རོམ་མི་ལེའུ་ 10 - རྫོང་ཁ་

¹ དབའེ་སྤུན་ཆ་ཚུ་ ཨཱིས་ར་ཨཱེལ་པ་ཚུ་ལུ་སྐྱབས་མཛད་བཅུག་ཟེར་ ངེ་གི་སེམས་ཁར་ལས་འདོད་པ་བསྐྱེད་དེ་ དཀོན་མཆོག་ལུ་ང་གིས་གསོལཝ་བཏབ་ཨིན།

² ཁོང་གིས་ག་དེ་ཅིག་རང་གཙོ་བོ་བསྟེན་ཏེ་ དཀོན་མཆོག་ལུ་འཚོལ་རུང་ ག་དེ་སྦེ་འཚོལ་ནི་ཨིན་ན་མི་ཤེས་པས་ཟེར་ ང་གིས་ཕྲང་སླབ་ཨིན།

³ ག་ཅི་སྨོ་ཟེར་བ་ཅིན་ དཀོན་མཆོག་གིས་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་གི་ཐབས་ཤེས་ལུ་ཆ་མ་བཞག་པར་ ཁོང་གིས་ཁོང་རའི་ཐབས་ཤེས་གཞན་གཅིག་འཚོལ་འགྱོ་སྟེ་ དཀོན་མཆོག་གི་གནང་མི་ཐབས་ཤེས་ལུ་མ་ཉན་པས།

⁴ ཁིརཱིས་ཀྱིས་བཀའ་ཁྲིམས་ཀྱི་དོན་དག་ག་ར་སྒྲུབ་ཚར་ཏེ་ ཁོ་ལུ་དད་པ་བསྐྱེད་མི་ག་ར་ལུ་དཀོན་མཆོག་གིས་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་ནི་ཨིན།།

ཐར་པ་འདི་ག་ར་གི་དོན་ལུ་ཨིན་པའི་སྐོར།

⁵ བཀའ་ཁྲིམས་ལུ་བརྟེན་ཏེ་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་གི་སྐོར་ལས་ མོ་སཱེས་ཀྱིས་ བཀའ་ཁྲིམས་ག་ར་སྲུང་མི་འདི་གིས་རྐྱངམ་གཅིག་ ཚེ་ཐོབ་ནི་ཨིན་ཟེར་ཧེ་མ་དེ་སྦེ་བྲིས་ནུག

⁶ དེ་འབདཝ་ད་ དད་པ་ལུ་བརྟེན་ཏེ་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་གི་སྐོར་ལས་ དེ་སྦེ་བྲིས་ཏེ་ཡོད་ ཁྱོད་ཀྱི་སེམས་ནང་དེ་སྦེ་སླབ་ནི་མི་འོང་ ཁིརཱིས་ལུ་ཡར་ཞིང་ཁམས་ལས་མར་ཞུ་ནི་གི་དོན་ལུ་ ཡར་ཞིང་ཁམས་ལུ་འཛེག་འགྱོ་དགོ།

⁷ ཡང་ན་ ཁིརཱིས་ལུ་ཡར་བཞེང་ནི་གི་དོན་ལུ་མར་ཤི་ས་ལུ་འབབ་འགྱོ་དགོ།

⁸ དེ་སྦེ་སླབ་ནི་མེན་པར་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་གི་སྐོར་ལས་ ག་ཅི་བྲིས་ཏེ་ཡོད། དཀོན་མཆོག་གི་གསུང་འདི་ སྦོ་ལོགས་ཁར་སྦེ་ ཁྱོད་ཀྱི་སེམས་དང་ཁ་ནང་ཡོད། འདི་ཁིརཱིས་ལུ་དད་པ་བསྐྱེད་དགོ་པའི་སྐོར་ལས་ ང་བཅས་ཀྱིས་ཁྱབ་བསྒྲགས་འབད་མི་འདི་ཨིན།

