མཐོང་སྣང་ལེའུ་ 4 - རྫོང་ཁ་

ཞིང་ཁམས་ཀྱི་ཁྲིའི་སྐོར།

¹ དེ་གི་ཤུལ་ལས་ ང་གིས་ཡར་ཞིང་ཁམས་ལུ་བལྟཝ་ད་ སྒོ་གཅིག་ཕྱེ་བཞག་ཡོདཔ་མཐོང་ཅི་ དེ་ལས་ང་གིས་འགོ་དང་པ་གོ་མི་སྐད་དེ་ དུང་སྐད་བཟུམ་སྦེ་ ང་ལུ་ཡར་ཤོག་ ད་དེ་ཚུ་གི་ཤུལ་ལས་ག་ཅི་འབྱུང་ནི་ན་ འདི་ཚུ་ཁྱོད་ལུ་སྟོན་ནི་ཨིན་ཟེར་འབོ་ཅི།

² དེ་འཕྲོ་ལས་ང་ཐུགས་ཉིད་ཀྱིས་གང་སྟེ། ངེ་གི་གདོང་ཁར་ཞིང་ཁམས་ནང་ ཁྲིའི་གུ་བཞུགས་མི་གཅིག་མཇལ་ཡི།

³ ཁྲིའི་གུ་བཞུགས་མི་འདི་ རིན་ཆེན་རྡོའི་ཁ་དོག་ ཟཱས་པར་དང་ ཀར་ནེ་ལི་ཨཱན་ཟེར་མི་བཟུམ་ འོད་ག་ཅི་དེས་ཅིག་ཐོན་ཏེ་བཞུགསཔ་མ་ཚད་ ཁྲི་དེའི་མཐའ་བསྐོར་ཏེ་ རིན་ཆེན་རྡོའི་ཁ་དོག་ ནོར་བུ་མར་གད་ཟེར་མི་བཟུམ་གྱི་འཇའ་ཚོན་ བསྐོར་ར་བརྐྱབས་ཏེ་འདུག

⁴ ད་རུང་དེ་གི་བསྐོར་ར་བརྐྱབས་ཏེ་ བཞུགས་ཁྲི་ཉི་ཤུ་རྩ་བཞི་འདུག་ བཞུགས་ཁྲི་དེ་གི་གུ་ལུ་ རྒས་ཤོས་ཉི་ཤུ་རྩ་བཞི་ ན་བཟའ་དཀརཔོ་བཞེས་ དབུ་གུ་གསེར་གྱི་གཙུག་རྒྱན་བཞེས་ཏེ་བཞུགས་མི་ཚུ་ལུ་མཇལ་ཡི།

⁵ བཞུགས་ཁྲི་དེའི་གུ་ལས་གློག་ཀེམ་སྟེ་ འབྲུག་ལྡིར་མི་འུར་སྒྲ་གཅིག་གོ་ཡི་ དེ་ལས་བཞུགས་ཁྲི་དེ་གི་གདོང་ཁར་ལུ་ མེ་བདུན་འབར་ཏེ་ཡོད་མི་དེ་ལུ་མཇལ་ཡི་ དེ་དཀོན་མཆོག་གི་ཐུགས་ཉིད་བདུན་ཨིན་མས།

⁶ དེ་ལས་ཁྲིའི་སྐུ་མདུན་ལུ་ ཆུ་ཤེལ་གྱི་རྒྱ་མཚོ་འོད་ཆེམ་ཆེ་སྦེ་ཤར་ཏེ་འདུག ཁྲི་དེ་གི་མཐའ་བསྐོར་ནང་ སེམས་ཅན་གྱི་གཟུགས་གདོང་ཁར་དང་རྒྱབ་ཁར་ ག་ར་མིག་ཏོ་གིས་གང་མི་བཞི་འདུག

⁷ སེམས་ཅན་དང་པ་འདི་ སེངྒེ་བཟུམ་ གཉིས་པ་འདི་གླང་བཟུམ་ གསུམ་པ་འདི་མིའི་གདོང་བཟུམ་ བཞི་པ་འདི་བྱ་རྒོད་ལྡིང་ སྡོད་དོཝ་བཟུམ་སྦེ་འདུག

⁸ སེམས་ཅན་བཞི་ཆ་རང་ལུ་གཤོག་ཐལ་དྲུག་དྲུག་འདུག་ དེ་ལས་གཤོག་ཐལ་ཕྱི་དང་ནང་ན་ ག་ར་མིག་ཏོ་ལྟེམ་ལྟེ་གང་སྟེ་འདུག་ དེ་ལས་ཉིན་ནུབ་མེད་པར་ཁོང་གིས། འགོ་དང་པ་ལས་བཞུགས་མི་ ད་ལྟོ་ཡང་བཞུགས་མི་ ཤུལ་ལས་ཡང་འབྱོན་ནི་ཨིན་མི་ ཀུན་དབང་བའི་གཙོ་བོ་དཀོན་མཆོག་འདི་ མཆོག་ཏུ་གྱུར་པ་ མཆོག་ཏུ་གྱུར་པ་ མཆོག་ཏུ་གྱུར་པ་ཨིན་ཟེར་ རྒྱུན་མ་ཆད་པར་ཞུཝ་ཨིན་མས།

⁹ དེ་ལས་ནམ་རང་འབད་རུང་ སེམས་ཅན་ཚུ་གིས་ རྒྱལ་ཁྲི་གུ་དུས་རྒྱུན་དུ་རང་བཞུགས་མི་དེ་ལུ་ བསྟོད་པ་དང་ཞེ་ས་བཀའ་དྲིན་ལེགས་སོ་ཕུལཝ་ད།

¹⁰ རྒས་ཤོས་ཉི་ཤུ་རྩ་བཞི་གིས་ཡང་ རྒྱལ་ཁྲི་གུ་དུས་རྒྱུན་དུ་རང་བཞུགས་མིའི་སྐུ་མདུན་ལུ་ ཕྱག་འཚལ་ཞབས་ཏོག་ཞུ་སྟེ་ ཁོང་རང་གི་གཙུག་རྒྱན་ ཁྲིའི་གདོང་ཁར་ཕུད་བཞག་ཞིནམ་ད།

¹¹ ང་བཅས་ཀྱི་གཙོ་བོ་དང་དཀོན་མཆོག་ ནཱ་གི་ཐུགས་དགོངས་བཞིན་དུ་ ག་ར་མཛད་གནང་མི་འདི་གྲུབ་ནི་དེ་གིས་ ནཱ་ལུ་བསྟོད་པ་དང་ཞེ་ས་འབུལ་བ་ དབང་ཤུགས་ཐོབ་པའི་འོས་འབབ་ཡོད་ལགས་ཟེར་ཞུཝ་ཨིན་མས།།