ཕི་ལི་པི་ལེའུ་ 2 - རྫོང་ཁ་

ཁིརཱིས་བཟུམ་སྦེ་ཉམ་ཆུང་ཏོག་ཏོ་སྦེ་སྡོད་དགོ་པའི་སྐོར།

¹ ཁིརཱིས་ལས་བློ་གི་སྤོབས་པ་ཐོབ་ཐོབ་ཡོད་པ་ཅིན་ ཡང་ན་ཁོ་གི་བྱམས་པ་ལས་ཁྱེད་ཀྱིས་སེམས་གསོ་ཐོབ་ཐོབ་ཡོད་པ་ཅིན་ ཡང་ན་ཐུགས་ཉིད་ནང་ཁྱེད་མཐུན་སྒྲིག་ཡོད་པ་ཅིན་ ཡང་ན་ཁྱེད་ནང་ན་སྙིང་རྗེ་དང་ལེགས་སེམས་བསྐྱེད་དེ་ཡོད་པ་ཅིན།

² ཁྱེད་ཀྱིས་སེམས་གཅིག་སྦེ་མཐུན་ཏེ་ གཅིག་གིས་གཅིག་ལུ་བྱམས་སེམས་བསྐྱེད་དེ་ དགོ་དོན་གཅིག་དང་ མནོ་བསམ་གཅིག་སྦེ་འབད་ དེ་ལས་ངེ་གི་དགའ་སྤྲོ་དེ་ ག་ར་སྒྲུབ་ནི་ཨིན།

³ ཁྱེད་ཀྱིས་ ག་ཅི་རང་འབད་རུང་ རང་གི་དོན་ལུ་འདོདཔ་བཙོང་ནི་དང་ རང་བསྟོད་རྐྱབ་པའི་ཐོག་ལས་སྦེ་ལཱ་མ་འབད་ དེ་འབདཝ་ད་ རང་ཉམ་ཆུང་འབད་དེ་ གཅིག་གིས་གཅིག་ལུ་ རང་ལས་གཞན་མཐོ་ཤོས་གཅིག་ཨིན་ཟེར་མནོ་དགོ།

⁴ ཁྱེད་ག་གིས་རང་འབད་རུང་ རང་དོན་རྐྱངམ་གཅིག་ལུ་སྤྲོ་བ་བཏོན་ཏེ་མ་འབད་ དེ་འབདཝ་ད་ མི་གཞན་གྱི་སྤྲོ་བ་ལུ་ཡང་ གཙོ་བོ་བསྟེན་ཏེ་འབད་དགོ།།

ཁིརཱིས་ཀྱི་མཛད་སྤྱོད་དེ་ཉམ་ཆུང་ཨིན་པའི་སྐོར།

⁵ ཁིརཱིས་ཡེ་ཤུ་གི་ཐུགས་ཡོད་དོཝ་བཟུམ་ ཁྱེད་ཀྱི་སེམས་ཡང་འདི་བཟུམ་དགོ།

⁶ ཁིརཱིས་ཁོ་རང་ དཀོན་མཆོག་ངོ་མ་རང་ཨིན་རུང་ ཁོ་དཀོན་མཆོག་དང་འདྲན་འདྲ་སྦེ་ ཨིན་ཅི་མིན་ཅི་བཞུགས་དགོ་པའི་ ཐུགས་བསམ་མ་བཞེས་པས།

⁷ ཁོ་ག་ཨིནམ་དེ་ཁོ་རང་སྤང་སྟེ་ ཉམ་ཆུང་གཡོགཔོ་སྦེ་འཁྲུངས་ཏེ་ མི་གི་ལུས་ནང་བྱོན་ནུག

⁸ མིའི་ལུས་ནང་བྱོན་ཞིནམ་ད་ ཁོ་རང་ཉམ་ཆུང་སྦེ་མ་གཤགས་ཚུན་ཚོད་རང་ དཀོན་མཆོག་གི་བཀའ་ལུ་གསན་ཏེ་ ཁོ་ཉེས་པ་ཅན་བཟུམ་སྦེ་ ཁྲམ་ཤིང་གུ་གཤགས་ནུག

