མཐོང་སྣང་ལེའུ་ 18 - རྫོང་ཁ་

ཁྲོམ་ བ་བི་ལཱོན་མེདཔ་གཏང་མིའི་སྐོར།

¹ དེ་གི་ཤུལ་ལས་ཞིང་ཁམས་ལས་མར་ ཕོ་ཉ་དབང་ཅན་གཅིག་འོང་ས་ང་གིས་མཐོང་ཅི་ ཁོ་རང་གི་གཟི་བརྗིད་ཀྱིས་ འཛམ་བུ་གླིང་ག་ར་ནང་འོད་ཁྱབ་ཅི།

² ཁོ་གིས་སྐད་ཤུགས་སྦེ། མར་རམ་སོང་ཡི་ ཁྲོམ་སྦོམ་ བ་བི་ལཱོན་དེ་མར་རམ་སོང་ཡི་ ད་མོ་གི་ཁྱིམ་འདི་ འདྲེ་གདོན་དང་བདུད་མ་གཙངམ་དེ་ཚུ་འཛུལཝ་ཨིནམ་མ་ཚད་ བྱ་བཙོག་པ་དང་ གཅན་གཟན་ཁམས་ལོག་སི་སི་ སྐྱུག་སི་སི་དེ་ཚུ་གི་ཚང་ལུ་འགྱུར་སོང་ཡི།

³ དེ་ལས་མོ་གི་འདོད་ཆགས་ཀྱི་ཆང་གིས་ མི་རིགས་ག་ར་བཟིཝ་མ་ཚད་ འཛམ་བུ་གླིང་ནང་གི་རྒྱལཔོ་ག་ར་གིས་ མོ་དང་གཅིག་ཁར་ལུས་འབྲེལ་འབད་ཡི་ དེ་ལས་ཚོང་པ་ཉོ་བཙོང་འཐབ་མི་ཚུ་ཡང་ མོ་གིས་འདོད་ཡོན་ལོངས་སྤྱོད་པའི་སྒོ་ལས་སྦེ་ཕྱུགཔ་སོང་ཡི་ཟེར་ གསུངས་ཡི།

⁴ ད་རུང་རང་ཞིང་ཁམས་ལས་གསུང་སྐད་གཞན་གཅིག་གིས། དབའེ་ ངེ་གི་མི་རིགས་ཚུ་ དེ་ནང་ལས་ཕྱི་ཁར་ཐོན་ཤོག་ ཁྱེད་ཐོན་མ་འོང་པ་ཅིན་ མོ་གི་སྡིག་པ་དང་འབྲེལ་བ་འཐབ་སྟེ་ མོ་རའི་ནད་ཡམས་ཡང་ཐོབ་ནི་ཨིན།

⁵ ག་ཅི་སྨོ་ཟེར་བ་ཅིན་ མོ་གི་སྡིག་པའི་ཀཝ་འདི་ ཡར་ཞིང་ཁམས་ལུ་ལྷོདཔ་མ་ཚད་ མོ་གི་ལཱ་ངན་འདི་ དཀོན་མཆོག་གིས་ཐུགས་ཁར་དྲན་ཡི།

⁶ མོ་གིས་མི་གཞན་ལུ་འབད་མི་འདི་ལོག་སྟེ་ མོ་རང་ལུ་འབད་དགོ་ མོ་གིས་འབད་མིའི་བྱ་བ་གི་ཉེས་ཆད་འདི་ ལོག་ལྟབ་སྦེ་མོ་རང་ལུ་འབད་དགོ་ མོ་རང་གི་ཕོརཔ་ནང་ལས་བཀང་སྟེ་བྱིན་མི་འདི་ ལོག་སྟེ་མོ་རང་ལུ་ལོག་ལྟབ་སྦེ་བཀང་སྟེ་བྱིན།

