མཐོང་སྣང་ལེའུ་ 5 - རྫོང་ཁ་

ལུག་གི་ཕྱུག་ཀུ་དང་ཤོག་དྲིལ་གྱི་སྐོར།

¹ དེ་ལས་ཁྲིའི་གུ་བཞུགས་མི་ ཕྱག་གཡས་པ་ལུ་ཤོག་དྲིལ་གཅིག་ ཕྱི་དང་ནང་ཡི་གུ་བྲིས་ཏེ་ དེའི་གུ་ཕྱག་ཐམ་བདུན་བརྐྱབས་ཏེ་ཡོད་མི་གཅིག་ང་གིས་མཐོང་ཅི།

² དེ་ལས་སྟོབས་ཤུགས་ཅན་ ཕོ་ཉ་གཅིག་གིས་ སྐད་སྦོམ་བརྐྱབས་ཏེ་ ཨ་ནི་ཤོག་དྲིལ་གུ་གི་ཕྱག་ཐམ་འདི་བཀྲུམ་སྟེ་ ཁ་ཕྱེ་ནི་འོས་འབབ་ ག་ལུ་ཡོདཔ་སྨོ་ཟེར་གསུངས་ས་ང་གིས་གོ་ཡི།

³ དེ་འབདཝ་ད་ ཞིང་ཁམས་དང་འཛམ་བུ་གླིང་ ཡང་ན་ས་འོག་ལུ་ཡོད་མི་ཚུ་གིས་ ཁ་ཕྱེ་ནི་ ཡང་ན་དེ་ལུ་ལྷབ་ཚུགས་མི་ག་ཡང་མིན་འདུག

⁴ དེ་ལས་ང་གནམ་མེད་ས་མེད་སྔུ་ཡི་ ག་ཅི་སྨོ་ཟེར་བ་ཅིན་ ཤོག་དྲིལ་འདི་ལུ་ཁ་ཕྱེ་སྟེ་བལྟ་ཚུགས་པའི་ འོས་འབབ་ག་ལུ་ཡང་མིན་འདུག

⁵ དེ་འབདཝ་ད་ རྒས་ཤོས་གཅིག་གིས་ང་ལུ་ ཁྱོད་མ་སྔུ་ ནཱ་བལྟ་ཤིག་ ཡུ་ད་གི་རིགས་བརྒྱུད་ལས་ཨིན་མི་སེངྒེ་ རྒྱལཔོ་ ད་བིད་ཀྱི་བརྒྱུད་འཛིན་པ་གིས་ རྒྱལ་ཁ་ཐོབ་སྟེ་ཡོད་མི་ལུ་ ཨ་ནི་ཤོག་དྲིལ་འདི་གི་གུ་ ཡོད་མིའི་ཕྱག་ཐམ་འདི་བཀྲུམ་སྟེ་ ཁ་ཕྱེ་ནི་གི་འོས་འབབ་ཡོད་ཟེར་གསུངས་ཡི།

⁶ དེ་ལས་རྒྱལ་ཁྲི་གི་སྐུ་མདུན་ སེམས་ཅན་བཞི་དང་ རྒས་ཤོས་ཚུ་གི་གདོང་ཁར་ལུ་ལུག་གི་ཕྱུག་ཀུ་ ཧེ་མ་བསད་ད་རུང་ ད་ལྟོ་བཞེངས་ཏེ་བཞུགས་མི་དེ་ང་གིས་མཇལ་ཡི་ ལུག་གི་ཕྱུག་ཀུ་དེ་གི་མགུ་ལུ་རྭཝ་བདུན་དང་སྤྱན་བདུན་འདུག་ ཨ་ནི་འདི་ཚུ་དཀོན་མཆོག་གིས་ འཛམ་བུ་གླིང་ག་ར་ནང་བཏང་གནང་མིའི་ ཐུགས་ཉིད་བདུན་ཨིན་མས།

⁷ དེ་ལས་ཁོ་གདོང་ཁར་བྱོན་ཏེ་ རྒྱལ་ཁྲི་གུ་བཞུགས་མིའི་ཕྱག་གཡས་པ་ལས་ ཤོག་དྲིལ་འདི་བཞེསཔ་ད།

