ཕི་ལི་པི་ལེའུ་ 4 - རྫོང་ཁ་

¹ ངེའི་བྱམས་པའི་སྤུན་ཆ་ཚུ་ ང་གིས་ཁྱེད་ལུ་ཕངས་སེམས་བསྐྱེད་དེ་ ཁྱེད་དང་འཕྱད་དགོ་མནོ་བའི་སེམས་ཡོད་ ཁྱེད་ངེ་གི་དགའ་ཚོར་དང་ ང་གིས་དཀའཝ་སྤྱད་པའི་གསོལ་རས་ཨིན་ ངེའི་བྱམས་པའི་སྤུན་ཆ་ཚུ་ ང་གིས་ཁྱེད་ལུ་སྟོན་དོཝ་བཟུམ་སྦེ་རང་ གཙོ་བོ་ནང་དད་པ་སྒྲིང་སྒྲིང་བསྐྱེད་སྡོད།།

པའུལ་གྱིས་དྲན་བསྐུལ་འབད་བའི་སྐོར།

² ཨམ་ ཡུའོ་དི་ཡ་དང་ཨམ་ སཱིན་ཏི་ཀི་ ཁོང་གཉིས་གཙོ་བོ་ནང་སེམས་མཐུན་ཏེ་སྡོད་ཟེར་ ང་གིས་ཁོང་ལུ་དྲན་བསྐུལ་འབདཝ་ཨིན།

³ ང་དང་གཅིག་ཁར་ ན་འཐན་ཏོག་ཏོ་སྦེ་ལཱ་འབད་མི་ཁྱོད་ལུ་ཡང་ ཨ་ནི་ཨམ་ཚུ་ལུ་ འཆམ་ཁ་བཟོ་བྱིན་ཟེར་ ང་གིས་གསོལཝ་བཏབ་ཨིན་ ག་ཅི་སྨོ་ཟེར་བ་ཅིན་ ཁོང་གཉིས་ཀྱིས་ ཀེལེ་མཱེན་དང་ ངེ་གི་ལཱ་རོགས་གཞན་ཚུ་དང་མཉམ་ གཏམ་བཟང་བཤད་ནི་ནང་ ང་དང་གཅིག་ཁར་དཀའཝ་སྤྱད་ཅི་ ཁོང་གི་མིང་ ཚེའི་དེབ་ནང་བྲིས་ཏེ་ཡོད།

⁴ གཙོ་བོ་ནང་ ཨ་རྟག་རང་དགའ་ཚོར་འགྱུར་ ད་རུང་ཡང་ དགའ་ཚོར་འགྱུར་ཟེར་ང་གིས་སླབ་དོ།

⁵ ཁྱེད་ཀྱི་ཉམ་ཆུང་གི་བྱ་བ་སྤྱོད་ལམ་གྱི་ཐོག་ལས་ མི་ག་ར་གིས་ཤེས་བཅུག་ གཙོ་བོ་སྦོ་ལོགས་ཁར་བཞུགས་ཏེ་ཡོད།

⁶ ག་ཅི་གི་དོན་ལུ་ཡང་ ཚ་གྱང་མ་ལངས་པར་སྡོད་ དེ་འབདཝ་ད་ ཁྱེད་ལུ་དགོཔ་ ག་ཅི་ཡོད་རུང་ དཀོན་མཆོག་ལུ་ཞུ་སྟེ་ ཁོ་གིས་མཛད་གནང་མི་ལུ་བཀའ་དྲིན་ཆེ་ཟེར་སྨོན་ལམ་བཏབ་སྡོད།

⁷ ཁྱེད་ཀྱིས་དེ་སྦེ་འབད་བ་ཅིན་ མནོ་བསམ་ལས་ཡང་ལྷག་མི་ དཀོན་མཆོག་གི་ཞི་བདེ་དེ་གིས་ ཁྱེད་ཁིརཱིས་ཡེ་ཤུ་ནང་ཡོད་མི་གི་ ཧིང་དང་སེམས་སྲུང་སྐྱོབ་འབད་དེ་བཞག་འོང་།