⁷ མོ་རང་ལུ་རང་བསྟོད་རྐྱབ་ དགའ་ཏོག་ཏོ་དང་ སྐྱིད་ཏོང་ཏོ་སྦེ་ཟ་འཐུང་ དེའི་འབྲས་བུ་ལུ་ བཟོད་མ་ཚུགས་པའི་དཀའ་ངལ་དང་སྡུག་བསྔལ་མྱོང་བཅུག་ མོ་གི་སེམས་ཁར་ ང་རྒྱལ་ཕྲག་དོག་ལངསམ་མ་ཚད་ ང་ཡུགས་ས་མོ་མེན་ རྒྱལམོ་བཟུམ་སྦེ་སྡོདཔ་ཨིན་ ང་ལུ་དཀའ་ངལ་དང་མྱ་ངན་ ནམ་ཡང་མྱོང་མི་དགོ་ཟེར་མནོ་བསམ་བཏངམ་ཨིན་མས།

⁸ ད་མོ་ལུ་ནད་ཡམས་དང་ མུ་གེ་ མྱ་ངན་ ཤི་ནི་དེ་ཚུ་ ཉིནམ་གཅིག་ལུ་ བྱུང་ནི་ཨིནམ་མ་ཚད་ མོ་མེ་གིས་འཚིག་སྟེ་ མེདཔ་གཏང་ནི་ཨིན་ ག་ཅི་སྨོ་ཟེར་བ་ཅིན་ མོ་ལུ་ཁྲིམས་ཕྱེ་སྟེ་ ཉེས་ཆད་བཀལ་མི་འདི་ དབང་ཤུགས་དང་ལྡན་པའི་ གཙོ་བོ་དཀོན་མཆོག་ཨིན་ཟེར་ གསུངས་ཡི།

⁹ དེ་ལས་འཛམ་བུ་གླིང་ནང་གི་རྒྱལཔོ་ མོ་དང་གཅིག་ཁར་ལུས་འབྲེལ་འབད་མི་ མོ་གི་རྒྱུ་ནོར་ལོངས་སྤྱོད་མི་ཚུ་གིས་ མོ་མེ་གིས་འཚིག་པའི་དུ་པ་མཐོངམ་ད་ ཁོང་གནམ་མེད་ས་མེད་མྱ་ངན་འབད་དེ་ངུ་འོང་།

¹⁰ ད་རུང་ཁོང་གིས་ མོ་གིས་མྱོང་མིའི་སྡུག་བསྔལ་དེ་ལུ་བལྟ་འདྲོགས་ཏེ་ ཐག་རིང་ས་ལུ་ལོང་ཞིནམ་ད་ སྐད་ཤུགས་སྦེ། ཨ་ཁའི་ ཁྲོམ་སྦོམ་ བ་བི་ལཱོན་ སྡི་ཆེ་ཡི་ ཨ་ཁའི་ ཁྲོམ་མིང་གཏམ་ཅན་ བ་བི་ལཱོན་ སྡི་ཆེ་ཡི་ ཁྱོད་ལུ་ཁྲིམས་ཕྱེ་མིའི་ཆུ་ཚོད་གཅིག་གི་ནང་འཁོད་འོངས་ཡི་ཟེར་ སླབ་འོང་།

¹¹ དེ་ལས་འཛམ་བུ་གླིང་ནང་གི་ཚོང་པ་ཚུ་ ཁོང་གི་ཚོང་ཆས་ ག་གིས་ཡང་ཉོ་མི་མེད་པར་ ཁོང་མོ་གི་དོན་ལུ་སྔུ་སྟེ་མྱ་ངན་འབད་འོང་།

¹² ཁོང་གི་ཚོང་དང་ཟོང་ཆས་ གསེར་ དངུལ་ རྡོ་ལས་བྱུང་མིའི་རིན་པོ་ཆེ་ མུ་ཏིག་ བགོ་ལ་འཇམ་ཅུག་ཅུ་ བགོ་ལ་རྒྱ་སྨུག་ འབུ་རས་ བགོ་ལ་དམརཔ་ དྲི་ཞིམ་གྱི་ཤིང་སྣ་ཚོགས་ བ་སོའི་ཅ་ལ་ རིན་གོང་མཐོ་བའི་ཤིང་ ལི་ ལྕགས་ རྡོ་ཀ་མ་རུའི་པའི་བཟོ་བཟོ་བའི་ཅ་ལ་སྣ་ཚོགས།

