མཐོང་སྣང་ལེའུ་ 13 - རྫོང་ཁ་

གཅན་གཟན་དང་པ་འོང་པའི་སྐོར།

¹ དེ་ལས་ངེ་གི་མཐོང་སྣང་ལུ་ རྒྱ་མཚོ་ནང་ལས་གཅན་གཟན་གཅིག་ ཐོན་འོང་ས་ང་གིས་མཐོང་ཅི་ གཅན་གཟན་དེ་ལུ་རྭཝ་བཅུ་ཐམ་དང་མགུ་ཏོ་བདུན་འདུག་ རྭཝ་དེའི་གུ་ལུ་གཙུག་རྒྱན་བཅུ་ཐམ་འདུག་ དེ་ལས་མགུ་ཏོ་རེ་རེ་གུ་དཀོན་མཆོག་ལུ་སྐུར་པ་བཏབ་ནི་ཚིག་རེ་རེ་བྲིས་ཏེ་འདུག

² ང་གིས་མཐོང་མིའི་གཅན་གཟན་འདི་ གཟིག་བཟུམ་སྦེ་འདུག་ ལགཔ་དང་རྐངམ་ སེམས་ཅན་དོམ་གྱི་རྐང་ལག་བཟུམ་དང་ ཁ་འདི་ སེམས་ཅན་སེངྒེ་གི་ཁ་བཟུམ་སྦེ་འདུག་ དེ་ལུ་འབྲུག་འདི་གིས་ཁོ་རང་གི་སེམས་དང་དབང་ཤུགས་བྱིནམ་མ་ཚད་ ཁྲི་གུ་སྡོད་ནི་གི་དབང་ཚད་ཡང་བྱིན་ནུག

³ གཅན་གཟན་དེའི་མགུ་ཏོ་གཅིག་གུ་ རྨ་རྐྱེན་བྱུང་སྟེ་ཤི་བའི་སྲོག་ལུ་ཐུག་ཡོདཔ་བཟུམ་ང་གིས་མཐོང་ཅི་ ཤི་བའི་སྲོག་ལུ་ཐུག་ནི་བཟུམ་གྱི་རྨ་འདི་དྲགཔ་ད་ འཛམ་གླིང་ནང་གི་མི་དེ་ཚུ་ག་ར་ཧ་ལས་ཏེ་ གཅན་གཟན་དེ་གི་རྟིང་བདའ་སྟེ་ཡར་སོང་ཡི།

⁴ མི་དེ་ཚུ་གིས་འབྲུག་འདི་ལུ་ཕྱག་འཚལ་ཏེ་གསོལཝ་བཏབ་མས་ ག་ཅི་སྨོ་ཟེར་བ་ཅིན་ འབྲུག་འདི་གིས་གཅན་གཟན་འདི་ལུ་ དབང་ཚད་བྱིན་ནི་དེ་གིས་ཨིན་མས་ དེ་ལས་མི་འདི་ཚུ་གིས་ གཅན་གཟན་འདི་ལུ་ཡང་ཕྱག་འཚལ་ཏེ་ ཨ་ནི་གཅན་གཟན་འདི་ལུ་རྒོལ་ཏེ་ ཁོ་དང་འདྲན་འདྲ་ག་གིས་དམག་རྐྱབ་ཚུགས་ག་ཟེར་བསྟོད་པ་ཕུལཝ་མས།

⁵ དཀོན་མཆོག་གིས་གཅན་གཟན་འདི་ལུ་ ཁ་དྲག་དབང་ཆེ་བའི་གཏམ་སླབ་བཅུགཔ་ཨིནམ་མ་ཚད་ གཅན་གཟན་འདི་ལུ་དཀོན་མཆོག་གིས་ཁོ་རང་ལུ་སྐུར་པ་བཏབ་བཅུག་ནུག་ ཁོ་ལུ་ཟླཝ་བཞི་བཅུ་ཞེ་གཉིས་ཚུན་ཚོད་ ཁོ་རང་གི་དབང་ཚད་ལག་ལེན་འཐབ་ཟེར་དབང་ཚད་གནང་ནུག

