རོམ་མི་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ ཨ་ནི་ཡི་གུ་འདི་ ང་ཡེ་ཤུ་ཁིརཱིས་ཀྱི་ཕྱག་ཞུ་མི་ པའུལ་གྱིས་གཏངམ་ཨིན་ དཀོན་མཆོག་གིས་ང་ལུ་ མི་ག་ར་ལུ་གཏམ་བཟང་བཤད་ནིའི་དོན་ལུ་ བཙག་འཐུ་མཛད་གནང་སྟེ་ སྐུ་ཚབ་ཀྱི་འགན་ཁུར་གནང་ཡི།

² ཨ་ནི་གཏམ་བཟང་དེ་གི་སྐོར་ལས་ དཀོན་མཆོག་གིས་ཧེ་མ་ལས་རང་ཁས་བླངས་བཞེས་ཏེ་ ཁོ་རའི་ལུང་སྟོན་པ་ཚུ་ལས་རྒྱུད་དེ་ དམ་པའི་གསུང་རབ་ནང་ལུ་བྲིས་བཞག་ནུག

³ ཨ་ནི་གཏམ་བཟང་དེ་ དཀོན་མཆོག་གི་སྲས་ཀྱི་སྐོར་ལས་ཨིན་ ཁོ་ཕྱི་ཁར་ མི་གི་རང་བཞིན་ལུ་བལྟ་བ་ཅིན་ ད་བིད་ཀྱི་རྒྱལ་རིགས་ལས་སྦེ་འཁྲུངས་ནུག

⁴ དེ་ལས་ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་དམ་པའི་རང་བཞིན་ལུ་བལྟ་བ་ཅིན་ ཁོ་གཤགས་ས་ལས་སྐུ་གསོན་པོ་སྦེ་བཞེངས་པའི་ཐོག་ལས་ ཁོ་དཀོན་མཆོག་གི་སྲས་ཨིན་ཟེར་སྟོན་གནང་ནུག

⁵ དེ་གིས་འབད་ ཁིརཱིས་སྙན་གྲགས་ཅན་སྦེ་འགྱུར་ནི་གི་དོན་ལུ་ མི་རིགས་ག་ར་གིས་ གཏམ་བཟང་འདི་ལུ་དད་པ་བསྐྱེད་དེ་ ཁོ་གི་བཀའ་ལུ་ཉན་བཅུག་ནིའི་དོན་ལུ་ དཀོན་མཆོག་གིས་ང་ལུ་ཐུགས་རྗེ་གཟིགས་ཏེ་ སྐུ་ཚབ་ཀྱི་འགན་ཁུར་གནང་ཡི།

⁶ ཁྱེད་ཆ་ཁྱབ་ཡང་ ཁོང་ག་ར་གི་གྲལ་ལས་ ཡེ་ཤུ་ཁིརཱིས་ཀྱི་བཀའ་ལུ་ཉན་ནི་གི་དོན་ལུ་ ཁོ་གི་མེ་སྦེ་འབོ་འབོཔ་ཨིན།

⁷ དཀོན་མཆོག་གིས་བྱམས་པ་མཛད་མི་ ཁོ་རའི་དམ་པའི་མི་སྦེ་འབོ་མི་ རྒྱལ་ས་ རོམ་ནང་ཡོད་མི་ ཁྱེད་ག་ར་ལུ་ཨ་ནི་ཡི་གུ་འདི་འབྲི་དོ་ ང་བཅས་ཀྱི་ཡབ་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ཀྱིས་ཞི་བདེ་དང་ཐུགས་རྗེ་ ཁྱེད་ག་ར་ལུ་གནང་བཅུག།

