མཐོང་སྣང་ལེའུ་ 1 - རྫོང་ཁ་

ངོ་སྤྲོད་ཞུ་བའི་སྐོར།

¹ ཨ་ནི་འདི་ ཡེ་ཤུ་ཁིརཱིས་ཀྱིས་གནང་མིའི་མཇལ་ཁ་གི་སྐོར་ལས་ཨིན་ དཀོན་མཆོག་གིས་ མགྱོགས་པ་རང་ ག་ཅི་འབྱུང་ནི་ཨིན་ན་ ཁོ་རང་གི་ཕྱག་ཞུ་མི་ཚུ་ལུ་ དངོས་སུ་སྦེ་སྟོན་ནི་གི་དོན་ལུ་ ཡེ་ཤུ་ལུ་ཕྱག་ལཱ་བཅོལ་གནང་ནུག་ ཡེ་ཤུ་གིས་ཁོ་རང་གི་ ཕོ་ཉ་གི་ཐོག་ལས་སྦེ་ ཕྱག་ཞུ་མི་ ཡོ་ཧ་ནཱན་ལུ་ མཇལ་ཁ་དེ་སྟོན་གནང་ནུག

² དེ་ལས་ དཀོན་མཆོག་གི་གསུང་དང་ ཡེ་ཤུ་ཁིརཱིས་ཀྱི་མཇལ་ཁ་ ཡོ་ཧ་ནཱན་ཁོ་རང་གིས་མཐོང་སྟེ་ དེ་གི་སྐོར་ལས་འཛོམ་དཔང་འབདཝ་ཨིན།

³ མ་འོང་ལུང་བསྟན་གྱི་ཚིག་དེ་ཚུ་ གཞན་གྱིས་རྣ་བ་གོཝ་སྦེ་ལྷག་བྱིན་མི་དང་ བྲིས་ཏེ་ཡོད་མི་ལུ་ཉན་ཏེ་སྲུང་མི་དེ་ཚུ་ག་ར་ བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ ད་དུས་ཚོད་འདི་ ནཱ་སྦོ་ལོགས་ཁར་ལྷོདཔ་ཨིན་མས།།

ཡོ་ཧ་ནཱན་གྱིས་ཆོས་ཚོགས་བདུན་ལུ་ཡི་གུ་གཏང་མིའི་སྐོར།

⁴ ཨ་ནི་ཡི་གུ་འདི་ ཡོ་ཧ་ནཱན་གྱིས་ ལུང་ཕྱོགས་ ཨེ་སི་ཡ་ནང་ཡོད་མི་ཆོས་ཚོགས་བདུན་ལུ་འབྲི་དོ། འགོ་དང་པ་ལས་བཞུགས་མི་ ད་ལྟོ་ཡང་བཞུགས་མི་ ཤུལ་ལས་ཡང་འབྱོན་ནི་ཨིན་མི་དཀོན་མཆོག་དང་ ཁོ་གི་ཁྲིའི་སྐུ་མདུན་ལུ་བཞུགས་མི་ ཐུགས་ཉིད་བདུན་དང་།

⁵ དམ་ཚིག་ཅན་དཔང་བཞག་མཛད་མི་ གཤགས་ས་ལས་ དང་པ་སྐུ་གསོན་པོ་བཞེངས་མི་ འཇིག་རྟེན་ནང་རྒྱལཔོ་ཚུ་གི་དབང་ཐང་སྐྱོང་མི་ཡེ་ཤུ་ཁིརཱིས་ལས་ ཁྱེད་ལུ་ཐུགས་རྗེ་དང་ཞི་བདེ་གནང་བཅུག དེ་ལས་ང་བཅས་ལུ་བྱམས་པ་མཛད་དེ་ ཁོ་གི་སྐུ་ཁྲག་གིས་ ང་བཅས་ཀྱི་སྡིག་པ་ལས་དགཔ་མཛད་མི།

