ཕི་ལི་པི་ལེའུ་ 1 - རྫོང་ཁ་

པའུལ་གྱིས་བཀྲ་ཤིས་བདེ་ལེགས་ཞུ་བའི་སྐོར།

¹ ཡེ་ཤུ་ཁིརཱིས་ཀྱི་ཕྱག་ཞུ་མི་ ང་ པའུལ་དང་ ཏི་མོ་ཐི་ལས་ ཕི་ལི་པི་ལུ་ཡོད་མི་ ཁིརཱིས་ཡེ་ཤུ་ལུ་དད་པ་བསྐྱེད་མི་ དཀོན་མཆོག་ཁོ་རའི་དམ་པའི་མི་ག་ར་དང་ ཆོས་ཚོགས་ཀྱི་འགོ་འདྲེན་པ་དང་དྲང་བཞགཔ་དེ་ཚུ་ལུ་ ཡི་གུ་འདི་འབྲི་དོ།

² ང་བཅས་ཀྱི་ཡབ་དཀོན་མཆོག་དང་གཙོ་བོ་ཡེ་ཤུ་ཁིརཱིས་ཀྱིས་ ཁྱེད་ག་ར་ལུ་ཐུགས་རྗེ་དང་ཞི་བདེ་གནང་བཅུག།

བཀའ་དྲིན་དགའ་ཚོར་དང་སྨོན་ལམ་ཞུ་བའི་སྐོར།

³ ང་གིས་ཁྱེད་ལུ་སེམས་ཁར་དྲནམ་ད་རང་ དཀོན་མཆོག་ལུ་བཀའ་དྲིན་ཆེ་ཟེར་ཞུཝ་ཨིན།

⁴ ང་གིས་ཁྱེད་ག་ར་གི་དོན་ལུ་ དཀོན་མཆོག་ལུ་སྨོན་ལམ་བཏབ་ད་ ང་ཨ་རྟག་རང་སེམས་ཁར་ལུ་དགའ་སྤྲོ་གི་ངང་ལས་སྨོན་ལམ་བཏབ་ཨིན།

⁵ ག་ཅི་སྨོ་ཟེར་བ་ཅིན་ ཁྱེད་ཀྱིས་གཏམ་བཟང་གོ་སྟེ་ དད་པ་བསྐྱེད་པའི་ཉིནམ་འདི་ལས་འགོ་བཙུགས་ཏེ་ ད་ལྟོ་ཚུན་ཚོད་ཀྱི་བར་ན་ གཏམ་བཟང་བཤད་ནི་ལུ་ཆ་རོགས་འབད་བྱིན་ཡི།

⁶ དཀོན་མཆོག་གིས་ཁྱེད་ཀྱི་མི་ཚེ་ནང་ལུ་ ཕྱག་ལཱ་ལེགས་ཤོམ་འགོ་བཙུགས་མཛད་མི་དེ་ མ་ཚརཝ་བར་ན་ གཙོ་བོ་ཡེ་ཤུ་ཁིརཱིས་འབྱོན་ནི་གི་ཉིནམ་ཚུན་ཚོད་ འཕྲོ་མཐུད་དེ་རང་མཛད་གནང་འོང་ཟེར་ང་གིས་ཏན་ཏན་ཤེས།

⁷ ང་ཁྱེད་ལུ་སེམས་ཀྱི་གདིང་ལས་རང་དགའ་ནི་འདི་གིས་ ཁྱེད་ག་ར་ལས་སྦེ་དགའ་སྤྲོ་འགྱུར་ནི་དེ་ཀྲིག་ཀྲི་རང་ཨིན་ ག་ཅི་སྨོ་ཟེར་བ་ཅིན་ ང་བཙོན་ནང་སྡོད་རུང་རང་ ཡང་ན་ཕྱི་ཁ་སྡོད་དེ་ གཏམ་བཟང་གི་སྐོར་ལས་བདེན་ཁུངས་བཀལ་རུང་རང་ དཀོན་མཆོག་གིས་ང་བཅས་ལུ་གནང་མི་ལཱ་ནང་ ཁྱེད་ཀྱིས་ང་ལུ་ཆ་རོགས་འབད་བྱིན་ཡི།

⁸ ཁིརཱིས་ཡེ་ཤུ་གིས་ཁྱེད་ལུ་ཐུགས་བརྩེ་བ་ཡོད་དོ་བཟུམ་སྦེ་ ང་ཡང་ཁྱེད་ལུ་བརྩེ་བ་བསྐྱེད་དེ་ཡོདཔ་མ་ཚད་ ང་ཨ་རྟག་རང་ཁྱེད་ལུ་བལྟ་དགོ་མནོ་སྟེ་སྡོདཔ་ཨིན་ དེ་ག་ར་དཀོན་མཆོག་གིས་མཁྱེན།

