མཐོང་སྣང་ལེའུ་ 2 - རྫོང་ཁ་

ཨི་ཕི་སི་གི་ཆོས་ཚོགས་ལུ་ཡི་གུ་བྲིས་བའི་སྐོར།

¹ ཨི་ཕི་སི་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ ཡི་གུ་འདི་ སྐརམ་བདུན་ཕྱག་གཡས་ལུ་བསྣམས་ཏེ་ གསེར་གྱི་ལ་ཝང་བདུན་གྱི་སྦུག་ལུ་བྱོན་མི་དེ་གིས་ གསུངས་དེས།

² ཁྱོད་ཀྱིས་དཀའཝ་སྤྱད་པའི་ལཱ་དང་ བཟོད་སྲན་བསྐྱེད་དེ་འབད་མིའི་ལཱ་ག་ར་ང་གིས་ཤེས་ ཁྱོད་ཀྱིས་ལཱ་ངན་པ་འབད་མི་དེ་ལུ་བལྟ་བཟོད་མི་ཚུགས་ཟེར་ཡང་ང་གིས་ཤེས་ དེ་ལས་སྐུ་ཚབ་མེན་རུང་ཨིན་ཟེར་སླབ་མི་ཚུ་ལུ་ ཁྱོད་ཀྱིས་བརྟག་ཞིབ་དཔྱད་དེ་རྫུས་མ་ཨིནམ་ཧ་གོ་ཡི།

³ ངེ་གི་མིང་ནང་སྡུག་བསྔལ་མྱོང་རུང་ བཟོད་སྲན་བསྐྱེད་དེ་ དད་པ་མ་ཉམས་པར་ རྩ་འགེངས་འབད་མི་ཚུ་ ང་གིས་ཤེས།

⁴ དེ་འབདཝ་ད་ དོན་དག་གཅིག་ལས་བརྟེན་ཏེ་ ང་ཁྱོད་ལུ་མ་དགའཝ་ཡོད་ འདི་ཁྱོད་ཀྱིས་ ཧེ་མ་འབད་མི་བྱམས་པ་འདི་ ད་ལྟོ་འབད་ནི་བཞག་ད་ནུག

⁵ དེ་འབདཝ་ལས་ ཁྱོད་རང་གིས་ག་ཏེ་ལུ་འཛོལ་བ་འབད་ཡི་ག་ འདི་སེམས་ཁར་དྲན་ཏེ་ འདི་ལུ་སེམས་འགྱུར་ཏེ་ ཧེ་མ་འབད་དོཝ་བཟུམ་གྱི་བྱམས་པ་འདི་འབད་དགོ་ དེ་སྦེ་མ་འབད་བ་ཅིན་ ང་ཁྱོད་སྡོད་སར་འོངས་ཏེ་ གསེར་གྱི་ལ་ཝང་འདི་ དེ་ཁར་ལས་བཏོན་འབག་ནི་ཨིན།

⁶ དེ་འབདཝ་ད་ ཁྱོད་ཀྱིས་ ནི་ཀོ་ལའི་ཏཱན་ཟེར་མིའི་ ཆོས་ལུགས་ལུ་མ་དགའ་མི་འདི་ ལེགས་ཤོམ་ཨིན་མས་ ང་ཡང་འདི་ལུ་མི་དགའ།

⁷ ད་རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ཚུ་ལུ་གསུངས་མི་འདི་ཉན་དགོ་ རྒྱལ་ཁ་ཐོབ་མི་ག་ར་ཨིན་རུང་ འདི་གིས་དཀོན་མཆོག་གི་ལྡུམ་ར་ནང་གི་ཚེ་ཤིང་ལས་ ཟ་ནིའི་དབང་ཚད་བྱིན་ནི་ཨིན་ཟེར་གསུངས་ཡི།།

སུམཱུར་ན་གི་ཆོས་ཚོགས་ལུ་ཡི་གུ་བྲིས་བའི་སྐོར།

⁸ སུམཱུར་ན་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ ཨ་ནི་འདི་ འགོ་དང་པ་དང་མཐའན་མཇུག་ ཧེ་མ་ཤི་སྟེ་འབད་རུང་ ཤི་ས་ལས་གསོན་པོ་སྦེ་ལོག་སྟེ་ ད་ནམ་ཡང་ཤི་ནི་མེད་པའི་གསོན་པོ་དེ་གིས་ གསུངས་དེས།

