ཧིབ་རུ་ལེའུ་ 7 - རྫོང་ཁ་

མཱེལ་ཀི་ཟེ་དེག་གི་སྐོར།

¹ མཱེལ་ཀི་ཟེ་དེག་ཟེར་མི་དེ་ རྒྱལ་ཁབ་ ཤ་ལེམ་ཟེར་སླབ་མིའི་རྒྱལཔོ་དང་ བླ་ན་མེད་པའི་དཀོན་མཆོག་གི་བླམ་ཨིན་མས་ ཨབ་ར་ཧམ་ རྒྱལཔོ་ཚུ་དང་གཅིག་ཁར་དམག་བརྐྱབས་ཏེ་ ཁོང་ཆ་ཁྱབ་ཕམ་བཏང་སྦེ་ ལོག་འོངམ་ད་ མཱེལ་ཀི་ཟེ་དེག་གིས་ ཨབ་ར་ཧམ་ལུ་ མཇལ་ཁ་གནང་སྟེ་ ཁོ་ལུ་བྱིན་རླབས་གནང་ནུག

² དེ་ལས་ ཨབ་ར་ཧམ་གྱིས་ དམག་རྐྱབ་ས་ལས་ཐོབ་སྟེ་ འབག་འོང་མི་ནང་ལས་ བརྒྱ་ལས་བཅུ་ཆ་དེ་ཁོ་ལུ་ཕུལ་ནུག་ དང་པ་རང་ མཱེལ་ཀི་ཟེ་དེག་གི་དོན་དག་དེ་ དྲང་ཁྲིམས་ཀྱི་རྒྱལཔོ་ཟེར་ཞུཝ་ཨིན་མས་ གཉིས་པ་ ཁོ་ལུ་ ཤ་ལེམ་གྱི་རྒྱལཔོ་ཟེར་ཡང་ཞུཝ་ཨིན་མས་ འདི་གི་དོན་དག་དེ་ ཞི་བདེ་གི་རྒྱལཔོ་ཟེར་ཨིན་མས།

³ ཁོ་ལུ་ཡབ་ཡུམ་དང་གདུང་བརྒྱུད་ཟེརཝ་ཡང་མེད་མི་ ཁོ་གི་སྐུ་ཚེ་དེ་དུས་ཚོད་དེམ་ཅིག་ཁར་འགོ་བཙུགས་ཅི་ཟེརཝ་དང་ དེམ་ཅིག་ཁར་མཇུག་བསྡུཝ་ཨིན་ཟེརཝ་ཡང་མེད་མི་ དཀོན་མཆོག་གི་སྲས་དང་འདྲཝ་སྦེ་ ཁོ་དུས་རྒྱུན་གྱི་བླམ་སྦེ་བཞུགས་ནི་ཨིན།

⁴ མཱེལ་ཀི་ཟེ་དེག་དེ་ མི་ག་ཅི་དེས་ཅིག་རྩ་ཆེ་ཤོས་གཅིག་ཨིན་སྨོ་ ཁོ་གི་སྐོར་ལས་མནོ་བསམ་གཏང་གེ་ ང་བཅས་ཀྱི་ཕ་བརྒྱུད་ ཨབ་ར་ཧམ་གྱིས་ཡང་ དམག་རྐྱབ་ས་ལས་ཐོབ་མི་ཅ་ལ་ནང་ལས་ བརྒྱ་ལས་བཅུ་ཆ་ ཁོ་ལུ་ཕུལ་ནུག

⁵ ད་བླམ་གྱི་ལཱ་འགན་ཐོབ་མི་ ལེ་ཝི་གི་བུ་བརྒྱུད་དེ་ཚུ་གིས་ ཐོབ་ཐངས་བཀའ་ཁྲིམས་བཞིན་དུ་ ཨབ་ར་ཧམ་ལས་རྒྱུད་དེ་ འོང་མི་ཁོང་རའི་སྤུན་ཆ་ག་ར་ལས་ བརྒྱ་ལས་བཅུ་ཆ་ལེན་དགོཔ་ཨིན་མས།

