མཐོང་སྣང་ལེའུ་ 19 - རྫོང་ཁ་

ཞིང་ཁམས་ལུ་རྒྱལ་ཁ་ཐོབ་སྟེ་མགུར་མ་ཕུལ་བའི་སྐོར།

¹ དེ་གི་ཤུལ་ལས་ཞིང་ཁམས་ལུ་ གནམ་མེད་ས་མེད་མིའི་དམངས་ཚོགས་ཀྱི་སྐད་བཟུམ་གྱི་འུར་སྒྲ་གིས། ཧལ་ལེ་ལུ་ཡཱ་ ཐར་པ་དང་གཟི་བརྗིད་ དབང་ཤུགས་འདི་ ང་བཅས་ཀྱི་གཙོ་བོ་དཀོན་མཆོག་གི་ཨིན།

² ག་ཅི་སྨོ་ཟེར་བ་ཅིན་ ཁོ་གིས་ཕྱེ་མིའི་ཁྲིམས་འདི་ ཕྲངམ་དང་བདེན་པ་ཨིན་ འཛམ་བུ་གླིང་ནང་གི་མི་དང་གཅིག་ཁར་ ལུས་འབྲེལ་གྱི་ལཱ་ངན་འབད་དེ་ སྡིག་པ་ནང་ཐིམ་བཅུག་མི་ ཨམ་སྲུ་གཞང་བཙོངམ་སྦོམ་འདི་ལུ་ དཀོན་མཆོག་གིས་ཁྲིམས་བཏང་གནང་ཡི་ ཁོ་རའི་ཞབས་ཕྱིཔ་ཚུ་བསད་མི་དེ་ཚུ་གི་སྲོག་ལེན་བཞེས་ཏེ་ ཁྲིམས་ཕྱེ་སྦེ་ཉེས་ཆད་བཀལ་གནང་ཡི།

³ ད་རུང་ཡང་ཐེངས་གཉིས་པ་ལུ་གསུང་སྐད་སྦོམ་གཅིག་གིས། ཧལ་ལེ་ལུ་ཡཱ་ མོ་འཚིག་པའི་དུ་པ་འདི་དུས་རྒྱུན་དུ་རང་ཐོན་སྡོད་འོང་ཟེར་ གསུངསམ་མས།

⁴ རྒས་ཤོས་ཉི་ཤུ་རྩ་བཞི་དང་སེམས་ཅན་བཞི་གིས་ རྒྱལ་ཁྲི་གུ་བཞུགས་མིའི་དཀོན་མཆོག་ལུ་ཕྱག་འཚལ་ཏེ་ ཨ་མཱེན་ ཧལ་ལེ་ལུ་ཡཱ་ཟེར་བསྟོད་པ་ཕུལཝ་མས།

⁵ དེ་ལས་རྒྱལ་ཁྲི་ལས་གསུང་སྐད་གཅིག་གིས། ང་བཅས་ཀྱི་དཀོན་མཆོག་ལུ་ ཁོ་རང་གི་ཕྱག་ཞུ་མི་ ཁོ་ལུ་འདྲོག་མི་ཆེ་ཆུང་མེད་པར་ ག་ར་གིས་བསྟོད་པ་ཕུལ་བཅུག་ཟེར་ཞུཝ་མས།།

ལུག་གི་ཕྱུག་ཀུ་གི་གཉེན་གྱི་ཚོགས་སྟོན་གྱི་སྐོར།

⁶ དེ་ལས་ང་གིས་ཆུ་སྦོམ་འོང་མི་ འབྲུག་ལྡིར་མིའི་འུར་སྒྲ་བཟུམ་ མི་ཚོགས་དམངས་བཟུམ་གྱི་སྐད་སྦོམ་བརྐྱབས་ཏེ། ཧལ་ལེ་ལུ་ཡཱ་ ང་བཅས་ཀྱི་གཙོ་བོ་དཀོན་མཆོག་ ཀུན་དབང་ཨིན་མི་དེ་གིས་རྒྱལ་སྲིད་སྐྱོང་སྟེ།

⁷ ད་ང་བཅས་སེམས་དགའ་སྟེ་ངལ་རངས་དགོ་ ཁོ་ལུ་གུས་ཞབས་ཞུ་སྦེ་བསྟོད་པ་ཕུལ་ ག་ཅི་སྨོ་ཟེར་བ་ཅིན་ ལུག་གི་ཕྱུག་ཀུ་གི་ གཉེན་གྱི་ཚོགས་སྟོན་རན་ཆེ་ཡི་ མནའམ་འདི་མོ་རང་གིས་གྲ་སྒྲིག་བརྐྱབས་ཅི།