⁹ དེ་འབདཝ་ལས་བརྟེན་ཏེ་ དཀོན་མཆོག་གིས་ཁོ་ལུ་ག་ར་ལས་ ཡར་འཕར་མཛད་དེ་ ཁོ་གི་མཚན་ཡང་མི་གཞན་ག་ར་ལས་ མཐོ་ཤོས་ཅིག་མཛད་གནང་ནུག

¹⁰ དེ་ལས་ཞིང་ཁམས་ནང་ལུ་ཡོད་མི་ཚུ་དང་ འཛམ་བུ་གླིང་ནང་ཡོད་མི་ཚུ་དང་ སའི་འོག་ལུ་ཡོད་མི་རེ་རེ་བཞིན་དུ་ ཡེ་ཤུ་གི་མཚན་ནང་ པུས་མོ་ས་ཁར་བཙུགས་ཏེ་ ཕྱག་འཚལ་ནི་ཨིནམ་མ་ཚད།

¹¹ ག་གིས་རང་འབད་རུང་ ཡེ་ཤུ་ཁིརཱིས་གཙོ་བོ་ཨིན་ཟེར་ ཁ་ཐོན་ཏེ་སླབ་ད་ ཡབ་དཀོན་མཆོག་གཟི་བརྗིད་ཅན་སྦེ་ འགྱུར་ནི་ཨིན།།

མི་ཚེ་འདི་འོད་ཅེམ་ཅེ་སྦེ་ཤར་དགོ་པའི་སྐོར།

¹² དེ་འབདཝ་ལས་བརྟེན་ཏེ་ ངེ་གི་བྱམས་པའི་སྤུན་ཆ་ཚུ་ ང་ཁྱེད་དང་མཉམ་སྡོད་པའི་སྐབས་ལུ་ ཁྱེད་ཀྱིས་ ཨ་རྟག་རང་ ངེ་གི་བསླབ་བྱ་ལུ་ ན་འཐན་སྦེ་ཉན་སྡོད་ཅི་ ད་ལྟོ་ཡང་ ང་ཁྱེད་དང་གཅིག་ཁར་མེདཔ་ད་ དེ་ལས་ཡང་ཐེབས་སྦེ་ དཀོན་མཆོག་བལྟ་སྟེ་འདྲོགས་ཞིནམ་ལས་ ཁོ་གིས་ཁྱེད་ལུ་གནང་མིའི་ཐར་པ་འདི་སྒྲུབ་དགོ།

¹³ ག་ཅི་སྨོ་ཟེར་བ་ཅིན་ ཁོ་གི་ཐུགས་དགྱེསཔ་བཞིན་དུ་ ལཱ་འབད་ཚུགས་མི་སེམས་དང་ འབད་དགོ་མི་ཁེ་རྒོ་འདི་ དཀོན་མཆོག་ཁོ་རང་གིས་ཁྱེད་ལུ་གནངམ་ཨིན།

¹⁴ ཁྱེད་ཀྱིས་ལཱ་ག་ཅི་རང་འབད་རུང་ རྩོད་པ་མ་རྐྱབས་ ཉག་ཉོག་མ་བཤད།

¹⁵ དེ་ལས་སྐྱོན་མེདཔ་དང་ མི་ག་གིས་ཡང་ཁྱེད་ཀྱི་སྐོར་ལས་ སྐྱོན་བཏགས་མ་ཚུགས་མི་ དཀོན་མཆོག་གི་སྲས་དང་སྲསམོ་སྦེ་སྡོད་དེ་ མི་གཡོ་སྒྱུ་དང་ཚུལ་དང་མ་མཐུན་མི་གི་འཇིག་རྟེན་པ་ཚུ་གི་གདོང་ཁ་ལུ་ ཁྱེད་ཀྱི་མི་ཚེ་དེ་འོད་ཟེར་བཟུམ་སྦེ་ཤར་ཏེ།

