ཧིབ་རུ་ལེའུ་ 9 - རྫོང་ཁ་

ཞལ་འཆེས་རྙིངམ་གི་བསྙེན་བཀུར་ཕུལ་ཐངས་ཀྱི་སྐོར།

¹ འགོ་དང་པ་གི་ཞལ་འཆེས་ནང་ དཀོན་མཆོག་ལུ་བསྙེན་བཀུར་ཕུལ་ནིའི་སྐོར་ལས་ ཁྲིམས་ལུགས་ཡོདཔ་ཨིནམ་མ་ཚད་ བསྙེན་བཀུར་ཕུལ་སའི་དེ་ མི་གིས་བཟོ་མི་ས་གནས་གཅིག་ཨིན་མས།

² འདི་ཁར་གུར་ཁང་གཅིག་བཞེངས་ཏེ་ ཕྱི་ཁའི་ཁང་མིག་དེ་ནང་ལུ་ མེ་སྟེགས་དང་གསོལ་ཅོག་ དེ་ལས་དཀོན་མཆོག་གི་སྐུ་མདུན་ལུ་ཕུལ་མི་ ཏད་ཟས་དེ་ཚུ་ཡོདཔ་ཨིན་མས་ འདི་ལུ་ས་གནས་དམ་པ་ཟེར་སླབ་ཨིན་མས།

³ དེ་ལས་ནང་ན་གི་ཡོལ་ལི་གི་རྒྱབ་ཁར་ལུ་ཡོད་པའི་ཁང་མིག་དེ་ལུ་ ས་གནས་ག་ར་ལས་དམ་པ་ ཟེར་སླབ་ཨིན་མས།

⁴ འདི་ནང་ལུ་བསང་གཏང་ནིའི་གསེར་གྱི་མཆོད་ཁྲི་དང་ གསེར་སྒྲོན་སྒྲོནམ་གི་ ཞལ་འཆེས་ཀྱི་སྒྲོམ་དང་ འདི་གི་ནང་ན་ མཱན་ན་འདེགས་ཡོད་པའི་གསེར་གྱི་ཧོད་ཆ་དང་ ཨ་རཱོན་གྱི་འཁརཝ་འདི་གུ་ ལྕུག་གུ་སྐྱེས་མི་དང་ ཞལ་འཆེས་ཀྱི་རྡོ་ལེབ་དེ་ཚུ་བཞག་ཡོདཔ་ཨིན་མས།

⁵ ཞལ་འཆེས་ཀྱི་སྒྲོམ་དེའི་གུ་ལས་མར་ གཟི་བརྗིད་ཅན་གྱི་ཕོ་ཉ་ ཅེ་རུ་བིམ་ཟེར་སླབ་མི་འདི་ཚུ་གི་ གཤོག་ཐལ་གྱི་གྲིབ་མ་གིས་ཁབ་ཏོག་བཀབ་ནུག་ དེ་ལས་གན་རྒྱ་གི་སྒྲོམ་གྱི་ཁབ་ཏོག་དེ་ འགྱོད་སེམས་བསྐྱེད་དེ་ སྡིག་བཤགས་ཕུལ་ས་ཡང་ཨིན་མས་ དེ་འབདཝ་ད་ ད་ལྟོ་དེ་གི་སྐོར་ལས་ ཁ་གསལ་སྦེ་གྲལ་བཤད་བརྐྱབ་མི་ཚུགས་པས།

⁶ ཨ་ནི་བཟུམ་སྦེ་ དེ་ཚུ་ག་ར་སྒྲིགས་ཚརཝ་ད་ བླམ་དེ་ཚུ་དུས་རྟག་བུ་ར་ ཕྱི་ཁའི་ཁང་མིག་ནང་ན་ ཞབས་ཏོག་ཕུལ་བ་འགྱོ་དོ་ཡོདཔ་མས།

⁷ དེ་འབདཝ་ད་ ནང་ན་གི་ཁང་མིག་ནང་འབད་བ་ཅིན་ མཁན་ཆེན་ཁོ་རང་རྐྱངམ་གཅིག་ ཁྲག་འབག་སྟེ་ ལོ་གཅིག་ལུ་ཚར་གཅིག་ནང་ན་བྱོན་ཏེ་ ཁོ་རའི་དོན་ལུ་དང་ མི་དམངས་ཀྱིས་ མ་ཤེས་པར་འབད་མིའི་སྡིག་པའི་དོན་ལུ་ མཆོད་པ་ཕུལ་དོ་ཡོདཔ་ཨིན་མས།

