ཡ་ཀོབ་ལེའུ་ 5 - རྫོང་ཁ་

མི་ཕྱུགཔ་ཚུ་ལུ་ཚོགས་བརྡ་གཏང་པའི་སྐོར།

¹ ཨ་ཁའི་ མི་ཕྱུགཔ་དེ་ཚུ་ ནཱ་ཉན་ཤིག་ ཁྱེད་གུ་ འོང་ནི་འབད་མིའི་སྡུག་བསྔལ་ལུ་ ཁྱེད་སྔུ་སྟེ་མྱ་ངན་འབད།

² ཁྱེད་ཀྱི་རྒྱུ་ཕྱེད་ཀྲམ་དེ་ཚུ་ག་ར་རུལ་སོང་ནུག་ ཁྱེད་ཀྱི་བགོ་ལ་དེ་ཚུ་བུབ་ཀྱིས་ཟ་ཚར་ནུག

³ ཁྱེད་ཀྱི་གསེར་དང་དངུལ་དེ་ཚུ་ བཙའ་གིས་ཟ་སྟེ་མེདཔ་ཐལ་ནུག་ འདི་གུ་ཆགས་མི་བཙའ་དེ་གིས་ ཁྱེད་ཀྱི་ཉེས་པ་འདི་བཏོནམ་མ་ཚད་ དེ་གིས་མེ་བཟུམ་སྦེ་ ཁྱེད་ཀྱི་ལུས་འཚིག་སྟེ་འགྱོ་འོང་ ཨིན་ཏེ་འབད་རུང་ ཁྱེད་ཀྱིས་ཉིནམ་མཐའན་མཇུག་གི་སྐབས་ལུ་ རྒྱུ་ནོར་བསག་བཞག་ནུག

⁴ ཁྱེད་ཀྱིས་བལྟ་ཤིག་ ཞིང་ཁར་ལཱ་འབད་མི་ལུ་མགུ་བསྐོར་བརྐྱབས་ཏེ་ གླ་ཆ་མ་སྤྲོད་པར་བཞག་མི་དེ་ཚུ་གིས་སྐད་བརྐྱབས་ཏེ་ ཁྱེད་ཀྱི་སྐོར་ལས་ལོ་རྒྱུས་བདེན་པ་སླབ་སྟེ་ ངོ་རྒོལ་འབད་དོ་ དེ་ལས་ལོ་ཐོག་བརྔ་མི་ཚུ་གི་སྔུ་སྐད་དེ་ ཀུན་ལུ་དབང་མིའི་གཙོ་བོ་གི་སྙན་གསན་ཏེ་ཡོད།

⁵ འཇིག་རྟེན་ནང་ ཁྱེད་ཕྱུགཔ་སྦེ་ཉམས་དགའ་ཏོག་ཏོ་སྦེ་སྡོདཔ་ཨིན་ དེ་མ་ཚད་ ནོར་སེམས་ཅན་ཤ་ནོར་གྱི་དོན་ལུ་ རྒྱགས་ཏོ་རིལ་རི་སྦེ་གསོ་སྟེ་ ཉིནམ་གཅིག་གི་ཚེ་བསད་ནི་སྦེ་བཞག་དོཝ་བཟུམ་སྦེ་ ཁྱེད་རང་ལུ་རྒྱགས་ཏོ་རིལ་རི་སྦེ་བཟོ་སྟེ་སྡོདཔ་ཨིན་མས།

⁶ ཁྱེད་ལུ་ག་ནི་ཡང་འབད་མ་ཚུགས་མི་ མི་ཕྲངམ་དེ་ཚུ་ ཁྱེད་ཀྱིས་ཁྲིམས་གཏང་སྟེ་བསད་བཀོག་ཡི།།

བཟོད་པ་བསྒོམ་ནི་ལུ་བསྐུལ་མ་ཞུ་བའི་སྐོར།

⁷ དེ་འབདཝ་ལས་བརྟེན་ཏེ་ ཁྱེད་སྤུན་ཆ་ཚུ་ གཙོ་བོ་འབྱོན་ནི་གི་དུས་སྐབས་འདི་ མ་རནམ་བར་ན་ རྩ་འགེངས་ཏེ་བཟོད་པ་སྒོམས་སྡོད་ བལྟ་ཤིག་ དཔེར་ན་ཞིང་ལཱ་འབད་མི་ཚུ་གིས་ ཞིང་ཁར་གྱི་ལོ་ཐོག་ལེགས་ཤོམ་གྱི་རེ་བ་བསྐྱེད་དེ་ གནམ་སེར་ཁ་དང་སོ་ཁ་གི་ཆརཔ་གི་དོན་ལུ་ བཟོད་པ་བསྒོམས་ཏེ་སྒུག་སྡོདཔ་ཨིན།