⁶ ཁོ་རང་གི་ཡབ་དཀོན་མཆོག་གི་དོན་ལུ་ ང་བཅས་ལུ་རྒྱལ་སྲིད་དང་བླམ་སྦེ་མཛད་གནང་མི་ཡེ་ཤུ་ཁིརཱིས་ལུ་ དུས་རྟག་བུ་རང་ གཟི་བརྗིད་དང་དབང་ཚད་ག་ར་ ཁོ་གི་ཨིན་ནོ་ ཨ་མཱེན།

⁷ བལྟ་ཤིག་ ཁོ་ས་སྨུག་ནང་འབྱོནམ་ད་ མི་ག་ར་གིས་ཁོ་ལུ་མཇལ་འོང་ ཁོ་ལུ་ཀྲིང་ཀ་གསོབ་སྟེ་བཀྲོང་མི་ཚུ་གིས་ཡང་ཁོ་ལུ་མཇལ་འོང་ དེ་མ་ཚད་ འཇིག་རྟེན་ནང་གི་མི་རིགས་ག་ར་གིས་ བློ་འགྱོད་བསྐྱེད་དེ་མྱ་ངན་འབད་འོང་ དེ་བཟུམ་སྦེ་རང་འབྱུང་བཅུག་ ཨ་མཱེན།

⁸ འགོ་དང་པ་ལས་བཞུགས་མི་ ད་ལྟོ་ཡང་བཞུགས་མི་ ཤུལ་ལས་ཡང་འབྱོན་ནི་ཨིན་མི་ ཀུན་ལུ་དབང་སྟེ་ཡོད་མི་འདི་ང་ཨིན་ ང་ ཨཱལ་ཕ་དང་ ཨོ་མེ་ག་ འགོ་དང་པ་དང་མཐའན་མཇུག་ཨིན་ཟེར་ གཙོ་བོ་དཀོན་མཆོག་གིས་གསུངས་དེས།།

མིའི་བུ་ལུ་མཇལ་བའི་སྐོར།

⁹ ང་ ཡོ་ཧ་ནཱན་ ཁྱེད་ཀྱི་སྤུན་ཆ་ དཀོན་མཆོག་གི་རྒྱལ་སྲིད་ནང་ ཁྱེད་དང་གཅིག་ཁར་ཨིན་མི་ ཁྱེད་དང་འདྲན་འདྲ་སྦེ་ ཡེ་ཤུ་གི་ཐོག་ལས་སྡུག་བསྔལ་གྱི་ཉམས་མྱོང་ཐོབ་སྟེ་ ཁྱེད་བཟུམ་སྦེ་བཟོད་སྲན་བསྐྱེདཔ་ཨིན་ ང་དཀོན་མཆོག་གི་གསུང་དང་ ཡེ་ཤུ་གི་འཛོམ་དཔང་འབདཝ་ལས་བརྟེན་ཏེ་ ང་ལུ་བདའ་གཏང་སྟེ་ ད་ལྟོ་མཚོ་གླིང་ པཱད་མཱོས་ནང་སྡོད་དགོཔ་ཐལ་སོང་ཡི།

¹⁰ གཙོ་བོ་གི་ངལ་འཚོ་བའི་ཉིནམ་དེ་ལུ་ ང་ཐུགས་ཉིད་ནང་སྡོདཔ་ད་ ངེ་གི་རྒྱབ་ཁར་ལས་ དུང་བཟུམ་སྦེ་འཕུ་མིའི་ གསུང་སྐད་སྦོམ་གཅིག་ང་གིས་གོ་ཡི།

¹¹ གསུང་སྐད་དེ་གིས་ང་ལུ་ ཁྱོད་ཀྱིས་ག་མཐོང་མི་འདི་ དེབ་ནང་བྲིས་དགོ་ ཨི་ཕི་སི་དང་ སུམཱུར་ན་ པེར་ག་མཱོས་ ཐི་ཨ་ཏེ་ར་ སར་དཱིས་ ཕི་ལ་དཱེལ་ཕི་ཡ་ ལེའོ་དེ་ཀི་ཡ་ཟེར་མི་ ཆོས་ཚོགས་བདུན་ལུ་བཀལ་གཏང་ཟེར་གསུངས་ཡི།

