མཐོང་སྣང་ལེའུ་ 12 - རྫོང་ཁ་

ཨམ་སྲུ་དང་འབྲུག་གི་སྐོར།

¹ དེ་ལས་ཞིང་ཁམས་ལུ་ རྟགས་མཚན་སྦོམ་གཅིག་མཐོང་ཅི་ ཨམ་སྲུ་གཅིག་ཉིམ་ བགོ་ལ་བཟུམ་སྦེ་གྱོན་ མོ་གི་རྐངམ་གི་འོག་ལུ་ ཟླཝ་བཙུགས་ མགུ་ལུ་སྐརམ་བཅུ་གཉིས་གཙུག་རྒྱན་བཟུམ་སྦེ་བཙུགས་ཏེ་འདུག

² མོ་ཨ་ལོ་སྐྱེ་ནི་སྦེ་ ན་ཟུག་གིས་འབད་མ་ཚུགས་པར་ གནམ་མེད་ས་མེད་ངུ་སྐད་བརྐྱབས་ཏེ་འདུག

³ ད་རུང་ཞིང་ཁམས་ནང་ན་རྟགས་མཚན་གཞན་གཅིག་མཐོང་ཅི་ འབྲུག་དམརཔོ་ མགུ་བདུན་དང་ རྭཝ་བཅུ་ཐམ་ མགུ་རེ་རེ་གུ་གཙུག་རྒྱན་རེ་རེ་བཙུགས་ཏེ་འདུག

⁴ ཁོ་གི་མཇུགམ་གིས་ནམ་མཁའ་ལས་ སྐརམ་དཔྱ་གསུམ་ས་ཁར་སྤུད་བཏང་ཡི་ དེ་ལས་ཨ་ལོ་སྐྱེ་ནི་ཡོད་མིའི་ ཨམ་སྲུ་འདི་གི་གདོང་ཁར་ལོང་སྟེ་ ཨ་ལུ་སྐྱེཝ་ད་འཐུ་ཟ་ནི་སྦེ་སྒུག་སྡོདཔ་མས།

⁵ ཨ་ནི་ཨམ་སྲུ་ལས་འཁྲུངས་མིའི་སྲས་འདི་གིས་ འཛམ་གླིང་ནང་མི་རིགས་ཚུ་ལུ་ཁོ་གིས་ དབང་ཚད་ལྕགས་ཀྱི་འཁརཝ་ ལག་ལེན་འཐབ་པའི་ཐོག་ལས་འགོ་དཔོན་སྦེ་དབང་ནི་ཨིན་མས་ དེ་འབདཝ་ད་ སྲས་འདི་འཁྲུངསམ་ཅིག་ དེ་འཕྲོ་ལས་ཡར་དཀོན་མཆོག་གིས་ ཁོ་རང་གི་ཁྲིའི་གདོང་ཁར་ལུ་བསྣམས་བྱོན་ཡི།

⁶ དེ་ལས་ཨམ་སྲུ་འདི་ དཀོན་མཆོག་གིས་རི་སྟོང་ནང་ ས་གནས་གཅིག་གྲ་སྒྲིག་མཛད་གནང་མིའི་ནང་བྱོག་སོང་ཡི་ ཞག་གཅིག་སྟོང་གཉིས་བརྒྱ་དྲུག་བཅུ་གི་དོན་ལུ་ རི་སྟོང་དེ་ནང་ལུ་ ཁོ་གིས་མོ་ལུ་བདག་འཛིན་མཛད་ནུག།

བདུད་ སེ་ཏཱན་འཛམ་བུ་གླིང་ནང་བཀོག་བའི་སྐོར།

⁷ དེ་ལས་ཞིང་ཁམས་ནང་དམག་འཁྲུགས་ཐོན་ཏེ་ ཕོ་ཉ་གི་འགོ་དཔོན་ མི་ཁ་ཨཱེལ་དང་ ཕོ་ཉ་གཞན་ཚུ་ཁ་གཅིག་སྦེ་ འབྲུག་དང་ཁོ་རའི་ཕོ་ཉ་ཚུ་དང་དམག་བརྐྱབས་ཅི།

⁸ དེ་འབདཝ་ད་ འབྲུག་དང་ཁོ་གི་ཕོ་ཉ་ཚུ་ སྟོབས་ཤུགས་མེད་པར་དམག་ཕམ་སྟེ་ ཞིང་ཁམས་ལུ་ཁོང་སྡོད་སའི་ས་གནས་མ་ཐོབ་པས།

⁹ དེ་ལས་འབྲུག་སྦོམ་འདི་ བདུད་དང་ སེ་ཏཱན་ཟེར་ཡང་སླབ་མི་ དང་ཕུགས་ཀྱི་སྦུལ་ མི་ག་ར་ལུ་མགུ་བསྐོར་རྐྱབ་མི་དེ་ ཞིང་ཁམས་ལས་མར་ ཁོ་དང་ཁོ་རའི་ཕོ་ཉ་ཚུ་དང་གཅིག་ཁར་ མར་འཛམ་བུ་གླིང་ནང་འཐུ་བཀོག་ཡི།