⁹ ཁྱེད་ཀྱི་དོན་ལུ་ང་གིས་སྨོན་ལམ་དེ་སྦེ་ཞུཝ་ཨིན་ ཁྱེད་ཀྱི་བྱམས་པ་དེ་ཡར་ཡར་རང་སྦོམ་འགྱོ་བའི་ཐོག་ལས་ ཤེས་རབ་ཅན་ལུ་འགྱུར་ཏེ་བཟང་ངན་ཀྲིག་ཀྲི་སྦེ་དབྱེ་བ་ཕྱེ་བཅུག

¹⁰ དེ་ལས་འདི་གི་ཐོག་ལས་ ཁྱེད་ཀྱི་མི་ཚེ་ནང་ལུ་ དོན་ལས་རང་ཁག་ཆེ་ཤོས་འདི་ག་ཅི་ཨིན་ན་ཧ་གོ་སྟེ་ གཙོ་བོ་ཁིརཱིས་ལོག་སྟེ་མ་བྱོན་ཚུན་ཚོད་ ཁྱེད་གཙང་ཏོག་ཏོ་དང་སྐྱོན་ག་ནི་ཡང་མེདཔ་སྦེ་སྡོད་བཅུག

¹¹ དེ་ལས་ཡེ་ཤུ་ཁིརཱིས་ཀྱི་ཐོག་ལས་སྦེ་འོང་མི་ དཀོན་མཆོག་གི་ཐུགས་དང་ལྡན་པའི་འབྲས་བུ་གིས་ ཁྱེད་ཀྱི་མི་ཚེ་ནང་གང་སྟེ་ དཀོན་མཆོག་གི་གཟི་བརྗིད་ཡར་འཕེལ་བཅུག་ ཁོ་གི་མཚན་ཡང་ཡར་བསྟོད་བཅུག།

གཏམ་བཟང་སྤེལ་བའི་སྐོར།

¹² ངེ་གི་སྤུན་ཆ་ཚུ་ ང་ལུ་བྱུང་སྟེ་ཡོད་མི་ཚུ་གིས་ གཏམ་བཟང་བཤད་ནི་ནང་ལུ་ ཕན་པ་ལེ་ཤ་ཐོབ་ཡོདཔ་ ཁྱེད་ཆ་ཁྱབ་ལུ་ཤེས་བཅུག་དགོ་མནོ་ཡི།

¹³ ག་ཅི་སྨོ་ཟེར་བ་ཅིན་ ང་བཙོན་ནང་ཚུད་དགོ་པའི་དོན་དག་དེ་ ཁིརཱིས་ཀྱི་དོན་ལས་ཨིན་ཟེར་ ནཱ་གི་མི་ཚུ་ག་ར་དང་ རྒྱལཔོ་ ཀེ་སཱར་གྱི་ཕོ་བྲང་ནང་གི་སྲུང་རྒྱབ་དེ་ཚུ་གིས་ཤེས།

¹⁴ ང་བཙོན་ནང་ཚུད་པའི་ཐོག་ལས་སྦེ་ ནཱ་ལུ་གཙོ་བོ་ནང་ཡོད་མི་དདཔ་ཅན་སྤུན་ཆ་ལེ་ཤ་ཅིག་གིས་ དཀོན་མཆོག་གི་གསུང་བཤད་ནི་ལུ་ མ་འདྲོག་པར་བློ་ཁོག་སྦོམ་འགྱུར་སོང་ནུག

¹⁵ དེ་ཚུ་གི་གྲལ་ཁ་ལས་ མི་ལ་ལུ་ཅིག་གིས་ཁིརཱིས་ཀྱི་སྐོར་ལས་ཆོས་བཤདཔ་ད་ ང་ལུ་ཕྲག་དོག་བསྐྱེད་དེ་ རྩོད་འགྲན་གྱི་ཐོག་ལས་བཤད་ཡོདཔ་ཨིན་མས་ ཨིན་རུང་ མི་ལ་ལུ་ཅིག་གིས་ལེགས་སེམས་མནོ་སྟེ་ཆོས་བཤདཔ་ཨིན་མས།

¹⁶ ཁོང་ལེགས་སེམས་མནོ་མི་ཚུ་གིས་ ང་ནཱ་ལུ་བཙུགས་དགོ་པའི་དོན་དག་དེ་ གཏམ་བཟང་ལུ་བདེན་ཁུངས་བཀལ་བའི་དོན་ལུ་ཨིན་ཟེར་ ང་ལུ་བྱམས་སེམས་བསྐྱེད་དེ་ ཆོས་བཤདཔ་ཨིན་མས།

