⁰ མིག་ཏོ་མ་མཐོང་ནི་གི་དོན་ལུ་ཞརཝ་འགྱོ་བཅུག་ དེ་ལས་ཨ་རྟག་རང་གི་དོན་ལུ་ སྐེདཔ་ཡང་མར་བཀུག་འགྱོ་བཅུག་ཟེར་གསུངས་ནུག།

ཁོང་ཕྱིའི་མི་རིགས་ཚུ་གིས་ཡང་ཐར་པ་ཐོབ་ནི་གི་སྐོར།

¹¹ དཀོན་མཆོག་གི་མི་ཚུ་ལུ་ རྐངམ་ཐོགས་ཏེ་འགྱེལ་བཅུགཔ་ད་ ལོག་སྟེ་ཡར་རྩ་ལས་ལོང་མི་ཚུགས་ཟེརཝ་ཨིན་ན་ དེ་སྦེ་མེན་ དཀོན་མཆོག་གི་ཁོ་རང་གི་ཐར་པ་འདི་ཧེ་མ་ ཨཱིས་ར་ཨཱེལ་པ་ཚུ་ལུ་གནངམ་ད་ ཁོང་གིས་ཆ་མ་བཞག་པར་འབད་ནི་འདི་གིས་ ཕྱིའི་མི་རིགས་ཚུ་གིས་ཐར་པ་ཐོབ་སྦེ་མཛད་དེ་ ཁོང་ ཨཱིས་ར་ཨཱེལ་པ་ཚུ་ ད་རུང་ཁོང་ལུ་ཡང་དགོ་ཟེར་ མིག་ཏོ་ཚ་བཅུག་ནི་སྦེ་ཨིན་མས།

¹² དེ་ལས་ ཨཱིས་ར་ཨཱེལ་པ་ཚུ་གིས་ དཀོན་མཆོག་གི་གནང་མི་ཐར་པ་ལུ་ཆ་མ་བཞག་པའི་རྒྱུད་ལས་སྦེ་ འཛམ་བུ་གླིང་གི་མི་ཚུ་ལུ་བྱིན་རླབས་ཐོབ་ཐོབ་ཨིན་པ་ཅིན་ ཡང་ན་ ཨཱིས་ར་ཨཱེལ་པ་ཚུ་གིས་ཕམ་པའི་རྒྱུད་ལས་སྦེ་ ཕྱིའི་མི་རིགས་ཚུ་གིས་བྱིན་རླབས་ཐོབ་ཐོབ་ཨིན་པ་ཅིན་ ཁོང་ ཨཱིས་ར་ཨཱེལ་པ་གི་གྱངས་ཁ་ཚང་སྟེ་ དཀོན་མཆོག་གི་ཐར་པ་འདི་ལུ་ཆ་བཞག་པ་ཅིན་ འཛམ་བུ་གླིང་ནང་བྱིན་རླབས་ག་དེ་ཅིག་ཐོབ་ནི་ཨིནམ་སྨོ།

¹³ ད་ང་གིས་སླབ་མི་འདི་ ཁྱེད་ ཕྱིའི་མི་རིགས་ཚུ་གི་དོན་ལུ་ཨིན་ ང་ཁྱེད་ཀྱི་དོན་ལུ་ སྐུ་ཚབ་སྦེ་སྡོདཔ་ད་ ང་རང་གི་ལཱ་འདི་ཁོང་གི་གདོང་ཁ་ལུ་ གཙོ་བོ་བསྟེན་ཏེ་སླབ་ཨིན།

¹⁴ འདི་ག་ཅི་སྨོ་ཟེར་བ་ཅིན་ ང་རའི་མི་རིགས་ ཨཱིས་ར་ཨཱེལ་པ་ཚུ་གིས་ ཁྱེད་ཕྱིའི་མི་རིགས་ཚུ་ལུ་བལྟཝ་ད་ མིག་ཏོ་ཚ་སྟེ་ དཀོན་མཆོག་གིས་ཁོང་ལུ་སྐྱབས་མཛད་འོང་ཟེར་བའི་དོན་ལུ་ཨིན།

¹⁵ དཀོན་མཆོག་གིས་ཁོང་ལུ་སྤངམ་ད་ འཛམ་བུ་གླིང་གི་མི་ལེ་ཤ་དང་དཀོན་མཆོག་གི་བར་ན་མཐུན་ལམ་བྱུང་ཡི་ དེ་འབདཝ་ད་ དཀོན་མཆོག་གིས་ཁོང་ལུ་ད་རུང་ལོག་ལེནམ་ད་ དེ་ལས་ཡང་དྲགཔ་སྦེ་མི་ག་ར་ ཤི་ས་ལས་ཚེ་ཐོབ་ནི་ཨིན།