⁸ འདི་ལས་སྦེ་ གུར་ཁང་རྙིངམ་དེ་གི་ནང་ན་ བར་ན་ཡོལ་ལི་ཀྲིང་སྟེ་ཁང་མིག་གཉིས་སྦེ་ཡོད་པའི་ནང་ དང་པ་དེ་ནང་བསྙེན་བཀུར་ཕུལ་ས་སྦེ་ ལག་ལེན་འཐབ་ཡོད་པའི་བསྒང་ གཉིས་པ་དེ་ནང་ག་ར་ལས་དམ་པའི་ས་གནས་ཀྱི་ནང་ན་ འགྱོ་ནི་གི་ལམ་མ་སྟོན་ཟེར་ དམ་པའི་ཐུགས་ཉིད་ཀྱིས་སྟོན་གནང་ནུག

⁹ ཕུལ་ཆ་དང་དམར་མཆོད་ཕུལ་ཏེ་ མཆོདཔ་ཕུལ་མི་ཆ་ཁྱབ་ཀྱི་བསམ་བློ་ གཙངམ་བཟོ་མི་ཚུགས་ཟེར་ འདི་ཚུ་ག་ར་ ད་རེས་དུས་ཀྱི་དོན་ལུ་དཔེ་སྦེ་སྟོནམ་ཨིན་མས།

¹⁰ ཨ་ནི་ཕུལ་ཆ་དང་མཆོད་པ་འདི་ཚུ་ བཟའ་འཐུང་དང་ གཙང་སྦྲ་ཁྲུས་གསོལ་གྱི་སྐོར་ལས་ ཕྱིའི་སྒྲིག་ཁྲིམས་རྐྱངམ་གཅིག་ཨིན་ འདི་ཚུ་ ཞལ་འཆེས་གསརཔ་ གོ་རིམ་བསྒྲིག་མ་གནང་ཚུན་ཚོད་ཀྱི་དོན་ལུ་རྐྱངམ་གཅིག་ཨིན་མས།།

ཡེ་ཤུ་ཁིརཱིས་ཀྱི་སྐུ་ཁྲག་གི་སྐོར།

¹¹ ཁིརཱིས་ ད་ལྟོ་ང་བཅས་ཀྱིས་ཐོབ་མི་བྱིན་རླབས་བཟང་པོ་དེ་ཚུ་གི་ མཁན་ཆེན་སྦེ་འབྱོནམ་ད་ མི་གིས་བཟོ་མིའི་གུར་ཁང་ལས་ཡང་ སྦོམ་དང་ཡང་དག་པའི་གུར་ཁང་ལས་སྦེ་ འཛུལ་ཏེ་ལོག་བྱོན་ནུག་ གུར་ཁང་འདི་ མི་གིས་བཟོ་བཟོཝ་མེན་པས་ དེ་མ་ཚད་ ནཱ་འཛམ་བུ་གླིང་གི་ཡང་མེན་པས།

¹² ད་རུང་ ར་དང་གླང་གི་ཁྲག་དེ་ མཆོདཔ་སྦེ་མེན་པར་ ཁོ་རའི་སྐུ་ཁྲག་ཕུལ་ཏེ་ ག་ར་ལས་དམ་པ་གི་ས་གནས་ནང་ལུ་ ཚར་གཅིག་གི་དོན་ལུ་འཛུལ་ཏེ་ ང་བཅས་ཀྱི་དོན་ལུ་ མཐའ་མེད་པའི་ཐར་པ་གྲུབ་གནང་ནུག

¹³ ཧེ་མ་གི་ལམ་ལུགས་ནང་ ར་དང་གླང་དེ་ཚུ་གི་ཁྲག་དང་ བ་ཐམ་ མེ་གཏང་གཏངམ་གི་གོ་ཐལ་དེ་ཚུ་ གཟུགས་གཙང་སྦྲ་མེད་མི་ཚུ་གི་གུ་བླུགས་ཏེ་ གྲིབ་ཅན་ཚུ་ གཙང་ཏོག་ཏོ་བཟོ་ཚུགས་པ་ཅིན།

