མཐོང་སྣང་ལེའུ་ 3 - རྫོང་ཁ་

སར་དཱིས་ཀྱི་ཆོས་ཚོགས་ལུ་ཡི་གུ་བྲིས་བའི་སྐོར།

¹ སར་དཱིས་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ དཀོན་མཆོག་གི་ཕྱག་ཞུ་མི་ཐུགས་ཉིད་བདུན་དང་ སྐརམ་བདུན་ཕྱག་ལུ་བསྣམས་མི་གིས་གསུངས་དེས། ཁྱོད་ཀྱིས་འབད་མིའི་ལཱ་ག་ར་ང་གིས་ཤེས་ ཁྱོད་གསོན་པོ་སྦེ་སྡོད་པའི་མིང་གཏམ་ཡོད་རུང་ ཁྱོད་ཀྱིས་འབད་མི་ལཱ་ལས་བརྟེན་ཏེ་ ཁྱོད་ད་ལྟོ་ཤི་ཤིཝ་གི་རོ་བཟུམ་སྦེ་ཨིན་མས།

² ད་མགྱོགས་པར་གཉིད་གསད་དེ་ཡར་ལོང་ ལྷག་ལུས་ཏེ་ཤི་ནི་འབད་མི་ཚུ་ལུ་སྒྲིང་སྒྲིང་བཟོ་ཞིག་ ག་ཅི་སྨོ་ཟེར་བ་ཅིན་ ངེ་གི་དཀོན་མཆོག་གི་གཟིགས་སྣང་ལུ་ ཁྱོད་ཀྱིས་འབད་མི་ལཱ་ཚུ་ག་ར་ཀྲིག་ཀྲི་སྦེ་ང་གིས་མ་མཐོང་།

³ དེ་འབདཝ་ལས་ ཁྱོད་ཀྱིས་ག་ཐོབ་མི་དང་ གོ་མི་འདི་ལུ་དྲན་ཏེ་ཉན་ཁུག་བཏབ་དགོ་ དེ་ལས་སེམས་འགྱུར་ཏེ་བཤགས་པ་ཕུལ་ དེ་འབདཝ་ད་ གཉིད་གསད་དེ་ མ་སྡོད་པ་ཅིན་ང་ཨརཝ་བཟུམ་སྦེ་ ནམ་འོང་ནི་ཨིན་ན་ ཁྱོད་ཀྱིས་མ་ཤེས་པའི་བར་ན་ང་འོང་ནི་ཨིན།

⁴ ཨིན་རུང་ སར་དཱིས་ནང་ལུ་ ཁོང་རང་གི་བགོ་ལ་གུ་དྲེག་པ་ཆགས་མ་བཅུག་པར་སྡོད་མི་ཉུང་སུ་ཅིག་ཡོད་ ཁོང་བགོ་ལ་དཀརཔོ་གྱོན་ཏེ་ ང་དང་གཅིག་ཁར་འགྱོ་ནི་གི་འོས་འབབ་ཡོདཔ་ཨིན།

⁵ དེ་ལས་ག་གིས་རྒྱལ་ཁ་ཐོབ་མི་དེ་ལུ་ ཨ་ནི་བཟུམ་སྦེ་བགོ་ལ་དཀརཔོ་གྱོན་བྱིན་ནི་ཨིན་ དེ་ལས་ཁོ་གི་མིང་འདི་ནམ་ཡང་ ཚེའི་དེབ་ནང་ལས་བཏོན་མི་གཏང་ དེ་འབདཝ་ད་ ང་གིས་ཁོ་གི་མིང་འདི་ ངེ་གི་ཡབ་དང་ ཁོ་གི་ཕོ་ཉ་ཚུ་གི་གདོང་ཁར་ འཛོམ་དཔང་འབད་འོང་།

⁶ རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ལུ་གསུངས་མི་འདི་ཉན་དགོ་ཟེར་གསུངས་ཡི།།

ཕི་ལ་དཱེལ་ཕི་ཡ་གི་ཆོས་ཚོགས་ལུ་ཡི་གུ་བྲིས་བའི་སྐོར།

⁷ ཕི་ལ་དཱེལ་ཕི་ཡ་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ དམ་པ་དང་བདེན་པ་ཨིན་མི་ རྒྱལཔོ་ ད་བིད་ཀྱི་ལྡེ་མིག་བསྣམས་མི་ ཁོ་གིས་ཕྱེ་མིའི་སྒོ་འདི་ག་གིས་ཡང་བསྡམ་མ་ཚུགས་མི་དང་ དེ་ལས་ཁོ་གིས་བསྡམ་མིའི་སྒོ་འདི་ ག་གིས་ཡང་ཕྱེ་མི་ཚུགས་ཟེར་མི་ དེ་གིས་གསུངས་དེས།

