མཐོང་སྣང་ལེའུ་ 11 - རྫོང་ཁ་

འཛོམ་དཔང་གཉིས་པ་གི་སྐོར།

¹ དེ་ལས་ཚད་འཇལ་ནི་གི་འཁརཝ་བཟུམ་ཅིག་ང་ལུ་གནང་སྟེ་ ད་སོང་ཞིནམ་ད་ དཀོན་མཆོག་གི་མཆོད་ཁང་དང་མཆོད་ཁྲི་ཚད་འཇལ་ཟེར་གསུངས་ཡི་ དེ་ཁར་གསོལཝ་བཏབ་མི་ཆ་ཁྱབ་ག་དེ་ཅིག་ཡོད་ག་ གྱངས་ཁ་རྐྱབ་ཟེར་གསུངསམ་ཨིན་མས།

² དེ་འབདཝ་ད་མཆོད་ཁང་གི་ ཕྱི་ཁ་གི་རྡོ་གཅལ་ཚད་འཇལ་མི་དགོ་ ག་ཅི་སྨོ་ཟེར་བ་ཅིན་ མཆོད་ཁང་གི་ཕྱི་ཁ་ལུ་ ཁོང་དཀོན་མཆོག་ལུ་ ངོ་མ་ཤེས་མི་ ཕྱིའི་མི་རིགས་ཚུ་ལུ་གནང་ཚར་ཡི་ རྒྱལ་ས་དམ་པ་འདི་ ཁོང་གིས་ཟླཝ་བཞི་བཅུ་ཞེ་གཉིས་ཚུན་ཚོད་ རྐངམ་གི་འོག་ལུ་བསྣད་དེ་བཞག་འོང་།

³ དེ་ལས་ང་རང་གི་འཛོམ་དཔང་འབད་མི་གཉིས་ སྦོ་རས་ཕད་ཙེ་གྱོན་ཞིནམ་ད་ ཉིན་ཞག་གཅིག་སྟོང་གཉིས་རྒྱ་དྲུག་བཅུ་ཚུན་ཚོད་ ང་གིས་ཁོང་ལུ་ལུང་བསྟན་བཤད་ནི་གི་དོན་ལུ་ དབང་ཤུགས་གནང་འོང་ཟེར་གསུངས་མི་འདི་ང་གིས་གོ་ཡི།

⁴ ཨ་ནི་མི་གཉིསཔ་འདི་ག་སྨོ་ཟེར་བ་ཅིན་ འཛམ་བུ་གླིང་གི་གཙོ་བོ་གི་སྐུ་མདུན་ལུ་ ལོང་མི་ཨ་རུ་རའི་ཤིང་གཉིས་དང་ ལ་ཝང་གཉིསཔ་འདི་ཨིན་མས།

⁵ ག་དེམ་ཅིག་སྦེ་ ག་གིས་ཁོང་ལུ་གནོད་པ་བཀལ་བ་ཅིན་ ཁོང་གཉིས་ཀྱི་ཁ་ལས་མེ་འབར་ཏེ་ དགྲ་དེ་ཚུ་འཚིག་གཏང་འོང་ཟེར་ཨིན་མས་ ཨ་ནི་བཟུམ་སྦེ་ག་གིས་རང་ཁོང་ལུ་གནོད་པ་བཀལ་བ་ཅིན་ མེ་གིས་འཚིག་གཏང་སྟེ་རང་ ཁོང་རང་ཤི་དགོཔ་ཨིན་མས།

⁶ ཨ་ནི་མི་དེ་ཚུ་གིས་ དཀོན་མཆོག་གི་སྐོར་ལས་འཛོམ་དཔང་བཤད་པའི་སྐབས་ལུ་ ཁོང་གི་ཞལ་ལུ་ནམ་མཁའ་ལས་ཆརཔ་ཡང་ རྐྱབ་མ་བཅུག་པར་ བཀག་ནི་གི་དབང་ཤུགས་འདུག་ དེ་གིས་མ་ཚད་པར་ ཁོང་གིས་འབད་དགོ་པ་ཅིན་ ཆུ་ཡང་ཁྲག་ལུ་འགྱུར་ འཛམ་བུ་གླིང་ནང་ནད་ཡམས་སྣ་ཚོགས་དེ་ཚུ་ གཏང་ཚུགས་པའི་ནུས་ཤུགས་འདུག