⁹ ཕྱི་ཁར་ཁྱོད་སྡུག་བསྔལ་མྱོང་སྟེ་སྤྱང་ཀ་ཨིན་རུང་ ནང་ན་སེམས་ཉིད་འདི་ཕྱུགཔ་ཨིནམ་ང་གིས་ཤེས་ དོན་ལས་རང་ ཡ་ཧུ་ད་པ་མེན་རུང་ཨིན་ཟེར་སླབ་སྟེ་ ཁྱོད་ལུ་བློ་བཙོང་སྟེ་ངོ་རྒོལ་འབད་མི་ཚུ་ ཁོང་བདུད་ སེ་ཏཱན་གྱི་ སི་ན་གོག་ལས་ཨིནམ་ང་གིས་ཤེས།

¹⁰ སྡུག་བསྔལ་མྱོང་ནི་ཨིན་མས་ཟེར་མ་འདྲོག་ བདུད་ཀྱིས་ཁྱེད་ཀྱི་གྲལ་ཁ་ལས་ལ་ལུ་ཅིག་ལུ་ ཚོད་བལྟ་འབད་དེ་བཙོན་ཁང་ནང་བཙུགས་ཏེ་ ཞག་བཅུ་ཐམ་ཚུན་ཚོད་ གནོདཔ་བཀལ་ཏེ་བཞག་འོང་ དེ་སྦེ་ཤི་བའི་སྲོག་ལུ་ཐུག་རུང་ དམ་ཚིག་བསྟེན་ཏེ་སྡོད་ དེ་ལས་ང་གིས་ཚེའི་གཙུག་རྒྱན་བྱིན་ནི་ཨིན།

¹¹ ད་རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ལུ་གསུངས་མི་འདི་ཉན་དགོ་ རྒྱལ་ཁ་ཐོབ་མི་འདི་ལུ་ འཆི་བ་གཉིས་པ་འདི་གིས་གནོད་མི་ཚུགས།།

པེར་ག་མཱོས་ཀྱི་ཆོས་ཚོགས་ལུ་ཡི་གུ་བྲིས་བའི་སྐོར།

¹² པེར་ག་མཱོས་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ རལ་གྲི་ཁ་གཉིསཔ་གི་རྣོས་དང་ལྡན་མི་གིས་ ཨ་ནི་བཟུམ་སྦེ་གསུངས་དེས།

¹³ ད་ལྟོ་ཁྱོད་སྡོད་མི་ས་གནས་འདི་ བདུད་ སེ་ཏཱན་གྱི་རྒྱལ་ཁྲི་ཨིན་རུང་ ངེ་གི་མིང་ནང་ ཁྱོད་ཀྱིས་དམ་ཚིག་བསྟེན་ཏེ་སྡོད་མི་དེ་ང་གིས་ཤེས་ དེ་ལས་ ཨཱན་ཏྲི་པཱས་ཀྱིས་ང་ལུ་དམ་ཚིག་བསྟེན་མི་དང་ ངེ་གི་འཛོམ་དཔང་འབད་དེ་ བདུད་ སེ་ཏཱན་གྱི་ཁྲོམ་ཁར་ ཁྱེད་ཀྱི་སྦུག་ལུ་ཁོ་བསད་པའི་སྐབས་ ཁྱོད་ཀྱིས་དད་པ་མ་ཉམས་ དེ་མ་ཚད་ ང་ངོ་མི་ཤེས་ཟེར་མ་སླབ་པར་སྡོད་མི་ཡང་ང་གིས་ཤེས།

¹⁴ དེ་འབདཝ་ད་ སྐྱོན་ལ་ལུ་ཅིག་ཁྱོད་ལུ་བཏོན་ཏེ་སླབ་ནི་ཡོད་ མངོན་ཤེས་བཤད་མི་ བ་ལམ་གྱིས་ རྒྱལཔོ་ བ་ལག་ལུ་ ཨཱིས་ར་ཨཱེལ་པ་གི་མི་རིགས་ཚུ་སྡིག་པ་ནང་ཚུད་བཅུག་ནི་སྦེ་ སྐུ་ལུ་མཆོད་པ་ཕུལ་མི་ཚོགས་དེ་ཚུ་ཟ་བཅུག་ དེ་ལས་འདོད་ཆགས་ཀྱི་ལུས་འབྲེལ་འབད་བཅུག་ཟེར་ བསླབ་བྱ་སྟོན་མི་ལུ་ ཁྱེད་ཀྱི་གྲལ་ཁ་ལས་ ཉན་མི་ལ་ལུ་ཅིག་ཡོད།