¹³ ཤིང་ཙེ་མུ་ སྨན་སྣ་ཚོགས་ སྤོས་ བསང་རྫས་ཀྱི་རིགས་ སྤོས་ཕྱེ་ དྲི་བཟང་ ཆང་ ཨ་རུ་ར་ཤིང་གི་དོག་མ་གི་མར་ཁུ་ དཀར་ཕྱེ་ སྒོ་ནོར་ ལུག་ རྟ་ ཤིང་རྟ་འཁོར་ལོ་ མིའི་གཟུགས་ རྒྱོབོ་རྒྱམོ་ ཨ་ནི་དེ་ཚུ་བཙོངམ་ཨིན་མས།

¹⁴ ཚོང་པ་ཚུ་གིས། ད་ཨ་ནི་ཁྱོད་ཀྱི་བརྩེ་བ་ཡོད་མི་ཤིང་འབྲས་དེ་ཚུ་ ཁྱོད་ལས་ཤོར་སོང་ཡི་ དེ་མ་ཚད་ འདོད་ཡོན་ལོངས་སྤྱོད་དང་རྒྱུ་ནོར་དེ་ཚུ་ཡང་ དུས་རྟག་བུ་རང་གི་དོན་ལུ་བྱང་སྟེ་ཡོད་ ད་ལོག་སྟེ་ནམ་ཡང་མི་ཐོབ་ཟེར་ སླབ་འོང་།

¹⁵ ད་མོ་ལས་བརྟེན་ཏེ་ ཨ་ནི་རྒྱུ་ནོར་ཚུ་གིས་ཕྱུགཔ་འགྱོ་མིའི་ཚོང་དཔོན་ཚུ་གིས་ ད་རུང་ཡང་ མོ་གི་བཟོད་མ་ཚུགས་པའི་སྡུག་བསྔལ་འདི་ལུ་བལྟ་འདྲོགས་ཏེ་ ཐག་རིང་ས་ལུ་ལོང་ཞིནམ་ད་ མྱ་ངན་འབད་ངུ་སྟེ།

¹⁶ ཨ་ཁའི་ བགོ་ལ་འཇམ་ཅུག་ཅུ་དང་ བགོ་ལ་རྒྱ་སྨུག་ གོས་ཆེན་དམརཔོ་གྱོན་མི་ གསེར་དང་རྡོ་རིན་པོ་ཆེ་ མུ་ཏིག་གི་རྒྱན་ཆ་བཏགས་མི་ ཁྲོམ་སྦོམ་ སྡི་ཆེ་ཡི་ སྡི་ཆེ་ཡི།

¹⁷ ད་ཆུ་ཚོད་གཅིག་གི་ནང་འཁོད་ དེ་ཚུན་ཚོད་ཀྱི་རྒྱུ་ནོར་མེདཔ་སོང་ཡི་ཟེར་ དེ་སྦེ་སླབ་འོང་ དེ་ལས་རྒྱ་མཚོ་ག་ར་ནང་གི་གྲུའི་སྦྱིན་བདག་དང་གྲུ་དཔོན་ གྲུ་ནང་ལཱ་འབད་མི་ གྲུའི་ཐོག་ལས་ལམ་འགྲུལ་འབད་མི་ རྒྱ་མཚོ་ལས་བརྟེན་ཏེ་ ལཱ་འབད་དེ་ཟ་མི་ག་ར་གིས་ཐག་རིང་སར་སྡོད་སྦེ།

¹⁸ མོ་མེ་གིས་འཚིག་པའི་དུ་པ་བལྟ་སྟེ་ ཁོང་གིས་སྐད་སྦོམ་སྦེ་བརྐྱབས་ཏེ་ འཛམ་གླིང་ནང་གི་ཁྲོམ་སྦོམ་ག་ར་གི་གྲལ་ལས་ཨ་ནི་བཟུམ་ག་ཏེ་ཡོདཔ་སྨོ་ཟེར་སླབ་སྦེ།