པའུལ་ རོམ་ལུ་འགྱོ་དགོ་མནོ་བའི་རེ་བ་གི་སྐོར།

⁸ འགོ་དང་པ་རང་ ཡེ་ཤུ་ཁིརཱིས་ལས་རྒྱུད་དེ་ ངེ་གི་དཀོན་མཆོག་ལུ་ ཁྱེད་ག་ར་གི་དོན་ལུ་བཀའ་དྲིན་ཆེ་ཟེར་ཞུ་ནི་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱིས་ཁིརཱིས་ལུ་དད་པ་བསྐྱེད་ཅི་ཟེར་ འཛམ་བུ་གླིང་གི་ས་ཆ་ག་ར་ནང་ཁྱབ་སྟེ་ཡོད།

⁹ དཀོན་མཆོག་གི་སྲས་ཀྱི་སྐོར་ལས་ གཏམ་བཟང་དེ་གཞན་ལུ་བཤད་པའི་རྒྱུད་ལས་སྦེ་ ངེ་གི་སེམས་ཀྱི་གདིང་ལས་ར་ཕྱག་ཞུ་མི་དཀོན་མཆོག་ལུ་ འཛོམ་དཔང་སྦེ་བཙུགས་ཏེ་ ང་གིས་རྟག་བུ་ར་ཁྱེད་ཀྱི་དོན་ལུ་སྨོན་ལམ་ཞུཝ་ཨིན།

¹⁰ ང་གིས་དུས་རྟག་བུ་གི་སྨོན་ལམ་ནང་ དཀོན་མཆོག་གི་ཐུགས་དགོངས་ལས་སྦེ་ ཉིནམ་གཅིག་གི་ཚེ་ང་ཁྱེད་སྡོད་ས་ ག་དེ་འབད་རུང་འོང་ནིའི་གོ་སྐབས་ ཐོབ་བཅུག་ཟེར་ཞུཝ་ཨིན།

¹¹ ག་ཅི་སྨོ་ཟེར་བ་ཅིན་ ཁྱེད་དད་པ་ནང་སྒྲིང་སྒྲིང་བཟོ་ནི་གི་དོན་ལུ་ ཐུགས་ཉིད་ཀྱི་གསོལ་རས་ལ་ལུ་ཅིག་ ཁྱེད་དང་བགོ་བཤའ་བརྐྱབ་ནི་སྦེ་ ཁྱེད་སྡོད་ས་འོང་ནི་གི་རེ་བ་སྦོམ་ང་ལུ་ཡོད།

¹² འདི་ག་དེ་སྦེ་ཨིན་ན་ཟེར་བ་ཅིན་ ང་ཁྱེད་སྡོད་ས་འོངམ་ད་ ང་བཅས་གཅིག་གིས་གཅིག་ལུ་ སེམས་ཤུགས་བྱིན་ཏེ་དད་པ་སྒྲིང་སྒྲིང་བཟོ་ནིའི་རེ་བ་ཡོད།

¹³ སྤུན་ཆ་ཚུ་ ང་གིས་ཁྱེད་ལུ་ཤེས་བཅུག་དགོ་པའི་བློ་གཅིག་ཡོད་ དེ་ག་ཅི་སྨོ་ཟེར་བ་ཅིན་ ང་ཁྱེད་སྡོད་ས་ལུ་འོང་ནིའི་དོན་ལུ་ ཚར་ལེ་ཤ་རང་གནས་སྐབས་བསྒྱིར་ཡི་ དེ་འབདཝ་ད་ ཚར་གཅིག་ཡང་ ཚགས་ཁར་ཚུད་མ་ཚུགས་ ང་ཁྱེད་སྡོད་ས་ལུ་འོང་དགོ་མནོ་མི་དོན་དག་དེ་ ང་གིས་ཧེ་མ་ ཕྱིའི་མི་རིགས་ཚུ་ལུ་ དཀོན་མཆོག་ལུ་དད་པ་བསྐྱེད་བཅུག་དོཝ་བཟུམ་སྦེ་ ཁྱེད་ རོམ་ལུ་སྡོད་མི་ཆ་ཁྱབ་ཀྱི་གྲལ་ལས་ཡང་ དད་པ་བསྐྱེད་བཅུག་ནི་དོན་ལུ་ཨིན།