¹⁶ ཚེ་བྱིན་མིའི་གསུང་དེ་ལུ་ སྒྲིང་སྒྲིང་སྦེ་བཤེད་དེ་བཞག་ དེ་འབདཝ་ལས་ ང་གིས་བང་རྒྱུག་མི་དང་ དཀའཝ་སྤྱད་མི་དེ་ བར་སྟོར་མ་འགྱོ་བར་ ཁིརཱིས་ལོག་བྱོན་པའི་ཉིནམ་ལུ་ ང་དཔའ་ཡག་སྡོད་ནི་ཐོབ་འོང་།

¹⁷ དེ་འབདཝ་ད་ ཁྱེད་ཀྱིས་དད་པའི་ཐོག་ལས་ དཀོན་མཆོག་གི་ཕྱག་ཞུ་སྟེ་སྡོད་མི་དེ་ ཁོ་ལུ་མཆོདཔ་བླུག་སྟེ་ཕུལ་མི་བཟུམ་སྦེ་ཨིན་ དེ་ལས་ང་ལུ་བསད་དེ་ ངེ་གི་མི་ཚེ་ཡང་ ཁྱེད་ཀྱིས་བླུག་སྟེ་ཕུལ་མི་མཆོདཔ་དང་གཅིག་ཁར་ འགྱུར་ཏེ་འབད་རུང་ ང་དགའ་སྤྲོ་འགྱུར་ནི་ཨིནམ་མ་ཚད་ ཁྱེད་ལུ་བལྟ་སྟེ་ངལ་རངས་ནི་ཨིན།

¹⁸ ཨ་ནི་བློ་ལུ་ ཁྱེད་ཆ་ཁྱབ་ཡང་ ང་དང་མཉམ་གཅིག་སེམས་དགའ་སྟེ་ དགའ་སྤྲོ་འགྱུར་དགོ།།

པའུལ་གྱིས་ ཏི་མོ་ཐི་ལུ་བཏང་པའི་སྐོར།

¹⁹ གཙོ་བོ་ཡེ་ཤུ་གི་ཐུགས་དགོངས་ཨིན་པ་ཅིན་ ཁྱེད་ཀྱི་སྐོར་ལས་གནས་ཚུལ་གོ་ནི་གི་དོན་ལུ་ ཏི་མོ་ཐི་མགྱོགས་པ་རང་ ཁྱེད་སྡོད་ས་ལུ་གཏང་ནི་ཨིན་ དེ་ལས་ཁྱེད་ཀྱི་སྐོར་ལས་གནས་ཚུལ་གོཝ་ད་ ང་སེམས་དགའ་འོང་།

²⁰ ཁྱེད་ཀྱི་དོན་ལས་ ཚ་གྱང་ལངས་ཏེ་ བདག་འཛིན་འཐབ་མི་ ཏི་མོ་ཐི་མ་གཏོགས་ མི་གཞན་ག་ཡང་མེད།

²¹ གཞན་ཚུ་གིས་ཡེ་ཤུ་ཁིརཱིས་ཀྱི་དོན་ལུ་མ་བལྟ་བར་ རང་གི་དོན་ལུ་རྐྱངམ་གཅིག་འབདཝ་ཨིན།

²² ཏི་མོ་ཐི་དེ་ མི་ག་བཟུམ་ཅིག་ཨིན་ན་ འདི་ཁྱེད་ཀྱིས་ཤེས་ ཁོ་གིས་ བུ་གིས་རང་གི་ཨ་པ་གི་དོན་ལུ་ལཱ་འབད་དོཝ་བཟུམ་སྦེ་ ང་དང་མཉམ་གཅིག་གཏམ་བཟང་བཤད་ནི་གི་ལཱ་འབད་ཡི།

²³ ང་ལུ་ག་ཅི་འབྱུང་ནི་ཨིན་ན་ ཧ་གོཝ་ཅིག་ ང་གིས་ ཏི་མོ་ཐི་ ཁྱེད་འབད་སར་གཏང་ནིའི་རེ་བ་ཡོད།

