མཐོང་སྣང་ལེའུ་ 20 - རྫོང་ཁ་

བདུད་ སེ་ཏཱན་ལོ་ངོ་སྟོང་ཕྲག་གཅིག་བཅིངས་བཞག་པའི་སྐོར།

¹ ད་རུང་ཡང་ཞིང་ཁམས་ལས་མར་ ལྕགས་ཐག་དང་ གཏིང་དང་མཐའ་མེད་པའི་དོང་གི་ལྡེ་མིག་འབག་མིའི་ ཕོ་ཉ་གཅིག་འོང་ས་ང་གིས་མཐོང་ཅི།

² དེ་ལས་འབྲུག་འདི་ བདུད་དང་ སེ་ཏཱན་ཟེར་ཡང་སླབ་མི་ དང་ཕུགས་ཀྱི་སྦུལ་འདི་བཟུང་སྟེ་ བཅིངས་ཞིནམ་ད་ ལོ་སྟོང་ཕྲག་གཅིག་གི་དོན་ལུ།

³ གཏིང་དང་མཐའ་མེད་པའི་དོང་གི་ནང་ན་བཀོག་སྦེ་ཁ་བསྡམས་ཏེ་ ལོ་སྟོང་ཕྲག་གཅིག་མ་རྫོགས་བར་དུ་ ཁོ་གིས་མི་རིགས་ཚུ་ལུ་ལོག་སྟེ་མགུ་བསྐོར་མ་རྐྱབ་པའི་དོན་ལུ་ སྒོའི་གུ་ཐིའུ་བརྐྱབས་ཅི་ ལོ་ཚད་འདི་ཚངམ་ད་ དུས་ཡུན་ཐུང་ཀུ་གཅིག་གི་དོན་ལུ་ཁོ་ལུ་ཐར་གཏང་འོང་།

⁴ དེ་ལས་ཁྲི་དང་ ཁོང་ཁྲིམས་ཕྱེ་ནི་གི་དབང་ཚད་ཐོབ་སྟེ་ཡོད་མི་ཚུ་ ཁྲིའི་གུ་བཞུགས་ཡོདཔ་ང་གིས་མཇལ་ཡི་ ད་རུང་ཡང་ ཡེ་ཤུ་དང་དཀོན་མཆོག་གི་གསུང་གི་དོན་ལུ་འཛོམ་དཔང་འབད་དེ་ ཨོལ་ལྐོག་བཏོགས་ཤི་མི་ཚུ་གི་སེམས་ཉིད་ང་གིས་མཐོང་ཅི་ ཁོང་ཆ་ཁྱབ་ཀྱིས་ གཅན་གཟན་དང་ཁོ་གི་སྐུ་འདྲ་ལུ་ཕྱག་མ་འཚལ་མི་དང་ ཁོ་གི་རྟགས་དཔྱལ་བ་ ཡང་ན་ལག་པར་མ་བཀལ་མི་ཚུ་ཨིན་མས་ ཨ་ནི་དེ་ཚུ་ལོག་གསོན་པོ་སྦེ་ལོང་སྟེ་ ལོ་གཅིག་སྟོང་ཚུན་ཚོད་ ཡེ་ཤུ་ཁིརཱིས་དང་གཅིག་ཁར་རྒྱལ་སྲིད་སྐྱོང་ནི་ཨིན་མས།

⁵ ཨ་ནི་འདི་ཤི་མི་ཚུ་གསོན་པོ་སྦེ་ལོང་མི་དང་པ་ཨིན་མས་ གཞན་ཤི་མི་དེ་ཚུ་ལོ་སྟོང་ཕྲག་གཅིག་ མ་ལང་པར་གསོན་པོ་སྦེ་མི་ལོང་ཟེརཝ་ཨིན་མས།

⁶ ཨ་ནི་དང་པ་གསོན་པོ་སྦེ་ལོང་མི་དེ་ཚུ་ དཀོན་མཆོག་ཁོ་རའི་མི་ཚུ་བྱིན་རླབས་ཅན་ཨིན་ འཆི་བ་གཉིས་པ་གི་དབང་གིས་ཁོང་ལུ་གནོད་མི་ཚུགས་ དེ་འབདཝ་ད་ཁོང་གིས་ དཀོན་མཆོག་དང་ཁིརཱིས་ཀྱི་བླམ་སྦེ་ ཁིརཱིས་དང་གཅིག་ཁར་ལོ་སྟོང་ཕྲག་གཅིག་རྒྱལ་སྲིད་སྐྱོང་ནི་ཨིན།།