¹⁴ རིགས་བཟངམ་དང་ རིགས་ཞནམ་འབད་རུང་འདྲ་ ཡོན་ཏན་ཡོད་མི་དང་ མེད་མི་ཚུ་འབད་རུང་འདྲ་ ཁོང་ག་ར་ལུ་ཆོས་བཤད་ནི་གི་འགན་ཁག་དེ་ང་གིས་འབག་དགོ།

¹⁵ འདི་གི་དོན་ལས་སྦེ་ཁྱེད་ རོམ་ནང་སྡོད་མི་ཚུ་ལུ་ཡང་ ང་གིས་ག་དེ་དྲག་དྲག་གཏམ་བཟང་བཤད་པ་འོང་དགོ་མནོ་ཡི།།

དད་པ་གི་རྒྱུད་ལས་སྦེ་སྡོདཔ་ཨིན་པའི་སྐོར།

¹⁶ ག་ཅི་སྨོ་ཟེར་བ་ཅིན་ དད་པ་བསྐྱེད་མིའི་ མི་ཆ་མཉམ་ འགོ་དང་པ་ ཡ་ཧུ་ད་པ་ཚུ་གི་དོན་ལུ་དང་ ཕྱིའི་མི་རིགས་ཚུ་ལུ་ དཀོན་མཆོག་གིས་སྐྱབས་མཛད་ནི་གི་དབང་ཆེ་ཤོས་འདི་ ཨ་ནི་གཏམ་བཟང་འདི་ཨིན་ འདི་ལུ་ང་གིས་ངོ་མ་ཚ་བར་བཤདཔ་ཨིན།

¹⁷ ཨ་ནི་གཏམ་བཟང་གི་རྒྱུད་ལས་ དཀོན་མཆོག་གིས་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་ལམ་སྟོན་གནངམ་ཨིན་ ཨ་ནི་ལམ་འདི་ འགོ་དང་པ་ལས་མཐའན་མཇུག་ཚུན་ཚོད་རང་ དད་པ་ལས་བརྟེན་ཏེ་ཨིན་ དམ་པའི་གསུང་རབ་ནང་། ཆོས་སེམས་ཡོད་མི་དེ་ དད་པ་ལས་བརྟེན་ཏེ་ སྡོདཔ་ཨིན་ཟེར་བྲིས་ཏེ་འདུག།

སྤྱོད་པ་ངན་པ་གི་ཐོག་ལས་བདེན་པ་ལུ་མནན་བཞག་པའི་སྐོར།

^18-19 དེ་འབདཝ་ད་ དཀོན་མཆོག་གི་སྐོར་ལས་ མི་སྡིག་ཅན་ཚུ་གིས་ཤེས་དགོ་མི་འདི་ཚུ་ དཀོན་མཆོག་གིས་ཁོང་ལུ་སྟོན་གནང་སྟེ་ མི་སྡིག་ཅན་ཚུ་གིས་ལེགས་ཤོམ་སྦེ་ཤེས་རུང་ སྡིག་པ་དང་སྤྱོད་པ་ངན་པ་གི་རྒྱུད་ལས་སྦེ་ བདེན་པ་ལུ་མནན་བཞག་ནུག་ དེ་འབདཝ་ལས་ ཞིང་ཁམས་ལས་ དཀོན་མཆོག་གིས་ཁོང་ལུ་ དགོངསམ་ཁྲེལ་ཏེ་ཆདཔ་གནངམ་ཨིན།

²⁰ དཀོན་མཆོག་ཁོ་རང་གིས་ འཇིག་རྟེན་མཛད་ཚར་བའི་ཤུལ་ལས་ ཁོ་གི་མཐའ་མེད་པའི་མཐུ་སྟོབས་དང་ ཁོ་ག་ར་ལས་མཐོ་ཤོས་ཅིག་ཨིན་ཟེར་ མངོན་གསུམ་དུ་མཐོང་ནུག་ ག་ཅི་སྨོ་ཟེར་བ་ཅིན་ དཀོན་མཆོག་གིས་མཛད་མི་ལུ་བལྟཝ་ད་ ཁོ་གི་རང་བཞིན་གྱི་སྐོར་ལས་ ཧིང་སངས་ས་སྦེ་ཧ་གོ་ཚུགས་ འདི་ལས་སྦེ་ དཀོན་མཆོག་དང་གཞན་འབྲེལ་མེད་ཟེར་ཧད་འཕུལ་ཏེ་སླབ་མི་ཚུགས།

