མཐོང་སྣང་ལེའུ་ 17 - རྫོང་ཁ་

ཨམ་སྲུ་གཞང་བཙོངམ་དང་གཅན་གཟན་གྱི་སྐོར།

¹ དེ་ལས་ཕོརཔ་བདུན་ཡོད་མིའི་ ཕོ་ཉ་བདུན་གྱི་གྲལ་ཁ་ལས་ གཅིག་ང་སྡོད་སར་འོངས་ཏེ་ཁོ་གིས་ ང་དང་མཉམ་གཅིག་ཤོག་ ཆུ་ལེ་ཤ་གི་གུ་ལུ་སྡོད་མིའི་གཞང་བཙོངམ་མིང་གཏམ་ཅན་འདི་ མོ་ལུ་ཉེས་ཁྲིམས་ག་དེ་སྦེ་གཏང་གནང་ནི་ཨིན་ན་ ཁྱོད་ལུ་སྟོན་བྱིན་ནི།

² འཛམ་བུ་གླིང་སྐྱོང་མིའི་རྒྱལཔོ་ཚུ་མོ་དང་གཅིག་ཁར་ ལུས་འབྲེལ་གྱི་སྡིག་པ་འབདཝ་མ་ཚད་ འཛམ་བུ་གླིང་ནང་གི་མི་དེ་ཚུ་ཡང་ མོ་གི་འདོད་ཆགས་ཀྱི་ཆང་གིས་ བཟི་བཅུགཔ་ཨིན་མས་ཟེར་གསུངས་ཡི།

³ དེ་ལས་ང་ཐུགས་ཉིད་ནང་སྡོདཔ་ད་ ཕོ་ཉ་དེ་གིས་ང་ལུ་རི་སྟོང་ནང་ལུ་འཁྱིད་ཅི། དེ་ཁར་ལུ་སེམས་ཅན་དམརཔོ་ མགུ་བདུན་དང་རྭཝ་བཅུ་ཐམ་འབད་མི་ གཟུགས་ཁ་ལུ་ སྐུར་པ་བཏབ་ནི་གི་ཚིག་བྲིས་ཏེ་ཡོད་མི་དེ་གི་གུ་ ཨམ་སྲུ་གཅིག་བཞོན་ཏེ་ཡོདཔ་ང་གིས་མཐོང་ཅི།

⁴ དེ་ལས་ཨམ་སྲུ་དེ་ བགོ་ལ་གི་བཀྱག་དམརཔོ་དང་རྒྱ་སྨུག་འབད་མི་ གནམ་མེད་ས་མེད་ལེགས་ཤོམ་སྦེ་གྱོན་མི་ རྒྱན་ཆ་གསེར་ རིན་ཆེན་རྡོ་ མུ་ཏིག་ལ་སོགས་པ་བཏགས་མི་གཅིག་ཨིན་མས་ མོ་གིས་ལག་པ་གསེར་གྱི་ཕོརཔ་བཤེད་ དེ་ནང་ལུ་འདོད་ཆགས་ཀྱི་ལཱ་མ་གཙངམ་ ཁམས་པོ་རྐྱབ་སི་སི་ཁ་ལས་སྐྱུག་ནི་བཟུམ་སྦེ་བཀང་སྟེ་འདུག

⁵ མོ་གི་དཔྱལ་བ་ལུ་ བ་བི་ལཱོན་གྱི་ཁྲོམ་མིང་གཏམ་ཅན་ གཞང་བཙོངམ་ཚུ་དང་འཛམ་བུ་གླིང་ནང་ཡོད་མི་ཁམས་པོ་རྐྱབ་སི་སི་གི་ཨའི་ཟེར་ཧ་མ་གོ་བའི་མིང་བྲིས་ཏེ་འདུག