⁸ ཁྱོད་ཀྱིས་འབད་མི་ལཱ་ག་ར་ང་གིས་ཤེས་ ང་གིས་ཁྱོད་ཀྱི་གདོང་ཁར་ ག་གིས་ཡང་བསྡམ་མ་ཚུགས་མིའི་སྒོ་གཅིག་ཕྱེ་བཞག་ཡོད་ ཁྱོད་ཤུགས་མེདཔ་ང་གིས་ཤེས་ ད་ཁྱོད་ཀྱིས་ངེ་གི་གསུང་འདི་ སེམས་ཁར་བཞག་སྟེ་ ང་ལུ་ངོ་མི་ཤེས་ཟེར་མ་སླབ་པར་སྡོདཔ་ང་གིས་ཤེས།

⁹ དོན་ལས་རང་ ཡ་ཧུ་ད་པ་མེན་རུང་ཨིན་ཟེར་ ཤོབ་བརྐྱབས་ཏེ་སླབ་མི་བདུད་ སེ་ཏཱན་གྱི་ སི་ན་གོག་ལས་ཨིན་མི་ཚུ་ལུ་ ང་གིས་ཁྱོད་ཀྱི་རྐང་མའི་རྩ་བ་འོངས་ཏེ་ ཕྱག་འཚལ་བཅུག་ནི་ཨིན་ དེ་ལས་ང་གིས་ཁྱོད་ལུ་བྱམས་པ་འབདཝ་ ཁོང་གིས་ཤེས་འོང་།

¹⁰ དེ་མ་ཚད་བཟོད་སྲན་བསྐྱེད་ནི་ ངེ་གི་བཀའ་འདི་ ཁྱོད་ཀྱིས་སེམས་ཁར་བཞག་ཅི་ དེ་འབདཝ་ལས་འཛམ་གླིང་ནང་ སྡོད་མི་ཚུ་ལུ་བརྟག་དཔྱད་འབད་དེ་ བར་ཆད་བྱུང་བའི་དུས་ཚོད་ལུ་ ང་གིས་ཁྱོད་ལུ་སྲུང་སྐྱོབས་འབད་ནི་ཨིན།

¹¹ ང་མགྱོགས་པར་འོང་ནི་ཨིན་ ཁྱོད་ཀྱི་ལག་པ་ག་ཅི་ཡོད་མི་འདི་སྒྲིང་སྒྲིང་སྦེ་བཤེད་བཞག་ དེ་ལས་ག་གིས་ཡང་ཁྱོད་ཀྱི་གཙུག་རྒྱན་འདི་འཕྱོག་འབག་མི་ཚུགས།

¹² ག་གིས་རྒྱལ་ཁ་ཐོབ་མི་འདི་ལུ་ ང་གིས་ངེ་གི་དཀོན་མཆོག་གི་ མཆོད་ཁང་གི་ཀཝ་སྦེ་བཟོ་ནི་ཨིན་ ཁོ་གིས་ད་རུང་ནམ་ཡང་ཨ་ནི་བཞག་སྟེ་འགྱོ་མི་དགོ་ དེ་ལས་ང་གིས་ངེ་གི་དཀོན་མཆོག་གི་མཚན་འདི་ ཁོ་གི་གུ་ལུ་འབྲི་ནི་ཨིན་ དེ་ལས་ངེ་གི་དཀོན་མཆོག་གི་ ཞིང་ཁམས་ལས་མར་ འོང་ནི་ཨིན་མིའི་ཁྲོམ་གསརཔ་ ཡེ་རུ་ཤ་ལེམ་གྱི་མིང་དང་ ངེ་གི་མིང་གསརཔ་འདི་ཁོ་གི་གུ་ལུ་འབྲི་ནི་ཨིན།

¹³ ད་རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ལུ་གསུངས་མི་འདི་ཉན་དགོ་ཟེར་གསུངས་ཡི།།

