ཡ་ཀོབ་ལེའུ་ 3 - རྫོང་ཁ་

ལྕེ་བདག་འཛིན་འབད་དགོ་པའི་སྐོར།

¹ ངེའི་སྤུན་ཆ་ཚུ་ ཁྱེད་ཀྱི་གྲལ་ལས་ལེ་ཤ་རང་ ཆོས་ཚོགས་ཀྱི་སློབ་དཔོན་འབད་ནི་གི་མནོ་བསམ་གཏང་ནི་མི་འོང་ ང་བཅས་སློབ་དཔོན་ཚུ་ལུ་ མི་གཞན་ལས་ལྷགཔ་སྦེ་ ཁྲིམས་ཕྱེ་འོང་ཟེར་ཤེས་དགོ།

² ང་བཅས་ག་ར་གིས་འཛོལ་བ་ལེ་ཤ་འབདཝ་ཨིན་ དེ་འབདཝ་ད་ མི་གཅིག་གིས་ཁ་སླབ་ད་ འཛོལ་བ་མ་འབད་བ་ཅིན་ མི་དེ་ཀྲིག་ཀྲི་ཡོདཔ་མ་ཚད་ རང་གི་གཟུགས་ག་ར་བཏུལ་ཚུགསཔ་ཨིན།

³ ང་བཅས་ཀྱིས་རྟ་དེ་ཚུ་བཏུལ་ནི་གི་དོན་ལུ་ ཁོང་གི་ཁ་གུ་ལུ་སྲབ་ཐག་བཙུགས་པ་ཅིན་ ཁོང་ལུ་ག་སྟེ་ཁྱིད་དགོ་མནོ་རུང་ ཁྱིད་འགྱོ་ཚུགས།

⁴ ད་རུང་དཔེ་གྲུ་གཅིག་ལུ་བལྟ་བ་ཅིན་ གྲུ་དེ་ཚུ་སྦོམ་ཡོདཔ་མ་ཚད་ རླུང་ཤུགས་ཀྱིས་འཕུལ་ཏེ་འགྱོ་རུང་ གྲུ་དཔོན་དེ་གིས་འདོད་པ་ལྟར་དུ་ གྲུ་འདི་ག་སྟེ་ཁ་ཐུག་གཏང་དགོ་མནོ་ས་ གཟན་སྐྱ་ཆུང་ཀུ་ཅིག་གིས་གཏང་འགྱོ་ཚུགས།

⁵ འདི་བཟུམ་སྦེ་རང་ ལྕེ་འདི་ཡང་གཟུགས་ཀྱི་ཡན་ལག་ག་ར་ནང་ལས་ ཆུང་ཀུ་གཅིག་ཨིན་ཏེ་འབད་རུང་ འདི་གིས་བློ་སྦོམ་སྦེ་སླབ་སྟེ་ ཧམ་བཤད་རྐྱབ་ཨིན། ནཱ་བལྟ་ཞིག་ མེ་ལྷབ་ཆུང་ཀུ་ཅིག་ཨིན་ཏེ་འབད་རུང་ དེ་གིས་ནགས་ཚལ་སྦོམ་འཚིག་གཏངམ་ཨིན།

⁶ ལྕེ་འདི་ ཐད་རི་བ་རི་ མེ་བཟུམ་སྦེ་རང་ཨིན་ གཟུགས་ཀྱི་ཡན་ལག་གི་གྲལ་ལས་ ལྕེ་འདི་ གདུག་དྲགས་ངན་པ་འབད་བཅུག་མི་ཅིག་ཨིན་ ལྕེ་འདི་གིས་ གཟུགས་ག་ར་མ་གཙངམ་བཟོཝ་ཨིན་ དམྱལ་བ་ལས་འོང་མིའི་མེ་དེ་གིས་ རང་གི་མི་ཚེ་ག་ར་མེདཔ་གཏངམ་ཨིན།

⁷ ད་རུང་དཔེ་གཞན་ལུ་བལྟ་བ་ཅིན་ སེམས་ཅན་ལྷམ་པ་མ་འདྲཝ་དང་ ནམ་མཁའི་བྱ་དེ་ཚུ་དང་ ཕོ་བཤུད་བརྐྱབ་འགྱོ་མི་སེམས་ཅན་དང་ རྒྱ་མཚོའི་ནང་གི་སེམས་ཅན་རིགས་སྣ་ཚོགས་དེ་ཚུ་ག་ར་ མི་གིས་བཏུལ་ཏེ་ཡོད།

⁸ དེ་འབདཝ་ད་ མི་གི་གྲལ་ལས་གཅིག་གིས་ཡང་ ད་ལྟོ་ཚུན་ཚོད་ཀྱི་བར་ན་ ལྕེ་དེ་ལུ་བཏུལ་མ་ཚུགས་པས་ ལྕེ་དེ་གིས་ ནམ་ཡང་ཁ་མ་སླབ་པར་ སྡོད་མ་ཚུགས་མིའི་ངན་པ་དང་ དུག་གདུག་དྲགས་ཀྱིས་གང་སྟེ་ སྡོད་མི་ཅིག་ཨིན།