²¹ ཁོང་གིས་དཀོན་མཆོག་ལུ་ངོ་ཤེས་རུང་ ཁོ་ལུ་དཀོན་མཆོག་སྦེ་མ་བརྩིས་པར་ བཀའ་དྲིན་ཆེ་ཟེར་ཡང་མ་ཞུ་ དེ་ལས་ཁོང་གི་མནོ་བསམ་འདི་ཕར་ཕར་རང་ ཁུངས་མེད་པའི་རྩ་རྒས་ཀྱི་མནོ་བསམ་གཏང་སྟེ་ ཁོང་གི་སེམས་གནག་དུང་དུ་འགྱུར་ཏེ་ལུས་ནུག

²² ཁོང་རང་གིས་འབད་བ་ཅིན་ མཁས་པ་འཐོན་ནི་གི་རྩིས་ཨིན་མས་ དེ་འབདཝ་ད་ ག་ནི་ཡང་མ་ཤེས་པར་ ཕར་ཕར་རང་རྩ་རྒས་ལུ་འགྱུར་ནུག

²³ གཟི་བརྗིད་དང་ལྡན་པའི་ འཁྲུང་ནི་དང་གཤགས་ནི་མེད་པའི་དཀོན་མཆོག་ལུ་དད་པ་མ་བསྐྱེད་པར་ ཁོང་གིས་ འཆི་བ་མྱོང་པའི་ མི་གི་སྐུ་འདྲ་ ཡང་ན་བྱ་བྱིའུ་ དུད་འགྲོ་སེམས་ཅན་ སྦུལ་ལ་སོགས་པའི་སྐུ་འདྲ་ ལྷམ་པ་མ་གཅིགཔ་ལེ་ཤ་བཟོ་སྟེ་ འདི་ཚུ་ལུ་དད་པ་སྐྱེདཔ་ཨིན་མས།

²⁴ དེ་གི་དོན་ལས་ ཁོང་ཕོ་རྒྱ་དང་ཨམ་སྲུ་ རང་གི་གཟུགས་བློ་བཙོང་ནིའི་མར་རབས་ཀྱི་སྤྱོད་པ་ ག་འབད་དགོ་མནོ་མིའི་འདོད་ཆགས་ཚུ་ དཀོན་མཆོག་གིས་འབད་བཅུག་ནུག

²⁵ ག་ཅི་སྨོ་ཟེར་བ་ཅིན་ དཀོན་མཆོག་གི་བདེན་པ་ལུ་ ཁོང་གིས་རྫུས་མ་དང་སོརཝ་མ་ཚད་ གནམ་དང་ས་མཛད་མི་དཀོན་མཆོག་ལུ་སྤངས་ཏེ་ ཁོ་གིས་མཛད་མི་ཚུ་ལུ་དད་པ་བསྐྱེདཔ་ཨིན་མས་ དེ་འབདཝ་ད་ དཀོན་མཆོག་དེ་དུས་རྟག་བུ་ར་བསྟོདཔ་ཕུལ་དགོ་མི་གཅིག་ཨིན་ ཨ་མཱེན།

²⁶ དེ་གིས་འབད་ དཀོན་མཆོག་གིས་ཁོང་ལུ་ བློ་བཙོང་ནིའི་ལཱ་རང་འབད་བཅུག་ནུག་ ཨམ་སྲུ་ཚུ་གིས་ཡང་ཕོ་རྒྱ་དང་འབྲེལ་བ་འཐབ་ནི་བཞག་སྟེ་ ཁོང་རའི་ནང་འཁོད་ནང་ལུས་འབྲེལ་འབད་ནུག