¹⁶ ཕྱི་བསྣད་བསྣདཝ་གུ་ལས་ཕུད་གཅིག་བཏོག་སྟེ་ དཀོན་མཆོག་ལུ་ཕུལཝ་ད་ དེ་དམ་པ་ཨིན་པ་ཅིན་ གཞན་ག་ར་དམ་པ་སྦེ་འགྱོ་འོང་ འདི་བཟུམ་སྦེ་ ཤིང་གི་ར་ཏོ་དེ་དམ་པ་ཡོད་པ་ཅིན་ དེ་གིས་འབད་ཞལ་ལག་ཚུ་ཡང་དམ་པ་སྦེ་ཐོན་འོང་།

¹⁷ དཔེར་ན་ གཡུས་ཁ་གི་ཨ་རུ་ར་ཤིང་གི་ཞལ་ལག་ལ་ལུ་བཏོག་སྟེ་ དེའི་གུ་ ཁྱེད་ནགས་ཚལ་ནང་ན་གི་ཨ་རུ་ར་ཤིང་གི་ཞལ་ལག་ གཡུས་ཁའི་ཨ་རུ་ར་ཤིང་གུ་ མཐུདཔ་ད་ ཁྱེད་གཡུས་ཁ་གི་ཨ་རུ་ར་ཤིང་གི་ར་ཏོ་གི་བཅུད་ལས་བརྟེན་ཏེ་སྡོད་འོང་།

¹⁸ དེ་འབདཝ་ལས་ ཁྱེད་ནགས་ཚལ་གྱི་ཞལ་ལག་མཐུད་མི་ཆ་ཁྱབ་ གཡུས་ཁའི་ཞལ་ལག་བཏོགས་མི་ལས་དྲགཔ་སྦེ་ཨིན་ཟེར་ རང་བསྟོད་རྐྱབས་ནི་མི་འོང་ ར་ཏོ་འདི་མཐུད་མི་ཞལ་ལག་ལས་བརྟེན་ཏེ་མི་སྡོད་ མཐུད་མི་ཞལ་ལག་དེ་ར་ཏོ་ལས་བརྟེན་ཏེ་སྡོད་འོང་།

¹⁹ ད་རུང་ཁྱེད་ཀྱིས་ ཞལ་ལག་བཏོག་བཀོ་མི་དོན་དག་དེ་ ང་བཅས་ལུ་མཐུད་ནི་སྦེ་ཨིན་མས་ཟེར་སླབ་འོང་།

²⁰ འདི་ཐད་རི་བ་རི་ཨིན་ ཁོང་གིས་དད་པ་མ་བསྐྱེད་པའི་སྒོ་ལས་སྦེ་ ཞལ་ལག་བཏོག་བཏོགཔ་ཨིན་ ཁྱེད་རའི་དད་པ་གིས་འབད་ ཁྱེད་སྒྲིང་སྒྲིང་སྦེ་ལོང་སྟེ་ཡོད་ ཁམས་མ་བཙོང་ དེ་འབདཝ་ད་ ཁྱེད་ལུ་ཡང་བཏོག་བཀོག་འོང་ཟེར་འདྲོགས་ཏེ་སྡོད།

²¹ ག་ཅི་སྨོ་ཟེར་བ་ཅིན་ དཀོན་མཆོག་གིས་ རང་བཞིན་ལས་སྐྱེས་མི་ཞལ་ལག་འདི་ཚུ་བཏོག་གཏང་པ་ཅིན་ ཁྱེད་མཐུད་བཞག་མི་ལུ་ཡང་བཏོག་གཏང་འོང་།

²² དཀོན་མཆོག་གིས་ཐུགས་རྗེ་གཟིགས་ནི་དང་ ཐུགས་ཁྲོ་བོ་གཉིས་ཆ་རང་མཛད་མི་འདི་ལུ་དྲན་པ་བཏོན་ བཀའ་ལུ་མ་ཉན་མི་ལུ་ཐུགས་ཁྲོ་ནི་ དེ་ལས་ཁྱེད་ཕྱིའི་མི་རིགས་ཚུ་ལུ་ཐུགས་རྗེ་གཟིགས་ནི་ དེ་འབདཝ་ད་ ཁྱེད་ཡང་ཁོ་གི་ཐུགས་རྗེ་འོག་ལུ་མ་སྡོད་པ་ཅིན་ དཀོན་མཆོག་གིས་བཏོག་གཏང་འོང་།

