ཕི་ལི་པི་ལེའུ་ 3 - རྫོང་ཁ་

ཁིརཱིས་ངོ་ཤེས་པ་ཅིན་ཁེ་ཕན་སྦོམ་ཡོད་པའི་སྐོར།

¹ ངེའི་སྤུན་ཆ་ཚུ་ ག་ཅི་རང་བྱུང་རུང་ གཙོ་བོ་ནང་དགའ་ཚོར་འགྱུར་ ཁྱེད་ལུ་ལོག་ཅི་ལོག་ཅི་རང་ བློ་གཅིག་བྲིས་བ་ཅིན་ ང་ཞེ་མི་བསུན་ འདི་ཁྱེད་ཀྱི་དད་པ་ལུ་སྲུང་སྐྱོབས་འབད་ནིའི་དོན་ལུ་ཨིན།

² དཀོན་མཆོག་གི་གསུང་ལུ་མེདཔ་གཏང་མི་ ངན་པ་ཚུ་ལས་རིགཔ་བསྒྱིམ་སྡོད་ ཁོང་ཆ་ཁྱབ་རོ་ཁྱི་བཟུམ་སྦེ་ཨིན་ ཁོང་ཆ་ཁྱབ་ཀྱིས་ ཡ་ཧུ་ད་པའི་རྟགས་ཀྱིས་རྐྱངམ་གཅིག་ དཀོན་མཆོག་གི་མི་ཨིན་ཟེར་སླབ་མས།

³ ག་ཅི་སྨོ་ཟེར་བ་ཅིན་ ཕྱི་ཁར་ཤ་ལུས་ལུ་ ཡ་ཧུ་ད་པའི་རྟགས་བཀལ་མི་ལུ་ བློ་མ་གཏད་པར་ ང་བཅས་དཀོན་མཆོག་གི་མི་ངོ་མ་ དམ་པའི་ཐུགས་ཉིད་ནང་ དཀོན་མཆོག་གི་ཕྱག་ཞུ་མི་དང་ ཁིརཱིས་ཡེ་ཤུ་ལུ་བློ་གཏད་མི་ཚུ་ཨིན།

⁴ དེ་འབདཝ་ད་ ང་ཡང་ ཕྱི་ཁར་ཤ་ལུས་ལུ་རྟགས་བཀལ་མི་འདི་ལུ་ བློ་གཏད་ནི་དོན་དག་ཡོད་ མི་ག་གིས་རང་འབད་རུང་ ཁོང་རའི་ཤ་ལུས་ལུ་བློ་གཏད་དགོ་པའི་དོན་དག་ཡོད་ཟེར་མནོ་བ་ཅིན་ ང་ལུ་ཁོང་ལས་ཡང་ལྷག་པའི་དོན་དག་ལེ་ཤ་ཡོད།

⁵ དོན་དག་རིམ་པ་བཞིན་དུ་སླབ་པ་ཅིན་ ང་སྐྱེས་ཏེ་ཞག་བརྒྱད་ལུ་ ཡ་ཧུ་ད་པའི་རྟགས་སྐྱེལ་མི་དང་ ཨཱིས་ར་ཨཱེལ་པ་གི་མི་བརྒྱུད་ཨིན་མི་དང་ བེན་ཇ་མིན་གྱི་རིགས་ཨིན་མི་དང་ ཧིབ་རུ་པ་ལས་སྐྱེས་མི་རིགས་བཟང་ དེ་ལས་ ཡ་ཧུ་ད་པའི་བཀའ་ཁྲིམས་སྲུང་པའི་སྐོར་ལས་སླབ་པ་ཅིན་ ང་ ཕ་རུ་ཤི་པ་ཟེར་བའི་དགེ་བཤེས་ཨིན།

⁶ ཡ་ཧུ་ད་པའི་ལུགས་སྲོལ་ གཙོ་བོ་བསྟེན་ནི་གི་སྐོར་ལས་སླབ་པ་ཅིན་ ཆོས་ཚོགས་ལུ་ང་གིས་གནོད་འཚེ་སྐྱེལ་ཏེ་དཀའ་ངལ་བྱིན་མི་དང་ དེ་ལས་བཀའ་ཁྲིམས་དང་འཁྲིལ་ཏེ་ ཁྲིམས་གཅིག་ཡང་མ་ཉམས་པར་ སྲུང་ནི་གི་སྐོར་ལས་སླབ་པ་ཅིན་ ང་སྐྱོན་མེད་མིའི་ མི་གཅིག་ཨིན།

⁷ ཧེ་མ་འདི་ཚུ་ག་ར་ ངེ་གི་དོན་ལུ་ཁག་ཆེ་ཏོག་ཏོ་ཨིན་ དེ་འབདཝ་ད་ ཁིརཱིས་ཀྱིས་འབད་དེ་ ད་དེ་ཚུ་ག་ར་ ངེ་གི་དོན་ལུ་ ཁུངས་མེདཔ་སྦེ་བཞགཔ་ཨིན།