⁶ དེ་འབདཝ་ད་ མཱེལ་ཀི་ཟེ་དེག་དེ་ ཁོང་གི་མི་བརྒྱུད་ལས་མེན་རུང་ ཨབ་ར་ཧམ་ལས་ བརྒྱ་ལས་བཅུ་ཆ་ལེན་ཏེ་ དཀོན་མཆོག་གི་ཁས་བླངས་ཐོབ་མི་ ཨབ་ར་ཧམ་ལུ་ ཁོ་གིས་བྱིན་རླབས་གནང་ནུག

⁷ ད་ ཆུང་ཤོས་ཚུ་གིས་ སྦོམ་ཤོས་ཚུ་ལས་ བྱིན་རླབས་ཐོབ་ཨིན་ཟེར་ ག་ར་གིས་ཤེས།

⁸ བླམ་དེ་ཚུ་ ད་རེས་ཡོད་ ནངས་པ་ཤི་མི་ཨིན་རུང་ བརྒྱ་ལས་བཅུ་ཆ་ལེནམ་ཨིན་མས་ དེ་འབདཝ་ད་ ཨབ་ར་ཧམ་ལས་ བརྒྱ་ལས་བཅུ་ཆ་ལེན་མིའི་ མཱེལ་ཀི་ཟེ་དེག་དེ་ གསུང་རབ་ནང་གསུངས་དོཝ་བཟུམ་སྦེ་རང་ ཁོ་དུས་རྟག་བུ་གསོན་པོ་སྦེ་བཞུགས་ཡོད།

⁹ ལ་ལུ་གིས་ བརྒྱ་ལས་བཅུ་ཆ་བསྡུ་མི་ ལེ་ཝི་གིས་ཡང་ ཨབ་ར་ཧམ་ལས་རྒྱུད་དེ་ མཱེལ་ཀི་ཟེ་དེག་ལུ་ བརྒྱ་ལས་བཅུ་ཆ་ཕུལ་ནུག་ཟེར་ཡང་སླབ་འོང་།

¹⁰ ག་ཅི་སྨོ་ཟེར་བ་ཅིན་ མཱེལ་ཀི་ཟེ་དེག་ ཨབ་ར་ཧམ་དང་མཇལཝ་ད་ ལེ་ཝི་དེ་ ཁོ་རའི་ཕ་བརྒྱུད་ ཨབ་ར་ཧམ་གྱི་ཤ་ལུས་ནང་ར་ མ་སྐྱེ་བར་ཡོདཔ་ཨིན།།

ཡེ་ཤུ་དང་ མཱེལ་ཀི་ཟེ་དེག་གཉིས་ཀྱི་ཁྱད་པར་གྱི་སྐོར།

¹¹ ད་ ལེ་ཝི་གི་བླ་མའི་ཆོས་ལུགས་དང་འཁྲིལ་ཏེ་ མི་ཚུ་ལུ་བཀའ་ཁྲིམས་དེ་གནང་ནུག་ དེ་གིས་འབད་ ཁོང་གིས་མི་ཚུ་ལུ་ཡང་དག་པ་བཟོ་ཚུགས་པ་ཅིན་ ཨ་རཱོན་གྱི་རིམ་བརྒྱུད་ལས་མེན་པར་ མཱེལ་ཀི་ཟེ་དེག་གི་རིམ་བརྒྱུད་ལས་སྦེ་ བླམ་སོ་སོ་གཅིག་ ག་ཅི་འབད་དགོཔ་སྨོ།

¹² ད་བླ་མའི་ཆོས་ལུགས་སོར་དགོ་པ་ཅིན་ བཀའ་ཁྲིམས་དེ་ཡང་སོར་དགོཔ་ཨིན་མས།

¹³ ག་ཅི་སྨོ་ཟེར་བ་ཅིན་ ང་བཅས་ཀྱིས་སླབ་མིའི་བླམ་དེ་ མི་རིགས་སོ་སོ་ལས་ཨིནམ་མ་ཚད་ ཁོ་གི་མི་རིགས་ཀྱི་གྲལ་ལས་ ག་གིས་ཡང་མཆོད་ཁྲིའི་ཞབས་ཏོག་མ་ཞུཝ་ཨིན་མས།