¹⁷ དེ་འབདཝ་ད་ ཕྲག་དོག་བསྐྱེད་མི་འདི་ཚུ་གིས་ ལེགས་སེམས་བསྐྱེད་དེ་མེན་པར་ ང་བཙོན་ཁང་ནང་ལུ་ ད་རུང་ང་ལུ་མར་ཕབ་བཅུག་ནི་གི་མནོ་བསམ་བཏང་བཏངམ་ཨིནམ་མ་ཚད་ ཁོང་རང་གི་འདོད་པ་ལུ་བལྟ་སྟེ་ ཁིརཱིས་ཀྱི་སྐོར་ལས་བཤདཔ་ཨིན་མས།

¹⁸ ཁོང་གིས་དོན་ལས་རང་བཤད་རུང་ ཡང་ན་འདོད་པ་གི་ཐོག་ལས་ དོན་དག་རྫུས་མ་སྦེ་བཤད་རུང་ ག་དེ་སྦེ་བཤད་རུང་ ང་ལུ་ག་ཅི་ཁྱད་པར་ཡང་མེད་ ག་ཅི་སྨོ་ཟེར་བ་ཅིན་ ཁོང་གཉིས་ཆ་རང་གིས་ ཁིརཱིས་ཀྱི་སྐོར་ལས་བཤདཔ་མས་ དེ་གིས་འབད་ ང་སེམས་དགའ་སྟེ་ཡོད་ དེ་མ་ཚད་ ང་འཕྲོ་མཐུད་དེ་རང་ དགའ་ཚོར་བསྐྱེད་དེ་སྡོདཔ་ཨིན།

¹⁹ ག་ཅི་སྨོ་ཟེར་བ་ཅིན་ ཁྱེད་ཀྱི་སྨོན་ལམ་དང་ ཡེ་ཤུ་ཁིརཱིས་ཀྱི་ཐུགས་ཉིད་ཀྱི་རོགས་རམ་ལས་རྒྱུད་དེ་ ངེ་གི་མི་ཚེ་ནང་ག་བྱུང་མི་འདི་ ང་ཐར་ནིའི་དོན་ལུ་ཨིན་ཟེར་ང་གིས་ཤེས།

²⁰ ག་ཅི་ནང་ཡང་ ང་ངོ་མི་ཚ་ཟེར་ ངེ་གི་རེ་བ་དང་འདོད་པ་ཨིན་ ང་མ་འདྲོག་པར་བློ་ཁོག་སྦོམ་བསྐྱེད་དེ་ ང་ཤི་སོང་རུང་ གསོན་པོ་སྦེ་སྡོད་རུང་ ངེ་གི་མི་ཚེ་འདི་ ཧེ་མ་བཟུམ་སྦེ་ ཨ་རྟག་རང་ ཁིརཱིས་ཡེ་ཤུ་ལུ་བསྟོད་པ་ཐོབ་བཅུག་ནི་གི་འདོད་པ་ཡོད།།

པའུལ་གྱི་མི་ཚེ་འདི་ཁིརཱིས་ཀྱི་ཨིན་མིའི་སྐོར།

²¹ ག་ཅི་སྨོ་ཟེར་བ་ཅིན་ ང་གསོན་པོ་སྦེ་སྡོད་ནི་དེ་ ཁིརཱིས་ཀྱི་དོན་ལུ་ཨིན་ དེ་ལས་ ཤི་ནི་དེ་ ངེ་གི་དོན་ལུ་ ཁེ་སང་ཨིན།

²² ང་འཕྲོ་མཐུད་དེ་རང་ གསོན་པོ་སྦེ་སྡོད་པ་ཅིན་ དཀོན་མཆོག་གི་དོན་ལུ་ འབྲས་བུ་ཐོབ་པའི་ལཱ་ལེ་ཤ་ ང་གིས་འབད་ཚུགས་ དེ་འབདཝ་ད་ ག་འདི་ལུ་གདམ་ཁ་རྐྱབ་ནི་ཨིན་ན་ ང་གིས་མི་ཤེས་པས།

²³ ཨ་ནི་གཉིས་ལས་གཅིག་ གདམ་ཁ་རྐྱབ་ནི་ལཱ་ཁག་རྐྱབ་དོ་ གཅིག་ལས་བལྟ་བ་ཅིན་ མི་ཚེ་འདི་ལས་དགོངམ་ཞུ་སྟེ་ ཁིརཱིས་དང་མཉམ་སྡོད་པ་འགྱོ་དགོ་མནོ་ཡི་ ག་ཅི་སྨོ་ཟེར་བ་ཅིན་ ག་ར་ལས་དྲག་ཤོས་འདི་ དེ་ཨིན་མས།