⁸ བགོ་ལ་འཇམ་ཅུག་ཅུ་འོད་ག་ཅི་དེས་ཅིག་ཡོད་མིའི་ གཙང་སྦྲ་དང་ལྡན་པའི་བགོ་ལ་གྱོན་ནི་མོ་ལུ་གནང་ཡི། བགོ་ལ་འཇམ་ཅུག་ཅུ་འདི་ དཀོན་མཆོག་གི་དམ་པའི་མི་གི་ ཆོས་སེམས་ཆེ་ཏོག་ཏོ་གི་ལཱ་གི་དཔེ་ཨིན་མས།

⁹ དེ་ལས་ཕོ་ཉ་གིས་ང་ལུ་ ལུག་གི་ཕྱུག་ཀུ་གི་གཉེན་གྱི་ཚོགས་སྟོན་ནང་ མགྱོནམ་སྦེ་འབོ་མི་འདི་ བྱིན་རླབས་ཅན་ཨིན་ཟེར་བྲིས་དགོ་ཟེར་གསུངས་ཡི་ དེ་ལས་ད་རུང་ཕོ་ཉ་གིས་ ཨ་ནི་འདི་དཀོན་མཆོག་གི་གསུང་བདེན་པ་ཨིན་ཟེར་གསུངས་ཡི།

¹⁰ དེ་ལས་ང་གིས་ཁོ་གི་སྐུ་མདུན་འགྱོ་སྟེ་ཕྱག་འཚལ་ནི་འབདཝ་ད་ ཁོ་གིས་ང་ལུ་ཕྱག་མ་འཚལ་ ཁྱོད་དང་ ཁྱོད་ཀྱི་སྤུན་ཆ་ ཡེ་ཤུ་གི་འཛོམ་དཔང་འབད་མི་ཚུ་བཟུམ་ ང་ཡང་ཞབས་ཕྱི་ཞུ་མི་གཅིག་ཨིན་ ཁྱོད་ཀྱིས་དཀོན་མཆོག་རྐྱངམ་གཅིག་ལུ་ཕྱག་འཚལ་ཏེ་བསྟོད་པ་ཕུལ་དགོ་ ག་ཅི་སྨོ་ཟེར་བ་ཅིན་ ཡེ་ཤུ་གི་སྐོར་ལས་འཛོམ་དཔང་འབད་མི་ཚུ་ ལུང་སྟོན་པ་བཟུམ་སྦེ་ཨིན་ཟེར་གསུངས་ཡི།།

ཡེ་ཤུ་ཁིརཱིས་ཀྱིས་རྒྱལ་ཁ་ཐོབ་པའི་སྐོར།

¹¹ དེ་ལས་ཞིང་ཁམས་འདི་སྒོ་ཕྱེ་ཡོདཔ་ང་གིས་མཇལ་ཏེ་ ངེ་གི་གདོང་ཁར་ལུ་ཆིབས་རྟ་དཀརཔོ་གཅིག་འདུག་ དེའི་གུ་ཆིབས་མི་འདི་གི་མཚན་འདི་ དམ་ཚིག་ཅན་བདེན་པ་ཟེར་ཞུཝ་མས་ ཁོ་གིས་ཁྲིམས་ཕྲང་སྟེ་ཕྱེཝ་ཨིན་ དམག་ཡང་དྲང་བདེན་གྱི་རྒྱུད་ལས་གནངམ་ཨིན།

¹² ཁོ་གི་སྤྱན་འདི་མེ་ཅེམ་ཅེ་དང་ དབུ་ལུ་གཙུག་རྒྱན་ལེ་ཤ་བཞེས་ཏེ་འདུག་ ཁོ་གི་གུ་ལུ་མཚན་གཅིག་བྲིས་ཏེ་འདུག་ མཚན་དེ་ཁོ་རང་གིས་མ་གཏོགས་ གཞན་ག་གིས་ཡང་མི་ཤེས་པས།

¹³ ཁོ་གི་ན་བཟའ་འདི་ཁྲག་ནང་སྦངས་ཏེ་བཞེས་ནུག་ ཁོ་གི་གོ་སའི་མཚན་འདི་ དཀོན་མཆོག་གི་གསུང་ཟེར་ཞུཝ་ཨིན་མས།

