ཡ་ཀོབ་ལེའུ་ 4 - རྫོང་ཁ་

རང་གི་ལུས་དང་ཚེ་སྲོག་དཀོན་མཆོག་ལུ་ཕུལ་དགོ་པའི་སྐོར།

¹ ཁྱེད་ཀྱི་གྲལ་ཁར་ལུ་འཐབ་འཛིང་ནི་དང་ རྩོད་པ་བརྐྱབ་ནི་དེ་ཚུ་ ག་ལས་འོངམ་ཨིན་ན་ ཁྱེད་ཀྱིས་མི་ཤེས་ག་ དེ་ཚུ་ག་ར་ཁྱེད་ཀྱི་སེམས་ཀྱི་ནང་ན་ དམག་རྐྱབ་སྡོད་མིའི་འདོད་པ་ཚུ་ལས་འོངམ་ཨིན་མེན་ན།

² ཁྱེད་ཀྱིས་མནོ་བསམ་གཏང་མི་འདོད་པ་འདི་གིས་ མི་བསདཔ་ཨིན་ ད་རུང་མིག་ཏོ་ཚ་སྟེ་ འཐབ་འཛིང་འབདཝ་ཨིན་ དེ་འབདཝ་ད་ ཁྱེད་ཀྱིས་ག་མནོ་མི་འདི་མི་ཐོབ་ ག་ཅི་སྨོ་ཟེར་བ་ཅིན་ ཁྱེད་ཀྱིས་དཀོན་མཆོག་ལུ་མ་ཞུ་བ་འབད་ནི་འདི་གིས་ཨིན།

³ དེ་འབདཝ་ད་ ཁྱེད་ཀྱིས་ཞུ་སྟེ་འབད་རུང་མི་ཐོབ་ ག་ཅི་འབད་ཟེར་བ་ཅིན་ དོན་དག་རྫུས་མ་དང་ རང་གི་སྤྲོ་སྟོན་ནིའི་དོན་ལུ་ ཞུཝ་ལས་བརྟེན་ཏེ་ཨིན།

⁴ ཨ་ཁའི་ དཀོན་མཆོག་ལུ་དམ་ཚིག་མ་སྲུང་མི་ཚུ་ ཁྱེད་ཀྱིས་འཇིག་རྟེན་དང་མཐུན་ལམ་འགྲིགས་ཏེ་སྡོད་པ་ཅིན་ ཁྱེད་དཀོན་མཆོག་གི་དགྲ་སྦེ་བྱུངམ་ཨིན་ཟེར་མི་ཤེས་ག་ དེ་ལས་ ག་ར་འབད་རུང་ ཨ་ནི་འཇིག་རྟེན་དང་མཐུན་དགོ་མནོ་མི་དེ་གིས་ དཀོན་མཆོག་གི་དགྲ་འབདཝ་ཨིན།

⁵ དཀོན་མཆོག་གིས་ང་བཅས་ལུ་གནང་མི་ རང་བཞིན་འདི་གིས་ འདོད་པ་ལུ་ཆགས་ཏེ་ མིག་ཏོ་ཚཝ་ཨིན་ཟེར་ གསུང་རབ་ནང་བྲིས་ཏེ་ཡོད་མི་དེ་ ཐད་རི་བ་རི་ཨིན་ཟེར་ ཁྱེད་ཀྱིས་མི་ཤེས་ག་

⁶ ཨིན་ཏེ་འབད་རུང་ དཀོན་མཆོག་གིས་ང་བཅས་ལུ་བཀའ་དྲིན་བསྐྱང་གནངམ་ཨིན་ འདི་འབདཝ་ལས་ གསུང་རབ་ནང་ མི་ཁམས་ཡོད་མི་ཚུ་ལུ་ དཀོན་མཆོག་གིས་མི་གཟིགས་ དེ་འབདཝ་ད་ མི་མཉམ་ཆུང་དེ་ཚུ་ལུ་ ཁོ་གིས་ཐུགས་རྗེ་གཟིགསཔ་ཨིན་ཟེར་ བྲིས་ཏེ་ཡོད་དོཝ་བཟུམ་སྦེ་ཨིན།

⁷ ཁྱེད་རང་དཀོན་མཆོག་གི་ཕྱག་འོག་ལུ་ཕུལ་ཏེ་ བདུད་ལུ་འབངས་མ་བྱིན་པར་ སྒྲིང་སྒྲིང་སྦེ་སྡོད་ དེ་ལས་ཁོ་གིས་ཁྱོད་ལུ་བཞག་སྟེ་ ཁོ་རང་འབྱོག་འགྱོ་འོང་།

⁸ དེ་ལས་ཁྱེད་རང་དཀོན་མཆོག་དང་འབྲེལ་བ་ལེགས་ཤོམ་སྦེ་འཐབ་སྟེ་སྡོད་ དེ་ལས་ཁོ་གིས་ཁྱེད་ལུ་གཟིགས་ཏེ་བཞུགས་འོང་ ཁྱེད་སྡིག་ཅན་ཚུ་ ལགཔ་ཆུ་འཁྱུ་དོཝ་བཟུམ་སྦེ་ ལཱ་ངན་པ་སྤང་ དེ་ལས་སེམས་ཏན་ཏན་མེད་མི་ཚུ་ ཁྱེད་རང་གི་སེམས་འདི་གཙང་ཏོག་ཏོ་བཟོ།