¹⁴ ཁིརཱིས་ཀྱི་སྐུ་ཁྲག་གིས་ འདི་ལས་ཡང་ལྷགཔ་སྦེ་ ག་ཅི་དེས་ཅིག་གཙང་ཏོག་ཏོ་མཛད་གནང་མི་ཚུགས་ག་ ཁོ་གིས་ དུས་རྒྱུན་དུ་བཞུགས་མིའི་ཐུགས་ཉིད་ལས་རྒྱུད་དེ་ ཁོ་རང་ཉེས་པ་མེད་པའི་མཆོདཔ་གཅིག་སྦེ་ དཀོན་མཆོག་ལུ་ཕུལ་ཏེ་ ང་བཅས་ཀྱི་སེམས་ཁར་ གོ་མ་ཆོད་པའི་ལཱ་ངན་པ་ཚུ་ལས་ གཙངམ་མཛད་གནང་ཡི་ དེ་འབདཝ་ལས་བརྟེན་ཏེ་ ང་བཅས་ཀྱིས་གསོན་པོའི་དཀོན་མཆོག་གི་ཕྱག་ཞུ་ཚུགསཔ་ཨིན།

¹⁵ འདི་གིས་འབད་ ཁིརཱིས་འདི་ དཀོན་མཆོག་གི་ཞལ་འཆེས་གསརཔ་གི་བར་མི་ཨིན་ ད་ཁོ་གིས་ཁས་བླངས་བཞེས་ཡོད་མིའི་དུས་རྒྱུན་གྱི་བྱིན་རླབས་དེ་ དཀོན་མཆོག་གིས་འབོ་མི་ཆ་ཁྱབ་ཀྱིས་ ཐོབ་ནི་ཨིན་མས་ ག་ཅི་སྨོ་ཟེར་བ་ཅིན་ ཞལ་འཆེས་རྙིངམ་གི་འོག་ལུ་སྡོད་མི་ཚུ་ལུ་ སྡིག་པ་ནང་ལས་ཐར་གཏང་པའི་དོན་ལུ་ ཁིརཱིས་གཤགས་ནུག

¹⁶ ཁ་ཆེམས་ཡི་གུ་གི་ཐད་ལུ་ ཡི་གུ་དེ་ལག་ལེན་འཐབ་ནི་ཨིན་པ་ཅིན་ ཧེ་མ་བཟོ་མིའི་ མི་འདི་ ཤི་སོང་ཡི་ཟེར་བའི་ བདེན་ཁུངས་བཀལ་དགོཔ་ཨིན།

¹⁷ ག་ཅི་སྨོ་ཟེར་བ་ཅིན་ ཁ་ཆེམས་ཡི་གུ་བཟོ་མིའི་ མི་འདི་ ཤི་སོངམ་ད་རྐྱངམ་གཅིག་ ཡི་གུ་དེ་ངོ་མ་སྦེ་ ལག་ལེན་འཐབ་ཚུགསཔ་ཨིན།

¹⁸ དེ་འབདཝ་ལས་བརྟེན་ཏེ་ ཞལ་འཆེས་དང་པ་དེ་ཡང་ ཁྲག་མ་འཛགས་པར་ ལག་ལེན་མ་འཐབ་པས།

¹⁹ ག་ཅི་སྨོ་ཟེར་བ་ཅིན་ མོ་སཱེས་ཀྱིས་བཀའ་ཁྲིམས་དེ་ཚུ་ག་ར་མི་ཚུ་ལུ་སྟོན་བྱིན་ཚརཝ་ད་ ཁོ་གིས་བོའུ་ཅུང་དང་ར་གི་ཁྲག་དེ་ཚུ་ཆུ་དང་སླ་བསྲེས་ དེ་ལས་བལ་དམརཔ་དང་ཤིང་གི་འདབ་མ་གིས་ བཀའ་ཁྲིམས་ཀྱི་དེབ་དང་མི་དེ་ཚུ་གི་གུ་གཏོར་ཏེ།

²⁰ ཁོ་གིས་ཁོང་ལུ་ དཀོན་མཆོག་གིས་ཁྱེད་ལུ་བཀའ་གནང་མི་ཞལ་འཆེས་ཀྱི་ཁྲག་ ཨ་ནི་ཨིན་ འདི་ཁྱེད་ཀྱིས་ ལག་ལེན་འཐབ་དགོ་ཟེར་གསུངས་ནུག