²³ དེ་ལས་ད་རུང་ ད་ལྟོ་མ་ཉན་མི་ཚུ་གིས་ལོག་སྟེ་ དད་པ་བསྐྱེད་ནི་འགོ་བཙུགས་པ་ཅིན་ དཀོན་མཆོག་གིས་ཁོང་ལུ་ཡང་ ཤིང་གི་ཞལ་ལག་བཟུམ་སྦེ་མཐུད་བཞག་འོང་ ཁོ་ལུ་དེ་སྦེ་མཛད་ནི་དབང་ཤུགས་ཡོད།

²⁴ ག་ཅི་སྨོ་ཟེར་བ་ཅིན་ དཀོན་མཆོག་གིས་མ་འདྲཝ་མཛད་མི་ ཁྱེད་ནགས་ཚལ་གྱི་ཨ་རུ་ར་ཤིང་ལས་བཏོགས་ཏེ་ གཡུས་ཁ་གི་ཨ་རུ་ར་ཤིང་གུ་མཐུད་ནི་གི་ཐུགས་བསམ་ཡོད་པ་ཅིན་ རང་བཞིན་ལས་སྐྱེས་མི་ཞལ་ལག་བཏོག་བཀོག་མི་དེ་ ད་རུང་ལོག་སྟེ་མཐུད་ནི་ཐུགས་བསམ་ ག་དེ་ཅིག་བཞེས་བཞུགསཔ་སྨོ།།

ཨཱིས་ར་ཨཱེལ་པ་ཚུ་ལུ་སྐྱབས་མཛད་ནི་གི་སྐོར།

²⁵ དབའེ་སྤུན་ཆ་ཚུ་ ཁྱེད་ཆ་ཁྱབ་ཁམས་བཙོང་སྟེ་ ང་རྒྱལ་མ་བསྐྱེད་ནི་གི་དོན་ལུ་ དཀོན་མཆོག་གི་གསང་བ་དེ་ ཁྱེད་ཆ་ཁྱབ་ཀྱིས་ལེགས་ཤོམ་སྦེ་ཧ་གོ་དགོ་ཟེར་ང་གིས་མནོ་ཡི་ ག་ཅི་སྨོ་ཟེར་བ་ཅིན་ ཕྱིའི་མི་རིགས་ཚུ་གི་གྱངས་ཁ་མ་ཚང་ཚུན་ཚོད་ ཨཱིས་ར་ཨཱེལ་པ་ལ་ལུ་ཅིག་སེམས་སྲ་ཀྲག་སྦེ་སྡོད་འོང་།

²⁶ དེ་འབདཝ་ད་ ཁོང་ཕྱིའི་མི་རིགས་ཚུ་གི་གྱངས་ཁ་ཚངམ་ད་ དཀོན་མཆོག་གིས་ ཨཱིས་ར་ཨཱེལ་པ་ཚུ་ལུ་སྐྱབས་མཛད་འོང་ ག་ཅི་སྨོ་ཟེར་བ་ཅིན་གསུང་རབ་ནང་། ཟི་ཨཱོན་ལས་སྐྱབས་མགོན་གཅིག་འབྱོན་འོང་ འདི་གིས་ ཨཱིས་ར་ཨཱེལ་པ་འདི་ཚུ་ལུ་ ཆོས་སེམས་མེད་པའི་ལཱ་ལས་ སེམས་འགྱུར་བཅུག་འོང་།

²⁷ དེ་ལས་ང་གིས་ ཞལ་འཆེས་བཞེས་མི་དང་འཁྲིལ་ཏེ་ ཁོང་གི་སྡིག་པ་ཚུ་དགཔ་བཟོ་ནི་ཨིན་ཟེར་ བྲིས་ཏེ་ཡོད།

²⁸ ད་ལྟོ་འབད་བ་ཅིན་ དཀོན་མཆོག་གིས་ ཡ་ཧུ་ད་པ་ཚུ་ལུ་ ཁིརཱིས་ཀྱི་གཏམ་བཟང་གི་དགྲ་འབད་མི་སྦེ་རྩི་གནངམ་ཨིན་ དེ་འབདཝ་ད་ དེ་སྦེ་མཛད་མི་འདི་ ཁྱེད་ཕྱིའི་མི་རིགས་ཚུ་གི་དོན་ལུ་ལེགས་ཤོམ་བྱུང་ཡི་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཁོ་གི་གསོལ་རས་ཚུ་ ཁྱེད་ལུ་གནང་སྟེ་ཡོད་ ཨིན་ཏེ་འབད་རུང་ དཀོན་མཆོག་གིས་ཁོང་ ཡ་ཧུ་ད་པ་ཚུ་གི་ཕ་བརྒྱུད་ཚུ་ལུ་ གནང་མི་ཞལ་འཆེས་ཀྱི་རྒྱུད་ལས་སྦེ་ ཁོང་རང་ལུ་བྱམས་པ་མཛདཔ་ཨིན།

