མཐོང་སྣང་ལེའུ་ 21 - རྫོང་ཁ་

ཡེ་རུ་ཤ་ལེམ་གསརཔ་གི་སྐོར།

¹ ད་ཧེ་མ་གི་གནམ་རྙིངམ་དང་ས་རྙིངམ་ རྒྱ་མཚོ་དེ་ཚུ་ག་ར་ཡལ་འགྱོ་སྟེ་ གནམ་གསརཔ་དང་ ས་གཞི་གསརཔ་དེ་ང་གིས་མཐོང་ཅི།

² དེ་ལས་རྒྱལ་ས་དམ་པ་ ཡེ་རུ་ཤ་ལེམ་གསརཔ་ ཨམ་སྲུ་མོ་རང་གི་རྨགཔ་གི་དོན་ལུ་ གཟབ་སྤྲོས་རྡིག་ཨིན་མི་བཟུམ་སྦེ་ ཡར་ཞིང་ཁམས་ལུ་བཞུགས་ཡོད་མི་ དཀོན་མཆོག་གི་སྐུ་མདུན་ལས་མར་འོངམ་ང་གིས་མཐོང་ཅི།

³ ད་རུང་ཁྲིའི་གུ་ལས་གསུང་སྐད་སྦོམ་གཅིག་གིས་ དེ་སྦེ་གསུངས་ས་ ང་གིས་གོ་ཡི་ ད་དཀོན་མཆོག་གི་བཞུགས་ཁང་འདི་ ཁོ་རའི་མི་ཚུ་གི་སྦུག་ལུ་ཨིན་ དཀོན་མཆོག་ མི་ཚུ་དང་གཅིག་ཁར་བཞུགས་འོང་ དེ་ལས་ ཁོང་དཀོན་མཆོག་གི་མི་སྦེ་ སྡོད་ནི་ཨིན་ དཀོན་མཆོག་ཁོ་ར་རང་ ཁོང་དང་གཅིག་ཁར་ ཁོང་གི་དཀོན་མཆོག་སྦེ་བཞུགས་ནི་ཨིན།

⁴ ཁོ་གིས་ཁོང་གི་མིག་ཏོ་གི་མིག་ཆུ་འཕྱག་ནི་ཨིན་ ད་དེ་ཁར་ལུ་ཤི་ནི་དང་མྱ་ངན་འབད་ནི་ སྔུ་ནི་ ཟུག་རྐྱབ་ནི་ལ་སོགས་པ་མེདཔ་མ་ཚད་ ཧེ་མ་འཇིག་རྟེན་རྙིངམ་དེ་ཐལ་སོང་ཡི་ཟེར་གསུངསམ་ ང་གིས་གོ་ཡི།

⁵ རྒྱལ་ཁྲི་གུ་བཞུགས་མི་ཁོ་གིས་ང་ལུ་ ད་ང་གིས་ག་ར་གསརཔ་སྦེ་བཟོ་དོ་ ཨ་ནི་འདི་བྲིས་ ག་ཅི་སྨོ་ཟེར་བ་ཅིན་ ང་གིས་སླབ་མི་འདི་ཆ་བཞག་ཚུགསཔ་དང་ བདེན་པ་ཨིན་ཟེར་གསུངས་ཡི།

⁶ ད་རུང་ཁོ་གིས་ང་ལུ་ ག་ར་འབད་ཚར་ཡི་ ང་འདི་ ཨཱལ་ཕ་དང་ ཨོ་མེ་ག་ཨིན་ འགོ་དང་པ་དང་མཐའན་མཇུག་ང་རང་ཨིན་ ག་ཁ་སྐོམ་མི་འདི་ལུ་ ང་གིས་ཚེའི་ཆུ་མིག་འདི་རིན་མེད་སྟོང་པ་སྦེ་འཐུང་བཅུག་ནི་ཨིན།