⁶ མོ་གིས་ དཀོན་མཆོག་ཁོ་རའི་དམ་པའི་མི་ ཡེ་ཤུ་གི་དོན་ལུ་ཤི་མི་ཚུ་གི་ཁྲག་འཐུང་སྟེ་ འགྲངས་འགྲངསམ་ཨིན་མས་ ང་གིས་མོ་མཐོངམ་ད་ ང་གནམ་མེད་ས་མེད་ཧ་ལས་ཅི།

⁷ དེ་ལས་ ཕོ་ཉ་འདི་གིས་ང་ལུ་ཁྱོད་ག་ཅི་འབད་ཧ་ལསཔ་སྨོ་ སེམས་ཅན་མགུ་བདུན་དང་རྭཝ་བཅུ་ཐམ་ཡོད་མི་དང་ དེའི་གུ་བཞོན་མི་ཨམ་སྲུ་འདི་གི་སྐོར་ལས་ ཧ་མ་གོ་བའི་གསང་བ་འདི་ ཁྱོད་ལུ་འགྲེལ་བཤད་བརྐྱབ་ནི།

⁸ ཁྱོད་ཀྱིས་མཐོང་མིའི་སེམས་ཅན་འདི་ ཧེ་མ་ཡོད་རུང་ད་ལྟོ་མི་མཐོང་ དེ་འབདཝ་ད་ དེ་མགྱོགས་པར་གཏིང་དང་མཐའ་མེད་པའི་ དོང་ནང་ལས་ཐོན་འོངས་ཏེ་ དེ་ལུ་རྩ་མེད་གཏང་འོང་ དེ་ལས་གཅན་གཟན་ཧེ་མ་ཡོད་མི་ ད་ལྟོ་མ་མཐོང་མི་དེ་ ཁོ་ཤུལ་ལས་ལོག་འོང་ས་མཐོངམ་ད་ འཛམ་བུ་གླིང་ནང་གི་མི་དེ་ཚུ་ ཧེ་མ་འཛམ་གླིང་མཛད་པའི་བསྒང་ལས་ ཡོད་མི་ཚེའི་དེབ་ནང་མིང་མ་འབྲི་མི་ཚུ་གིས་ཧ་ལས་འོང་།

⁹ ཨ་ནི་ཧ་གོ་ནི་གི་དོན་ལུ་ ཤེས་རབ་ཅན་གཅིག་དགོ་པས་ ད་སེམས་ཅན་གྱི་མགུ་བདུན་འདི་ ཨ་ནི་ཨམ་སྲུ་འདི་མོ་རང་སྡོད་མིའི་ རི་བདུན་འདི་ཚུ་ཨིན།

¹⁰ འདི་རྒྱལཔོ་བདུན་ཡང་ཨིན་ ལྔ་འདི་ཤི་སོང་ནུག་ གཅིག་ད་ལྟོ་ཡང་ཡོད་ གཞན་འདི་ད་ལྟོ་མ་འོང་པས་ ཁོ་འོང་རུང་ ཡུདཔ་ཐེངས་གཅིག་ལས་བརྒལ་མི་སྡོད།

¹¹ གཅན་གཟན་ཧེ་མ་ཡོད་མི་ ད་ལྟོ་མ་མཐོང་མི་འདི་ རྒྱལཔོ་བརྒྱད་པ་ཨིན་ དེ་བདུན་གྱི་ཁོངས་སུ་གཏོགསཔ་ཨིནམ་མ་ཚད་ དེ་ལུ་ཡང་རྩ་མེད་གཏང་ནི་ཨིན།

¹² དེ་ལས་ཁྱོད་ཀྱིས་རྭཝ་བཅུ་ཐམ་མཐོང་མི་འདི་ རྒྱལཔོ་བཅུ་ཐམ་གྱིས་དབང་ཚད་མ་ཐོབ་མིའི་རྒྱལཔོ་ཚུ་ཨིན་ དེ་འབདཝ་ད་ གཅན་གཟན་དེ་གིས་ ཁོང་དང་གཅིག་ཁར་ དུས་ཡུན་ཆུ་ཚོད་གཅིག་རྒྱལ་པོའི་དབང་ཚད་ཐོབ་ནི་ཨིན།