¹² ང་ལུ་གསུངས་མི་འདི་ག་ཨིན་ན་ཟེར་མནོ་སྟེ་ལོག་བལྟཝ་ད་ གསེར་གྱི་ལ་ཝང་བདུན་མཐོང་ཅི།

¹³ དེ་གི་སྦུག་ལུ་མིའི་བུ་བཟུམ་ཅིག་ ན་བཟའ་མར་རིངམ་སྦེ་བཞེས་མི་ སྐུའི་བྲང་ཁོག་ལས་མར་ གསེར་གྱི་གཉའ་རས་བཞེས་ཏེ་ བཞུགས་མི་ཅིག་མཇལ་ཡི།

¹⁴ དེ་ལས་ཁོ་གི་དབུ་སྐྲ་ཚུ་ཡང་ བལ་ཡང་ན་ཁཝ་བཟུམ་སྦེ་དཀརཔོ་དང་ ཁོ་གི་སྤྱན་ཡང་མེ་འབར་ཏེ་ཡོདཔ་བཟུམ་ཨིན་མས།

¹⁵ ཁོ་གི་ཞབས་འདི་ མེ་ནང་བཞུ་སྟེ་ བཀྱག་འཐོན་མི་ལི་བཟུམ་ གསུང་སྐད་འདི་ ཆུ་ཆེན་གྱི་སྐད་བཟུམ་སྦེ་ཨིན་མས།

¹⁶ དེ་ལས་ཕྱག་གཡས་པ་ སྐརམ་བདུན་བསྣམས་ཏེ་འདུག་ ཞལ་ལས་རལ་གྲི་ ཁ་གཉིསཔ་རྣོས་ཅན་བཟུམ་སྦེ་ཐོནམ་མ་ཚད་ ཞལ་ཡང་ཉི་མའི་འོད་ཟེར་བཟུམ་སྦེ་ འོད་ག་ཅི་དེས་ཅིག་ཐོན་ཏེ་ཨིན་མས།

¹⁷ དེ་ལས་ང་ཁོ་མཇལཝ་ད་ ཁོ་གི་སྐུ་མདུན་ལུ་ ང་ཤི་ཤིཝ་བཟུམ་སྦེ་ མར་འགྱེལ་ཡར་སོང་ཡི་ དེ་འབདཝ་ད་ ཁོ་གི་ཕྱག་གཡསཔ་ངེ་གི་གུ་སྐྱེལ་ཏེ་ མ་འདྲོག་ དང་པ་དང་མཐའན་མཇུག་འདི་ང་ཨིན།

¹⁸ དེ་མ་ཚད་ གསོན་པོ་སྦེ་སྡོད་མི་འདི་ང་ཨིན་ ད་བལྟ་ཤིག་ ང་ཚར་གཅིག་ཤི་སྟེ་འབད་རུང་ ད་ནམ་ཡང་ ཤི་ནི་མེདཔ་ལུ་འགྱུར་ཏེ་ ང་དུས་རྟག་བུ་ར་སྡོདཔ་ཨིན་ འཆི་བ་དང་གཤིན་ཡུལ་ གྱི་ལྡེ་མིག་འདི་ ངེའི་ནང་ཡོད།

¹⁹ ད་ཁྱོད་ཀྱིས་མཐོང་མི་ ད་ལྟོ་དང་ཤུལ་ལས་འབྱུང་ནི་འབད་མི་ཡང་ དེ་ཚུ་ག་ར་བྲིས་དགོ།

²⁰ ངེ་གི་ལགཔ་གཡས་པ་ ཡོད་མིའི་སྐརམ་བདུན་དང་ གསེར་གྱི་ལ་ཝང་བདུན་གྱི་ གསང་བ་ཧ་མ་གོ་མི་འདི་ཨ་ནི་ཨིན་ སྐརམ་བདུན་འདི་ ཆོས་ཚོགས་བདུན་གྱི་ཕོ་ཉ་འདི་ཚུ་ཨིན་ དེ་ལས་གསེར་གྱི་ལ་ཝང་བདུན་འདི་ ཆོས་ཚོགས་བདུན་ཨིན་ཟེར་གསུངས་ཡི།།