⁸ ཁྱེད་ཆ་ཁྱབ་ཡང་བཟོད་པ་བསྒོམས་ཏེ་ དད་པའི་ནང་སྒྲིང་སྒྲིང་སྦེ་ སེམས་མ་ཤི་བར་སྒུག་སྡོད་ ག་ཅི་སྨོ་ཟེར་བ་ཅིན་ གཙོ་བོ་མགྱོགས་པ་རང་འབྱོན་ནི་འབད་དོ།

⁹ སྤུན་ཆ་ཚུ་ ཁྱེད་རང་གཅིག་གིས་གཅིག་ལུ་ སྐྱོན་བཏགས་ཏེ་མ་རྒོལ་བ་ཅིན་ དེ་ལས་དཀོན་མཆོག་གིས་ཁྱེད་ལུ་ཡང་ཁྲིམས་མི་ཕྱེ་ ལྟ་ཤིག་ དྲང་དཔོན་དེ་སྒོ་གི་རྩ་བར་བཞུགས་ཏེ་ཡོད།

¹⁰ ད་རུང་སྤུན་ཆ་ཚུ་ ཁྱེད་ཀྱིས་དཔེ་བལྟ་སའི་ གཙོ་བོ་གི་མཚན་ནང་བཀའ་གསུངས་མིའི་ལུང་སྟོན་པ་ཚུ་ཡོད་ ཁོང་གིས་དཀའ་ངལ་ལེ་ཤ་མྱོང་སྟེ་འབད་རུང་ བཟོད་པ་བསྒོམས་ཏེ་སྡོད་ནུག

¹¹ ལྟ་ཤིག་ ང་བཅས་ཀྱིས་བཟོད་པ་སྒོམ་ཚུགས་མི་ཚུ་ལུ་ བྱིན་རླབས་ཅན་ཟེར་སླབ་ཨིན་ ཡོབ་ཟེར་མི་འདི་གིས་ག་དེ་སྦེ་བཟོད་པ་བསྒོམས་ཏེ་སྡོད་ཅི་ག་ ཁྱེད་ཀྱིས་གོ་ཡི་ དེ་ལས་མཐའན་མཇུག་ལུ་གཙོ་བོ་གིས་ ཡོབ་ཀྱི་མི་ཚེ་ནང་ག་དེ་སྦེ་མཛད་ཅི་ག་ ཁྱེད་ཀྱིས་ཤེས་ ག་ཅི་སྨོ་ཟེར་བ་ཅིན་ གཙོ་བོ་འདི་ གནམ་མེད་ས་མེད་བྱམས་པ་དང་སྙིང་རྗེ་ཅན་ཨིན།

¹² ངེ་གི་སྤུན་ཆ་ཚུ་ ག་ར་ལས་ཁག་ཆེ་བ་རང་ གནམ་དང་ས་ལ་སོགས་པ་ གཞན་ག་ནི་ཡང་འཛོམ་དཔང་སྦེ་བཙུགས་ཏེ་མནའ་མ་འབོ་ ཁྱེད་ཀྱིས་ཨིན་མི་འདི་ཨིན་ཟེར་ མེན་མི་འདི་མེན་ཟེར་རང་སླབ་དགོ་ དེ་སྦེ་འབད་བ་ཅིན་ ཁྱེད་ཀྱི་གུ་ལུ་ཆདཔ་མི་ཕོག།

སྨོན་ལམ་ལུ་ཤུགས་ཡོད་པའི་སྐོར།

¹³ ཁྱེད་ཀྱི་གྲལ་ལས་ གཅིག་ལུ་སྡུག་བསྔལ་ཡོད་པ་ཅིན་ ཁོ་གིས་གཙོ་བོ་ལུ་སྨོན་ལམ་ཞུ་དགོ་ དེ་ལས་ཁྱེད་ཀྱི་གྲལ་ཁ་ལས་ མི་གཅིག་སེམས་དགའ་སྟེ་ཡོད་པ་ཅིན་ ཁོ་གིས་གཙོ་བོ་ལུ་གླུ་དབྱངས་ཕུལ་དགོ།