ལེའོ་དེ་ཀི་ཡ་གི་ཆོས་ཚོགས་ལུ་ཡི་གུ་བྲིས་བའི་སྐོར།

¹⁴ ལེའོ་དེ་ཀི་ཡ་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ ཨ་ནི་འདི་ཨ་མཱེན་གྱི་ཚིག་དང་ དམ་ཚིག་ཅན་ བདེན་པའི་འཛོམ་དཔང་ དཀོན་མཆོག་གིས་མཛད་གནང་མི་ ཡོད་ཚད་ཅིགཔ་འགོ་བཙུགས་མི་གིས་གསུངས་དེས།

¹⁵ ཁྱོད་ཀྱིས་འབད་མི་ལཱ་དེ་ ཁོདམ་མེནམ་ ཡང་ན་ཚ་ཏོམ་མེནམ་ང་གིས་ཤེས་ ཁྱོད་ཡང་ན་ཚ་ཏོམ་ ཡང་ན་ཁོདམ་སྦེ་སྡོད་པ་ཅིན་ ལེགས་ཤོམ་འོང་།

¹⁶ དེ་འབདཝ་ད་ ཁྱོད་ཚ་ཏོམ་ཡང་མེན་ ཡང་ན་ཁོདམ་ཡང་མེན་པར་ གྲངམ་དྲོནམ་འབདཝ་ལས་ ང་གིས་ཁྱོད་ཁ་ལས་བཏོན་བཀོག་ནི་ཨིན།

¹⁷ ང་ཕྱུགཔ་ཨིན་ ང་ལུ་དགོཔ་ཁག་ཆེཝ་ག་ནི་ཡང་མེད་ཟེར་སླབ་ཨིན་མས་ དེ་འབདཝ་ད་ ཁྱོད་སྐྱོ་སི་སི་ མིག་ཏོ་ཞརཝ་ སྤྱང་ཀ་ སྒྱེན་མོ་སྦེ་ སྡི་ཆེ་སི་སི་ཨིནམ་ ཁྱོད་རང་གིས་མ་ཤེས་པས།

¹⁸ ཁྱོད་རང་ཕྱུགཔ་འགྱོ་དགོ་པ་ཅིན་ ད་ངེ་གི་བསླབ་བྱ་ལུ་ཉན་ཏེ་ གསེར་མེ་ནང་བཞུ་སྟེ་ལྷད་མེདཔ་ང་ལས་ཉོ་ དེ་ལས་ཁྱོད་རང་གཟུགས་སྒྱེན་མོ་མི་ཐོན་ དེ་མ་ཚད་ ངོ་མ་ཚར་བར་སྡོད་དགོ་པ་ཅིན་ གོ་ལ་དཀརཔོ་ང་ལས་ཉོ་ ད་རུང་མིག་ཏོ་ལེགས་ཤོམ་སྦེ་ མཐོང་དགོ་པ་ཅིན་ མིག་ཏོ་གུ་དབུར་ནི་གི་སྨན་ང་ལས་ཉོ།

¹⁹ ང་གིས་ག་ལུ་བྱམས་བརྩེ་བསྐྱེད་མི་འདི་ལུ་ ཚོགས་བརྡ་བཏང་སྟེ་སྒྲིགས་བཙུགསཔ་ཨིན་ དེ་འབདཝ་ལས་སེམས་འགྱུར་ཏེ་ ན་འཐན་ཏོག་ཏོ་སྦེ་འབད་དགོ།

²⁰ ང་སྒོའི་རྩ་བ་ལོང་སྟེ་སྒོ་བརྡུང་དོ་ ངེ་གི་སྐད་གོ་སྟེ་སྒོ་ཕྱེ་བ་ཅིན་ ང་ནང་ན་འོངས་ཏེ་ ཁོ་དང་གཅིག་ཁར་བཞེས་སྒོ་ཟ་ནི་ཨིན།

²¹ ང་གིས་རྒྱལ་ཁ་ཐོབ་ལས་ ངེ་གི་ཡབ་ཀྱིས་ཁོ་རང་དང་གཅིག་ཁར་ རྒྱལ་སྲིད་སྐྱོང་ནི་གི་དབང་ཚད་གནང་ཡོདཔ་བཟུམ་སྦེ་ ག་གིས་རྒྱལ་ཁ་ཐོབ་མི་དེ་ལུ་ ང་གིས་དབང་ཚད་བྱིན་ཏེ་ ང་དང་གཅིག་ཁར་རྒྱལ་སྲིད་སྐྱོང་བཅུག་ནི་ཨིན།

²² རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ལུ་གསུངས་མི་འདི་ཉན་དགོ་ཟེར་གསུངས་ཡི།།