བདུད་ སེ་ཏཱན་དང་མཐའན་མཇུག་གི་འཐབ་འཛིང་གི་སྐོར།

⁷ ད་ལོ་སྟོང་ཕྲག་གཅིག་རྫོགས་ཏེ་ བདུད་ སེ་ཏཱན་འདི་ ཁོ་བཙོན་ཁང་ནང་ལས་ཐར་བཏངམ་ད།

⁸ ཁོ་གིས་འཛམ་བུ་གླིང་གི་ ས་གཞི་ཕྱོགས་བཞི་གི་གི་ཁུག་ནང་འགྱོ་ཞིནམ་ད་ མི་རིགས་ག་ར་ གོག་དང་ མ་གོག་ཟེར་མི་ཚུ་ལུ་མགུ་བསྐོར་བརྐྱབས་ཏེ་ དམག་རྐྱབ་ནི་གི་དོན་ལུ་གཅིག་ཁར་སྤུངས་ནུག་ ཨ་ནི་མི་ཚུ་གི་གྱངས་ཁ་འདི་ རྒྱ་མཚོ་ནང་གི་བྱེམ་བཟུམ་སྦེ་འདུག

⁹ དེ་ལས་ཨ་ནི་དེ་ཚུ་གིས་ དམག་རྐྱབ་ནི་སྦེ་ འཛམ་བུ་གླིང་གི་ས་གཞི་ག་ར་ཁྱབ་སྟེ་ གཅེས་པའི་ཁྲོམ་དང་ དཀོན་མཆོག་གི་མི་ཚུ་གི་སྒར་བསྐོར་ར་བརྐྱབས་ཆེ་ནུག་ དེ་འབདཝ་ད་ ཞིང་ཁམས་ལས་མར་ མེ་ཟིམ་བུད་དེ་ ཁོང་ག་ར་མེ་གིས་འཚིག་བཏང་ཡི།

¹⁰ དེ་ལས་ཁོང་ལུ་མགུ་བསྐོར་བརྐྱབས་མི་བདུད་འདི་ ཧེ་མ་གི་གཅན་གཟན་འདི་དང་ལུང་སྟོན་པ་རྫུས་མ་བཀོག་སའི་ མུ་ཟི་མེའི་མཚོ་ནང་བཀོག་སྟེ་ ཁོང་ཉིན་མཚན་མེད་པར་ དུས་རྒྱུན་དུ་རང་ བཟོད་མ་ཚུགས་མི་སྡུག་བསྔལ་མྱོང་ནི་ཨིན།།

མཐའན་མཇུག་གི་ཁྲིམས་ཕྱེ་བའི་སྐོར།

¹¹ དེ་ལས་ང་གིས་ཁྲི་དཀརཔོ་སྦོམ་དང་ དེའི་གུ་བཞུགས་མི་འདི་ལུ་མཇལ་ཡི་ ཁོ་གི་སྐུ་མདུན་ལས་གནམ་དང་ས་གཉིས་ཀུ་བྱོག་འགྱོཝ་མས་ དེ་འབདཝ་ད་ བྱོག་སའི་ས་གནས་ག་ཏེ་ཡང་མིན་འདུག

¹² ད་རུང་ང་གིས་ཁྲིའི་སྐུ་མདུན་ལུ་མི་ཤི་སོང་མི་ སྦོམ་དང་ཆུང་ཀུ་ག་ར་ལོང་སྡོད་དེ་ དེབ་དེ་ཚུ་ཁ་ཕྱེཝ་མཐོང་ཅི་ དེ་ལས་ཚེའི་དེབ་ཡང་ཁ་ཕྱེ་ཡི་ ད་ཤི་མི་ཚུ་གི་ཁྲིམས་འདི་ རང་གིས་ག་འབད་མི་ལཱ་ དེབ་དེ་ཚུ་ནང་ག་བྲིས་ཏེ་ཡོད་མི་དང་འཁྲིལ་ཏེ་ ཁྲིམས་བཀལཝ་མས།

¹³ དེ་ལས་རྒྱ་མཚོ་གིས་ དེ་གི་ནང་ཡོད་མི་གཤིནམ་དེ་ཚུ་ག་ར་ཐར་བཏང་ཡི་ ད་རུང་འཆི་བ་དང་གཤིན་ཡུལ་གྱིས་ ཁོ་གི་ནང་ཡོད་མིའི་གཤིནམ་དེ་ཚུ་ཡང་ག་ར་ཐར་བཏང་ཡི་ ཤི་མི་དེ་ཚུ་རེ་རེ་བཞིན་དུ་ རང་གིས་འབད་མིའི་ལཱ་དང་འཁྲིལ་ཏེ་ ཁྲིམས་བཀལཝ་མས།

¹⁴ དེ་ལས་འཆི་བ་དང་གཤིན་ཡུལ་ མེ་གི་མཚོ་ནང་འཐུ་བཀོག་ཡི་ ཨ་ནི་མེ་གི་མཚོ་འདི་འཆི་བ་གཉིས་པ་ཨིན་མས།

¹⁵ དེ་ལས་ག་ར་ཨིན་རུང་ ཚེའི་དེབ་ནང་མིང་མེད་མི་ཚུ་ མེ་གི་མཚོ་ནང་འཐུ་བཀོག་ཡི།།