¹⁰ ད་རུང་ང་གིས་ཞིང་ཁམས་ལས་གསུང་སྐད་སྦོམ་གཅིག་གོ་ཡི་ དེ་གིས། ད་ང་བཅས་ཀྱི་དཀོན་མཆོག་གི་ཐར་པ་དང་ དབང་ཤུགས་ རྒྱལ་སྲིད་ ཁོ་གིས་བཙག་འཐུ་མཛད་མི་ཁིརཱིས་ཀྱི་དབང་ཚད་དེ་ཚུ་བྱོན་ཡི་ ག་ཅི་སྨོ་ཟེར་བ་ཅིན་ དཀོན་མཆོག་གི་སྐུ་མདུན་ལུ་ང་བཅས་ཀྱི་སྤུན་ཆ་ཚུ་ལུ་ ཉིན་མཚན་མེད་པར་སྐྱོན་བཏོན་མི་དགྲ་དེ་ལུ་ ཞིང་ཁམས་ལས་མར་འཐུ་བཀོག་ཡི།

¹¹ ཨིན་རུང་ སྤུན་ཆ་ཚུ་གིས་ཁོང་རང་གི་སྲོག་ལུ་མ་ཕངས་པར་ ལུག་གི་ཕྱུག་ཀུ་གི་སྐུ་ཁྲག་དང་ ཁོང་རང་གི་འཛོམ་དཔང་འབད་བའི་སྒོ་ལས་ བདུད་ལས་རྒྱལ་ཁ་ཐོབ་ཅི།

¹² དེ་འབདཝ་ལས་ ཞིང་ཁམས་དང་དེ་ནང་ན་བཞུགས་མི་ག་ར་ ཐུགས་སྤྲོ་འགྱུར་ཡི་ དེ་འབདཝ་ད་ རྒྱ་མཚོ་དང་ས་གཞི་ནང་སྡོད་མི་ཚུ་ལུ་སྡི་ཆེ་བས་ ག་ཅི་སྨོ་ཟེར་བ་ཅིན་ བདུད་འདི་གིས་ ཁོ་གི་དུས་ཚོད་ཐུང་ཀུ་གཅིག་ལས་བརྒལ་ཏེ་མེད་ཟེར་ཤེས་ཏེ་ གནམ་མེད་ས་མེད་ཙིགཔ་ཟ་སྟེ་ མར་ཁྱེད་སྡོད་སར་སོང་ཡི་ཟེར་ གསུངས་མི་དེ་ང་གིས་གོ་ཡི།

¹³ དེ་ལས་འབྲུག་འདི་གིས་ ཁོ་ལུ་ས་ཁར་སྤུད་བཀོག་དཔ་ཨིནམ་ཤེསཔ་ད་ ཧེ་མ་སྲས་འཁྲུངས་མི་ཨམ་སྲུ་འདི་གི་རྟིང་བདའ་སོང་ཡི།

¹⁴ དེ་འབདཝ་ད་ཨམ་སྲུ་འདི་ འབྲུག་འདི་ལས་བྱོག་ནི་གི་དོན་ལུ་ ཁྱ་རྒོད་སྦོམ་གཅིག་གི་གཤོག་སྒྲོ་གནང་སྟེ་ མོ་ལུ་བདག་འཛིན་འཐབ་ནི་སྦེ་ ལོ་ངོ་ཕྱེད་དང་བཞི་གི་དོན་ལུ་ རི་སྟོང་ནང་དཀོན་མཆོག་གིས་ས་གནས་གྲ་སྒྲིག་རྐྱབ་བཞག་མི་ནང་འཕུར་སོང་ཡི།

¹⁵ ད་རུང་འབྲུག་འདི་གིས་མོ་ལུ་ཆུ་རུད་བཏང་བསད་ནི་སྦེ་ མོ་གི་རྒྱབ་ཁར་ལས་ ཁོ་གི་ཁ་ལས་གཙང་ཆུ་སྦོམ་གཅིག་བཏང་ཡི།

¹⁶ དེ་འབདཝ་ད་ ས་གཞི་འདི་གིས་མོ་ལུ་ཆ་རོགས་འབད་དེ་ ས་གཞི་ཁ་བརྒྱང་སྟེ་ འབྲུག་གི་ཁ་ལས་ཐོན་མི་ཆུ་ག་ར་འཐུང་ཡི།

¹⁷ དེ་ལས་འབྲུག་འདི་མོ་ལུ་བལྟ་ གནམ་མེད་ས་མེད་ཙིགཔ་ཟ་སྟེ་ མོ་གི་རིགས་བརྒྱུད་ལྷག་མ་ལུས་མི་ དཀོན་མཆོག་གི་བཀའ་ལུ་ཉན་མི་ ཡེ་ཤུ་གི་འཛོམ་དཔང་འབད་མི་ཚུ་དང་དམག་རྐྱབ་པ་སོང་སྟེ།

¹⁸ འབྲུག་འདི་རྒྱ་མཚོ་གི་མཐའ་མ་ལོང་སྡོད་ནུག།