⁶ དེ་ལས་ཁོ་གིས་དཀོན་མཆོག་ལུ་སྐུར་པ་བཏབ་སྟེ་ ཁོ་གི་མཚན་ལུ་སྨད་ནི་ ཁོ་བཞུགས་སའི་ཞིང་ཁམས་དང་ དེ་ནང་བཞུགས་མི་ཚུ་ལུ་ཡང་སྨད་ནི་སྦེ་ཁ་བརྒྱང་ཡི།

⁷ དེ་ལས་དཀོན་མཆོག་ཁོ་རའི་དམ་པའི་མི་ཚུ་དང་དམག་བརྐྱབས་ཏེ་ ཁོ་ལུ་རྒྱལ་ཁ་ཐོབ་ནི་ནུས་ཤུགས་གནང་སྟེ་འདུག་ དེ་མ་ཚད་ཁོ་ལུ་རིགས་ཚན་མ་འདྲཝ་དང་ སྐད་རིགས་མ་འདྲཝ་ མི་བརྒྱུད་མ་འདྲཝ་ མི་རིགས་མ་འདྲཝ་ ག་ར་གི་གུ་ལུ་སྐྱོང་ནི་གི་དབང་ཚད་བྱིན་ཏེ་འདུག

⁸ དེ་ལས་འཛམ་བུ་གླིང་ནང་སྡོད་མི་ག་ར་གིས་ ཨ་ནི་གཅན་གཟན་འདི་ལུ་ ཕྱག་འཚལ་ཏེ་བསྟོད་པ་ཕུལ་ནུག་ ཁོང་ཆ་ཁྱབ་ འཛམ་གླིང་མཛད་པ་ལས་འགོ་བཙུགས་ཏེ་ ཚེའི་དེབ་ནང་མིང་མ་འབྲི་མི་ཚུ་ཨིན་ ཚེའི་དེབ་དེ་ བཀྲོངས་ཏེ་ཡོད་མི་ལུག་གི་ཕྱུག་ཀུ་དེ་གི་ཨིན།།

⁹ དེ་ལས་རྣམ་ཅོག་ཡོད་མི་ཚུ་ག་ར་ཨིན་རུང་ དེ་ཚུ་གིས་ཉན་ཏེ་ཧ་གོ་ཤིག

¹⁰ ད་ག་ར་འབད་རུང་ གཞན་གྱི་དབང་འོག་ལུ་འགྱོ་དགོ་པ་ཅིན་ ཁོ་གི་དབང་འོག་ལུ་རང་འགྱོ་འོང་ ག་ར་འབད་རུང་ གྱི་རིངམ་གི་འོག་ལུ་ཤི་དགོ་པ་ཅིན་ གྱི་རིངམ་གི་འོག་ལུ་རང་ཤི་འོང་། ཨ་ནི་འདི་ དདཔ་ཅན་ཚུ་གིས་དཀའ་ངལ་དང་བཟོད་པ་བསྒོམས་ཏེ་ དད་པ་བརྟན་ཏོག་ཏོ་སྦེ་སྡོད་ནི་གི་དྲན་བསྐུལ་ཨིན།།

གཅན་གཟན་གཉིས་པ་འོང་པའི་སྐོར།

¹¹ ད་རུང་གཅན་གཟན་གཉིས་པ་ སའི་མཐའ་མ་ལས་ ཐོན་འོང་ས་ང་གིས་མཐོང་ཅི་ འདི་ལུ་ལུག་བཟུམ་སྦེ་རྭཝ་གཉིས་འདུག་ དེ་འབདཝ་ད་ ཁོ་གིས་འབྲུག་བཟུམ་སྦེ་སྐད་བརྐྱབས་མས།

¹² གཅན་གཟན་གཉིས་པ་དེ་གིས་ དང་པ་དེ་གི་ཐོག་ལས་ དབང་ཚད་ལག་ལེན་འཐབ་སྟེ་ འཛམ་བུ་གླིང་ནང་སྡོད་མི་ག་ར་ལུ་ གཅན་གཟན་དང་པ་ ཤི་བའི་སྲོག་ལུ་ཐུག་ཡོད་མིའི་རྨ་དྲག་མི་དེ་ལུ་ ཕྱག་འཚལ་ཏེ་བསྟོད་པ་ཕུལ་བཅུགཔ་མས།