¹⁵ དེ་མ་ཚད་ ནི་ཀོ་ལའི་ཏཱན་གྱི་ཆོས་ལུགས་ཀྱི་ བསླབ་བྱ་ལུ་ཉན་མི་ཡང་ལ་ལུ་ཅིག་ཡོད།

¹⁶ དེ་འབདཝ་ལས་ ཁྱེད་ཆ་ཁྱབ་ཨ་ནི་དེ་ཚུ་ལུ་ སེམས་འགྱུར་ཏེ་བཤགས་པ་ཕུལ་དགོ་ དེ་མེན་པ་ཅིན་ ང་མགྱོགས་པར་ཁྱེད་སྡོད་སར་འོངས་ཏེ་ ངེ་གི་ཁ་ལུ་ཡོད་མི་རལ་གྲི་ཁ་གཉིསཔ་དེ་གིས་ ཁོང་དང་གཅིག་ཁར་དམག་བརྐྱབ་འོང་།

¹⁷ ད་རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ལུ་གསུངས་མི་འདི་ཉན་དགོ་ དེ་ལས་ག་གིས་རྒྱལ་ཁ་ཐོབ་མི་འདི་ལུ་ ང་གིས་སྦས་ཏེ་བཞག་ཡོད་མི་ མཱན་ན་འདི་བྱིན་ནི་ཨིན་ ད་རུང་ང་གིས་རྡོ་དཀརཔོ་གུ་བྲིས་ཏེ་ཡོད་མི་ མིང་གསརཔ་འདི་བྱིན་ནི་ཨིན་ ཨ་ནི་མིང་འདི་ རྡོ་དཀརཔོ་ཐོབ་མི་འདི་གིས་རྐྱངམ་གཅིག་ཧ་གོ་ཚུགས།།

ཐི་ཨ་ཏེ་ར་གི་ཆོས་ཚོགས་ལུ་ཡི་གུ་བྲིས་བའི་སྐོར།

¹⁸ ཐི་ཨ་ཏེ་ར་ནང་ཡོད་མི་ཆོས་ཚོགས་ཀྱི་ཕོ་ཉ་ལུ་ ཨ་ནི་ཡི་གུ་འདི་བྲིས་ མེ་ཅེམ་ཅེ་སྦེ་འབར་མི་བཟུམ་གྱི་སྤྱན་དང་ མེ་ནང་བཞུ་སྟེ་ བཀྱག་འཐོན་མི་ལི་བཟུམ་གྱི་ཞབས་ཡོད་མི་ དཀོན་མཆོག་གི་སྲས་ཀྱིས་གསུངས་དེས།

¹⁹ ཁྱོད་ཀྱིས་འབད་མིའི་བྱམས་པ་དང་ བསྐྱེད་མི་དད་པ་ ཕྱག་ཞུ་མི་ལཱ་ དེ་ལས་བཟོད་པ་བསྒོམས་ཏེ་འབད་མི་ ག་ར་ང་གིས་ཤེས་ ཁྱོད་ཀྱིས་འབད་མིའི་ལཱ་དེ་ཚུ་ ཧེ་མ་ལས་ཡང་ ད་ལྟོ་དྲགཔ་སྦེ་འབདཝ་ང་གིས་ཤེས།

²⁰ ཨིན་རུང་ ཁྱོད་ལུ་སྐྱོན་གཅིག་བཏོན་ཏེ་སླབ་ནི་ཡོད་ འདི་ཨམ་སྲུ་ ཇེ་ཛེ་བཱེལ་ཟེར་མི་འདི་གིས་ མོ་རང་ལུང་སྟོན་པ་ཨིན་ཟེར་ ངེ་གི་ཕྱག་ཞུ་མི་ཚུ་ལུ་མགུ་བསྐོར་བརྐྱབས་ཏེ་ ལུས་འབྲེལ་འབད་བཅུག་མིའི་སྡིག་པ་དང་ མཆོད་པ་ཕུལ་མིའི་བཞེས་སྒོ་ཚུ་ཟ་ནི་སྟོན་རུང་ ཁྱོད་ཀྱིས་མོ་ལུ་མ་བཀག་པས།

²¹ ཨིན་རུང་ང་གིས་ མོ་གིས་འབད་མིའི་འདོད་ཆགས་ཀྱི་ལཱ་ངན་པ་ལུ་ སེམས་འགྱུར་ཏེ་བཤགས་པ་ཞུ་ནི་གི་གོ་སྐབས་བྱིན་རུང་ མོ་གིས་ཉན་མ་བཏུབ།

