མཐོང་སྣང་ལེའུ་ 7 - རྫོང་ཁ་

དཀོན་མཆོག་གི་མི་དེ་ཚུ་ལུ་ཉེན་ཁ་མེད་པའི་སྐོར།

¹ དེ་གི་ཤུལ་ལས་ ས་གཞི་གི་ཕྱོགས་བཞིའི་ཟུར་ཁ་ལུ་ ཕོ་ཉ་བཞི་ཡར་བཞེངས་ཏེ་བཞུགསཔ་ང་གིས་མཇལ་ཡི་ ཕྱོགས་བཞི་གི་ས་གཞི་ནང་གི་རླུང་ འཕུ་མ་བཅུག་པར་ ཕོ་ཉ་ཚུ་གི་ཕྱག་ལུ་བཟུང་སྟེ་བཞག་ཡོདཔ་ཨིན་མས་ དེ་འབདཝ་ལས་ས་ཁར་དང་ རྒྱ་མཚོ་དང་ ཤིང་སྡོང་ག་ར་གུ་མ་ཕོག་བས།

² དེ་ལས་ཤར་ཕྱོགས་ཁ་ཐུག་ལས་ ཕོ་ཉ་གཞན་གྱིས་ ཕྱག་ལུ་ གསོན་པོའི་དཀོན་མཆོག་གི་ཕྱག་ཐམ་བསྣམས་ཏེ་ ཡར་བྱོན་སར་ང་གིས་མཇལ་ཡི་ ཁོ་གིས་ ས་གཞི་དང་རྒྱ་མཚོ་གཉིས་ལུ་ གནོད་ཚུགས་པའི་དབང་ཤུགས་ཡོད་མི་ཕོ་ཉ་བཞི་ལུ་གསུང་སྐད་སྦོམ་སྦེ།

³ ང་བཅས་ཀྱི་དཀོན་མཆོག་གི་ཕྱག་ཞུ་མི་ཚུ་གི་དཔྱལ་བ་ ཕྱག་ཐམ་མ་རྐྱབ་ཚུན་ཚོད་ ས་དང་རྒྱ་མཚོ་ ཤིང་སྡོང་དེ་ཚུ་ལུ་ གནོད་བཀལ་ནི་མེད་ཟེར་གསུངསམ་མས།

⁴ དེ་ལས་ ཨཱིས་ར་ཨཱེལ་གྱི་བུ་བརྒྱུད་ཀྱི་སྡེ་ཚན་ག་ར་ནང་ལས་ དཔྱལ་བ་ཕྱག་ཐམ་བརྐྱབས་ཏེ་ཡོད་མིའི་གྱངས་ཁ་ འབུམ་གཅིག་དང་བཞི་ཁྲི་བཞི་སྟོང་ཡོདཔ་ང་གིས་གོ་ཡི།

⁵ དེ་ཚུ་ག་ར་རིམ་པ་བཞིན་དུ་འབྲི་ནི་ཨིན། བུ་བརྒྱུད་ ཡུ་ད་གི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ རུ་བཱེན་གྱི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ གཱད་ཀྱི་སྡེ་ཚན་ནང་ལས་གཅིག་ཁྲི་གཉིས་སྟོང་།

⁶ བུ་བརྒྱུད་ ཨ་སེར་གྱི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ ནཱཕ་ཏ་ལི་གི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ མ་ན་སེ་གི་སྡེ་ཚན་ནང་ལས་གཅིག་ཁྲི་གཉིས་སྟོང་།

⁷ བུ་བརྒྱུད་ སི་མི་ཨཱོན་གྱི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ ལེ་ཝི་གི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ ཨི་ས་ཁཱར་གྱི་སྡེ་ཚན་ནང་ལས་གཅིག་ཁྲི་གཉིས་སྟོང་།

⁸ བུ་བརྒྱུད་ ཟེ་བུ་ལཱོན་གྱི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ ཡོ་སེབ་ཀྱི་སྡེ་ཚན་ནང་ལས་གཅིག་ཁྲི་གཉིས་སྟོང་། བུ་བརྒྱུད་ བེན་ཇ་མིན་གྱི་སྡེ་ཚན་ནང་ལས་གཅིག་ཁྲི་གཉིས་སྟོང་ཨིན་མས།།