⁷ ད་ཁོང་གིས་དཀོན་མཆོག་གི་སྐོར་ལས་འཛོམ་དཔང་བཤད་ཚར་བའི་ཤུལ་ལས་ གཏིང་དང་མཐའ་མེད་པའི་ས་དོང་ནང་ལས་ཐོན་པའི་ གཅན་གཟན་གྱིས་ཁོང་དང་དམག་རྐྱབ་ད་ གཅན་གཟན་རྒྱལ་ཁ་ཐོབ་སྟེ་ཁོང་ལུ་གསད་ནི་ཨིན་མས།

⁸ དེ་ལས་ཁོང་གཉིས་ཀྱི་ཕུང་པོ་འདི་ ཧེ་མ་ཁོང་གི་གཙོ་བོ་ཁྲམ་ཤིང་གུ་བཀྲོངས་སའི་ ས་གནས་ མིང་གཞན་དཔེ་བཟུམ་སྦེ་སླབ་པ་ཅིན་ སོ་དོམ་དང་ ཨི་ཇིབ་ཟེར་སླབ་མི་ཁྲོམ་སྦོམ་གྱི་ལམ་ཁར་ལུས་ནི་ཨིན་མས།

⁹ དེ་ལས་ཞག་གསུམ་དང་ཕྱེད་ཀ་ཚུན་ཚོད་ རིགས་ཚན་མ་འདྲཝ་དང་ སྐད་རིགས་མ་འདྲཝ་ མི་བརྒྱུད་མ་འདྲཝ་ མི་རིགས་མ་འདྲཝ་ ག་ར་གིས་ ཁོང་གི་ཕུང་པོ་འདི་མཐོང་རུང་ དུར་ཁུང་ནང་བཙུག་མ་ལྟེར་བས།

¹⁰ འཛམ་བུ་གླིང་ནང་གི་མི་དེ་ཚུ་ ཨ་ནི་ལུང་སྟོན་པ་གཉིས་ཤི་སོངམ་ལས་ གནམ་མེད་ས་མེད་དགའ་སྟེ་ངལ་རངས་ ཁོང་རང་གཅིག་གིས་གཅིག་ལུ་གསོལ་རས་དེ་ཚུ་བྱིན་འོང་ ག་ཅི་སྨོ་ཟེར་བ་ཅིན་ ཁོང་གི་ཞོར་ཁར་ལས་སྦེ་ འཛམ་བུ་གླིང་ནང་གནམ་མེད་ས་མེད་ སྡུག་བསྔལ་སྦོམ་མྱོང་བཅུག་ནུག

¹¹ དེ་འབདཝ་ད་ ཞག་གསུམ་དང་ཕྱེད་ཀ་གི་ཤུལ་ལས་ དཀོན་མཆོག་གིས་གནང་མི་ཚེ་སྲོག་གི་དབུགས་ ཁོང་གི་ནང་ན་འཛུལ་ཏེ་ ཁོང་རང་གི་རྐངམ་བཙུགས་ཏེ་ལོངམ་ད་ ཨ་ནི་མཐོང་མི་དེ་ཚུ་གནམ་མེད་ས་མེད་འདྲོགས་ཅི།

¹² དེ་ལས་ཁོང་གཉིས་ཀྱིས་ཞིང་ཁམས་ལས་གསུང་སྐད་སྦོམ་གཅིག་གོ་ཡི་ གསུང་སྐད་དེ་གིས་ ཡར་ཞིང་ཁམས་ལུ་ཤོག་ཟེར་གསུངསམ་ད་ ཁོང་གཉིས་ཀྱི་དགྲ་བྱང་ཕྱད་ཚུ་གི་མཐོང་སར་ ས་སྨུག་ནང་ཞིང་ཁམས་ལུ་ཡར་སོང་ཡི།

¹³ དེ་ལས་དུས་ཚོད་འདི་ལུ་རང་ ས་གཡོམ་ཤུགས་སྦེ་བརྐྱབས་ཏེ་ ཁྲོམ་དཔྱ་བཅུ་ཐམ་རམ་འགྱོ་སྦེ་ མིའི་གྱངས་ཁ་སྟོང་ཕྲག་བདུན་ཤིཝ་ད་ དེ་ཁར་ལུས་མི་དེ་ཚུ་འདྲོགས་ཏེ་ ཞིང་ཁམས་ཀྱི་དཀོན་མཆོག་ལུ་ ཕྱག་འཚལ་ཏེ་བསྟོད་པ་ཕུལ་ཡི།