⁷ རྒྱལ་ཁ་ཐོབ་མི་འདི་གིས་ ཨ་ནི་ག་ར་ཁོ་གི་བགོ་བཤའ་སྦེ་ཐོབ་ནི་ཨིན་ དེ་ལས་ང་ཁོ་གི་དཀོན་མཆོག་དང་ ཁོ་ངེ་གི་བུ་ཨིན།

⁸ དེ་འབདཝ་ད་ སེམས་ཆུང་ཀུ་དང་ དད་པ་མེད་མི་ མ་རབས་ཨིན་མི་ མི་བསད་མི་ འདོད་ཆགས་ཀྱི་ལཱ་ངན་འབད་མི་ ངན་སྔགས་རྐྱབ་མི་ སྐུ་འདྲ་ལུ་ཕྱག་འཚལ་ཏེ་བསྟོད་པ་ཕུལ་མི་ ཤོབ་རྐྱབ་མི་ ཨ་ནི་འདི་ཚུ་ག་ར་གི་བགོ་བཤའ་དེ་ མུ་ཟི་མེའི་མཚོ་ནང་ཨིན་ ཨ་ནི་འདི་འཆི་བ་གཉིས་པ་ཨིན་ཟེར་གསུངས་ཡི།

⁹ དེ་ལས་ མཐའན་མཇུག་གི་ནད་ཡམས་ཀྱིས་ བཀང་སྟེ་ཡོད་མིའི་ཕོརཔ་བདུན་པ་འབག་མིའི་ཕོ་ཉ་འོངས་ཏེ་ ང་ལུ་ནཱ་ཤོག་ ང་གིས་ཁྱོད་ལུ་ལུག་གི་ཕྱུག་ཀུ་གི་མནའམ་ ཁོ་རའི་བཙུནམོ་སྟོན་བྱིན་ནི་ཟེར་གསུངས་སྦེ།

¹⁰ ང་ཐུགས་ཉིད་ནང་སྡོད་སྦེ་ གངས་རི་སྦོམ་མཐོ་ཤོས་གཅིག་གི་གུ་འཁྱིད་དེ་ རྒྱལ་ས་དམ་པ་ ཡེ་རུ་ཤ་ལེམ་འདི་ ཞིང་ཁམས་ལུ་བཞུགས་མི་ དཀོན་མཆོག་གི་སྐུ་མདུན་ལས་མར་འོངམ་ང་ལུ་སྟོན་གནང་ཡི།

¹¹ འདི་དཀོན་མཆོག་གི་གཟི་བརྗིད་ཀྱིས་ཤར་ཏེ་ ཤེལ་དཀརཔོ་བཟུམ་ འོད་འཕྲོ་མི་ནོར་བུ་རིན་པོ་ཆེ་དང་ རིན་ཆེན་རྡོ་བཟུམ་སྦེ་འདུག

¹² དེ་གི་ཕྱི་ཁར་ལས་ རྩིགཔ་ག་ནི་བ་མཐོཝ་སྦོམ་སྦེ་ དེ་དང་གཅིག་ཁར་སྒོ་ར་སྒོ་བཅུ་གཉིས་འདུག་ སྒོ་རེ་རེ་ནང་ སྲུང་རྒྱབ་ཕོ་ཉ་བཅུ་གཉིས་འདུག་ སྒོ་ར་སྒོའི་གུ་ལས་ཕར་ ཨཱིས་ར་ཨཱེལ་གྱི་མི་རིགས་བཅུ་གཉིས་ཀྱི་མིང་བྲིས་ཏེ་འདུག

¹³ དེ་ལས་ཤར་ཕྱོགས་ཁ་ཐུག་ལུ་སྒོ་ར་སྒོ་གསུམ་འདུག་ བྱང་ཕྱོགས་ཁ་ཐུག་ལུ་སྒོ་ར་སྒོ་གསུམ་འདུག་ ལྷོ་ཕྱོགས་ཁ་ཐུག་ལུ་སྒོ་ར་སྒོ་གསུམ་འདུག་ ནུབ་ཕྱོགས་ཁ་ཐུག་ལུ་སྒོ་ར་སྒོ་གསུམ་འདུག