¹⁴ ག་ཅི་སྨོ་ཟེར་བ་ཅིན་ ང་བཅས་ཀྱི་གཙོ་བོ་དེ་ ཡུ་ད་པའི་རིགས་བརྒྱུད་ལས་སྦེ་ འཁྲུངས་འཁྲུངསམ་ཨིནམ་ང་བཅས་ཀྱིས་ཤེས་ ཨ་ནི་རིགས་བརྒྱུད་ཀྱིས་ མཆོད་ཁང་ནང་བླ་མའི་ལཱ་འགན་གྱི་སྐོར་ལས་ མོ་སཱེས་ཀྱིས་ཡང་ ག་ནི་ཡང་གསུངས་གསུངསམ་མིན་འདུག

¹⁵ དེ་མ་ཚད་ མཱེལ་ཀི་ཟེ་དེག་ཅོག་འཐདཔ་ གཙོ་བོ་དེ་ བླམ་གཞན་སྦེ་འབྱུངམ་ད་ བླ་མའི་ཆོས་ལུགས་སོར་དགོ་ཟེར་ ང་བཅས་ཀྱིས་ཐད་རི་བ་རི་ཤེས།

¹⁶ ཁོ་ལུ་ ལེ་ཝི་གི་རིགས་བརྒྱུད་དང་འཁྲིལ་ཏེ་ བླམ་གྱི་འགན་ཁུར་གནང་གནངམ་མེན་པར་ དུས་རྒྱུན་དུ་གསོན་པོ་སྦེ་བཞུགས་མི་ ཁོ་རའི་སྐུ་ཚེ་གི་དབང་ཤུགས་ཀྱི་ཐོག་ལས་ བླམ་སྦེ་བྱུང་ཡི།

¹⁷ གསུང་རབ་ནང་ལུ་ཁོ་གི་སྐོར་ལས། མཱེལ་ཀི་ཟེ་དེག་གི་རིམ་བརྒྱུད་དང་བསྟུན་ཏེ་ ཁྱོད་དུས་རྒྱུན་གྱི་བླམ་ཨིན་ཟེར་ གསུངས་ནུག

¹⁸ གཅིག་ལས་འབད་བ་ཅིན་ བཀའ་ཁྲིམས་རྙིངམ་དེ་ ཤུགས་དང་ཕན་པ་མེདཔ་ལས་བརྟེན་ བཀོག་བཞག་ནུག

¹⁹ ག་ཅི་སྨོ་ཟེར་བ་ཅིན་ བཀའ་ཁྲིམས་ཀྱིས་ག་ཅི་ལུ་ཡང་ ཡང་དག་པ་བཟོ་མ་ཚུགས་ ད་དེ་ལས་ཕར་ བཀའ་ཁྲིམས་རྙིངམ་ལས་ཡང་དྲགཔ་སྦེ་ ང་བཅས་དཀོན་མཆོག་གི་སྦོ་ལོགས་ཁར་ འཁྱིད་འོང་ཚུགས་པའི་རེ་བ་གསརཔ་གཅིག་ ང་བཅས་ལུ་ངོ་སྤྲོད་མཛད་གནང་ཡི།

²⁰ དཀོན་མཆོག་གིས་དབུ་མནའ་མ་བཞེས་པར་ ཨ་རཱོན་གྱི་བུ་བརྒྱུད་ཚུ་ རང་བླམ་ལུ་འགྱུར་ནུག་ དེ་འབདཝ་ད་ རེ་བ་གསརཔ་དེ་ དཀོན་མཆོག་གིས་དབུ་མནའ་བཞེས་མི་དང་འཁྲིལ་ཏེ་ བླམ་སྦེ་བྱུང་ནུག

²¹ ག་ཅི་སྨོ་ཟེར་བ་ཅིན་ རེ་བ་གསརཔ་ཨིན་མིའི་ཡེ་ཤུ་རྐྱངམ་གཅིག་ དབུ་མནའ་དེ་སྦེ་བཞེས་ནུག གཙོ་བོ་གིས་དབུ་མནའ་བཞེས་ཏེ་ཡོད་མི་དེ་ དུས་ནམ་ཡང་མི་འགྱུར་ ཁྱོད་དུས་རྒྱུན་གྱི་བླམ་ཨིན་ཟེར་ དཀོན་མཆོག་གིས་གསུངས་ནུག