⁹ ང་བཅས་ཀྱི་གཙོ་བོ་ ཡབ་དཀོན་མཆོག་ལུ་བསྟོད་པ་ཡང་ ང་བཅས་ཀྱི་ལྕེ་དེ་གིས་ཕུལཝ་ཨིན་ དེ་ལས་ད་རུང་དཀོན་མཆོག་གིས་ ཁོ་རའི་སྐུ་བརྙན་ལུ་མཛད་གནང་མིའི་མི་ཚུ་ལུ་ ལྕེ་དེ་གིས་རང་ ཁ་སྨོན་བཏབ་ཨིན།

¹⁰ བྱིན་རླབས་དང་ཁ་སྨོན་གཉིས་ཆ་རང་ ཁ་དེ་ནང་ལས་རང་ཐོནམ་ཨིན་ ངེ་གི་སྤུན་ཆ་ཚུ་ ཨ་ནི་བཟུམ་ང་བཅས་ཀྱིས་འབད་ནི་མི་འོང་།

¹¹ འཐུང་ཆུ་ལེགས་ཤོམ་དང་ འཐུང་མ་བཏུབ་པའི་ཆུ་ཁག་དྲགས་གཉིས་ཆ་རང་ ཆུ་གཟར་གཅིག་ལས་འཐོན་འོང་ག།

¹² ངེའི་སྤུན་ཆ་ཚུ་ ཅོང་སེ་ཤིང་གིས་ ཨ་རུ་ར་ཤིང་གི་འབྲས་བུ་བཏགས་མི་ཚུགས་ ཡང་ན་རྒུན་འབྲུམ་ཤིང་གིས་ ཅོང་སེ་ཤིང་གི་འབྲས་བུ་བཏགས་མི་ཚུགས་ ད་རུང་ཚ་ཆུ་འདི་ རང་བཞིན་གྱི་རྩ་ལས་རང་འཐུང་ཆུ་ལུ་མི་འགྱུར།

¹³ ཁྱེད་ཀྱི་གྲལ་ལས་ ཤེས་རབ་ཅན་དང་ཡོན་ཏན་ཡོད་མི་ག་ཨིན་ན་ དེ་གིས་སྤྱོད་པ་བཟང་པོ་འདི་ རང་གི་མི་ཚེ་ནང་བཏོན་ཏེ་ རིག་པ་གི་ཐོག་ལས་མཉམ་ཆུང་ཏོག་ཏོ་སྦེ་སྡོད་དགོ།

¹⁴ དེ་འབདཝ་ད་ ཁྱེད་ཀྱིས་རང་འདོད་བསྐྱེད་དེ་ མིག་ཏོ་ཚ་བ་ཅིན་ རང་གིས་རང་ལུ་ཤེས་རབ་ཅན་ཅིག་ཨིན་ཟེར་ རང་བསྟོད་རྐྱབས་ནི་མི་འོང་ དེ་སྦེ་རང་བསྟོད་རྐྱབ་པ་ཅིན་ ཁྱེད་ཤོབ་རྐྱབ་ཨིན།

¹⁵ ཨ་ནི་བཟུམ་གྱི་ཤེས་རབ་འདི་ དཀོན་མཆོག་ལས་གནང་མིའི་ཤེས་རབ་མེན་ དེ་འབདཝ་ད་ འཇིག་རྟེན་ནང་ལས་ཐོབ་མིའི་ཤེས་རབ་དང་ མི་གི་རང་བཞིན་ལས་འོང་མི་ཤེས་རབ་དང་ བདུད་ལས་འོང་མིའི་ཤེས་རབ་ཨིན།

¹⁶ ག་ཅི་སྨོ་ཟེར་བ་ཅིན་ ང་རྒྱལ་ལང་ནི་ མིག་ཏོ་ཚ་ནི་ རང་འདོད་བསྐྱེད་ནི་དེ་ཚུ་ག་ཡོད་སར་ ཚུལ་དང་མ་མཐུན་པའི་ལཱ་ངན་ མ་འདྲཝ་དེ་ཚུ་ག་ར་འཐོནམ་ཨིན།

¹⁷ དེ་འབདཝ་ད་ དཀོན་མཆོག་ལས་འོང་མི་ཤེས་རབ་འདི་ འགོ་དང་པ་རང་ གཙང་ཏོག་ཏོ་ སྐྱིད་ཏོང་ཏོ་ མཉམ་ཆུང་ མཐུན་ཏོག་ཏོ་ གཞན་ལུ་ཨ་རྟག་རང་སྙིང་རྗེ་བསྐྱེད་ནི་ ལཱ་ལེགས་ཤོམ་ཨ་རྟག་རང་འབད་ནི་ དེ་ལས་གཞན་ལུ་ཆགས་སྡང་ཕྱོགས་རིས་མེདཔ་ ཁ་ཆོས་མ་བཤད་ནི།

¹⁸ འདི་གིས་མ་ཚད་ ཞི་བདེ་བཟོ་མི་དེ་གིས་ ཞི་བདེ་གི་སོན་གཏོར་ཏེ་ དེ་གིས་འབྲས་བུ་འདི་རྔཝ་ད་ ཕྲངམ་དང་བདེནམ་སྦེ་བྱུངམ་ཨིན།།