¹⁴ ཁྲོམ་གྱི་རྩིགཔ་གི་འོག་ལུ་རྩིགཔ་འགྱམ་བཅུ་གཉིས་བཙུགས་ཏེ་འདུག་ དེ་ཚུ་གི་གུ་ལུ་ལུག་གི་ཕྱུག་ཀུ་གི་ སྐུ་ཚབ་བཅུ་གཉིས་ཀྱི་མཚན་བྲིས་ཏེ་འདུག

¹⁵ དེ་ལས་ཕོ་ཉ་ང་དང་གཅིག་ཁར་བློ་སླབ་མི་དེའི་ལགཔ་ལུ་ རྩིགཔ་དང་སྒོ་ར་སྒོ་དེ་ཚུ་ཚད་འཇལ་ནི་སྦེ་ གསེར་གྱི་འཁརཝ་གཅིག་འབག་སྟེ་འདུག

¹⁶ ད་ཁྲོམ་གྱི་རྒྱ་ཚད་དང་རིང་ཚད་འདི་གྲུ་བཞི་ཨིན་མས་ དེ་ལས་ཕོ་ཉ་འདི་གི་གསེར་གྱི་འཁརཝ་གིས་ ཁྲོམ་འདི་གི་ཚད་འཇལཝ་ད་ དཔག་ཚད་གསུམ་བརྒྱ་ཨ་ཙི་ཅིག་མ་ལངམ་གཅིག་ཐོན་ནུག་ དེ་ལས་རྒྱ་ཚད་དང་རིང་ཚད་མཐོ་ཚད་འདྲན་འདྲ་ཨིན་མས།

¹⁷ ད་རུང་ཕོ་ཉ་གིས་རྩིགཔ་གི་གྱང་གི་སྟུག་ཚད་འཇལ་མི་འདི་ ཕོ་ཉ་གིས་ཚད་འཇལ་མི་བཟུམ་སྦེ་ ང་བཅས་མིའི་ཁྱུ་ གཅིག་བརྒྱ་བཞི་བཅུ་ཞེ་བཞི་ཨིན་མས།

¹⁸ རྩིགཔ་འདི་ནོར་བུ་དམརཔོ་འབད་མི་གིས་བཟོ་བཟོཝ་དང་ ཁྲོམ་འདི་ཤེལ་བཟུམ་སྦེ་དྭངས་འཕྲོས་འཕྲོས་ ལྷད་མེད་པའི་གསེར་ངོ་མ་གི་བཟོ་བཟོཝ་ཨིན་མས།

¹⁹ ཁྲོམ་གྱི་རྩིགཔ་གི་འགྱམ་འདི་ རིན་ཆེན་ནོར་བུ་མ་འདྲཝ་ལེ་ཤ་གིས་ བྱ་མཆིས་ཆི་སྦེ་བཟོ་སྟེ་འདུག་ རྩིགཔ་འགྱམ་དང་པ་འདི་ནོར་བུ་ལྗང་ཁུ་འབད་མི་འདི་ཨིན་ གཉིས་པ་འདི་ནོར་བུ་ཨིན་དྲ་ནཱི་ལ་འབད་མི་འདི་ཨིན་ གསུམ་པ་འདི་རིན་ཆེན་ཤེལ་རྡོ་འབད་མི་འདི་ཨིན་ བཞི་པ་འདི་ནོར་བུ་མར་གད་ཡོད་མི་འདི་ཨིན།