¹⁹ ཁོང་རང་གི་མགུ་ལུ་ཐལཝ་བླུག་སྟེ་ སྔུ་སྐད་རྐྱབ་ མྱ་ངན་འབད་དེ། རྒྱ་མཚོ་ནང་གྲུའི་སྦྱིན་བདག་ག་ར་མོ་ལས་བརྟེན་ཏེ་ཕྱུགཔ་འགྱོཝ་ཨིན་ ད་དུས་ཡུན་ཆུ་ཚོད་གཅིག་གི་ནང་འཁོད་ག་ར་བརླག་སྟེ་ མེདཔ་འགྱོཝ་མས་ ཁྲོམ་སྦོམ་ སྡི་ཆེ་ཡི་ སྡི་ཆེ་ཡི་ཟེར་ སླབ་མས།

²⁰ དེ་ལས་ཁྱེད་ ཞིང་ཁམས་ལུ་བཞུགས་མི་ དཀོན་མཆོག་གི་དམ་པའི་མི་ཚུ་དང་ ལུང་སྟོན་པ་ཚུ་ སྐུ་ཚབ་ཚུ་ དགའ་སྤྲོ་འགྱུར་ ག་ཅི་སྨོ་ཟེར་བ་ཅིན་ མོ་གིས་ཁྱེད་ལུ་ཟོགཔ་འབད་མི་ལུ་ དཀོན་མཆོག་གིས་ཁྲིམས་ཕྱེ་གནང་ཡི།

²¹ དེ་ལས་ཕོ་ཉ་དབང་ཤུགས་ཅན་གཅིག་གིས་ རང་འཐག་བཟུམ་གྱི་རྡོ་སྦོམ་གཅིག་འཐུ་སྦེ་ རྒྱ་མཚོ་ནང་བཀོག་སྟེ་ ཁོ་གིས། ཁྲོམ་སྦོམ་ བ་བི་ལཱོན་ལུ་ཡང་ ཨ་ནི་བཟུམ་སྦེ་མེདཔ་བཏང་སྟེ་ མར་བཀོག་སྦེ་ ལོག་སྟེ་ནམ་ཡང་མི་མཐོང་།

²² དེ་ལས་སྙན་ཆ་སྐྲོག་མི་དང་ པྱི་ཝང་སྐྲོག་མི་ གླིངམ་འཕུ་མི་ དུང་འཕུ་མི་དེ་ཚུ་གི་འདངས་དབྱངས་ ཁྱེད་ཀྱི་ནང་ལོག་སྟེ་ནམ་ཡང་མི་གོ་ ད་རུང་བཟོ་རིགས་མ་འདྲཝ་སྦེ་བཟོ་མི་ཚུ་ཡང་ ཁྱེད་ཀྱི་ནང་ལོག་སྟེ་ནམ་ཡང་མི་ཐོབ་ རང་འཐག་གི་སྐད་ཡང་ ལོག་སྟེ་ནམ་ཡང་མི་གོ།

²³ ས་ཏི་གི་འོད་ཡང་ ཁྱེད་ཀྱི་ནང་ནམ་ཡང་མི་ཤར་ རྨགཔ་དང་མནའ་མ་གི་སེམས་དགའ་བའི་སྐད་ཡང་ ཁྱེད་ཀྱིས་ནམ་ཡང་མི་གོ་ ག་ཅི་སྨོ་ཟེར་བ་ཅིན་ འཛམ་གླིང་ནང་ག་ལས་ཡང་སྦོམ་མིའི་ཚོང་དཔོན་ཚུ་ ཁྱེད་ཀྱི་ཨིནམ་ད་ ཁྱེད་ཀྱིས་མིག་འཕྲུལ་སྦོམ་སྟོན་ཏེ་ མི་རིགས་ཚུ་ལུ་མགུ་བསྐོར་བརྐྱབས་ཅི།

²⁴ ཁྲོམ་འདི་ནང་ལུ་ དཀོན་མཆོག་གི་ལུང་སྟོན་པ་དང་ཁོ་རའི་དམ་པའི་མི་ཚུ་ དེ་ལས་འཛམ་བུ་གླིང་ནང་བསད་མི་ག་ར་གི་ཁྲག་འདུག་ཟེར་གསུངས་ཡི།།