⁹ ག་དེམ་ཅིག་སྦེ་ ཁྱོད་ཀྱིས་ཡེ་ཤུ་ལུ་གཙོ་བོ་ཨིན་ཟེར་ རང་གིས་ཁ་ལས་འཛོམ་དཔང་འབད་དེ་ དཀོན་མཆོག་གིས་ཁོ་ལུ་གཤགས་ས་ལས་སྐུ་གསོན་པོ་བཞེངས་གནང་ཡི་ཟེར་ ཁྱོད་རང་གི་སེམས་ཁར་ལུ་དད་པ་བསྐྱེད་པ་ཅིན་ དཀོན་མཆོག་གིས་ཁྱོད་ལུ་སྐྱབས་མཛད་འོང་།

¹⁰ ག་ཅི་སྨོ་ཟེར་བ་ཅིན་ མི་གིས་རང་གི་སེམས་ཁར་ལས་དད་པ་བསྐྱེད་པ་ཅིན་ དཀོན་མཆོག་གིས་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་ནི་ཨིན་ དེ་ལས་ ཁོ་རང་གི་ཁ་གིས་འཛོམ་དཔང་འབད་བ་ཅིན་ དཀོན་མཆོག་གིས་སྐྱབས་མཛད་ནི་ཨིན།

¹¹ ཁོ་ལུ་དད་པ་བསྐྱེད་མི་ག་ཡང་ ངོ་ཚ་སྟེ་སྡོད་མི་དགོ་ཟེར་གསུང་རབ་ནང་བྲིས་ཏེ་འདུག

¹² ཡ་ཧུ་ད་པ་དང་ ཕྱིའི་མི་རིགས་ཚུ་གི་བར་ན་ ཁྱད་པར་ག་ནི་ཡང་མེད་ ག་ཅི་སྨོ་ཟེར་བ་ཅིན་ དད་པ་བསྐྱེད་མི་ག་ར་གི་གཙོ་བོ་དེ་ གཅིག་ཨིན་ དེ་ལས་ཁོ་གི་མཚན་ལུ་འབོ་མི་ག་ར་ལུ་ བྱིན་རླབས་ལེ་ཤ་གནང་འོང་།

¹³ གསུང་རབ་ནང་བྲིས་དོཝ་བཟུམ་སྦེ་ གཙོ་བོ་གི་མཚན་འབོ་མི་ག་ར་ལུ་ གཙོ་བོ་གིས་སྐྱབས་མཛད་འོང་།

¹⁴ དེ་འབདཝ་ད་ མི་དེ་ཚུ་གིས་ཁོ་ལུ་དད་པ་མ་བསྐྱེད་པ་ཅིན་ ག་དེ་སྦེ་སྐྱབས་མཛད་མི་སྦེ་འབོ་ནི་སྨོ་ ཁོ་གི་སྐོར་ལས་རྣ་བ་མ་གོ་བ་ཅིན་ ཁོང་གིས་ག་དེ་སྦེ་དད་པ་བསྐྱེད་ནི་སྨོ་ ཆོས་བཤད་མི་མེད་པ་ཅིན་ ཁོང་གིས་ག་དེ་སྦེ་གོ་ནི་སྨོ།

¹⁵ དེ་ལས་གཏང་མིའི་མི་མེད་པ་ཅིན་ ཁོང་གིས་ག་དེ་སྦེ་འགྱོ་སྟེ་ཆོས་བཤད་ནི་སྨོ་ འདི་བཟུམ་སྦེ་གསུང་རབ་ནང་། གཏམ་བཟང་འབག་འོང་མི་རྐངམ་འདི་ ག་དེ་ཅིག་བྱ་ཆི་ཆི་ཨིན་སྨོ་ཟེར་ བྲིས་ཏེ་འདུག