⁸ མ་གཞི་ ངེ་གི་གཙོ་བོ་ཁིརཱིས་ཡེ་ཤུ་ལུ་ངོ་ཤེས་ནི་འདི་ གནམ་མེད་ས་མེད་གལ་ཆེ་ཤོས་ཅིག་འབད་དེ་ གཞན་ག་ཅི་རང་འབད་རུང་ ང་གིས་འདི་ཚུ་ག་ར་རྒུད་བཟུམ་སྦེ་རྩིཝ་ཨིན་ ཁིརཱིས་ཀྱིས་འབད་དེ་ འདི་ཚུ་ག་ར་ངེ་གི་དོན་ལུ་རྒུད་སྦེ་བྱུང་ཡི་ དེ་འབདཝ་ད་ ཁིརཱིས་ཐོབ་ནི་གི་དོན་ལུ་དང་།

⁹ ཁོ་གི་མི་སྦེ་རྩིས་གནང་ནི་གི་དོན་ལུ་ ཁྲིམས་གཅིག་ཡང་མ་ཉམས་པར་སྲུང་ནི་འདི་ དོན་དག་མེདཔ་སྦེ་བརྩིས་ཡི་ དེ་ལས་འདི་གི་ཚབ་ལུ་ ཁིརཱིས་ལུ་དད་པ་བསྐྱེདཔ་ལས་བརྟེན་ཏེ་ དཀོན་མཆོག་གིས་ང་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་ཅི་ ག་ཅི་སྨོ་ཟེར་བ་ཅིན་ དཀོན་མཆོག་གིས་ མི་ཕྲངམ་སྦེ་མཛད་མི་འདི་ དད་པ་ལས་བརྟེན་ཏེ་ཨིན།

¹⁰ དེ་ལས་ང་གིས་ཁིརཱིས་ངོ་ཤེས་ནི་འདོད་པ་ཡོདཔ་མ་ཚད་ ཁོ་ལུ་གཤགས་ས་ལས་ སྐུ་གསོན་པོ་བཞེངས་གནང་མི་དབང་ཤུགས་ལུ་ ག་དེ་དྲག་དྲག་ཉམས་མྱོང་འབད་དེ་ བལྟ་དགོ་མནོ་ཡི་ དེ་ལས་ཁོ་སྡུག་བསྔལ་བཞེས་ཏེ་ གཤགས་དོཝ་བཟུམ་སྦེ་ ང་ཡང་ཤི་ཆོགཔ་སྦེ་སྡོདཔ་ཨིན།

¹¹ དེ་ལས་ག་དེམ་ཅིག་སྦེ་འབད་ཚུགས་པ་ཅིན་ ཁོ་བཟུམ་སྦེ་ ང་ཡང་ཤི་ས་ལས་གསོན་པོ་སྦེ་ལྷོང་གནང་ནི་འདི་ཐོབ་བཅུག།

དམིགས་ཡུལ་སྒྲུབ་ནིའི་དོན་ལུ་རྩ་འགེངས་པའི་སྐོར།

¹² ང་གིས་མ་པ་ལས་རང་ ཡེ་ཤུ་ཁིརཱིས་བཟུམ་སྦེ་ ཡར་སོང་ཡི་ཟེར་ཁྱབ་སྒྲགས་འབདཝ་མེན་ དེ་མ་ཚད་ ང་མ་པ་ལས་དེ་སྦེ་ཀྲིག་ཀྲི་ཡོད་ཟེར་ཡང་སླབ་མེན་ དེ་འབདཝ་ད་ དོན་ལས་རང་ ཁིརཱིས་ཡེ་ཤུ་གིས་ང་ལུ་ ག་ཅི་གི་དོན་ལུ་བཙག་འཐུ་མཛད་གནང་ཡོད་ག་ དེ་གི་དོན་ལུ་རང་ ང་གིས་ག་དེ་དྲག་དྲག་བརྩོན་ཤུགས་སྦོམ་བསྐྱེདཔ་ཨིན།

¹³ ངེ་གི་སྤུན་ཆ་ཚུ་ ད་ལྟོ་ང་འདི་ནང་མ་ལྷོད་ཟེར་ང་རང་གིས་ཤེས་ དེ་འབདཝ་ད་ ཨ་ནི་གཅིག་འདི་ ང་གིས་འབདཝ་ཨིན་ ང་གིས་ཐལ་སོང་མི་ལོ་རྒྱུས་ཚུ་བརྗེད་དེ་ ད་མ་འོངས་པའི་ལོ་རྒྱུས་ཚུ་ནང་གཙོ་བོ་བསྟེན་ཏེ།