⁸ མཐའན་མཇུག་ལུ་ དབའེ་ངེ་གི་བྱམས་པའི་སྤུན་ཆ་ཚུ་ བདེན་པ་ག་ཅི་རང་ཡོད་རུང་ གུས་ཞབས་འབད་ནི་ག་ཅི་རང་ཡོད་རུང་ ཕྲངམ་ག་ཅི་རང་ཡོད་རུང་ གཙངམ་ག་ཅི་རང་ཡོད་རུང་ ཡིད་དུ་འོངམ་ག་ཅི་རང་ཡོད་རུང་ ཡི་རངས་ཏོག་ཏོ་ག་ཅི་རང་ཡོད་རུང་ མཆོག་ཏུ་གྱུར་པ་ག་ཅི་རང་ཡོད་རུང་ བསྟོད་པ་ཡོད་པའི་འོས་འབབ་ག་ཅི་རང་ཡོད་རུང་ དེ་ཚུ་ལུ་ཁྱེད་ཀྱིས་མནོ་བསམ་གཏང་དགོ།

⁹ ཁྱེད་ཀྱིས་ང་ལས་ལྷབ་མི་དང་ཐོབ་མི་ དེ་ལས་ ང་ལས་གོ་མི་དང་ ངེ་གི་ནང་ལུ་མཐོང་མི་དེ་ཚུ་ ག་ར་ལག་ལེན་འཐབ་ དེ་ལས་ཞི་བདེ་གནང་མི་དཀོན་མཆོག་ ཁྱེད་དང་མཉམ་གཅིག་བཞུགས་འོང་།།

ཕི་ལི་པིཔ་ཆ་ཁྱབ་ལུ་བཀའ་དྲིན་བསམ་པའི་སྐོར།

¹⁰ ཁྱེད་ཀྱིས་ང་ལུ་ད་རུང་ཡང་ཆ་རོགས་འབད་ནི་དེ་གིས་ ང་གིས་གཙོ་བོ་ལུ་བསྟོད་པ་ཕུལཝ་ཨིན་ ཁྱེད་ཀྱིས་རྟག་བུ་རང་ ངེ་གི་དོན་ལུ་ཚ་གྱང་འབག་སྟེ་འབད་རུང་ བར་ན་སྐོར་ ང་ལུ་ཕན་བཏགས་བྱིན་ནི་གི་དོན་ལུ་ གོ་སྐབས་མ་ཐོབ་པར་ལུས་ཡི་ཟེར་ང་གིས་ཤེས།

¹¹ ང་རང་ལུ་ཁག་ཆེཝ་ཡོད་ནི་འདི་གིས་ ང་གིས་དེ་སྦེ་སླབ་མེན་ ག་ཅི་སྨོ་ཟེར་བ་ཅིན་ གནས་སྟང་དང་འཁྲིལ་ཏེ་ཡོད་རུང་མེད་རུང་ དེ་ལུ་ག་དེ་སྦེ་ལངམ་སྦེ་སྡོད་དགོཔ་འདི་ ང་གིས་ལྷབ་ཅི།

¹² ང་ལུ་ག་ནི་ཡང་མེདཔ་སྦེ་སྡོདཔ་ད་ ལངམ་སྦེ་སྡོདཔ་ད་ ག་དེ་སྦེ་སྡོད་དགོཔ་ཨིན་ན་ ང་གིས་ཤེས་ ཕོཝ་འགྲངས་སྦེ་སྡོད་རུང་ ལྟོགསཔ་སྦེ་ལུས་རུང་ ལེ་ཤ་ཡོད་རུང་ ཉུང་དྲགས་ཡོད་རུང་ དེ་ལུ་ག་དེ་སྦེ་སྡོད་དགོཔ་ཨིན་ན་ དེ་གི་གསང་བ་དེ་ ང་གིས་ལྷབས་ཅི།

¹³ ཁིརཱིས་ཀྱིས་ང་ལུ་སྟོབས་ཤུགས་གནང་བའི་ཐོག་ལས་ ང་གིས་ག་ཅི་རང་འབད་རུང་འབད་ཚུགས།

¹⁴ ཨིན་ཏེ་འབད་རུང་ ང་དཀའ་ངལ་ཐོབ་པའི་དུས་ལུ་ ཁྱེད་ཀྱིས་ཕན་བཏགས་བྱིན་ནི་འདི་གིས་ ལེགས་ཤོམ་སོང་ཡི།

¹⁵ འགོ་དང་པ་ཁྱེད་ལུ་ གཏམ་བཟང་བཤད་པ་འོངས་པའི་སྐབས་ལུ་ ང་ལུང་ཕྱོགས་ མ་ཀེ་དོ་ནི་ཡ་ལས་འགྱོཝ་ད་ རོགས་རམ་འབད་དེ་བྱིན་མི་འདི་ ཁྱེད་ ཕི་ལི་པིཔ་ཆ་ཁྱབ་རྐྱངམ་གཅིག་ཨིན་ ཆོས་ཚོགས་གཞན་ ག་གིས་ཡང་ ང་ལུ་ཕན་བཏགས་མ་བྱིན་ཟེར་ཁྱེད་རང་གིས་ཤེས།