²² དེ་འབདཝ་ལས་ ང་གིས་མོ་ལུ་མལ་ཆ་ནང་ནདཔ་སྦེ་ སྡུག་བསྔལ་མྱོང་བཅུག་ནི་ཨིན་ དེ་ལས་ མོ་དང་གཅིག་ཁར་ལུས་འབྲེལ་འབད་མི་ཚུ་གིས་ཡང་ སེམས་འགྱུར་ཏེ་བཤགས་པ་མ་ཕུལ་བ་ཅིན་ མོ་བཟུམ་སྦེ་རང་ སྡུག་བསྔལ་གནམ་མེད་ས་མེད་མྱོང་བཅུག་ནི་ཨིན།

²³ ད་རུང་ མོ་གི་ཨ་ལོ་དེ་ཚུ་ག་ར་གསད་ནི་ཨིན་ དེ་ལས་ཆོས་ཚོགས་ག་ར་གིས་ ང་མི་གི་སེམས་ཀྱི་གཏིང་ནང་ཡོད་མིའི་ལོ་རྒྱུས་ཚུ་ བརྟག་ཞིབ་འབད་དེ་ཤེས་ཚུགས་མི་འདི་ ང་ཨིན་མས་ཟེར་ཤེས་འོང་ དེ་ལས་ང་གིས་ཁྱེད་རེ་རེ་བཞིན་གྱི་ལཱ་དང་བསྟུན་ཏེ་ ལེགས་ཤོམ་འབད་མི་ལུ་གསོལ་རས་དང་ ཟོགཔ་འབད་མི་ལུ་ཆདཔ་བཀལ་ནི་ཨིན།

²⁴ དེ་འབདཝ་ད་ ཁྱེད་ ཐི་ཨ་ཏེ་ར་གི་ཁྲོམ་ནང་ལྷག་ལུས་ཡོད་མི་ཚུ་ལུ་ མོ་གི་བསླབ་བྱ་རྫུས་མ་ལུ་མ་ཉན་མི་དང་ བདུད་ སེ་ཏཱན་གྱི་གསང་བའི་གདམས་ངག་ གཏིང་ཡོད་མི་ཟེར་སླབ་མི་ལུ་མ་ཉན་མི་ཚུ་ ང་གིས་འབག་མ་ཐེག་པའི་ཁུར་ཆ་ཁྱེད་གུ་མི་བཀལ།

²⁵ དེ་འབདཝ་ད་ ཁྱེད་ཀྱི་ནང་ག་ཡོད་མི་འདི་རྐྱངམ་གཅིག་ ང་མ་ལྷོད་བར་དུ་ སྒྲིང་སྒྲིང་སྦེ་བཤེད་དེ་བཞག

²⁶ དེ་ལས་རྒྱལ་ཁ་ཐོབ་མི་ག་ར་ཨིན་རུང་ འདི་གིས་ དུས་མཐའན་མཇུག་ཚུན་ཚོད་ ང་གིས་འབད་མི་ལཱ་དེ་ཚུ་ ཁོ་གི་སེམས་ཁར་བཟུང་སྟེ་འབད་མི་འདི་ལུ། ང་གིས་མི་རིགས་ག་ར་གི་གུ་ལུ་སྐྱོང་ནི་ཡོད་པའི་དབང་ཚད་བྱིན་ནི་ཨིན།

²⁷ དེ་མ་ཚད་ ང་གིས་ངེ་གི་ཡབ་ལས་དབང་ཚད་ཐོབ་དོཝ་བཟུམ་སྦེ་ མི་དེ་གིས་ཡང་མི་རིགས་ལུ་སྐྱོངམ་ད་ དབང་ཚད་ཅན་གྱི་ ལྕགས་ཀྱི་འཁརཝ་དེ་གིས་ སའི་རྫམ་དེ་ཚུ་ཕྱེ་བཀྲུམ་དོཝ་བཟུམ་སྦེ་ ཁོ་གིས་ཡང་རྒྱལ་སྲིད་དེ་སྦེ་སྐྱོང་འོང་།

²⁸ ད་རུང་ང་གིས་ཁོ་ལུ་ཐོ་རངས་སྐར་ཆེན་ཡང་བྱིན་ནི་ཨིན།

²⁹ རྣམ་ཅོག་ཡོད་མི་ཚུ་ག་ར་ཨིན་རུང་ ཐུགས་ཉིད་ཀྱིས་ཆོས་ཚོགས་ལུ་གསུངས་མི་འདི་ཉན་དགོ་ཟེར་གསུང་ཡི།།