⁹ སྡུག་བསྔལ་དང་མྱ་ངན་འབད་དེ་སྔུ་ ཁྱེད་ཀྱི་དགའ་བ་འདི་ སྐྱོ་གླུ་ལུ་འགྱུར་བཅུག་ཟེར་སླབ་ དེ་ལས་ཁྱེད་ཀྱི་དགའ་སྤྲོ་དེ་ མྱ་ངན་ལུ་འགྱུར་བཅུག་ཟེར་སླབ།

¹⁰ གཙོ་བོ་གི་གཟིགས་སར་ ཁྱེད་རང་མཉམ་ཆུང་སྦེ་སྡོད་ དེ་ལས་ཁོ་གིས་ཁྱེད་ཡར་མཐོ་ས་ལུ་སྐྱེལ་གནང་འོང་།།

གཞན་ལུ་སྐྱོན་བཏགས་མ་བཏུབ་པའི་སྐོར།

¹¹ ངེ་གི་སྤུན་ཆ་ཚུ་ གཅིག་གིས་གཅིག་གི་སྐོར་ལས་ བློ་ངན་པ་དེ་ཚུ་མ་སླབ་ ག་ར་འབད་རུང་ དདཔ་ཅན་སྤུན་ཆ་ཚུ་གི་སྐོར་ལས་ བློ་ངན་པ་དེ་ཚུ་སླབ་ ཡང་ན་གཞན་ལུ་ག་དེམ་ཅིག་སྦེ་སྐྱོན་བཏགས་པ་ཅིན་ འདི་གིས་གཞན་གྱི་སྐོར་ལས་ངན་པ་སླབ་མ་ཚད་ བཀའ་ཁྲིམས་ལུ་སྐྱོན་བཏགསཔ་ཨིན་ ཁྱེད་ཀྱིས་བཀའ་ཁྲིམས་ལུ་སྐྱོན་བཏགས་པ་ཅིན་ ཁྱེད་ཀྱིས་བཀའ་ཁྲིམས་མ་ཉནམ་མ་ཚད་ ཁྲིམས་ཕྱེ་མིའི་དྲང་དཔོན་ལུ་འགྱུརཝ་ཨིན།

¹² ད་ཁྲིམས་མཛད་གནང་མི་དང་ ཁྲིམས་ཕྱེ་མི་འདི་གཅིག་རང་ཨིན་ ཁོ་ལུ་སྐྱབས་མཛད་ནི་དང་ རྩ་མེད་མཛད་ནི་གི་དབང་ཚད་ཡང་ཡོད་ དེ་འབདཝ་ད་ ཁྱེད་རང་གི་ཁྱིམ་ཚང་ལུ་སྐྱོན་བཏགས་མི་ ཁྱེད་ག་སྨོ།།

མ་འོང་པའི་སྐོར་ལས་དཔའ་ཡག་མ་བཏུབ་པའི་སྐོར།

¹³ ད་ཁྱེད་ཀྱིས་ད་རེས་ ཡང་ན་ནངས་པ་ ང་བཅས་ཁྲོམ་གཞན་གཅིག་ཁར་འགྱོ་སྟེ་ ལོ་གཅིག་དེ་ཅིག་ཚོང་བརྐྱབས་ཏེ་ ཁེ་སང་བཏོན་གེ་ཟེར་སླབ་མི་ཆ་ཁྱབ་ ནཱ་ཉན་ཤིག

¹⁴ ཁྱེད་ཆ་ཁྱབ་ཀྱི་མི་ཚེ་ནང་ ནངས་པ་ག་ཅི་འབྱུང་འོང་ག་ འདི་ཁྱེད་ཀྱིས་མི་ཤེས་ ཁྱེད་ཀྱི་མི་ཚེ་འདི་ དྲོ་པ་ཧ་སག་སྟེ་ཆགས་མིའི་བ་མོ་བཟུམ་སྦེ་ ཡུདཔ་ཐེངས་ཅིག་ནང་ཡལ་འགྱོ་འོང་།

¹⁵ དེ་འབདཝ་ད་ ཁྱེད་ཀྱིས་དེ་སྦེ་སླབ་ནི་མེན་པར་ དཀོན་མཆོག་གི་ཐུགས་དགོངས་ ག་ཡོད་མི་དེ་ཚུ་འབད་དེ་སྡོད་ནི་ཨིན་ཟེར་སླབ་དགོ།

¹⁶ དེ་འབདཝ་ད་ ད་ལྟོ་ཁྱེད་རང་གི་འཆར་གཞི་དེ་གི་སྐོར་ལས་ གནམ་མེད་ས་མེད་སླབ་སྟེ་ དཔའ་ཡག་སྡོདཔ་མས་ ཨ་ནི་བཟུམ་གྱི་དཔའ་ཡག་ནི་འདི་ངན་པ་ཨིན།

¹⁷ འདི་འབདཝ་ལས་ ག་གིས་རང་འབད་རུང་ ག་དེ་སྦེ་འབད་ནི་ཨིན་ན་ ག་ཅི་འབད་བ་ཅིན་ལེགས་ཤོམ་ཨིན་ན་ ཤེས་ཏེ་འབད་རུང་ འདི་མ་འབད་བ་ཅིན་ སྡིག་པ་ཨིན།།