¹³ དེ་ལས་ གཉིས་པ་དེ་གིས་ མི་དེ་ཚུ་གི་བལྟ་ས་ལུ་ རྫུ་འཕྲུལ་དང་རྟགས་མཚན་སྦོམ་བཏོནམ་མ་ཚད་ ནམ་མཁའ་ལས་མེ་ཡང་ཕབ་བཏངམ་མས།

¹⁴ གཅན་གཟན་གཉིས་པ་དེ་ལུ་ གཅན་གཟན་དང་པ་འདི་གི་རྒྱུད་ལས་ ཨ་ནི་བཟུམ་གྱི་རྟགས་མཚན་བཏོན་ཚུགས་ནི་དེ་གིས་ འཛམ་བུ་གླིང་ནང་གི་མི་དེ་ཚུ་ག་ར་ལུ་མགུ་བསྐོར་བརྐྱབས་ཏེ་ གཅན་གཟན་དང་པ་ལུ་གྱི་རིངམ་གིས་རྨ་བཏོན་རུང་ མ་ཤི་བར་ གསོན་པོ་སྦེ་སྡོད་མི་འདི་གི་སྐུ་འདྲ་བཟོ་བཅུག་ཅི།

¹⁵ ད་རུང་ གཅན་གཟན་གཉིས་པ་གིས་ དང་པ་དེ་ཁ་སླབ་ཚུགས་ནི་གི་དོན་ལུ་ སྐུ་འདྲ་ནང་ན་ བུང་འཕུ་བཏབ་ནི་དབང་ཚད་ཐོབ་ཞིནམ་ད་ ནུས་ཤུགས་བྱིན་ཡི་ དེ་ལས་གཅན་གཟན་དང་པ་དེ་གིས་ ཁོ་རའི་སྐུ་འདྲ་ལུ་ཕྱག་འཚལ་ཏེ་ བསྟོད་པ་མ་ཕུལ་མི་ཚུ་ གསད་བཅུག་ནི་གི་དབང་ཚད་ཡང་འདུག

¹⁶ གཉིས་པ་དེ་གིས་ མི་ཆུང་ཀུ་ཡང་ན་སྦོམ་ མི་ཕྱུགཔ་ཡང་ན་སྤྱང་ཀ་ རྒྱོབོ་རྒྱམོ་ཡང་ན་རང་དབང་རང་ཚད་ཡོད་མིའི་ག་ར་གི་ དཔྱལཝ་གུ་ཡང་ན་ལགཔ་གཡས་པ་ལུ་ རྟགས་བཀལ་བཅུགཔ་ཨིན་མས།

¹⁷ ཨ་ནི་རྟགས་འདི་ གཅན་གཟན་དང་པ་འདི་གི་མིང་ ཡང་ན་ཁོ་གི་མིང་གི་གྱངས་ཁ་ཨིན་མས་ ཨ་ནི་རྟགས་འདི་མེད་པར་ ག་གིས་འབད་རུང་ ཚོང་ཉོ་ནི་དང་བཙོང་ནི་དེ་ཚུ་ རྩ་ལས་རང་འབད་མི་ཆོག་ཟེརཝ་ཨིན་མས།

¹⁸ ཨ་ནི་ཧ་གོ་ནི་དོན་ལུ་ཤེས་རབ་དགོ་ རིག་པ་ཡོད་མི་འདི་གིས་ གཅན་གཟན་དང་པ་འདི་གི་མིང་གི་གྱངས་ཁ་རྩིས་བལྟ་དགོ་ ཨ་ནི་གྱངས་ཁ་འདི་ མི་གི་གྱངས་ཁ་ཨིན་ ཁོ་གི་གྱངས་ཁ་འདི་ དྲུག་བརྒྱ་དྲུག་བཅུ་རེ་དྲུག་ཨིན།།