¹⁴ དེ་ལས་ཁྱེད་ཀྱི་གྲལ་ཁ་ལུ་ ནདཔ་ཡོད་པ་ཅིན་ ཁོ་གིས་ཆོས་ཚོགས་ཀྱི་འགོ་འདྲེན་པ་ཚུ་ ཁྱིམ་ནང་འབོ་སྟེ་ ཁོང་གིས་གཙོ་བོ་གི་མཚན་ནང་ ནདཔ་འདི་གི་གུ་ལུ་མར་ཁུ་དབུར་ཞིནམ་ད་ ཁོ་གི་དོན་ལུ་སྨོན་ལམ་བཏབ་བཅུག

¹⁵ དེ་ལས་དད་པའི་སྨོན་ལམ་དེ་གིས་ ནདཔ་འདི་དྲགཔ་མ་ཚད་ གཙོ་བོ་གིས་ཁོ་ལུ་ཡར་ལོང་ཚུགསཔ་མཛད་འོང་ དེ་ལས་ཁོ་གིས་སྡིག་པ་འབད་འབདཝ་ཡོད་པ་ཅིན་ ཁོ་གི་སྡིག་པ་འདི་ གཙོ་བོ་གིས་བཤགས་པ་བཞེས་འོང་།

¹⁶ དེ་ལས་ཁྱེད་རང་གི་ན་ཟུག་དྲག་ནི་གི་དོན་ལུ་ ཁྱེད་ཀྱིས་རང་གིས་འབད་མིའི་སྡིག་པ་ གཅིག་གིས་གཅིག་གི་གདོང་ཁར་སླབ་སྟེ་ གཅིག་གིས་གཅིག་ལུ་སྨོན་ལམ་ཞུ་ དེ་ལས་དཀོན་མཆོག་གི་ཐུགས་དང་ལྡན་པའི་སྨོན་ལམ་འདི་ དབང་ཤུགས་ཅན་དང་ཕན་ཐོག་སྦོམ་ཡོདཔ་ཨིན།

¹⁷ དཔེར་ན་ ཨེ་ལི་ཡ་ཟེར་མི་དེ་ཡང་ མིའི་རང་བཞིན་ང་བཅས་བཟུམ་ཅིག་ཨིན་མས་ དེ་འབདཝ་ད་ ཁོ་གིས་ཆརཔ་བརྐྱབ་མ་བཅུག་ཟེར་ རྩ་འགེངས་ཏེ་སྨོན་ལམ་བཏབ་ད་ ལོ་གསུམ་དང་ཕྱེད་ཀ་ཚུན་ཚོད་ ཆརཔ་མ་རྐྱབ་པར་སྡོད་ནུག

¹⁸ དེ་ལས་ད་རུང་ཆརཔ་བརྐྱབ་བཅུག་ཟེར་ ཁོ་གིས་སྨོན་ལམ་ཞུཝ་ད་ ཆརཔ་བརྐྱབས་ཏེ་ས་ཁར་ལས་ལོ་ཐོག་སྐྱེས་ནུག།

འཛོལ་བའི་ལམ་ལས་ལོག་བདེན་པའི་ལམ་ནང་འཁྱིད་འོང་དགོ་པའི་སྐོར།

¹⁹ དབའེ་ངེ་གི་སྤུན་ཆ་ཚུ་ ཁྱེད་ཀྱི་གྲལ་ཁ་ལས་ གཅིག་གིས་ལམ་བདེན་པ་འདི་སྤངས་ཏེ་ ལམ་འཛོལ་བ་བདའ་སྟེ་འགྱོ་སྡོདཔ་ད་ གཅིག་གིས་ལོག་སྟེ་ལམ་བདེན་པ་ནང་འཁྱིད་འོང་པ་ཅིན།

²⁰ དེ་སྦེ་མི་སྡིག་ཅན་གཅིག་ལམ་འཛོལ་བ་ནང་ལས་ ལོག་སྟེ་ཁྱིད་འོང་མིའི་མི་དེ་གིས་ སྡིག་ཅན་འདི་ཤི་ས་ལས་སྲོག་སྐྱབས་འབད་དེ་ སྡིག་པ་ལེ་ཤ་གསལ་བྱིནམ་ཨིན་ཟེར་ ཁྱེད་ཀྱིས་ཐད་རི་བ་རི་ཤེས་དགོ། །།