⁸ སེམས་ཅན་བཞི་དང་ རྒས་ཤོས་ཉི་ཤུ་རྩ་བཞི་གིས་ ལུག་དེ་གི་སྐུ་མདུན་ལུ་ཕྱག་འཚལ་ཡི་ ཁོང་རེ་རེ་གི་ཕྱག་ལུ་པི་ཝང་རེ་དང་ གསེར་གྱི་བསང་ཕོར་བསྣམས་ཏེ་ བསང་ཕོར་དེ་ནང་ལུ་ དཀོན་མཆོག་ཁོ་རའི་དམ་པའི་མི་ཚུ་གི་སྨོན་ལམ་འདི་ སྤོས་ཕྱེ་བཟུམ་སྦེ་བཀང་སྟེ་འདུག

⁹ དེ་ལས་ཁོང་རྒས་ཤོས་ཚུ་གིས་ མགུར་མ་གསརཔ་གཅིག་འཐེན་སྦེ། ནཱ་ལུ་ཤོག་དྲིལ་ཕྱག་ལུ་བཞེས་ཏེ་ དེའི་གུ་ཡོད་མིའི་ཕྱག་ཐམ་ ཁ་ཕྱེ་ནིའི་འོས་འབབ་འདུག་ ག་ཅི་སྨོ་ཟེར་བ་ཅིན་ ནཱ་གཤགས་ཏེ་ རིགས་ཚན་མ་འདྲཝ་དང་ སྐད་རིགས་མ་འདྲཝ་ མི་བརྒྱུད་མ་འདྲཝ་ མི་རིགས་མ་འདྲཝ་ ག་ར་གི་ནང་ན་ལས་ དཀོན་མཆོག་གི་དོན་ལུ་ ནཱ་གི་སྐུ་ཁྲག་གིས་ མི་ཚུ་ཉོ་གནང་ཡི།

¹⁰ ང་བཅས་ཀྱི་དཀོན་མཆོག་གི་ཕྱག་ཞུ་བཅུག་ནི་གི་དོན་ལུ་ ནཱ་གིས་ཁོང་ཆ་ཁྱབ་ལུ་རྒྱལ་སྲིད་གཅིག་དང་བླམ་སྦེ་མཛད་གནང་སྟེ་ ཁོང་གིས་འཛམ་གླིང་སྐྱོང་ནི་ཨིན་ཟེར་ གསུང་དབྱངས་འཐེན་མས།

¹¹ དེ་ལས་ང་གིས་བལྟཝ་ད་ ཁྲིའི་བསྐོར་ར་བརྐྱབས་ཏེ་ སེམས་ཅན་དང་རྒས་ཤོས་དེ་ཚུ་གི་སྦུག་ལུ་ ཕོ་ཉ་དེ་ཚུ་གྱངས་ཁ་མ་ཆོདཔ་ སྟོང་ཕྲག་དང་ཁྲི་ཕྲག་འབུམ་ཕྲག་ལས་ལྷགཔ་སྦེ་ གསུང་དབྱངས་འཐེན་པའི་སྐད་གོ་ཡི།

¹² ཁོང་གིས་གསུང་སྐད་སྦོམ་སྦེ། བཀྲོངས་ཚར་མིའི་ལུག་གི་ཕྱུག་ཀུ་དེ་ལུ་ དབང་ཤུགས་དང་ ལོངས་སྤྱོད་ ཤེས་རབ་ སྟོབས་ཤུགས་ གུས་ཞབས་ གཟི་བརྗིད་ བསྟོད་པ་ཐོབ་པའི་འོས་འབབ་ཡོད་ཟེར་ ཞུ་ཡི།

¹³ ད་རུང་ཡང་ཞིང་ཁམས་ནང་དང་ ས་གཞི་གུ་ལུ་དང་ ས་འོག་ལུ་ དེ་ལས་རྒྱ་མཚོའི་གུ་ལུ་ ཡོད་མིའི་སྲོག་ཆ་གི་རིགས་ག་ར་གིས་མགུར་མ་འཐེན་ཏེ། རྒྱལ་ཁྲི་ལུ་བཞུགས་མི་དང་ལུག་དེ་ལུ་ བསྟོད་པ་དང་ གུས་ཞབས་ གཟི་བརྗིད་ དབང་ཤུགས་དང་ལྡན་ཏེ་ དུས་རྒྱུན་དུ་འབབ་པར་ཤོག་ཟེར་ འཐེན་སར་ང་གིས་གོ་ཡི།

¹⁴ དེ་ལས་སེམས་ཅན་བཞི་གིས་ཨ་མཱེན་ཟེར་ཞུཝ་ད་ རྒས་ཤོས་དེ་ཚུ་གིས་ཕྱག་འཚལ་སྦེ་བསྟོད་པ་ཕུལཝ་མས།།