²⁰ ལྔ་པ་འདི་ནོར་བུ་གཟི་བཟུམ་སྦེ་ཡོད་མི་འདི་ཨིན་ དྲུག་པ་འདི་རྡོའི་བཀྱག་དམརཔོ་སྦེ་ཡོད་མི་འདི་ཨིན་ བདུན་པ་འདི་ནོར་བུ་སེརཔོ་འབད་མི་འདི་ཨིན་ བརྒྱད་པ་འདི་གཡུ་གི་བཀྱག་བཟུམ་སྦེ་ཡོད་མི་འདི་ཨིན་ དགུ་པ་འདི་རྡོའི་བཀྱག་སེརཔོ་གི་སྐྱཝ་སྦེ་ཡོད་མི་འདི་ཨིན་ བཅུ་པ་འདི་རྡོའི་བཀྱག་ལི་ཝང་གི་སྐྱབོ་སྦེ་ཡོད་མི་འདི་ཨིན་ བཅུ་གཅིག་པ་འདི་ནོར་བུ་ཧོནམོ་འབད་མི་འདི་ཨིན་ བཅུ་གཉིས་པ་འདི་ནོར་བུ་རྒྱ་སྨུག་འབད་མི་འདི་ཨིན།

²¹ སྒོ་ར་སྒོ་བཅུ་གཉིསཔ་འདི་མུ་ཏིག་ བཅུ་གཉིས་ཀྱིས་བཟོ་བཟོཝ་ཨིན་མས་ སྒོ་རེ་རེ་མུ་ཏིག་རེ་རེ་གིས་བཟོ་བཟོཝ་ཨིན་མས་ ཁྲོམ་གྱི་ལམ་ཡང་གསེར་ངོ་མ་ ཕྱི་དང་ནང་ན་མཐོང་ཚུགས་མིའི་ཤེལ་བཟུམ་སྦེ་འདུག

²² ང་གིས་ཁྲོམ་དེ་ནང་ལུ་མཆོད་ཁང་མ་མཐོང་ ག་ཅི་སྨོ་ཟེར་བ་ཅིན་ ཀུན་དབང་གཙོ་བོ་དཀོན་མཆོག་དང་ ལུག་གི་ཕྱུག་ཀུ་ ཁོང་རང་གཉིས་མཆོད་ཁང་ཨིན་མས།

²³ ཁྲོམ་འདི་ལུ་ཉིམ་དང་ཟླཝ་གི་འོད་མི་དགོ་པས་ ག་ཅི་སྨོ་ཟེར་བ་ཅིན་ དཀོན་མཆོག་གི་གཟི་བརྗིད་འདི་ ཉིམ་བཟུམ་སྦེ་ཤར་ཏེ་འདུག་ དེ་མ་ཚད་ཁྲོམ་གྱི་ལ་ཝང་དེ་ ལུག་གི་ཕྱུག་ཀུ་ཁོ་རང་རང་ཨིན་མས།

²⁴ ཨ་ནི་འོད་དེ་ནང་ མི་རིགས་དེ་ཚུ་ལམ་འགྱོཝ་ཨིན་མས་ འཛམ་བུ་གླིང་ནང་གི་རྒྱལཔོ་དེ་ཚུ་གིས་ཡང་ ཁོ་རང་གི་གཟི་བརྗིད་མངའ་ཐང་ཚུ་ ཁྲོམ་དེ་ནང་འབག་འོངམ་མས།

²⁵ ཉིན་མ་ལུ་ སྒོ་ར་སྒོ་མ་བསྡམ་པར་ཕྱེ་སྟེ་རང་བཞགསཔ་ཨིན་མས་ དེ་ནང་ལུ་ནུབ་མོ་ཟེར་ཡང་མིན་འདུག

²⁶ མི་རིགས་ཚུ་གིས་ཁོང་རང་གི་བསྟོད་པ་དང་ཞེ་ས་དེ་ནང་འབག་སྟེ་ཕུལཝ་མས།

²⁷ དེ་འབདཝ་ད་དེ་ནང་ལུ་ ལུག་གི་ཕྱུག་ཀུ་གི་ཚེའི་དེབ་ནང་མིང་བྲིས་མི་མ་གཏོགས་ གཞན་མ་གཙངམ་དང་ ཤོབ་རྐྱབ་མི་ ཞེན་པ་ལོག་སི་སི་དེ་ཚུ་དེ་ནང་འཛུལ་མི་ཚུགས་པས།།