¹⁴ ད་འཇིགས་སྐྲག་གཉིས་པ་འདི་ཐལ་སོང་ཡི་ དེ་འབདཝ་ད་ འཇིགས་སྐྲག་གསུམ་པ་འདི་ མགྱོགས་པར་འོང་དོ།།

དུང་བདུན་པ་འཕུཝ་ད་འཇིགས་སྐྲག་གསུམ་པ་བྱུང་མིའི་སྐོར།

¹⁵ དེ་ལས་ ཕོ་ཉ་བདུན་པ་འདི་གིས་ཁོ་རང་གི་དུང་འཕུཝ་ད་ ཞིང་ཁམས་ལས་གསུང་སྐད་སྦོམ་དེ་ཚུ་གིས། འཛམ་གླིང་ནང་གི་རྒྱལ་སྲིད་འདི་ ང་བཅས་ཀྱི་གཙོ་བོ་དང་ ཁོ་རའི་ བཙག་འཐུ་མཛད་མི་ཁིརཱིས་ཀྱི་རྒྱལ་སྲིད་ལུ་འགྱུརཝ་ཨིན་ ཁོ་གིས་དུས་རྒྱུན་དུ་རང་སྐྱོང་ནི་ཨིན་ཟེར་ གསུངས་ཡི།

¹⁶ དེ་ལས་དཀོན་མཆོག་གི་སྐུ་མདུན་ལུ་ ཁྲི་གུ་བཞུགས་མིའི་རྒས་ཤོས་ཉི་ཤུ་རྩ་བཞིཔ་དེ་གིས་ ཕྱག་འཚལ་ཏེ་དཀོན་མཆོག་ལུ་བསྟོད་པ་ཕུལ་ཏེ།

¹⁷ ཀུན་དབང་བའི་གཙོ་བོ་དཀོན་མཆོག་ ཧེ་མ་ལས་བྱོན་མི་དང་ ད་ལྟོ་བཞུགས་མི་ལུ་ ང་བཅས་ཀྱིས་བཀའ་དྲིན་དགའ་ཚོར་ཕུལཝ་ཨིན་ ག་ཅི་སྨོ་ཟེར་བ་ཅིན་ ནཱ་གི་དབང་ཤུགས་སྦོམ་གྱིས་དབང་སྟེ་རྒྱལ་སྲིད་སྐྱོང་ནི་འགོ་བཙུགས་ཅི།

¹⁸ དེ་ལས་མི་རིགས་ཚུ་ཁྲོ་བོ་གིས་གང་སྟེ་ཡོད་རུང་ ནཱ་གི་ཐུགས་ཁྲོ་བོའི་ཆདཔ་འདི་ཕོག་ནི་ཨིནམ་མ་ཚད་ ཤི་མི་ཚུ་གི་སྦུག་ལུ་ཁྲིམས་ཕྱེ་ནི་དུས་ཚོད་ལུ་ལྷོད་ཅི་ ནཱ་གི་ཕྱག་ཞུ་མི་དང་ ལུང་སྟོན་པ་ཚུ་ ནཱ་གི་དམ་པའི་མི་ཚུ་ ནཱ་གི་མཚན་ལུ་ཡར་བསྟོད་མིའི་ཆེ་ཆུང་མེད་པར་ ག་ར་ལུ་གསོལ་རས་གནང་ནི་དུས་ཚོད་ལུ་ལྷོད་ཅི་ དེ་ལས་འཛམ་བུ་གླིང་དེ་མེདཔ་བཏང་མི་ཚུ་ལུ་ རྩ་མེད་གཏང་བའི་དུས་ཚོད་ལུ་ཡང་ལྷོད་ཅི་ཟེར་ ཞུ་ཡི།

¹⁹ དེ་ལས་ཞིང་ཁམས་ལུ་ དཀོན་མཆོག་གི་མཆོད་ཁང་སྒོ་ཕྱེ་ཡི་ མཆོད་ཁང་ནང་ན་ལུ་ ཁོ་རའི་ཞལ་འཆེས་བཞེས་ཡོད་མིའི་སྒྲོམ་འདི་ ཕྱི་ཁར་མཇལ་ཁ་གནངམ་ད་ གློག་ཀེམ་ འབྲུག་གི་འུར་སྒྲ་ལྡིར་ ས་གཡོམ་དང་སེརཝ་སྦོམ་སྦེ་བརྐྱབས་ཅི།།