²⁹ དེ་འབདཝ་ལས་ དཀོན་མཆོག་གིས་གནང་མི་གསོལ་རས་འདི་ ནམ་ཡང་ལོག་སྟེ་ཁོ་རང་མི་བཞེས་ དེ་ལས་མི་ལུ་འབོ་མི་ཐུགས་དགོངས་འདི་ལས་ ནམ་ཡང་མི་འགྱུར།

³⁰ ཧེ་མ་ཁྱེད་ཕྱིའི་མི་རིགས་ཚུ་དཀོན་མཆོག་ལུ་མ་ཉན་རུང་ ཡ་ཧུ་ད་པ་ཚུ་གིས་ དཀོན་མཆོག་གི་གནང་མི་སྙིང་རྗེ་ལུ་ཆ་མ་བཞགཔ་ད་ དཀོན་མཆོག་གིས་ ཁོང་གི་ཚབ་ལུ་ ཁྱེད་ཕྱིའི་མི་རིགས་ཚུ་ལུ་སྙིང་རྗེ་གཟིགས་ཅི།

³¹ ད་ལྟོ་ ཡ་ཧུ་ད་པ་ཚུ་གིས་དཀོན་མཆོག་གི་བཀའ་ལུ་མ་ཉནམ་ད་ དཀོན་མཆོག་གིས་ཁྱེད་ཕྱིའི་མི་རིགས་ཚུ་ལུ་སྙིང་རྗེ་གཟིགས་ཅི་ དཀོན་མཆོག་གིས་ ཁྱེད་ལུ་སྙིང་རྗེ་གཟིགས་དོཝ་བཟུམ་སྦེ་ ཉིནམ་གཅིག་གི་ཚེ་ ཁོང་ལུ་ཡང་སྙིང་རྗེ་གཟིགས་ནི་ཨིན།

³² མི་ག་ར་བཀའ་ལུ་མ་ཉན་ནི་འདི་གིས་ དཀོན་མཆོག་གིས་ཁོང་ལུ་བཙོན་པ་སྦེ་རྩི་གནངམ་ཨིན་ འདི་ག་ཅི་སྨོ་ཟེར་བ་ཅིན་ དཀོན་མཆོག་གིས་མི་ག་ར་ལུ་སྙིང་རྗེ་གཟིགས་ནི་གི་དོན་ལུ་ཨིན།

³³ ཀྱེ་ དཀོན་མཆོག་གི་ཤེས་རབ་དང་མཁྱེན་རྒྱ་གི་རྒྱུ་ནོར་དེ་ རྟིང་ཟབ་དྲགས་འདུག་ འདི་ལུ་ང་བཅས་ཀྱིས་ ག་དེ་སྦེ་དབྱེ་བ་བཅད་ཚུགས་ནི་སྨོ་ ཀྱེ་ ཁོ་གིས་ཕྱེ་མི་ཁྲིམས་ ང་བཅས་ཀྱིས་ག་དེ་སྦེ་ཧ་གོ་ནི་སྨོ་ ཁོ་བྱོན་མི་ལམ་ལས་ ང་བཅས་ག་དེ་སྦེ་འགྱོ་ཚུགས་ནི་སྨོ།

³⁴ ག་ཅི་སྨོ་ཟེར་བ་ཅིན་ གཙོ་བོ་གི་ཐུགས་དགོངས་འདི་ ག་གིས་ཤེས་ཚུགས་ནི་སྨོ་ ཁོ་ལུ་ག་གིས་བཀའ་སློབ་ཕུལ་ཚུགས་ནི་སྨོ།

³⁵ ཡང་ན་དཀོན་མཆོག་གིས་ སྐྱིན་མ་གནང་དགོཔ་སྦེ་ ག་གིས་ཧེ་མ་ལས་ཁོ་ལུ་ཕུལ་ཕུལཝ་ཡོདཔ་སྨོ།

³⁶ ག་ཅི་སྨོ་ཟེར་བ་ཅིན་ ཡོད་རིགས་ཡོད་ཚད་ཅིགཔ་ག་ར་ དཀོན་མཆོག་ལས་བྱུངམ་ཨིན་ ག་ཅི་རང་ཡོད་རུང་ག་ར་ ཁོ་གི་དབང་ཤུགས་ལས་རྒྱུད་དེ་ཡོདཔ་མ་ཚད་ འདི་ཚུ་ག་ར་ལས་ ཁོ་རང་ལུ་བསྟོད་པ་ཐོབ་པའི་དོན་ལུ་མཛད་མཛདཔ་ཨིན་ དུས་རྒྱུན་དུ་གཟི་བརྗིད་ག་ར་ ཁོ་གི་ཨིན་ནོ་ ཨ་མཱེན།།