¹⁴ དེ་ལས་ཁོ་དང་གཅིག་ཁར་ཞིང་ཁམས་ཀྱི་དམག་མི་ཚུ་ བགོ་ལ་འཇམ་ཅུག་ཅུ་དང་གཙང་ཏོག་ཏོ་དཀརཔོ་གྱོན་ ཁོ་གི་ཤུལ་ལས་རྟ་དཀར་པོ་གུ་བཞོན་ཏེ་འདུག

¹⁵ མི་རིགས་ཚུ་ལུ་རྐྱབ་ནི་གི་དོན་ལུ་ ཁོ་རང་གི་ཞལ་ལས་ གྱི་རིངམ་རྣོས་ཡོད་མི་གཅིག་ཐོན་ཏེ་འདུག་ མི་ཚུ་ལུ་ལྕགས་ཀྱི་འཁརཝ་གིས་སྐྱོང་ནི་ཨིན་མས་ ཁོ་གིས་ཀུན་དབང་བའི་དཀོན་མཆོག་གི་ ཐུགས་ཁྲོ་བོའི་རྒུན་འབྲུམ་འདི་ ཆང་བཟོ་ཁང་ནང་བཙིར་ཏེ་གནངམ་མས།

¹⁶ ཁོ་གི་སྐུ་སྨད་གུ་གྱོན་མི་ན་བཟའ་ལུ་ རྒྱལ་པོའི་རྒྱལཔོ་ གཙོ་བོའི་གཙོ་བོ་ཟེར་བའི་མཚན་བྲིས་ཏེ་འདུག

¹⁷ ད་རུང་ ཕོ་ཉ་གཅིག་ཉིམ་ནང་ལོང་སྡོདཔ་ང་གིས་མཐོང་ཅི་ དེ་གིས་སྐད་སྦོམ་སྦེ་ ནམ་མཁའ་ལས་འཕུར་མིའི་བྱ་རྒོད་ཀྱི་རིགས་དེ་ཚུ་ ག་ར་ནཱ་དཀོན་མཆོག་གི་ཚོགས་སྟོན་ནང་ཤོག

¹⁸ དེ་ལས་རྒྱལཔོ་དང་ དམག་དཔོན་ སྟོབས་ཅན་ རྟ་དང་རྟའི་གུ་ཆིབས་མི་ རྒྱོབོ་རྒྱམོ་ཨིན་མི་དང་མེན་མི་ གཞན་ཆེ་ཆུང་མེད་པར་ ག་ར་གི་ཤ་ཟ་བའི་དོན་ལུ་ཨིན་ཟེར་གསུངས་ཡི།

¹⁹ དེ་ལས་གཅན་གཟན་དང་འཛམ་བུ་གླིང་ནང་གི་རྒྱལཔོ་དེ་ཚུ་ ཁོང་རང་གི་དམག་མི་དང་གཅིག་ཁར་ རྟ་དཀརཔོ་གུ་ཆིབས་མི་དང་ དེ་གི་དམག་མི་ཚུ་ལུ་རྒོལ་ཏེ་དམག་རྐྱབ་ནི་སྦེ་འོངམ་ང་གིས་མཐོང་ཅི།

²⁰ དེ་འབདཝ་ད་ གཅན་གཟན་དང་ལུང་སྟོན་པ་རྫུན་མ་གཉིས་ལུ་བཟུང་སྟེ་ མུ་ཟི་མེའི་མཚོ་ནང་གསོན་པོ་སྦེ་བཀོག་ཡི་ ལུང་སྟོན་པ་རྫུན་མ་དེ་གིས་ གཅན་གཟན་གྱི་རྟགས་བཀལ་མི་ གཅན་གཟན་གྱི་སྐུ་འདྲ་ལུ་ཕྱག་འཚལ་མི་དེ་ཚུ་ལུ་ རྟགས་མཚན་དང་རྫུ་འཕྲུལ་སྟོན་ཏེ་ མགུ་བསྐོར་རྐྱབ་མི་གཅིག་ཨིན་མས།

²¹ དེ་ལས་རྟ་དཀརཔོ་གི་གུ་ཆིབས་མི་ ཁོ་གི་ཞལ་ལས་གྱི་རིངམ་ཐོན་མི་དེ་གིས་ ལྷག་མ་ལུས་མི་ཚུ་བསད་དེ་ ཁོང་གི་ཤ་འདི་ བྱ་རྒོད་ཀྱི་རིགས་མ་འདྲཝ་ཚུ་གིས་འགྲངམ་སྦེ་ཟ་ཡི།།