²⁷ འདི་བཟུམ་སྦེ་ མི་ཕོ་རྒྱ་ཚུ་གིས་ཡང་ ཨམ་སྲུ་ཚུ་དང་གཅིག་ཁར་ལུས་འབྲེལ་འབད་ནི་བཞག་སྟེ་ ཁོང་རང་གཅིག་གིས་གཅིག་ལུ་འདོད་ཆགས་བསྐྱེད་དེ་ ངོ་ཚ་སི་སིའི་ལཱ་ངན་པ་དེ་ཚུ་འབད་ནུག་ དེ་ལས་རང་གིས་འབད་མི་འཛོལ་བ་ལས་བརྟེན་ཏེ་ ཁོང་ལུ་ཆདཔ་ཕོག་སྟེ་སྡུག་བསྔལ་མྱོང་ནུག

²⁸ དཀོན་མཆོག་ལུ་ངོ་ཤེས་དགོ་མནོ་བའི་སེམས་ ཁོང་ལུ་མེདཔ་ལས་བརྟེན་ཏེ་ ཁོང་གིས་འབད་མ་བཏུབ་པའི་ལཱ་ཚུ་འབད་མི་སྦེ་ དཀོན་མཆོག་གིས་ཁོང་གི་མནོ་བསམ་དེ་ཚུ་ གོ་མ་ཆོདཔ་མཛད་དེ་བཞག་ནུག

²⁹ ཁོང་གི་སེམས་ཁར་ལུ་སྡིག་པའི་རིགས་ མ་འདྲཝ་ལེ་ཤ་དང་ ངན་སེམས་དང་ འདོད་པ་ཆེ་དྲགས་དང་ གནོད་སེམས་བསྐྱེད་ནི་དང་ ཕྲག་དོག་བསྐྱེད་ནི་དང་ མི་གསད་ནི་དང་ འཐབ་རྒྱགས་འབད་ནི་དང་ མགུ་བསྐོར་བརྐྱབ་ནི་དང་ ཞན་སེམས་བསྐྱེད་ནི་དང་ དཀྲོགས་ཁ་རྐྱབས་ནི་དང་།

³⁰ འཕྱ་ཁ་གཏང་ནི་དང་ དཀོན་མཆོག་ལུ་ངོ་རྒོལ་འབད་ནི་དང་ ཞེ་ས་འབད་མ་བཏུབ་ནི་དང་ ཁམས་བཙོང་ནི་དང་ རང་བསྟོད་བརྐྱབ་ནི་དང་ ལཱ་ངན་པའི་ཐབས་ཤེས་འགྲིགས་ནི་དང་ ཕམ་གྱི་ཁ་ལུ་མ་ཉན་ནི་དང་།

³¹ ཤེས་མཐོང་རུང་མ་ཤེསཔ་བཟོ་ནི་དང་ རང་གི་ཁ་ཚིག་འཇལ་ཚར་མི་ལུ་མ་འབད་ནི་ དེ་ལས་བྱམས་སེམས་མེད་མི་ སྙིང་རྗེ་མེད་མི་ འདི་བཟུམ་གྱི་ལཱ་ལེ་ཤ་གིས་གང་སྟེ་སྡོད་ནུག

³² དཀོན་མཆོག་གི་བཀའ་ནང་ ཨ་ནི་བཟུམ་གྱི་མི་ཚུ་ཤི་བ་ཅིན་ཀྲིག་ཀྲི་རང་ཨིན་ཟེར་མི་འདི་ ཁོང་གིས་ཤེས་མཐོང་སྟེ་འབད་རུང་ ཨ་ནི་བཟུམ་གྱི་ལཱ་འབདཝ་ཨིནམ་མ་ཚད་ ད་རུང་འདི་བཟུམ་གྱི་ལཱ་འབད་མི་ གཞན་ཚུ་གི་ཁ་ཐུག་བཅརཝ་ཨིན།།