¹⁶ དེ་མ་ཚད་ང་ ཐེ་ས་ལོ་ནི་ཀ་ལུ་སྡོད་པའི་སྐབས་ལུ་ ཁྱེད་ཀྱིས་ཚར་ཅིག་ཡང་མ་ཆད་པར་ ང་ལུ་ཁག་ཆེཝ་དེ་ཚུ་སྐྱེལ་བཏང་སྟེ་ རོགས་རམ་འབད་ཡི།

¹⁷ ང་གིས་ཁྱེད་ལས་ ག་ཅི་ཅིག་དགོ་ནི་འབད་མནོ་སྟེ་སླབ་མེན་ དེ་འབདཝ་ད་ གཞན་ལུ་རོགས་རམ་བྱིནམ་ད་ རང་ལུ་ཡང་བྱིན་རླབས་ཐོབ་དོཝ་བཟུམ་སྦེ་ ཁྱེད་ལུ་ཡང་ བྱིན་རླབས་གནང་བཅུག་ཟེར་མནོཝ་ཨིན།

¹⁸ ད་ལྟོ་ང་ལུ་ཁག་ཆེ་མི་ལས་ཡང་ལྷགཔ་སྦེ་ ང་གིས་ཐོབ་ཅི་ ཁྱེད་ཀྱིས་ ཨེ་པ་ཕོརོ་དི་ཏུས་ཀྱི་ལག་པ་སྐྱེལ་བཏང་མི་དེ་གིས་ ང་ལུ་མ་ལང་ལངམ་སྦེ་ཡོད་ ཁྱེད་ཀྱིས་གཏང་མི་དེ་ དཀོན་མཆོག་གི་ཐུགས་དགྱེས་མི་ དྲིམ་ཞིམ་ཏོག་ཏོ་གི་མཆོདཔ་བཟུམ་སྦེ་ཨིན།

¹⁹ ཁྱེད་ཀྱི་ཁག་ཆེཝ་དེ་ཚུ་ག་ར་ ངེ་གི་དཀོན་མཆོག་གིས་ རང་གི་གཟི་བརྗིད་ཀྱི་རྒྱུ་ནོར་ནང་ལས་ ཁིརཱིས་ཡེ་ཤུ་གི་རྒྱུད་ལས་སྦེ་ ཁྱེད་ལུ་གནང་འོང་།

²⁰ ད་ང་བཅས་ཀྱི་ཡབ་དཀོན་མཆོག་ལུ་ དུས་རྒྱུན་དུ་བསྟོད་པ་ཕུལ་བཅུག་ ཨ་མཱེན།།

མཐའན་མཇུག་གི་བཀྲ་ཤིས་ལེགས་སྨོན་གྱི་སྐོར།

²¹ ཕར་ལུ་ ཁིརཱིས་ཡེ་ཤུ་ནང་ཡོད་མི་ དཀོན་མཆོག་ཁོ་རའི་དམ་པའི་མི་ག་ར་ལུ་ ང་ལས་སྐུ་གཟུགས་བཟང་ཡོད་ ང་དང་གཅིག་ཁར་ཡོད་མི་སྤུན་ཆ་ཚུ་གིས་ ཁྱེད་ལུ་སྐུ་གཟུགས་བཟང་པོ་ཟེར་སླབ་དེས།

²² དེ་ལས་ནཱ་ལུ་ཡོད་མི་ དཀོན་མཆོག་ཁོ་རའི་དམ་པའི་མི་ག་ར་གིས་ གཙོ་བ་རང་ རྒྱལཔོ་ ཀེ་སཱར་གྱི་ཕོ་བྲང་ནང་ཡོད་མི་ཚུ་གིས་ཡང་ ཁྱེད་ལུ་སྐུ་གཟུགས་བཟང་པོ་ཟེར་སླབ་དེས།

²³ གཙོ་བོ་ཡེ་ཤུ་ཁིརཱིས་ཀྱི་ཐུགས་རྗེ་དེ་ ཁྱེད་ཀྱི་སེམས་ཉིད་ནང་བཞུགས་བཅུག་ ཨ་མཱེན།། །།