¹⁶ དེ་འབདཝ་ད་ མི་མང་ཤོས་ཀྱིས་གཏམ་བཟང་ལུ་ཉན་མི་བཏུབ་པས་ འདི་བཟུམ་སྦེ་ལུང་སྟོན་པ་ ཨའི་ཟ་ཡ་གིས་ གཙོ་བོ་ལགས་ ང་བཅས་ཀྱིས་བཤད་མི་ཆོས་ལུ་ག་གིས་དད་པ་བསྐྱེད་ཅི་ག་ཟེར་གསུངས་ནུག

¹⁷ དེ་འབདཝ་ལས་དད་པ་བསྐྱེད་མི་འདི་ ཆོས་གོ་མི་ལས་བརྟེན་ཏེ་ཨིན་ ཆོས་གོ་མི་འདི་ ཁིརཱིས་ཀྱི་སྐོར་ལས་བཤད་མི་ལུ་བརྟེན་ཏེ་ཨིན།

¹⁸ དེ་འབདཝ་ད་ཁོང་ ཨཱིས་ར་ཨཱེལ་པ་འདི་ཚུ་གིས་མ་གོཝ་ཨིན་ན་ མེན་ ཁོང་གིས་ཐད་རི་བ་རི་གོ་ནུག་ ག་ཅི་སྨོ་ཟེར་བ་ཅིན། བཤད་མི་ཚུ་གི་སྐད་འདི་ ས་ཆ་ག་ར་ནང་གོ་སྟེ་ཡོད་ ཁོང་གི་ཚིག་ཡང་ འཛམ་བུ་གླིང་གི་མཐའ་མ་ཚུན་ཚོད་ ཁྱབ་སྟེ་ཡོད་ཟེར་ གསུང་རབ་ནང་བྲིས་ཏེ་འདུག

¹⁹ ད་རུང་ང་གིས་དྲིས་དོ་ ཨཱིས་ར་ཨཱེལ་པ་འདི་ཚུ་གིས་ དོན་ལས་རང་ཧ་མ་གོཝ་ཨིན་ན་ མེན་ དོན་ལས་རང་ཧ་གོ་ཡི་ འདི་བཟུམ་སྦེ་ མོ་སཱེས་ཀྱིས་དཀོན་མཆོག་གི་ཐོག་ལས། མི་རིགས་གཞན་ལུ་བྱིན་རླབས་གནང་སྟེ་ ཁྱེད་མིག་ཏོ་ཚ་བཅུག་ནི་ དེ་ལས་མི་རིགས་རྩ་རྒས་ཚུ་ལུ་བལྟ་སྟེ་ ཁྱེད་ཙིགཔ་ཟ་བཅུག་ནི་ཟེར་ བྲིས་ཏེ་འདུག

²⁰ དེ་ལས་ད་རུང་ལུང་སྟོན་པ་ ཨའི་ཟ་ཡ་གིས་མ་འདྲོག་པར་ དཀོན་མཆོག་གི་ཐོག་ལས། ང་ལུ་འཚོལ་ར་མ་འཚོལ་མི་ཚུ་གིས་ ང་ལུ་ཐོབ་ཅི་ དེ་ལས་ང་ལུ་དྲི་ར་མ་དྲི་མི་ཚུ་གི་སྦུག་ལུ་ ང་རང་ངོ་སྟོན་ཡི་ཟེར་ གསུངས་ནུག

²¹ ལུང་སྟོན་པ་ ཨའི་ཟ་ཡ་གིས་དཀོན་མཆོག་གི་ཐོག་ལས། ཉན་ཁུག་མ་བཏབ་མི་དང་རྒོལ་མི་ཚུ་ལུ་ ཉིནམ་རེ་འཆར་རང་ ང་རའི་ལགཔ་ཕར་སྐྱངས་ཏེ་ འབོ་སྡོད་ཅི་ཟེར་ ཨཱིས་ར་ཨཱེལ་པ་ཚུ་གི་སྐོར་ལས་གསུངས་ནུག།