²¹ འདི་བཟུམ་སྦེ་རང་ གུར་ཁང་དང་མཆོདཔ་ཕུལ་སའི་ཧོད་ཆ་ག་ར་གི་གུ་ ཁོ་གིས་ཁྲག་གཏོར་ནུག

²² ངོ་མ་རང་འབདན་ བཀའ་ཁྲིམས་དང་འཁྲིལ་ཏེ་ མང་ཤོས་ཅིག་རང་ ཁྲག་གིས་གཙངམ་བཟོ་དགོཔ་ཨིན་མས་ ཁྲག་མེད་པར་སྡིག་པའི་བཤགས་པ་རྩ་ལས་ར་ མེདཔ་ཨིན་མས།

²³ ད་གུར་ཁང་དང་དེའི་ནང་ལུ་ཡོད་མི་ཅ་ལ་ཚུ་ ཞིང་ཁམས་ཀྱི་དངོས་པོ་དེ་ཚུ་གི་འདྲ་བཟོ་ཨིན་ནི་དེ་གིས་ སེམས་ཅན་གྱི་ཁྲག་གིས་དམར་མཆོད་ཕུལ་ཏེ་ གཙངམ་བཟོ་དགོཔ་ཨིན་ དེ་འབདཝ་ད་ ཞིང་ཁམས་ལུ་ཡོད་པའི་དངོས་པོ་ངོ་མ་ཚུ་གི་དོན་ལུ་ སེམས་ཅན་གྱི་ཁྲག་ལས་ཡང་ལྷགཔ་སྦེ་ དམར་མཆོད་བཟང་པོ་ཕུལ་དགོཔ་ཨིན་མས།

²⁴ ག་ཅི་སྨོ་ཟེར་བ་ཅིན་ མི་གིས་བཟོ་མི་ ངོ་མ་གི་འདྲ་བཟོ་ནང་ན་ལུ་ ཁིརཱིས་མ་བྱོན་པས་ དེ་འབདཝ་ད་ ཁོ་ཞིང་ཁམས་ནང་རང་ ག་ར་ལས་དམ་པ་གི་གནས་ནང་བྱོན་ཏེ་ ད་ལྟོ་ང་བཅས་ཀྱི་དོན་ལུ་ བར་མི་སྦེ་ དཀོན་མཆོག་གི་སྐུ་མདུན་ལུ་བཅརཝ་ཨིན།

²⁵ ལོ་བསྟར་བཞིན་དུ་མཁན་ཆེན་གྱིས་ སེམས་ཅན་གྱི་ཁྲག་འབག་སྟེ་ ག་ར་ལས་དམ་པའི་ས་གནས་ནང་ དམར་མཆོད་ཕུལ་བ་བྱོན་དོཝ་བཟུམ་སྦེ་ ཁིརཱིས་ཀྱིས་ཁོ་རང་ལོག་ཅི་ལོག་ཅི་ དམར་མཆོད་སྦེ་མ་ཕུལ་བས།

²⁶ དེ་སྦེ་ཨིན་པ་ཅིན་ འཛམ་བུ་གླིང་མཛད་པའི་སྐབས་ལས་རང་ ཁོ་ཚར་ལེ་ཤ་གཤགས་དགོཔ་ཐལ་ཐལཝ་འོང་ དེ་འབདཝ་ད་ དུས་མཐའན་མཇུག་ལུ་ སྡིག་པ་གསལ་གནང་ནི་སྦེ་ དུས་རྟག་བུ་གི་དོན་ལུ་ ཚར་གཅིག་སྦེ་རང་ ཁོ་རང་དམར་མཆོད་སྦེ་ཕུལ་ནུག

²⁷ མི་དེ་ཚར་གཅིག་ཐད་རི་བ་རི་ཤི་དགོཔ་ད་ འདི་གི་ཤུལ་ལས་ཁོ་ལུ་ཁྲིམས་དཔྱད་ནི་ཨིན་མས།

²⁸ འདི་བཟུམ་སྦེ་རང་ ཁིརཱིས་ཡང་ མི་ལེ་ཤ་གི་སྡིག་པ་བསྣམས་ནིའི་དོན་ལུ་ ཚར་གཅིག་སྦེ་ ཁོ་རང་དམར་མཆོད་སྦེ་ཕུལ་ནུག་ ད་ཐེངས་གཉིས་པ་ལུ་ ཁོ་མི་སེར་གྱི་སྡིག་པ་བསྣམས་པ་མེན་པར་ ཁོ་ལུ་རེ་ཆ་བསྐྱེད་དེ་སྒུག་སྡོད་མི་ཚུ་ལུ་ཐར་བ་གནང་པ་འབྱོན་ནི་ཨིན།།