²⁴ ང་ཡང་མགྱོགས་པ་རང་ ཁྱེད་འབད་སར་འོང་ཚུགས་པའི་བློ་གཏད་ གཙོ་བོ་ལུ་བསྐྱེད་དེ་སྡོདཔ་ཨིན།།

པའུལ་གྱིས་ ཨེ་པ་ཕོརོ་དི་ཏུས་བཏང་པའི་སྐོར།

²⁵ དེ་འབདཝ་ད་ དང་པ་ ཨེ་པ་ཕོརོ་དི་ཏུས་འདི་ ཁྱེད་སྡོད་ས་ལོག་གཏང་དགོཔ་དེ་ ཁག་ཆེཝ་ཡོདཔ་ང་གིས་ཤེས་ཅི་ ཁོ་ངེ་གི་སྤུན་ཆ་བཟུམ་ ང་དང་གཅིག་ཁར་ལཱ་འབད་མི་ ང་བཅས་གཉིས་ཁིརཱིས་ཀྱི་འོག་ལུ་དམག་མི་བཟུམ་སྦེ་ཨིན་ དེ་ལས་ ང་ལུ་ཁག་ཆེ་བའི་སྐབས་ལུ་ ཁྱེད་ཀྱིས་ ཁོ་ང་ལུ་བལྟ་བ་བཏང་ཡི།

²⁶ ཁོ་ལུ་ན་ཚ་ཕོག་ཡོད་པའི་གནས་ཚུལ་དེ་ ཁྱེད་ཀྱིས་རྣ་བ་གོ་ནི་འདི་གིས་ ཁོ་ཁྱེད་ཀྱི་དོན་ལུ་ཚ་གྱང་ལངས་ཏེ་ ཁྱེད་ག་ར་དང་མཉམ་གཅིག་ ཁ་འཕྱད་པ་འོང་ནི་གི་རེ་བ་སྦོམ་བསྐྱེད་དེ་ཡོདཔ་ཨིན་མས།

²⁷ དོན་ལས་རང་ ཁོ་ལུ་ན་ཚ་ཕོག་སྟེ་ ཤི་ནི་གུ་རང་ཐུག་ཅི་ དེ་འབདཝ་ད་ དཀོན་མཆོག་གིས་ ཁོ་ལུ་སྙིང་རྗེ་གཟིགས་གནངམ་མ་ཚད་ ང་ལུ་ཡང་མྱ་ངན་གཅིག་གི་གུ་ལུ་ གཅིག་ཕོག་མ་བཅུག་པར་ སྙིང་རྗེ་གཟིགས་གནང་ཡི།

²⁸ དེ་འབདཝ་ལས་བརྟེན་ཏེ་ ཁོ་ལུ་མཐོངམ་ད་ ཁྱེད་སེམས་དགའ་བཅུག་པའི་དོན་ལུ་དང་ ངེ་གི་ཚ་གྱང་ཡང་ མར་ཉུང་འོང་ཟེར་མནོ་སྟེ་ ཁོ་ལུ་མགྱོགས་པར་ ཁྱེད་སྡོད་སར་གཏང་དགོ་མནོ་བའི་སེམས་ཡོད།

²⁹ གཙོ་བའི་ཞབས་ཕྱི་སྦེ་ སེམས་དགའ་སྟེ་ཁོ་ལུ་ལེན་ དེ་ལས་ཁོ་བཟུམ་གྱི་མི་ལུ་ཞེ་ས་འབད།

³⁰ ག་ཅི་སྨོ་ཟེར་བ་ཅིན་ ཁྱེད་རང་ས་ཐག་རིང་ས་སྡོད་ནི་དེ་གིས་ ཁྱེད་ཀྱིས་འབད་མ་ཚུགས་མི་ལཱ་འདི་ཚུ་ ཁོ་གིས་འབད་དེ་ ཁིརཱིས་ཀྱི་ཕྱག་ཞུ་བའི་དོན་ལུ་ ཁོ་རང་གི་ཚེ་སྲོག་འདི་ ཤི་ནི་གི་ཉེན་ཁ་ནང་བཙུགས་ཅི།།