²⁴ དེ་འབདཝ་ད་ གཅིག་ལས་བལྟ་བ་ཅིན་ ང་གསོན་པོ་སྦེ་སྡོད་ནི་དེ་ ཁྱེད་ཀྱི་དོན་ལུ་ཁག་ཆེ་ཏོག་ཏོ་ཨིན།

²⁵ ག་ཅི་སྨོ་ཟེར་བ་ཅིན་ ཁྱེད་དད་པ་ནང་ཡར་རྒྱས་འགྱོ་བཅུག་ནི་དང་ དད་པ་ནང་དགའ་ཚོར་བསྐྱེད་དེ་རང་སྡོད་བཅུག་ནི་སྦེ་ ང་མ་ཤི་བར་ ཁྱེད་དང་མཉམ་གཅིག་སྡོད་ནི་ཨིན་ཟེར་ ཏན་ཏན་ང་གིས་ཤེས་ཅི།

²⁶ དེ་ལས་ ང་ད་རུང་ ཁྱེད་སྡོད་ས་ལུ་ལོག་འོངམ་ད་ ངེ་གི་དོན་ལུ་ ཁིརཱིས་ཡེ་ཤུ་གིས་ མཛད་གནང་མི་ཚུ་གི་སྐོར་ལས་ཁྱེད་ལུ་སླབ་ད་ ཁྱེད་ཀྱིས་ དགའ་ཚོར་གནམ་མེད་ས་མེད་བསྐྱེད་ནི་གི་དོན་དག་ཐོབ་ནི་ཨིན།།

ཞིང་ཁམས་ཀྱི་མི་ཁུངས་བཟུམ་སྦེ་སྡོད་དགོ་པའི་སྐོར།

²⁷ གཙོ་བོ་རང་ ཁྱེད་ཀྱི་བྱ་བ་སྤྱོད་ལམ་དེ་ ཁིརཱིས་ཀྱི་གཏམ་བཟང་དང་མཐུནམ་སྦེ་སྡོད་ ང་ཁྱེད་འབད་ས་འོངས་ཏེ་ ང་རང་གི་མིག་ཏོ་གིས་མཐོང་རུང་རང་ ཡང་ན་འོང་མ་ཚུགས་ཏེ་འབད་རུང་རང་ ཁྱེད་ཀྱིས་ག་ར་སེམས་གཅིག་སྦེ་མཐུན་ཏེ་ གཞན་ཚུ་གིས་ གཏམ་བཟང་ལུ་དད་པ་བསྐྱེད་པའི་དོན་ལུ་ གཅིག་ཁར་སྦེ་ལཱ་དཀའཝ་སྤྱད་དེས་ཟེར་གོ་བཅུག

²⁸ དེ་ལས་ཁྱེད་ལུ་གནོད་འཚེ་བཀལ་མི་ཚུ་ལུ་ མ་འདྲོག་པའི་ལོ་རྒྱུས་ ང་གིས་རྣ་བ་གོ་བཅུག་ ཁྱེད་ཀྱིས་དེ་སྦེ་འབདཝ་ད་རང་ གནོད་འཚེ་བཀལ་མི་ཚུ་གི་དོན་ལུ་ རྩ་མེད་གཏང་པའི་ཁུངས་ཨིན་ དེ་འབདཝ་ད་ ཁྱེད་ཀྱི་དོན་ལུ་འདི་ དཀོན་མཆོག་ལས་ཐོབ་མི་ཐར་པ་གི་རྟགས་ཨིན་ འདི་ཚུ་གཉིས་ཆ་རང་དཀོན་མཆོག་ལས་ཨིན།

²⁹ ག་ཅི་སྨོ་ཟེར་བ་ཅིན་ ཁིརཱིས་ལུ་དད་པ་བསྐྱེད་ནི་གི་གོ་སྐབས་རྐྱངམ་གཅིག་མེན་པར་ ཁོ་གི་དོན་ལུ་ སྡུག་བསྔལ་ཡང་འབག་དགོ་པའི་འོས་འབབ་ ཁྱེད་ལུ་གནང་ཡོད།

³⁰ ཧེ་མ་ཁིརཱིས་ཀྱི་དོན་ལས་ ང་ལུ་བྱུང་མི་སྡུག་བསྔལ་དེ་ཚུ་ ཁྱེད་ཀྱིས་མཐོངམ་མ་ཚད་ ད་ངེ་གི་སྐོར་ལས་ ཁྱེད་ཀྱིས་རྣ་བ་གོ་མི་དེ་ ཁྱེད་ཀྱིས་ཡང་ དེ་སྦེ་རང་སྡུག་བསྔལ་འབག་སྟེ་ཡོད།།