ཐར་པ་ཐོབ་མི་ཚུ་ཞིང་ཁམས་ལུ་མཐོང་མིའི་སྐོར།

⁹ དེ་གི་ཤུལ་ལས་ ང་གིས་བལྟཝ་ད་ ངེ་གི་གདོང་ཁར་ མི་རིགས་མ་འདྲཝ་ ག་ར་གི་ནང་ན་ལས་ རིགས་ཚན་མ་འདྲཝ་དང་ མི་བརྒྱུད་མ་འདྲཝ་ སྐད་རིགས་མ་འདྲཝ་ག་ར་ནང་ལས་ མི་དམངས་ཚོགས་དེ་ཚུ་གྱངས་ཁ་ཡང་མ་ཆོདཔ་སྦེ་ བགོ་ལ་དཀརཔོ་གྱོན་ ལག་པར་ཤིང་གི་ཞལ་ལག་འབག་སྟེ་ རྒྱལ་ཁྲི་དང་ལུག་གི་ཕྱུག་ཀུ་གི་སྐུ་མདུན་ལུ་ལོངས་ཏེ།

¹⁰ གནམ་མེད་ས་མེད་སྐད་བརྐྱབས་ཏེ། ཐར་པ་འདི་ རྒྱལ་ཁྲི་ལུ་བཞུགས་མི་ང་བཅས་ཀྱི་དཀོན་མཆོག་དང་ ལུག་གི་ཕྱུག་ཀུ་ལས་འོངམ་ཨིན་ཟེར་ ཞུ་དེས།

¹¹ དེ་ལས་ཕོ་ཉ་ག་ར་གིས་ རྒྱལ་ཁྲི་དང་ སེམས་ཅན་བཞི་ རྒས་ཤོས་ཚུ་བསྐོར་ར་བརྐྱབས་ཏེ་ རྒྱལ་ཁྲི་གི་སྐུ་མདུན་ཕྱག་འཚལ་ཏེ་ དཀོན་མཆོག་ལུ་བསྟོད་པ་ཕུལ་དེས།

¹² དེ་ལས་ཁོང་གིས། ཨ་མཱེན་ བསྟོད་པ་དང་ གཟི་བརྗིད་ ཤེས་རབ་ བཀའ་དྲིན་ལེགས་སོ་ གུས་ཞབས་ དབང་ དེ་ལས་ཤུགས་སྟོབས་དེ་ཚུ་ ང་བཅས་ཀྱི་དཀོན་མཆོག་ལུ་ དུས་རྒྱུན་དུ་ཕུལ་བར་ཤོག་ ཨ་མཱེན་ཟེར་ ཞུ་དེས།

¹³ དེ་ལས་རྒས་ཤོས་གཅིག་གིས་ང་ལུ་ བགོ་ལ་དཀརཔོ་གྱོན་མི་ཚུ་ག་སྨོ་ ཁོང་ག་ལས་འོངམ་སྨོ་ཟེར་གསུངསམ་མས།

¹⁴ དེ་ལས་ང་གིས་ སློབ་དཔོན་ལགས་ འདི་ནཱ་གི་མཁྱེན་འོང་ཟེར་ཞུཝ་ད་ ཁོ་གིས་ ཁོང་ཆ་ཁྱབ་སྡུག་བསྔལ་སྦོམ་ནང་ལས་ཐོན་ཏེ་ ཁོང་རང་གི་བགོ་ལ་ ལུག་གི་ཕྱུག་ཀུ་གི་སྐུ་ཁྲག་ནང་འཁྱུ་སྟེ་ དཀརཔོ་བཟོ་ཚརཝ་ཨིན་མས།

¹⁵ དེ་འབདཝ་ལས་ ཁོང་གིས་དཀོན་མཆོག་གི་རྒྱལ་ཁྲིའི་རྩ་བར་སྡོད་དེ་ ཁོ་གི་མཆོད་ཁང་ནང་ ཉིན་མ་དང་ནུབ་མོ་ ཞབས་ཕྱི་ཞུཝ་ཨིན་མས་ དེ་ལས་རྒྱལ་ཁྲི་གུ་བཞུགས་མི་དེ་གིས་ ཁོང་གི་གུ་ལས་མར་ གུར་བཟུམ་སྦེ་སྤུབ་སྟེ་བཞུགས་འོང་།

¹⁶ ད་དེ་ལས་ཕར་ ཁོང་ནམ་ཡང་ལྟོཝ་མི་བཀྱེས་ ནམ་ཡང་ཁ་མི་སྐོམ་ ཉིམ་དང་དྲོད་ཀྱིས་མི་འཚིག

¹⁷ ག་ཅི་སྨོ་ཟེར་བ་ཅིན་ ཁྲི་གི་སྦུག་ལུ་བཞུགས་མི་ལུག་གི་ཕྱུག་ཀུ་འདི་ ཁོང་གི་ལུག་རྫིཔ་མཛད་འོང་ ཁོ་གིས་ཚེ་མཐའ་མེད་པའི་ཆུ་མིག་ནང་འཁྱིད་བཀལ་འོང་ དེ་ལས་དཀོན་མཆོག་གིས་ ཁོང་གི་མིག་ཏོ་གི་མིག་ཆུ་འཕྱག་སྟེ་གནང་འོང་ཟེར་གསུངས་ཡི།།