¹⁴ གསོལ་རས་ཀྱི་དོན་ལུ་ འགྲན་བསྡུར་འབད་དོཝ་བཟུམ་སྦེ་ ང་ཡང་ཞིང་ཁམས་ཀྱི་གསོལ་རས་ཀྱི་དོན་ལུ་ དཀོན་མཆོག་གིས་ ཁིརཱིས་ཡེ་ཤུ་གི་ཐོག་ལས་ ང་ལུ་འབོ་མི་དེ་ལུ་ ང་གིས་བརྩོན་ཤུགས་སྦོམ་བསྐྱེད་པའི་བསྒང་ཡོད།

¹⁵ ཁྱེད་དད་པ་ནང་སྒྲིང་སྒྲིང་ཡོད་མི་ཚུ་གིས་ཡང་ དེ་སྦེ་བརྩོན་ཤུགས་སྦོམ་བསྐྱེད་དགོ་ ཁྱེད་ལ་ལུ་ཅིག་གིས་ དེ་སྦེ་འབད་ནི་མནོ་བསམ་མེད་པ་ཅིན་ འདི་ཡང་དཀོན་མཆོག་གིས་ ཁྱེད་ལུ་གསལ་ཏོག་ཏོ་སྦེ་སྟོན་གནང་འོང་།

¹⁶ དེ་འབདཝ་ལས་ དཀོན་མཆོག་ལས་ ང་བཅས་ཀྱིས་ག་དེ་ཅིག་ཧ་གོ་ཡི་ག་ འདི་དང་བསྟུན་ཏེ་ ཉན་སྡོད་དགོ།

¹⁷ ངེའི་སྤུན་ཆ་ཚུ་ ཁྱེད་ག་ར་དཔེ་ང་ལུ་བལྟ་སྟེ་སྡོད་ དེ་ལས་ང་བཅས་ཀྱིས་སྟོན་མི་བྱ་བ་སྤྱོད་ལམ་ལྷབ་སྡོད་མི་ཚུ་ལས་ ཁྱེད་ཀྱིས་ལྷབ།

¹⁸ དེ་འབདཝ་ད་ མི་ལེ་ཤ་ཅིག་རང་ ཁོང་རའི་བྱ་བ་སྤྱོད་ལམ་གྱི་ཐོག་ལས་ ཁིརཱིས་ཀྱི་ཁྲམ་ཤིང་གི་དགྲ་འབདཝ་མས་ཟེར་ ཧེ་མ་ང་གིས་ཁྱེད་ཆ་ཁྱབ་ལུ་ ཚར་ལེ་ཤ་རང་ཁོང་གི་སྐོར་ལས་སླབ་ཅི་ ད་ལྟོ་འབད་རུང་ ང་གིས་ཁྱེད་ཆ་ཁྱབ་ལུ་ མིག་ཏོ་ལས་མིག་ཆུ་འཛག་སྟེ་སླབ་དོ།

¹⁹ ཁོང་གི་མཐའན་མཇུག་དེ་ མཐའ་མེད་པའི་འཆི་བ་ཨིན་ ཁོང་གི་དཀོན་མཆོག་དེ་ ཁོང་རའི་ཕོཝ་ཨིན་ ཁོང་རང་གིས་འབད་མི་ལཱ་ ངོ་ཚ་སི་སི་ལུ་བལྟ་སྟེ་ དཔའ་ཡག་སྡོདཔ་ཨིན་མས་ དེ་ལས་ཁོང་གི་སེམས་འདི་ འཇིག་རྟེན་པའི་ལོ་རྒྱུས་ཚུ་ནང་གཏང་སྡོདཔ་ཨིན་མས།

²⁰ དེ་འབདཝ་ད་ ང་བཅས་ཀྱི་མི་རྩིས་དེ་ ཡར་ཞིང་ཁམས་ལུ་ཡོད་ དེ་ཁར་ལས་སྐྱབས་མགོན་གཙོ་བོ་ཡེ་ཤུ་ཁིརཱིས་ལུ་ ང་བཅས་སྒུག་སྡོདཔ་ཨིན།

²¹ ཁིརཱིས་ཀྱི་དབང་ཤུགས་ཀྱིས་ ཡོད་རིགས་ཡོད་ཚད་ག་ར་ ཁོ་རའི་དབང་ཚད་ཀྱི་འོག་ལུ་བཞག་ནུག་ ཨ་ནི་དབང་ཤུགས་དེ་གིས་ ང་བཅས་འགྲོ་བ་མིའི་ཉག་ཕྲ་སི་སིའི་ལུས་འདི་ ཁོ་གི་སྐུ་ལུས་བཟུམ་སྦེ་ གཟི་བརྗིད་དང་ལྡནམ་ལུ་འགྱུར་གནང་འོང་།