²² དེ་སྦེ་དབུ་མནའ་བཞེས་མི་དེ་གིས་ ཧེ་མ་བླམ་དང་གཅིག་ཁར་བཟོ་མིའི་ཞལ་འཆེས་ཀྱི་ཚབ་མ་ལུ་ ཡེ་ཤུ་ཞལ་འཆེས་གསརཔ་གི་ཁས་ལེན་མི་སྦེ་བྱུང་ནུག

²³ བླམ་དེ་ཚུ་ གཅིག་གི་ཤུལ་ལས་གཅིག་ཤིཝ་ལས་ ཁོང་འཕྲོ་མཐུད་དེ་བླམ་འབད་མ་ཚུགསཔ་ལས་བརྟེན་ཏེ་ ཁོང་ལུ་བླམ་ལེ་ཤ་དགོཔ་མས།

²⁴ དེ་འབདཝ་ད་ཡེ་ཤུ་དེ་ དུས་རྒྱུན་དུ་གསོན་པོ་སྦེ་བཞུགས་ཡོདཔ་ལས་བརྟེན་ཏེ་ ཁོ་དུས་རྟག་པར་གྱི་བླམ་ཨིན།

²⁵ འདི་གིས་འབད་ ཁོ་ལས་རྒྱུད་དེ་ དཀོན་མཆོག་གི་སྐུ་མདུན་ལུ་བཅར་མི་ཚུ་ལུ་ ཁོ་གིས་དུས་རྟག་བུ་གི་དོན་ལུ་སྐྱབས་མཛད་ཚུགས་ ག་ཅི་སྨོ་ཟེར་བ་ཅིན་ ཁོ་རྟག་བུ་རང་གསོན་པོ་སྦེ་བཞུགས་ཏེ་ ཁོང་གི་དོན་ལས་དཀོན་མཆོག་ལུ་གསོལཝ་བཏབ་ཨིན།

²⁶ ང་བཅས་ལུ་དགོ་མི་མཁན་ཆེན་ ཨ་ནི་བཟུམ་སྦེ་རང་ཨིན་ ཁོ་མཆོག་ཏུ་གྱུར་པ་དང་ ཉེས་པ་མེད་མི་ སྐྱོན་ག་ནི་ཡང་མེདཔ་ སྡིག་ཅན་ཚུ་དང་འབྲེལ་བ་མེད་མི་ ཞིང་ཁམས་ལས་ཡང་ མཐོཝ་ཡོད་མི་གཅིག་ཨིན།

²⁷ མཁན་ཆེན་གཞན་ཚུ་གིས་ཕུལ་དོཝ་བཟུམ་སྦེ་ འགོ་དང་པ་ རང་གི་སྡིག་པའི་དོན་ལུ་དང་ གཉིས་པ་ མི་ཚུ་གི་སྡིག་པའི་དོན་ལུ་ ཉིནམ་རེ་འཆར་ དམར་མཆོད་ཕུལ་མ་དགོཔ་སྦེ་ ཡེ་ཤུ་གིས་ ཁོ་རའི་སྐུ་སྲོག་འདི་ ཚར་གཅིག་གུ་ དམར་མཆོད་ཕུལ་ཚར་ནུག

²⁸ ད་ བཀའ་ཁྲིམས་ཀྱིས་ ཤུགས་མེད་པའི་མི་ཚུ་ལུ་ བླམ་གྱི་འགན་ཁུར་བཀལཝ་ཨིན་མས་ དེ་འབདཝ་ད་ བཀའ་ཁྲིམས་ཀྱི་ཤུལ་ལས་དབུ་མནའ་གི་བཀའ་དང་འཁྲིལ་ཏེ་ དུས་རྒྱུན་གྱི་དོན་ལུ་ཡང་དག་པ་སྦེ་བཞུགས་མི་ དཀོན་མཆོག་གི་སྲས་འདི་ལུ་ མཁན་ཆེན་གྱི་འགན་ཁུར་གནང་ནུག།