¹³ དེ་ལས་ཁོང་ཆ་ཁྱབ་ཀྱི་བསམ་པ་འདི་གཅིག་རང་ཨིན་ ཁོང་རང་གི་དབང་ཤུགས་དང་དབང་ཚད་འདི་ གཅན་གཟན་འདི་ལུ་བྱིན་ནི་སྦེ་ཁ་བཟེད་ནུག

¹⁴ ཁོང་གིས་ལུག་གི་ཕྱུག་ཀུ་ལུ་ ངོ་རྒོལ་འབད་དེ་དམག་རྐྱབ་རུང་ ལུག་གི་ཕྱུག་ཀུ་གིས་ཁོང་ལས་རྒྱལ་ཁ་ཐོབ་ནི་ཨིན་ ག་ཅི་སྨོ་ཟེར་བ་ཅིན་ ཁོ་གཙོ་བོའི་གཙོ་བོ་དང་ རྒྱལ་པོའི་རྒྱལཔོ་ཨིན་ དེ་མ་ཚད་ཁོ་དང་གཅིག་ཁར་ ཁོ་གིས་འབོ་གནང་མི་ བཙག་འཐུ་མཛད་མི་ དམ་ཚིག་ཅན་དདཔ་ཅན་ཚུ་ཡང་ཡོདཔ་ཨིན་ཟེར་གསུངས་ཡི།

¹⁵ ད་རུང་ཕོ་ཉ་གིས་ང་ལུ་ ཁྱོད་ཀྱིས་མཐོང་མི་ ཨམ་སྲུ་གཞང་བཙོངམ་ ཆུའི་གུ་སྡོད་མི་འདི་ མི་རིགས་ མི་བརྒྱུད་ སྐད་རིགས་མ་འདྲཝ་དེ་ཚུ་གི་མི་དམངས་ཚོགས་ཨིན།

¹⁶ དེ་ལས་ཁྱོད་ཀྱིས་མཐོང་མིའི་རྭཝ་བཅུ་ཐམ་འདི་ཚུ་དང་གཅན་གཟན་དེ་གིས་ ཨམ་སྲུ་གཞང་བཙོངམ་འདི་ལུ་མ་དགའ་བར་ མོ་གི་གཟུགས་སྒྱེན་མོ་བཏོན་ ལགཔ་སྟོངམ་སྦེ་བཟོ་ ཤ་ཡང་ཟ་ནི་ཨིནམ་མ་ཚད་ མོ་མེ་གཏང་སྟེ་བཀོག་འོང་།

¹⁷ དཀོན་མཆོག་གི་བཀའ་འདི་མ་འགྲུབ་བར་དུ་ རྭཝ་བཅུ་ཐམ་འདི་ཚུ་གིས་གཅན་གཟན་དེ་ལུ་ རྒྱལ་པོའི་དབང་ཚད་སྤྲོད་ནི་ཨིན་ ག་ཅི་སྨོ་ཟེར་བ་ཅིན་ དཀོན་མཆོག་གིས་ མོ་ལུ་མེདཔ་གཏང་ནིའི་ཐུགས་དགོངས་སྒྲུབ་ནི་སྦེ་ ཁོང་ལུ་སེམས་གཅིག་སྦེ་ མཐུན་པའི་བསམ་པ་གནང་ཡི།

¹⁸ ད་རུང་ཁྱོད་ཀྱིས་མཐོང་མིའི་ཨམ་སྲུ་འདི་ འཛམ་བུ་གླིང་ནང་གི་རྒྱལཔོ་ཚུ་གི་གུ་ལུ་ དབང་མིའི་ཁྲོམ་མིང་གཏམ་ཅན་འདི་ཨ་ནི་ཨིན་ཟེར་གསུངས་ཡི།།